Utshovঅধ্যায় 5
5.1
সংজয় উবাচ
রথস্থং পুরুষব্যাঘ্রং দৃষ্ট্বা কর্ণমবস্থিতম্
হৃষ্টো দুর্যোধনো রাজন্নিদং বচনমব্রবীৎ
5.2
সনাথমিদমত্যর্থং ভবতা পালিতং বলম্
মন্যে কিং তু সমর্থং যদ্ধিতং তত্সংপ্রধার্যতাম্
5.3
কর্ণ উবাচ
ব্রূহি তত্পুরুষব্যাঘ্র ত্বং হি প্রাজ্ঞতমো নৃপ
যথা চার্থপতিঃ কৃত্যং পশ্যতে ন তথেতরঃ
5.4
তে স্ম সর্বে তব বচঃ শ্রোতুকামা নরেশ্বর
নান্যায্যং হি ভবান্বাক্যং ব্রূয়াদিতি মতির্মম
5.5
দুর্যোধন উবাচ
ভীষ্মঃ সেনাপ্রণেতাসীদ্বয়সা বিক্রমেণ চ
শ্রুতেন চ সুসংপন্নঃ সর্বৈর্যোধগুণৈস্তথা
5.6
তেনাতিয়শসা কর্ণ ঘ্নতা শত্রুগণান্মম
সুয়ুদ্ধেন দশাহানি পালিতাঃ স্মো মহাত্মনা
5.7
তস্মিন্নসুকরং কর্ম কৃতবত্যাস্থিতে দিবম্
কং নু সেনাপ্রণেতারং মন্যসে তদনন্তরম্
5.8
ন ঋতে নায়কং সেনা মুহূর্তমপি তিষ্ঠতি
আহবেষ্বাহবশ্রেষ্ঠ নেতৃহীনেব নৌর্জলে
5.9
যথা হ্যকর্ণধারা নৌ রথশ্চাসারথির্যথা
দ্রবেদ্যথেষ্টং তদ্বত্স্যাদৃতে সেনাপতিং বলম্
5.10
স ভবান্বীক্ষ্য সর্বেষু মামকেষু মহাত্মসু
পশ্য সেনাপতিং যুক্তমনু শাংতনবাদিহ
5.11
যং হি সেনাপ্রণেতারং ভবান্বক্ষ্যতি সংয়ুগে
তং বয়ং সহিতাঃ সর্বে প্রকরিষ্যাম মারিষ
5.12
কর্ণ উবাচ
সর্ব এব মহাত্মান ইমে পুরুষসত্তমাঃ
সেনাপতিত্বমর্হন্তি নাত্র কার্যা বিচারণা
5.13
কুলসংহননজ্ঞানৈর্বলবিক্রমবুদ্ধিভিঃ
যুক্তাঃ কৃতজ্ঞা হ্রীমন্ত আহবেষ্বনিবর্তিনঃ
5.14
যুগপন্ন তু তে শক্যাঃ কর্তুং সর্বে পুরঃসরাঃ
এক এবাত্র কর্তব্যো যস্মিন্বৈশেষিকা গুণাঃ
5.15
অন্যোন্যস্পর্ধিনাং তেষাং যদ্যেকং সত্করিষ্যসি
শেষা বিমনসো ব্যক্তং ন যোত্স্যন্তে হি ভারত
5.16
অয়ং তু সর্বয়োধানামাচার্যঃ স্থবিরো গুরুঃ
যুক্তঃ সেনাপতিঃ কর্তুং দ্রোণঃ শস্ত্রভৃতাং বরঃ
5.17
কো হি তিষ্ঠতি দুর্ধর্ষে দ্রোণে ব্রহ্মবিদুত্তমে
সেনাপতিঃ স্যাদন্যোঽস্মাচ্ছুক্রাঙ্গিরসদর্শনাৎ
5.18
ন চ স হ্যস্তি তে যোধঃ সর্বরাজসু ভারত
যো দ্রোণং সমরে যান্তং নানুয়াস্যতি সংয়ুগে
5.19
এষ সেনাপ্রণেতৄণামেষ শস্ত্রভৃতামপি
এষ বুদ্ধিমতাং চৈব শ্রেষ্ঠো রাজন্গুরুশ্চ তে
5.20
এবং দুর্যোধনাচার্যমাশু সেনাপতিং কুরু
জিগীষন্তোঽসুরান্সংখ্যে কার্ত্তিকেয়মিবামরাঃ
