Utshovঅধ্যায় 6
6.1
সংজয় উবাচ
সেনাপত্যং তু সংপ্রাপ্য ভারদ্বাজো মহারথঃ
যুয়ুত্সুর্ব্যূহ্য সৈন্যানি প্রায়াত্তব সুতৈঃ সহ
6.2
সৈন্ধবশ্চ কলিঙ্গশ্চ বিকর্ণশ্চ তবাত্মজঃ
দক্ষিণং পার্শ্বমাস্থায় সমতিষ্ঠন্ত দংশিতাঃ
6.3
প্রপক্ষঃ শকুনিস্তেষাং প্রবরৈর্হয়সাদিভিঃ
যয়ৌ গান্ধারকৈঃ সার্ধং বিমলপ্রাসয়োধিভিঃ
6.4
কৃপশ্চ কৃতবর্মা চ চিত্রসেনো বিবিংশতিঃ
দুঃশাসনমুখা যত্তাঃ সব্যং পার্শ্বমপালয়ন্
6.5
তেষাং প্রপক্ষাঃ কাম্বোজাঃ সুদক্ষিণপুরঃসরাঃ
যয়ুরশ্বৈর্মহাবেগৈঃ শকাশ্চ যবনৈঃ সহ
6.6
মদ্রাস্ত্রিগর্তাঃ সাম্বষ্ঠাঃ প্রতীচ্যোদীচ্যবাসিনঃ
শিবয়ঃ শূরসেনাশ্চ শূদ্রাশ্চ মলদৈঃ সহ
6.7
সৌবীরাঃ কিতবাঃ প্রাচ্যা দাক্ষিণাত্যাশ্চ সর্বশঃ
তবাত্মজং পুরস্কৃত্য সূতপুত্রস্য পৃষ্ঠতঃ
6.8
হর্ষয়ন্সর্বসৈন্যানি বলেষু বলমাদধৎ
যয়ৌ বৈকর্তনঃ কর্ণঃ প্রমুখে সর্বধন্বিনাম্
6.9
তস্য দীপ্তো মহাকায়ঃ স্বান্যনীকানি হর্ষয়ন্
হস্তিকক্ষ্যামহাকেতুর্বভৌ সূর্যসমদ্যুতিঃ
6.10
ন ভীষ্মব্যসনং কশ্চিদ্দৃষ্ট্বা কর্ণমমন্যত
বিশোকাশ্চাভবন্সর্বে রাজানঃ কুরুভিঃ সহ
6.11
হৃষ্টাশ্চ বহবো যোধাস্তত্রাজল্পন্ত সংগতাঃ
ন হি কর্ণং রণে দৃষ্ট্বা যুধি স্থাস্যন্তি পাণ্ডবাঃ
6.12
কর্ণো হি সমরে শক্তো জেতুং দেবান্সবাসবান্
কিমু পাণ্ডুসুতান্যুদ্ধে হীনবীর্যপরাক্রমান্
6.13
ভীষ্মেণ তু রণে পার্থাঃ পালিতা বাহুশালিনা
তাংস্তু কর্ণঃ শরৈস্তীক্ষ্ণৈর্নাশয়িষ্যত্যসংশয়ম্
6.14
এবং ব্রুবন্তস্তেঽন্যোন্যং হৃষ্টরূপা বিশাং পতে
রাধেয়ং পূজয়ন্তশ্চ প্রশংসন্তশ্চ নির্যয়ুঃ
6.15
অস্মাকং শকটব্যূহো দ্রোণেন বিহিতোঽভবৎ
পরেষাং ক্রৌঞ্চ এবাসীদ্ব্যূহো রাজন্মহাত্মনাম্
প্রীয়মাণেন বিহিতো ধর্মরাজেন ভারত
6.16
ব্যূহপ্রমুখতস্তেষাং তস্থতুঃ পুরুষর্ষভৌ
বানরধ্বজমুচ্ছ্রিত্য বিষ্বক্সেনধনংজয়ৌ
6.17
ককুদং সর্বসৈন্যানাং লক্ষ্ম সর্বধনুষ্মতাম্
আদিত্যপথগঃ কেতুঃ পার্থস্যামিততেজসঃ
6.18
দীপয়ামাস তত্সৈন্যং পাণ্ডবস্য মহাত্মনঃ
যথা প্রজ্বলিতঃ সূর্যো যুগান্তে বৈ বসুংধরাম্
6.19
অস্যতামর্জুনঃ শ্রেষ্ঠো গাণ্ডীবং ধনুষাং বরম্
বাসুদেবশ্চ ভূতানাং চক্রাণাং চ সুদর্শনম্
6.20
চত্বার্যেতানি তেজাংসি বহঞ্শ্বেতহয়ো রথঃ
পরেষামগ্রতস্তস্থৌ কালচক্রমিবোদ্যতম্
6.21
এবমেতৌ মহাত্মানৌ বলসেনাগ্রগাবুভৌ
তাবকানাং মুখং কর্ণঃ পরেষাং চ ধনংজয়ঃ
6.22
ততো জাতাভিসংরম্ভৌ পরস্পরবধৈষিণৌ
