Utshovঅধ্যায় 2
2.1
সংজয় উবাচ
হতং ভীষ্মমাধিরথির্বিদিত্বা; ভিন্নাং নাবমিবাত্যগাধে কুরূণাম্
সোদর্যবদ্ব্যসনাত্সূতপুত্রঃ; সংতারয়িষ্যংস্তব পুত্রস্য সেনাম্
2.2
শ্রুত্বা তু কর্ণঃ পুরুষেন্দ্রমচ্যুতং; নিপাতিতং শাংতনবং মহারথম্
অথোপায়াত্তূর্ণমমিত্রকর্শনো; ধনুর্ধরাণাং প্রবরস্তদা বৃষঃ
2.3
হতে তু ভীষ্মে রথসত্তমে পরৈ;র্নিমজ্জতীং নাবমিবার্ণবে কুরূন্
পিতেব পুত্রাংস্ত্বরিতোঽভ্যয়াত্ততঃ; সংতারয়িষ্যংস্তব পুত্রস্য সেনাম্
2.4
কর্ণ উবাচ
যস্মিন্ধৃতির্বুদ্ধিপরাক্রমৌজো; দমঃ সত্যং বীরগুণাশ্চ সর্বে
অস্ত্রাণি দিব্যান্যথ সংনতির্হ্রীঃ; প্রিয়া চ বাগনপায়ীনি ভীষ্মে
2.5
ব্রহ্মদ্বিষঘ্নে সততং কৃতজ্ঞে; সনাতনং চন্দ্রমসীব লক্ষ্ম
স চেত্প্রশান্তঃ পরবীরহন্তা; মন্যে হতানেব হি সর্বয়োধান্
2.6
নেহ ধ্রুবং কিংচন জাতু বিদ্যতে; অস্মিঁল্লোকে কর্মণোঽনিত্যয়োগাৎ
সূর্যোদয়ে কো হি বিমুক্তসংশয়ো; ভাবং কুর্বীতাদ্য মহাব্রতে হতে
2.7
বসুপ্রভাবে বসুবীর্যসংভবে; গতে বসূনেব বসুংধরাধিপে
বসূনি পুত্রাংশ্চ বসুংধরাং তথা; কুরূংশ্চ শোচধ্বমিমাং চ বাহিনীম্
2.8
সংজয় উবাচ
মহাপ্রভাবে বরদে নিপাতিতে; লোকশ্রেষ্ঠে শাংতনবে মহৌজসি
পরাজিতেষু ভরতেষু দুর্মনাঃ; কর্ণো ভৃশং ন্যশ্বসদশ্রু বর্তয়ন্
2.9
ইদং তু রাধেয়বচো নিশম্য তে; সুতাশ্চ রাজংস্তব সৈনিকাশ্চ হ
পরস্পরং চুক্রুশুরার্তিজং ভৃশং; তদাশ্রু নেত্রৈর্মুমুচুর্হি শব্দবৎ
2.10
প্রবর্তমানে তু পুনর্মহাহবে; বিগাহ্যমানাসু চমূষু পার্থিবৈঃ
অথাব্রবীদ্ধর্ষকরং বচস্তদা; রথর্ষভান্সর্বমহারথর্ষভঃ
2.11
কর্ণ উবাচ
জগত্যনিত্যে সততং প্রধাবতি; প্রচিন্তয়ন্নস্থিরমদ্য লক্ষয়ে
ভবত্সু তিষ্ঠত্স্বিহ পাতিতো রণে; গিরিপ্রকাশঃ কুরুপুংগবঃ কথম্
2.12
নিপাতিতে শাংতনবে মহারথে; দিবাকরে ভূতলমাস্থিতে যথা
ন পার্থিবাঃ সোঢুমলং ধনংজয়ং; গিরিপ্রবোঢারমিবানিলং দ্রুমাঃ
2.13
