অধ্যায় 3

3.1

সংজয় উবাচ
শরতল্পে মহাত্মানং শয়ানমমিতৌজসম্
মহাবাতসমূহেন সমুদ্রমিব শোষিতম্

দিব্যৈরস্ত্রৈর্মহেষ্বাসং পাতিতং সব্যসাচিনা
জয়াশাং তব পুত্রাণাং সংভগ্নাং শর্ম বর্ম চ

অপারাণামিব দ্বীপমগাধে গাধমিচ্ছতাম্
স্রোতসা যামুনেনেব শরৌঘেণ পরিপ্লুতম্

মহান্তমিব মৈনাকমসহ্যং ভুবি পাতিতম্
নভশ্চ্যুতমিবাদিত্যং পতিতং ধরণীতলে

শতক্রতোরিবাচিন্ত্যং পুরা বৃত্রেণ নির্জয়ম্
মোহনং সর্বসৈন্যস্য যুধি ভীষ্মস্য পাতনম্

ককুদং সর্বসৈন্যানাং লক্ষ্ম সর্বধনুষ্মতাম্
ধনংজয়শরব্যাপ্তং পিতরং তে মহাব্রতম্

তং বীরশয়নে বীরং শয়ানং পুরুষর্ষভম্
ভীষ্মমাধিরথির্দৃষ্ট্বা ভরতানামমধ্যমম্

অবতীর্য রথাদার্তো বাষ্পব্যাকুলিতাক্ষরম্
অভিবাদ্যাঞ্জলিং বদ্ধ্বা বন্দমানোঽভ্যভাষত

কর্ণোঽহমস্মি ভদ্রং তে অদ্য মা বদ ভারত
পুণ্যয়া ক্ষেময়া বাচা চক্ষুষা চাবলোকয়

ন নূনং সুকৃতস্যেহ ফলং কশ্চিত্সমশ্নুতে
যত্র ধর্মপরো বৃদ্ধঃ শেতে ভুবি ভবানিহ

কোশসংজননে মন্ত্রে ব্যূহপ্রহরণেষু চ
নাথমন্যং ন পশ্যামি কুরূণাং কুরুসত্তম

বুদ্ধ্যা বিশুদ্ধয়া যুক্তো যঃ কুরূংস্তারয়েদ্ভয়াৎ
যোধাংস্ত্বমপ্লবে হিত্বা পিতৃলোকং গমিষ্যসি

অদ্য প্রভৃতি সংক্রুদ্ধা ব্যাঘ্রা ইব মৃগক্ষয়ম্
পাণ্ডবা ভরতশ্রেষ্ঠ করিষ্যন্তি কুরুক্ষয়ম্

অদ্য গাণ্ডীবঘোষস্য বীর্যজ্ঞাঃ সব্যসাচিনঃ
কুরবঃ সংত্রসিষ্যন্তি বজ্রপাণেরিবাসুরাঃ

অদ্য গাণ্ডীবমুক্তানামশনীনামিব স্বনঃ
ত্রাসয়িষ্যতি সংগ্রামে কুরূনন্যাংশ্চ পার্থিবান্

সমিদ্ধোঽগ্নির্যথা বীর মহাজ্বালো দ্রুমান্দহেৎ
ধার্তরাষ্ট্রান্প্রধক্ষ্যন্তি তথা বাণাঃ কিরীটিনঃ

যেন যেন প্রসরতো বায্বগ্নী সহিতৌ বনে
তেন তেন প্রদহতো ভগবন্তৌ যদিচ্ছতঃ

যাদৃশোঽগ্নিঃ সমিদ্ধো হি তাদৃক্পার্থো ন সংশয়ঃ
যথা বায়ুর্নরব্যাঘ্র তথা কৃষ্ণো ন সংশয়ঃ

নদতঃ পাঞ্চজন্যস্য রসতো গাণ্ডিবস্য চ
শ্রুত্বা সর্বাণি সৈন্যানি ত্রাসং যাস্যন্তি ভারত

কপিধ্বজস্য চোত্পাতে রথস্যামিত্রকর্শিনঃ
শব্দং সোঢুং ন শক্ষ্যন্তি ত্বামৃতে বীর পার্থিবাঃ

কো হ্যর্জুনং রণে যোদ্ধুং ত্বদন্যঃ পার্থিবোঽর্হতি
যস্য দিব্যানি কর্মাণি প্রবদন্তি মনীষিণঃ

অমানুষশ্চ সংগ্রামস্ত্র্যম্বকেন চ ধীমতঃ
তস্মাচ্চৈব বরঃ প্রাপ্তো দুষ্প্রাপশ্চাকৃতাত্মভিঃ

তমদ্যাহং পাণ্ডবং যুদ্ধশৌণ্ড;মমৃষ্যমাণো ভবতানুশিষ্টঃ
আশীবিষং দৃষ্টিহরং সুঘোর;মিয়াং পুরস্কৃত্য বধং জয়ং বা