অধ্যায় 4

4.1

সংজয় উবাচ
তস্য লালপ্যতঃ শ্রুত্বা বৃদ্ধঃ কুরুপিতামহঃ
দেশকালোচিতং বাক্যমব্রবীত্প্রীতমানসঃ

সমুদ্র ইব সিন্ধূনাং জ্যোতিষামিব ভাস্করঃ
সত্যস্য চ যথা সন্তো বীজানামিব চোর্বরা

পর্জন্য ইব ভূতানাং প্রতিষ্ঠা সুহৃদাং ভব
বান্ধবাস্ত্বানুজীবন্তু সহস্রাক্ষমিবামরাঃ

স্ববাহুবলবীর্যেণ ধার্তরাষ্ট্রপ্রিয়ৈষিণা
কর্ণ রাজপুরং গত্বা কাম্বোজা নিহতাস্ত্বয়া

গিরিব্রজগতাশ্চাপি নগ্নজিত্প্রমুখা নৃপাঃ
অম্বষ্ঠাশ্চ বিদেহাশ্চ গান্ধারাশ্চ জিতাস্ত্বয়া

হিমবদ্দুর্গনিলয়াঃ কিরাতা রণকর্কশাঃ
দুর্যোধনস্য বশগাঃ কৃতাঃ কর্ণ ত্বয়া পুরা

তত্র তত্র চ সংগ্রামে দুর্যোধনহিতৈষিণা
বহবশ্চ জিতা বীরাস্ত্বয়া কর্ণ মহৌজসা

যথা দুর্যোধনস্তাত সজ্ঞাতিকুলবান্ধবঃ
তথা ত্বমপি সর্বেষাং কৌরবাণাং গতির্ভব

শিবেনাভিবদামি ত্বাং গচ্ছ যুধ্যস্ব শত্রুভিঃ
অনুশাধি কুরূন্সংখ্যে ধত্স্ব দুর্যোধনে জয়ম্

ভবান্পৌত্রসমোঽস্মাকং যথা দুর্যোধনস্তথা
তবাপি ধর্মতঃ সর্বে যথা তস্য বয়ং তথা

যৌনাত্সংবন্ধকাল্লোকে বিশিষ্টং সংগতং সতাম্
সদ্ভিঃ সহ নরশ্রেষ্ঠ প্রবদন্তি মনীষিণঃ

স সত্যসংগরো ভূত্বা মমেদমিতি নিশ্চিতম্
কুরূণাং পালয় বলং যথা দুর্যোধনস্তথা

ইতি শ্রুত্বা বচঃ সোঽথ চরণাবভিবাদ্য চ
যয়ৌ বৈকর্তনঃ কর্ণস্তূর্ণমায়োধনং প্রতি

সোঽভিবীক্ষ্য নরৌঘাণাং স্থানমপ্রতিমং মহৎ
ব্যূঢপ্রহরণোরস্কং সৈন্যং তত্সমবৃংহয়ৎ

কর্ণং দৃষ্ট্বা মহেষ্বাসং যুদ্ধায় সমবস্থিতম্
ক্ষ্বেডিতাস্ফোটিতরবৈঃ সিংহনাদরবৈরপি
ধনুঃশব্দৈশ্চ বিবিধৈঃ কুরবঃ সমপূজয়ন্