হতপ্রধানং ত্বিদমার্তরূপং; পরৈর্হতোত্সাহমনাথমদ্য বৈ
ময়া কুরূণাং পরিপাল্যমাহবে; বলং যথা তেন মহাত্মনা তথা
2.14
সমাহিতং চাত্মনি ভারমীদৃশং; জগত্তথানিত্যমিদং চ লক্ষয়ে
নিপাতিতং চাহবশৌণ্ডমাহবে; কথং নু কুর্যামহমাহবে ভয়ম্
2.15
অহং তু তান্কুরুবৃষভানজিহ্মগৈঃ; প্রবেরয়ন্যমসদনং রণে চরন্
যশঃ পরং জগতি বিভাব্য বর্তিতা; পরৈর্হতো যুধি শয়িতাথ বা পুনঃ
2.16
যুধিষ্ঠিরো ধৃতিমতিধর্মতত্ত্ববা;ন্বৃকোদরো গজশততুল্যবিক্রমঃ
তথার্জুনস্ত্রিদশবরাত্মজো যতো; ন তদ্বলং সুজয়মথামরৈরপি
2.17
যমৌ রণে যত্র যমোপমৌ বলে; সসাত্যকির্যত্র চ দেবকীসুতঃ
ন তদ্বলং কাপুরুষোঽভ্যুপেয়িবা;ন্নিবর্ততে মৃত্যুমুখাদিবাসকৃৎ
2.18
তপোঽভ্যুদীর্ণং তপসৈব গম্যতে; বলং বলেনাপি তথা মনস্বিভিঃ
মনশ্চ মে শত্রুনিবারণে ধ্রুবং; স্বরক্ষণে চাচলবদ্ব্যবস্থিতম্
2.19
এবং চৈষাং বুধ্যমানঃ প্রভাবং; গত্বৈবাহং তাঞ্জয়াম্যদ্য সূত
মিত্রদ্রোহো মর্ষণীয়ো ন মেঽয়ং; ভগ্নে সৈন্যে যঃ সহায়ঃ স মিত্রম্
2.20
কর্তাস্ম্যেতত্সত্পুরুষার্যকর্ম; ত্যক্ত্বা প্রাণাননুয়াস্যামি ভীষ্মম্
সর্বান্সংখ্যে শত্রুসংঘান্হনিষ্যে; হতস্তৈর্বা বীরলোকং গমিষ্যে
2.21
সংপ্রাক্রুষ্টে রুদিতস্ত্রীকুমারে; পরাভূতে পৌরুষে ধার্তরাষ্ট্রে
ময়া কৃত্যমিতি জানামি সূত; তস্মাচ্ছত্রূন্ধার্তরাষ্ট্রস্য জেষ্যে
2.22
কুরূন্রক্ষন্পাণ্ডুপুত্রাঞ্জিঘাংসং;স্ত্যক্ত্বা প্রাণান্ঘোররূপে রণেঽস্মিন্
সর্বান্সংখ্যে শত্রুসংঘান্নিহত্য; দাস্যাম্যহং ধার্তরাষ্ট্রায় রাজ্যম্
2.23
নিবধ্যতাং মে কবচং বিচিত্রং; হৈমং শুভ্রং মণিরত্নাবভাসি
শিরস্ত্রাণং চার্কসমানভাসং; ধনুঃ শরাংশ্চাপি বিষাহিকল্পান্
2.24
উপাসঙ্গান্ষোডশ যোজয়ন্তু; ধনূংষি দিব্যানি তথাহরন্তু
অসীংশ্চ শক্তীশ্চ গদাশ্চ গুর্বীঃ; শঙ্খং চ জাম্বূনদচিত্রভাসম্
2.25
এতাং রৌক্মীং নাগকক্ষ্যাং চ জৈত্রীং; জৈত্রং চ মে ধ্বজমিন্দীবরাভম্
