Utshovঅধ্যায় 171
171.1
সংজয় উবাচ
ভীমসেনং সমাকীর্ণং দৃষ্ট্বাস্ত্রেণ ধনংজয়ঃ
তেজসঃ প্রতিঘাতার্থং বারুণেন সমাবৃণোৎ
171.2
নালক্ষয়ত তং কশ্চিদ্বারুণাস্ত্রেণ সংবৃতম্
অর্জুনস্য লঘুত্বাচ্চ সংবৃতত্বাচ্চ তেজসঃ
171.3
সাশ্বসূতরথো ভীমো দ্রোণপুত্রাস্ত্রসংবৃতঃ
অগ্নাবগ্নিরিব ন্যস্তো জ্বালামালী সুদুর্দৃশঃ
171.4
যথা রাত্রিক্ষয়ে রাজঞ্জ্যোতীংষ্যস্তগিরিং প্রতি
সমাপেতুস্তথা বাণা ভীমসেনরথং প্রতি
171.5
স হি ভীমো রথশ্চাস্য হয়াঃ সূতশ্চ মারিষ
সংবৃতা দ্রোণপুত্রেণ পাবকান্তর্গতাভবন্
171.6
যথা দগ্ধ্বা জগত্কৃত্স্নং সময়ে সচরাচরম্
গচ্ছেদগ্নির্বিভোরাস্যং তথাস্ত্রং ভীমমাবৃণোৎ
171.7
সূর্যমগ্নিঃ প্রবিষ্টঃ স্যাদ্যথা চাগ্নিং দিবাকরঃ
তথা প্রবিষ্টং তত্তেজো ন প্রাজ্ঞায়ত কিংচন
171.8
বিকীর্ণমস্ত্রং তদ্দৃষ্ট্বা তথা ভীমরথং প্রতি
উদীর্যমাণং দ্রৌণিং চ নিষ্প্রতিদ্বংদ্বমাহবে
171.9
সর্বসৈন্যানি পাণ্ডূনাং ন্যস্তশস্ত্রাণ্যচেতসঃ
যুধিষ্ঠিরপুরোগাংশ্চ বিমুখাংস্তান্মহারথান্
171.10
অর্জুনো বাসুদেবশ্চ ত্বরমাণৌ মহাদ্যুতী
অবপ্লুত্য রথাদ্বীরৌ ভীমমাদ্রবতাং ততঃ
171.11
ততস্তদ্দ্রোণপুত্রস্য তেজোঽস্ত্রবলসংভবম্
বিগাহ্য তৌ সুবলিনৌ মায়য়াবিশতাং তদা
171.12
ন্যস্তশস্ত্রৌ ততস্তৌ তু নাদহদস্ত্রজোঽনলঃ
বারুণাস্ত্রপ্রয়োগাচ্চ বীর্যবত্ত্বাচ্চ কৃষ্ণয়োঃ
171.13
ততশ্চকৃষতুর্ভীমং তস্য সর্বায়ুধানি চ
নারায়ণাস্ত্রশান্ত্যর্থং নরনারায়ণৌ বলাৎ
171.14
অপকৃষ্যমাণঃ কৌন্তেয়ো নদত্যেব মহারথঃ
বর্ধতে চৈব তদ্ঘোরং দ্রৌণেরস্ত্রং সুদুর্জয়ম্
171.15
তমব্রবীদ্বাসুদেবঃ কিমিদং পাণ্ডুনন্দন
বার্যমাণোঽপি কৌন্তেয় যদ্যুদ্ধান্ন নিবর্তসে
171.16
যদি যুদ্ধেন জেয়াঃ স্যুরিমে কৌরবনন্দনাঃ
বয়মপ্যত্র যুধ্যেম তথা চেমে নরর্ষভাঃ
171.17
রথেভ্যস্ত্ববতীর্ণাস্তু সর্ব এব স্ম তাবকাঃ
তস্মাত্ত্বমপি কৌন্তেয় রথাত্তূর্ণমপাক্রম
171.18
এবমুক্ত্বা ততঃ কৃষ্ণো রথাদ্ভূমিমপাতয়ৎ
নিঃশ্বসন্তং যথা নাগং ক্রোধসংরক্তলোচনম্
171.19
যদাপকৃষ্টঃ স রথান্ন্যাসিতশ্চায়ুধং ভুবি
