Utshovঅধ্যায় 1
1.1
জনমেজয় উবাচ
তমপ্রতিমসত্ত্বৌজোবলবীর্যপরাক্রমম্
হতং দেবব্রতং শ্রুত্বা পাঞ্চাল্যেন শিখণ্ডিনা
1.2
ধৃতরাষ্ট্রস্তদা রাজা শোকব্যাকুলচেতনঃ
কিমচেষ্টত বিপ্রর্ষে হতে পিতরি বীর্যবান্
1.3
তস্য পুত্রো হি ভগবন্ভীষ্মদ্রোণমুখৈ রথৈঃ
পরাজিত্য মহেষ্বাসান্পাণ্ডবান্রাজ্যমিচ্ছতি
1.4
তস্মিন্হতে তু ভগবন্কেতৌ সর্বধনুষ্মতাম্
যদচেষ্টত কৌরব্যস্তন্মে ব্রূহি দ্বিজোত্তম
1.5
বৈশংপায়ন উবাচ
নিহতং পিতরং শ্রুত্বা ধৃতরাষ্ট্রো জনাধিপঃ
লেভে ন শান্তিং কৌরব্যশ্চিন্তাশোকপরায়ণঃ
1.6
তস্য চিন্তয়তো দুঃখমনিশং পার্থিবস্য তৎ
আজগাম বিশুদ্ধাত্মা পুনর্গাবল্গণিস্তদা
1.7
শিবিরাত্সংজয়ং প্রাপ্তং নিশি নাগাহ্বয়ং পুরম্
আম্বিকেয়ো মহারাজ ধৃতরাষ্ট্রোঽন্বপৃচ্ছত
1.8
শ্রুত্বা ভীষ্মস্য নিধনমপ্রহৃষ্টমনা ভৃশম্
পুত্রাণাং জয়মাকাঙ্ক্ষন্বিললাপাতুরো যথা
1.9
ধৃতরাষ্ট্র উবাচ
সংসাধ্য তু মহাত্মানং ভীষ্মং ভীমপরাক্রমম্
কিমকার্ষুঃ পরং তাত কুরবঃ কালচোদিতাঃ
1.10
তস্মিন্বিনিহতে শূরে দুরাধর্ষে মহৌজসি
কিং নু স্বিত্কুরবোঽকার্ষুর্নিমগ্নাঃ শোকসাগরে
1.11
তদুদীর্ণং মহত্সৈন্যং ত্রৈলোক্যস্যাপি সংজয়
ভয়মুত্পাদয়েত্তীব্রং পাণ্ডবানাং মহাত্মনাম্
1.12
দেবব্রতে তু নিহতে কুরূণামৃষভে তদা
যদকার্ষুর্নৃপতয়স্তন্মমাচক্ষ্ব সংজয়
1.13
সংজয় উবাচ
শৃণু রাজন্নেকমনা বচনং ব্রুবতো মম
যত্তে পুত্রাস্তদাকার্ষুর্হতে দেবব্রতে মৃধে
1.14
নিহতে তু তদা ভীষ্মে রাজন্সত্যপরাক্রমে
তাবকাঃ পাণ্ডবেয়াশ্চ প্রাধ্যায়ন্ত পৃথক্পৃথক্
1.15
বিস্মিতাশ্চ প্রহৃষ্টাশ্চ ক্ষত্রধর্মং নিশাম্য তে
স্বধর্মং নিন্দমানাশ্চ প্রণিপত্য মহাত্মনে
1.16
শয়নং কল্পয়ামাসুর্ভীষ্মায়ামিততেজসে
সোপধানং নরব্যাঘ্র শরৈঃ সংনতপর্বভিঃ
1.17
বিধায় রক্ষাং ভীষ্মায় সমাভাষ্য পরস্পরম্
অনুমান্য চ গাঙ্গেয়ং কৃত্বা চাপি প্রদক্ষিণম্
1.18
ক্রোধসংরক্তনয়নাঃ সমবেক্ষ্য পরস্পরম্
পুনর্যুদ্ধায় নির্জগ্মুঃ ক্ষত্রিয়াঃ কালচোদিতাঃ
1.19
ততস্তূর্যনিনাদৈশ্চ ভেরীণাং চ মহাস্বনৈঃ
তাবকানামনীকানি পরেষাং চাপি নির্যয়ুঃ
1.20
ব্যাবৃত্তেঽহনি রাজেন্দ্র পতিতে জাহ্নবীসুতে
অমর্ষবশমাপন্নাঃ কালোপহতচেতসঃ
1.21
অনাদৃত্য বচঃ পথ্যং গাঙ্গেয়স্য মহাত্মনঃ
নির্যয়ুর্ভরতশ্রেষ্ঠাঃ শস্ত্রাণ্যাদায় সর্বশঃ
1.22
মোহাত্তব সপুত্রস্য বধাচ্ছাংতনবস্য চ
কৌরব্যা মৃত্যুসাদ্ভূতাঃ সহিতাঃ সর্বরাজভিঃ
1.23
অজাবয় ইবাগোপা বনে শ্বাপদসংকুলে
ভৃশমুদ্বিগ্নমনসো হীনা দেবব্রতেন তে
1.24
পতিতে ভরতশ্রেষ্ঠে বভূব কুরুবাহিনী
দ্যৌরিবাপেতনক্ষত্রা হীনং খমিব বায়ুনা
1.25
বিপন্নসস্যেব মহী বাক্চৈবাসংস্কৃতা যথা