অবেক্ষেতাং তদান্যোন্যং সমরে কর্ণপাণ্ডবৌ
6.23
ততঃ প্রয়াতে সহসা ভারদ্বাজে মহারথে
অন্তর্নাদেন ঘোরেণ বসুধা সমকম্পত
6.24
ততস্তুমুলমাকাশমাবৃণোত্সদিবাকরম্
বাতোদ্ধূতং রজস্তীব্রং কৌশেয়নিকরোপমম্
6.25
অনভ্রে প্রববর্ষ দ্যৌর্মাংসাস্থিরুধিরাণ্যুত
গৃধ্রাঃ শ্যেনা বডাঃ কঙ্কা বায়সাশ্চ সহস্রশঃ
উপর্যুপরি সেনাং তে তদা পর্যপতন্নৃপ
6.26
গোমায়বশ্চ প্রাক্রোশন্ভয়দান্দারুণান্রবান্
অকার্ষুরপসব্যং চ বহুশঃ পৃতনাং তব
চিখাদিষন্তো মাংসানি পিপাসন্তশ্চ শোণিতম্
6.27
অপতদ্দীপ্যমানা চ সনির্ঘাতা সকম্পনা
উল্কা জ্বলন্তী সংগ্রামে পুচ্ছেনাবৃত্য সর্বশঃ
6.28
পরিবেষো মহাংশ্চাপি সবিদ্যুত্স্তনয়িত্নুমান্
ভাস্করস্যাভবদ্রাজন্প্রয়াতে বাহিনীপতৌ
6.29
এতে চান্যে চ বহবঃ প্রাদুরাসন্সুদারুণাঃ
উত্পাতা যুধি বীরাণাং জীবিতক্ষয়কারকাঃ
6.30
ততঃ প্রববৃতে যুদ্ধং পরস্পরবধৈষিণাম্
কুরুপাণ্ডবসৈন্যানাং শব্দেনানাদয়জ্জগৎ
6.31
তে ত্বন্যোন্যং সুসংরব্ধাঃ পাণ্ডবাঃ কৌরবৈঃ সহ
প্রত্যঘ্নন্নিশিতৈর্বাণৈর্জয়গৃদ্ধাঃ প্রহারিণঃ
6.32
স পাণ্ডবানাং মহতীং মহেষ্বাসো মহাদ্যুতিঃ
বেগেনাভ্যদ্রবত্সেনাং কিরঞ্শরশতৈঃ শিতৈঃ
6.33
দ্রোণমভ্যুদ্যতং দৃষ্ট্বা পাণ্ডবাঃ সহ সৃঞ্জয়ৈঃ
প্রত্যগৃহ্ণংস্তদা রাজঞ্শরবর্ষৈঃ পৃথক্পৃথক্
6.34
সংক্ষোভ্যমাণা দ্রোণেন ভিদ্যমানা মহাচমূঃ
ব্যশীর্যত সপাঞ্চালা বাতেনেব বলাহকাঃ
6.35
বহূনীহ বিকুর্বাণো দিব্যান্যস্ত্রাণি সংয়ুগে
অপীডয়ত্ক্ষণেনৈব দ্রোণঃ পাণ্ডবসৃঞ্জয়ান্
6.36
তে বধ্যমানা দ্রোণেন বাসবেনেব দানবাঃ
পাঞ্চালাঃ সমকম্পন্ত ধৃষ্টদ্যুম্নপুরোগমাঃ
6.37
ততো দিব্যাস্ত্রবিচ্ছূরো যাজ্ঞসেনির্মহারথঃ
অভিনচ্ছরবর্ষেণ দ্রোণানীকমনেকধা
6.38
দ্রোণস্য শরবর্ষৈস্তু শরবর্ষাণি ভাগশঃ
সংনিবার্য ততঃ সেনাং কুরূনপ্যবধীদ্বলী
6.39
সংহৃত্য তু ততো দ্রোণঃ সমবস্থাপ্য চাহবে
স্বমনীকং মহাবাহুঃ পার্ষতং সমুপাদ্রবৎ
6.40
স বাণবর্ষং সুমহদসৃজত্পার্ষতং প্রতি
মঘবান্সমভিক্রুদ্ধঃ সহসা দানবেষ্বিব
6.41
তে কম্প্যমানা দ্রোণেন বাণৈঃ পাণ্ডবসৃঞ্জয়াঃ
পুনঃ পুনরভজ্যন্ত সিংহেনেবেতরে মৃগাঃ
6.42
অথ পর্যপতদ্দ্রোণঃ পাণ্ডবানাং বলং বলী
অলাতচক্রবদ্রাজংস্তদদ্ভুতমিবাভবৎ
6.43
খচরনগরকল্পং কল্পিতং শাস্ত্রদৃষ্ট্যা; চলদনিলপতাকং হ্রাদিনং বল্গিতাশ্বম্
স্ফটিকবিমলকেতুং তাপনং শাত্রবাণাং; রথবরমধিরূঢঃ সংজহারারিসেনাম্