ততো নারায়ণাস্ত্রং তত্প্রশান্তং শত্রুতাপনম্
171.20
তস্মিন্প্রশান্তে বিধিনা তদা তেজসি দুঃসহে
বভূবুর্বিমলাঃ সর্বা দিশঃ প্রদিশ এব চ
171.21
প্রববুশ্চ শিবা বাতাঃ প্রশান্তা মৃগপক্ষিণঃ
বাহনানি চ হৃষ্টানি যোধাশ্চ মনুজেশ্বর
171.22
ব্যপোঢে চ ততো ঘোরে তস্মিংস্তেজসি ভারত
বভৌ ভীমো নিশাপায়ে ধীমান্সূর্য ইবোদিতঃ
171.23
হতশেষং বলং তত্র পাণ্ডবানামতিষ্ঠত
অস্ত্রব্যুপরমাদ্ধৃষ্টং তব পুত্রজিঘাংসয়া
171.24
ব্যবস্থিতে বলে তস্মিন্নস্ত্রে প্রতিহতে তথা
দুর্যোধনো মহারাজ দ্রোণপুত্রমথাব্রবীৎ
171.25
অশ্বত্থামন্পুনঃ শীঘ্রমস্ত্রমেতত্প্রয়োজয়
ব্যবস্থিতা হি পাঞ্চালাঃ পুনরেব জয়ৈষিণঃ
171.26
অশ্বত্থামা তথোক্তস্তু তব পুত্রেণ মারিষ
সুদীনমভিনিঃশ্বস্য রাজানমিদমব্রবীৎ
171.27
নৈতদাবর্ততে রাজন্নস্ত্রং দ্বির্নোপপদ্যতে
আবর্তয়ন্নিহন্ত্যেতত্প্রয়োক্তারং ন সংশয়ঃ
171.28
এষ চাস্ত্রপ্রতীঘাতং বাসুদেবঃ প্রয়ুক্তবান্
অন্যথা বিহিতঃ সংখ্যে বধঃ শত্রোর্জনাধিপ
171.29
পরাজয়ো বা মৃত্যুর্বা শ্রেয়ো মৃত্যুর্ন নির্জয়ঃ
নির্জিতাশ্চারয়ো হ্যেতে শস্ত্রোত্সর্গান্মৃতোপমাঃ
171.30
দুর্যোধন উবাচ
আচার্যপুত্র যদ্যেতদ্দ্বিরস্ত্রং ন প্রয়ুজ্যতে
অন্যৈর্গুরুঘ্না বধ্যন্তামস্ত্রৈরস্ত্রবিদাং বর
171.31
ত্বয়ি হ্যস্ত্রাণি দিব্যানি যথা স্যুস্ত্র্যম্বকে তথা
ইচ্ছতো ন হি তে মুচ্যেত্ক্রুদ্ধস্যাপি পুরংদরঃ
171.32
ধৃতরাষ্ট্র উবাচ
তস্মিন্নস্ত্রে প্রতিহতে দ্রোণে চোপধিনা হতে
তথা দুর্যোধনেনোক্তো দ্রৌণিঃ কিমকরোত্পুনঃ
171.33
দৃষ্ট্বা পার্থাংশ্চ সংগ্রামে যুদ্ধায় সমবস্থিতান্
নারায়ণাস্ত্রনির্মুক্তাংশ্চরতঃ পৃতনামুখে
171.34
সংজয় উবাচ
জানন্পিতুঃ স নিধনং সিংহলাঙ্গূলকেতনঃ
সক্রোধো ভয়মুত্সৃজ্য অভিদুদ্রাব পার্ষতম্
171.35
অভিদ্রুত্য চ বিংশত্যা ক্ষুদ্রকাণাং নরর্ষভঃ
পঞ্চভিশ্চাতিবেগেন বিব্যাধ পুরুষর্ষভম্
171.36
ধৃষ্টদ্যুম্নস্ততো রাজঞ্জ্বলন্তমিব পাবকম্
দ্রোণপুত্রং ত্রিষষ্ট্যা তু রাজন্বিব্যাধ পত্রিণাম্