শ্লক্ষ্ণৈর্বস্ত্রৈর্বিপ্রমৃজ্যানয়স্ব; চিত্রাং মালাং চাত্র বদ্ধ্বা সজালাম্
2.26
অশ্বানগ্র্যান্পাণ্ডুরাভ্রপ্রকাশা;ন্পুষ্টান্স্নাতান্মন্ত্রপূতাভিরদ্ভিঃ
তপ্তৈর্ভাণ্ডৈঃ কাঞ্চনৈরভ্যুপেতা;ঞ্শীঘ্রাঞ্শীঘ্রং সূতপুত্রানয়স্ব
2.27
রথং চাগ্র্যং হেমজালাবনদ্ধং; রত্নৈশ্চিত্রং চন্দ্রসূর্যপ্রকাশৈঃ
দ্রব্যৈর্যুক্তং সংপ্রহারোপপন্নৈ;র্বাহৈর্যুক্তং তূর্ণমাবর্তয়স্ব
2.28
চিত্রাণি চাপানি চ বেগবন্তি; জ্যাশ্চোত্তমাঃ সংহননোপপন্নাঃ
তূণাংশ্চ পূর্ণান্মহতঃ শরাণা;মাসজ্য গাত্রাবরণানি চৈব
2.29
প্রায়াত্রিকং চানয়তাশু সর্বং; কন্যাঃ পূর্ণং বীরকাংস্যং চ হৈমম্
আনীয় মালামববধ্য চাঙ্গে; প্রবাদয়ন্ত্বাশু জয়ায় ভেরীঃ
2.30
প্রয়াহি সূতাশু যতঃ কিরীটী; বৃকোদরো ধর্মসুতো যমৌ চ
তান্বা হনিষ্যামি সমেত্য সংখ্যে; ভীষ্মায় বৈষ্যামি হতো দ্বিষদ্ভিঃ
2.31
যস্মিন্রাজা সত্যধৃতির্যুধিষ্ঠিরঃ; সমাস্থিতো ভীমসেনার্জুনৌ চ
বাসুদেবঃ সাত্যকিঃ সৃঞ্জয়াশ্চ; মন্যে বলং তদজয্যং মহীপৈঃ
2.32
তং চেন্মৃত্যুঃ সর্বহরোঽভিরক্ষে;ত্সদাপ্রমত্তঃ সমরে কিরীটিনম্
তথাপি হন্তাস্মি সমেত্য সংখ্যে; যাস্যামি বা ভীষ্মপথা যমায়
2.33
ন ত্বেবাহং ন গমিষ্যামি তেষাং; মধ্যে শূরাণাং তত্তথাহং ব্রবীমি
মিত্রদ্রুহো দুর্বলভক্তয়ো যে; পাপাত্মানো ন মমৈতে সহায়াঃ
2.34
সংজয় উবাচ
স সিদ্ধিমন্তং রথমুত্তমং দৃঢং; সকূবরং হেমপরিষ্কৃতং শুভম্
পতাকিনং বাতজবৈর্হয়োত্তমৈ;র্যুক্তং সমাস্থায় যয়ৌ জয়ায়
2.35
সংপূজ্যমানঃ কুরুভির্মহাত্মা; রথর্ষভঃ পাণ্ডুরবাজিয়াতা
যয়ৌ তদায়োধনমুগ্রধন্বা; যত্রাবসানং ভরতর্ষভস্য
2.36
বরূথিনা মহতা সধ্বজেন; সুবর্ণমুক্তামণিবজ্রশালিনা
সদশ্বয়ুক্তেন রথেন কর্ণো; মেঘস্বনেনার্ক ইবামিতৌজাঃ
2.37
হুতাশনাভঃ স হুতাশনপ্রভে; শুভঃ শুভে বৈ স্বরথে ধনুর্ধরঃ
স্থিতো ররাজাধিরথির্মহারথঃ; স্বয়ং বিমানে সুররাডিব স্থিতঃ