আসুরীব যথা সেনা নিগৃহীতে পুরা বলৌ
1.26
বিধবেব বরারোহা শুষ্কতোয়েব নিম্নগা
বৃকৈরিব বনে রুদ্ধা পৃষতী হতয়ূথপা
1.27
স্বাধর্ষা হতসিংহেব মহতী গিরিকন্দরা
ভারতী ভরতশ্রেষ্ঠ পতিতে জাহ্নবীসুতে
1.28
বিষ্বগ্বাতহতা রুগ্ণা নৌরিবাসীন্মহার্ণবে
বলিভিঃ পাণ্ডবৈর্বীরৈর্লব্ধলক্ষৈর্ভৃশার্দিতা
1.29
সা তদাসীদ্ভৃশং সেনা ব্যাকুলাশ্বরথদ্বিপা
বিষণ্ণভূয়িষ্ঠনরা কৃপণা দ্রষ্টুমাবভৌ
1.30
তস্যাং ত্রস্তা নৃপতয়ঃ সৈনিকাশ্চ পৃথগ্বিধাঃ
পাতাল ইব মজ্জন্তো হীনা দেবব্রতেন তে
কর্ণং হি কুরবোঽস্মার্ষুঃ স হি দেবব্রতোপমঃ
1.31
সর্বশস্ত্রভৃতাং শ্রেষ্ঠং রোচমানমিবাতিথিম্
বন্ধুমাপদ্গতস্যেব তমেবোপাগমন্মনঃ
1.32
চুক্রুশুঃ কর্ণ কর্ণেতি তত্র ভারত পার্থিবাঃ
রাধেয়ং হিতমস্মাকং সূতপুত্রং তনুত্যজম্
1.33
স হি নায়ুধ্যত তদা দশাহানি মহায়শাঃ
সামাত্যবন্ধুঃ কর্ণো বৈ তমাহ্বয়ত মাচিরম্
1.34
ভীষ্মেণ হি মহাবাহুঃ সর্বক্ষত্রস্য পশ্যতঃ
রথেষু গণ্যমানেষু বলবিক্রমশালিষু
সংখ্যাতোঽর্ধরথঃ কর্ণো দ্বিগুণঃ সন্নরর্ষভঃ
1.35
রথাতিরথসংখ্যায়াং যোঽগ্রণীঃ শূরসংমতঃ
পিতৃবিত্তাম্বুদেবেশানপি যো যোদ্ধুমুত্সহেৎ
1.36
স তু তেনৈব কোপেন রাজন্গাঙ্গেয়মুক্তবান্
ত্বয়ি জীবতি কৌরব্য নাহং যোত্স্যে কথংচন
1.37
ত্বয়া তু পাণ্ডবেয়েষু নিহতেষু মহামৃধে
দুর্যোধনমনুজ্ঞাপ্য বনং যাস্যামি কৌরব
1.38
পাণ্ডবৈর্বা হতে ভীষ্মে ত্বয়ি স্বর্গমুপেয়ুষি
হন্তাস্ম্যেকরথেনৈব কৃত্স্নান্যান্মন্যসে রথান্
1.39
এবমুক্ত্বা মহারাজ দশাহানি মহায়শাঃ
নায়ুধ্যত ততঃ কর্ণঃ পুত্রস্য তব সংমতে
1.40
ভীষ্মঃ সমরবিক্রান্তঃ পাণ্ডবেয়স্য পার্থিব
জঘান সমরে যোধানসংখ্যেয়পরাক্রমঃ
1.41
তস্মিংস্তু নিহতে শূরে সত্যসংধে মহৌজসি
ত্বত্সুতাঃ কর্ণমস্মার্ষুস্তর্তুকামা ইব প্লবম্
1.42
তাবকাস্তব পুত্রাশ্চ সহিতাঃ সর্বরাজভিঃ
হা কর্ণ ইতি চাক্রন্দন্কালোঽয়মিতি চাব্রুবন্
1.43
জামদগ্ন্যাভ্যনুজ্ঞাতমস্ত্রে দুর্বারপৌরুষম্
অগমন্নো মনঃ কর্ণং বন্ধুমাত্যয়িকেষ্বিব
1.44
স হি শক্তো রণে রাজংস্ত্রাতুমস্মান্মহাভয়াৎ
ত্রিদশানিব গোবিন্দঃ সততং সুমহাভয়াৎ
1.45
বৈশংপায়ন উবাচ
তথা কর্ণং যুধি বরং কীর্তয়ন্তং পুনঃ পুনঃ
আশীবিষবদুচ্ছ্বস্য ধৃতরাষ্ট্রোঽব্রবীদিদম্
1.46
যত্তদ্বৈকর্তনং কর্ণমগমদ্বো মনস্তদা
অপ্যপশ্যত রাধেয়ং সূতপুত্রং তনুত্যজম্
1.47
অপি তন্ন মৃষাকার্ষীদ্যুধি সত্যপরাক্রমঃ
সংভ্রান্তানাং তদার্তানাং ত্রস্তানাং ত্রাণমিচ্ছতাম্
1.48
অপি তত্পূরয়াং চক্রে ধনুর্ধরবরো যুধি
যত্তদ্বিনিহতে ভীষ্মে কৌরবাণামপাবৃতম্
1.49
তত্খণ্ডং পূরয়ামাস পরেষামাদধদ্ভয়ম্
কৃতবান্মম পুত্রাণাং জয়াশাং সফলামপি