171.37
সারথিং চাস্য বিংশত্যা স্বর্ণপুঙ্খৈঃ শিলাশিতৈঃ
হয়াংশ্চ চতুরোঽবিধ্যচ্চতুর্ভির্নিশিতৈঃ শরৈঃ
171.38
বিদ্ধ্বা বিদ্ধ্বানদদ্দ্রৌণিঃ কম্পয়ন্নিব মেদিনীম্
আদদত্সর্বলোকস্য প্রাণানিব মহারণে
171.39
পার্ষতস্তু বলী রাজন্কৃতাস্ত্রঃ কৃতনিশ্রমঃ
দ্রৌণিমেবাভিদুদ্রাব কৃত্বা মৃত্যুং নিবর্তনম্
171.40
ততো বাণময়ং বর্ষং দ্রোণপুত্রস্য মূর্ধনি
অবাসৃজদমেয়াত্মা পাঞ্চাল্যো রথিনাং বরঃ
171.41
তং দ্রৌণিঃ সমরে ক্রুদ্ধশ্ছাদয়ামাস পত্রিভিঃ
বিব্যাধ চৈনং দশভিঃ পিতুর্বধমনুস্মরন্
171.42
দ্বাভ্যাং চ সুবিকৃষ্টাভ্যাং ক্ষুরাভ্যাং ধ্বজকার্মুকে
ছিত্ত্বা পাঞ্চালরাজস্য দ্রৌণিরন্যৈঃ সমার্দয়ৎ
171.43
ব্যশ্বসূতরথং চৈনং দ্রৌণিশ্চক্রে মহাহবে
তস্য চানুচরান্সর্বান্ক্রুদ্ধঃ প্রাচ্ছাদয়চ্ছরৈঃ
171.44
প্রদ্রুদ্রাব ততঃ সৈন্যং পাঞ্চালানাং বিশাং পতে
সংভ্রান্তরূপমার্তং চ শরবর্ষপরিক্ষতম্
171.45
দৃষ্ট্বা চ বিমুখান্যোধান্ধৃষ্টদ্যুম্নং চ পীডিতম্
শৈনেয়োঽচোদয়ত্তূর্ণং রণং দ্রৌণিরথং প্রতি
171.46
অষ্টভির্নিশিতৈশ্চৈব সোঽশ্বত্থামানমার্দয়ৎ
বিংশত্যা পুনরাহত্য নানারূপৈরমর্ষণম্
বিব্যাধ চ তথা সূতং চতুর্ভিশ্চতুরো হয়ান্
171.47
সোঽতিবিদ্ধো মহেষ্বাসো নানালিঙ্গৈরমর্ষণঃ
যুয়ুধানেন বৈ দ্রৌণিঃ প্রহসন্বাক্যমব্রবীৎ
171.48
শৈনেয়াভ্যবপত্তিং তে জানাম্যাচার্যঘাতিনঃ
ন ত্বেনং ত্রাস্যসি ময়া গ্রস্তমাত্মানমেব চ
171.49
এবমুক্ত্বার্করশ্ম্যাভং সুপর্বাণং শরোত্তমম্
ব্যসৃজত্সাত্বতে দ্রৌণির্বজ্রং বৃত্রে যথা হরিঃ
171.50
স তং নির্ভিদ্য তেনাস্তঃ সায়কঃ সশরাবরম্
বিবেশ বসুধাং ভিত্ত্বা শ্বসন্বিলমিবোরগঃ
171.51
স ভিন্নকবচঃ শূরস্তোত্ত্রার্দিত ইব দ্বিপঃ
বিমুচ্য সশরং চাপং ভূরিব্রণপরিস্রবঃ
171.52
সীদন্রুধিরসিক্তশ্চ রথোপস্থ উপাবিশৎ
সূতেনাপহৃতস্তূর্ণং দ্রোণপুত্রাদ্রথান্তরম্
171.53
অথান্যেন সুপুঙ্খেন শরেণ নতপর্বণা
আজঘান ভ্রুবোর্মধ্যে ধৃষ্টদ্যুম্নং পরংতপঃ
171.54
স পূর্বমতিবিদ্ধশ্চ ভৃশং পশ্চাচ্চ পীডিতঃ