5.21
সংজয় উবাচ
কর্ণস্য বচনং শ্রুত্বা রাজা দুর্যোধনস্তদা
সেনামধ্যগতং দ্রোণমিদং বচনমব্রবীৎ
5.22
বর্ণশ্রৈষ্ঠ্যাত্কুলোত্পত্ত্যা শ্রুতেন বয়সা ধিয়া
বীর্যাদ্দাক্ষ্যাদধৃষ্যত্বাদর্থজ্ঞানান্নয়াজ্জয়াৎ
5.23
তপসা চ কৃতজ্ঞত্বাদ্বৃদ্ধঃ সর্বগুণৈরপি
যুক্তো ভবত্সমো গোপ্তা রাজ্ঞামন্যো ন বিদ্যতে
5.24
স ভবান্পাতু নঃ সর্বান্বিবুধানিব বাসবঃ
ভবন্নেত্রাঃ পরাঞ্জেতুমিচ্ছামো দ্বিজসত্তম
5.25
রুদ্রাণামিব কাপালী বসূনামিব পাবকঃ
কুবের ইব যক্ষাণাং মরুতামিব বাসবঃ
5.26
বসিষ্ঠ ইব বিপ্রাণাং তেজসামিব ভাস্করঃ
পিতৄণামিব ধর্মোঽথ আদিত্যানামিবাম্বুরাট্
5.27
নক্ষত্রাণামিব শশী দিতিজানামিবোশনাঃ
শ্রেষ্ঠঃ সেনাপ্রণেতৄণাং স নঃ সেনাপতির্ভব
5.28
অক্ষৌহিণ্যো দশৈকা চ বশগাঃ সন্তু তেঽনঘ
তাভিঃ শত্রূন্প্রতিব্যূহ্য জহীন্দ্রো দানবানিব
5.29
প্রয়াতু নো ভবানগ্রে দেবানামিব পাবকিঃ
অনুয়াস্যামহে ত্বাজৌ সৌরভেয়া ইবর্ষভম্
5.30
উগ্রধন্বা মহেষ্বাসো দিব্যং বিস্ফারয়ন্ধনুঃ
অগ্রে ভবন্তং দৃষ্ট্বা নো নার্জুনঃ প্রসহিষ্যতে
5.31
ধ্রুবং যুধিষ্ঠিরং সংখ্যে সানুবন্ধং সবান্ধবম্
জেষ্যামি পুরুষব্যাঘ্র ভবান্সেনাপতির্যদি
5.32
এবমুক্তে ততো দ্রোণে জয়েত্যূচুর্নরাধিপাঃ
সিংহনাদেন মহতা হর্ষয়ন্তস্তবাত্মজম্
5.33
সৈনিকাশ্চ মুদা যুক্তা বর্ধয়ন্তি দ্বিজোত্তমম্
দুর্যোধনং পুরস্কৃত্য প্রার্থয়ন্তো মহদ্যশঃ
5.34
দ্রোণ উবাচ
বেদং ষডঙ্গং বেদাহমর্থবিদ্যাং চ মানবীম্
ত্রৈয়ম্বকমথেষ্বস্ত্রমস্ত্রাণি বিবিধানি চ
5.35
যে চাপ্যুক্তা ময়ি গুণা ভবদ্ভির্জয়কাঙ্ক্ষিভিঃ
চিকীর্ষুস্তানহং সত্যান্যোধয়িষ্যামি পাণ্ডবান্
5.36
সংজয় উবাচ
স এবমভ্যনুজ্ঞাতশ্চক্রে সেনাপতিং ততঃ
দ্রোণং তব সুতো রাজন্বিধিদৃষ্টেন কর্মণা
5.37
অথাভিষিষিচুর্দ্রোণং দুর্যোধনমুখা নৃপাঃ
সেনাপত্যে যথা স্কন্দং পুরা শক্রমুখাঃ সুরাঃ
5.38
ততো বাদিত্রঘোষেণ সহ পুংসাং মহাস্বনৈঃ
প্রাদুরাসীত্কৃতে দ্রোণে হর্ষঃ সেনাপতৌ তদা
5.39
ততঃ পুণ্যাহঘোষেণ স্বস্তিবাদস্বনেন চ
সংস্তবৈর্গীতশব্দৈশ্চ সূতমাগধবন্দিনাম্
5.40
জয়শব্দৈর্দ্বিজাগ্র্যাণাং সুভগানর্তিতৈস্তথা
সত্কৃত্য বিধিবদ্দ্রোণং জিতান্মন্যন্ত পাণ্ডবান্