সসাদ যুধি পাঞ্চাল্যো ব্যপাশ্রয়ত চ ধ্বজম্
171.55
তং মত্তমিব সিংহেন রাজন্কুঞ্জরমর্দিতম্
জবেনাভ্যদ্রবঞ্শূরাঃ পঞ্চ পাণ্ডবতো রথাঃ
171.56
কিরীটী ভীমসেনশ্চ বৃদ্ধক্ষত্রশ্চ পৌরবঃ
যুবরাজশ্চ চেদীনাং মালবশ্চ সুদর্শনঃ
পঞ্চভিঃ পঞ্চভির্বাণৈরভ্যঘ্নন্সর্বতঃ সমম্
171.57
আশীবিষাভৈর্বিংশদ্ভিঃ পঞ্চভিশ্চাপি তাঞ্শরৈঃ
চিচ্ছেদ যুগপদ্দ্রৌণিঃ পঞ্চবিংশতিসায়কান্
171.58
সপ্তভিশ্চ শিতৈর্বাণৈঃ পৌরবং দ্রৌণিরার্দয়ৎ
মালবং ত্রিভিরেকেন পার্থং ষড্ভির্বৃকোদরম্
171.59
ততস্তে বিব্যধুঃ সর্বে দ্রৌণিং রাজন্মহারথাঃ
যুগপচ্চ পৃথক্চৈব রুক্মপুঙ্খৈঃ শিলাশিতৈঃ
171.60
যুবরাজস্তু বিংশত্যা দ্রৌণিং বিব্যাধ পত্রিণাম্
পার্থশ্চ পুনরষ্টাভিস্তথা সর্বে ত্রিভিস্ত্রিভিঃ
171.61
ততোঽর্জুনং ষড্ভিরথাজঘান; দ্রৌণায়নির্দশভির্বাসুদেবম্
ভীমং দশার্ধৈর্যুবরাজং চতুর্ভি;র্দ্বাভ্যাং ছিত্ত্বা কার্মুকং চ ধ্বজং চ
পুনঃ পার্থং শরবর্ষেণ বিদ্ধ্বা; দ্রৌণির্ঘোরং সিংহনাদং ননাদ
171.62
তস্যাস্যতঃ সুনিশিতান্পীতধারা;ন্দ্রৌণেঃ শরান্পৃষ্ঠতশ্চাগ্রতশ্চ
ধরা বিয়দ্দ্যৌঃ প্রদিশো দিশশ্চ; ছন্না বাণৈরভবন্ঘোররূপৈঃ
171.63
আসীনস্য স্বরথং তূগ্রতেজাঃ; সুদর্শনস্যেন্দ্রকেতুপ্রকাশৌ
ভুজৌ শিরশ্চেন্দ্রসমানবীর্য;স্ত্রিভিঃ শরৈর্যুগপত্সংচকর্ত
171.64
স পৌরবং রথশক্ত্যা নিহত্য; ছিত্ত্বা রথং তিলশশ্চাপি বাণৈঃ
ছিত্ত্বাস্য বাহূ বরচন্দনাক্তৌ; ভল্লেন কায়াচ্ছির উচ্চকর্ত
171.65
যুবানমিন্দীবরদামবর্ণং; চেদিপ্রিয়ং যুবরাজং প্রহস্য
বাণৈস্ত্বরাবাঞ্জ্বলিতাগ্নিকল্পৈ;র্বিদ্ধ্বা প্রাদান্মৃত্যবে সাশ্বসূতম্
171.66
তান্নিহত্য রণে বীরো দ্রোণপুত্রো যুধাং পতিঃ
দধ্মৌ প্রমুদিতঃ শঙ্খং বৃহন্তমপরাজিতঃ
171.67
ততঃ সর্বে চ পাঞ্চালা ভীমসেনশ্চ পাণ্ডবঃ
ধৃষ্টদ্যুম্নরথং ভীতাস্ত্যক্ত্বা সংপ্রাদ্রবন্দিশঃ
171.68
তান্প্রভগ্নাংস্তথা দ্রৌণিঃ পৃষ্ঠতো বিকিরঞ্শরৈঃ
অভ্যবর্তত বেগেন কালবত্পাণ্ডুবাহিনীম্
171.69
তে বধ্যমানাঃ সমরে দ্রোণপুত্রেণ ক্ষত্রিয়াঃ
দ্রোণপুত্রং ভয়াদ্রাজন্দিক্ষু সর্বাসু মেনিরে