Utshovঅধ্যায় 170
170.1
সংজয় উবাচ
ততঃ স কদনং চক্রে রিপূণাং দ্রোণনন্দনঃ
যুগান্তে সর্বভূতানাং কালসৃষ্ট ইবান্তকঃ
170.2
ধ্বজদ্রুমং শস্ত্রশৃঙ্গং হতনাগমহাশিলম্
অশ্বকিংপুরুষাকীর্ণং শরাসনলতাবৃতম্
170.3
শূলক্রব্যাদসংঘুষ্টং ভূতয়ক্ষগণাকুলম্
নিহত্য শাত্রবান্ভল্লৈঃ সোঽচিনোদ্দেহপর্বতম্
170.4
ততো বেগেন মহতা বিনদ্য স নরর্ষভঃ
প্রতিজ্ঞাং শ্রাবয়ামাস পুনরেব তবাত্মজম্
170.5
যস্মাদ্যুধ্যন্তমাচার্যং ধর্মকঞ্চুকমাস্থিতঃ
মুঞ্চ শস্ত্রমিতি প্রাহ কুন্তীপুত্রো যুধিষ্ঠিরঃ
170.6
তস্মাত্সংপশ্যতস্তস্য দ্রাবয়িষ্যামি বাহিনীম্
বিদ্রাব্য সত্যং হন্তাস্মি পাপং পাঞ্চাল্যমেব তু
170.7
সর্বানেতান্হনিষ্যামি যদি যোত্স্যন্তি মাং রণে
সত্যং তে প্রতিজানামি পরাবর্তয় বাহিনীম্
170.8
তচ্ছ্রুত্বা তব পুত্রস্তু বাহিনীং পর্যবর্তয়ৎ
সিংহনাদেন মহতা ব্যপোহ্য সুমহদ্ভয়ম্
170.9
ততঃ সমাগমো রাজন্কুরুপাণ্ডবসেনয়োঃ
পুনরেবাভবত্তীব্রঃ পূর্ণসাগরয়োরিব
170.10
সংরব্ধা হি স্থিরীভূতা দ্রোণপুত্রেণ কৌরবাঃ
উদগ্রাঃ পাণ্ডুপাঞ্চালা দ্রোণস্য নিধনেন চ
170.11
তেষাং পরমহৃষ্টানাং জয়মাত্মনি পশ্যতাম্
সংরব্ধানাং মহাবেগঃ প্রাদুরাসীদ্রণাজিরে
170.12
যথা শিলোচ্চয়ে শৈলঃ সাগরে সাগরো যথা
প্রতিহন্যেত রাজেন্দ্র তথাসন্কুরুপাণ্ডবাঃ
170.13
ততঃ শঙ্খসহস্রাণি ভেরীণাময়ুতানি চ
অবাদয়ন্ত সংহৃষ্টাঃ কুরুপাণ্ডবসৈনিকাঃ
170.14
ততো নির্মথ্যমানস্য সাগরস্যেব নিস্বনঃ
অভবত্তস্য সৈন্যস্য সুমহানদ্ভুতোপমঃ
170.15
প্রাদুশ্চক্রে ততো দ্রৌণিরস্ত্রং নারায়ণং তদা
অভিসংধায় পাণ্ডূনাং পাঞ্চালানাং চ বাহিনীম্
170.16
প্রাদুরাসংস্ততো বাণা দীপ্তাগ্রাঃ খে সহস্রশঃ
পাণ্ডবান্ভক্ষয়িষ্যন্তো দীপ্তাস্যা ইব পন্নগাঃ
170.17
তে দিশঃ খং চ সৈন্যং চ সমাবৃণ্বন্মহাহবে
মুহূর্তাদ্ভাস্করস্যেব রাজঁল্লোকং গভস্তয়ঃ
170.18
তথাপরে দ্যোতমানা জ্যোতীংষীবাম্বরেঽমলে
প্রাদুরাসন্মহীপাল কার্ষ্ণায়সময়া গুডাঃ
170.19
চতুর্দিশং বিচিত্রাশ্চ শতঘ্ন্যোঽথ হুতাশদাঃ
চক্রাণি চ ক্ষুরান্তানি মণ্ডলানীব ভাস্বতঃ
170.20
শস্ত্রাকৃতিভিরাকীর্ণমতীব ভরতর্ষভ
দৃষ্ট্বান্তরিক্ষমাবিগ্নাঃ পাণ্ডুপাঞ্চালসৃঞ্জয়াঃ
170.21
যথা যথা হ্যয়ুধ্যন্ত পাণ্ডবানাং মহারথাঃ
তথা তথা তদস্ত্রং বৈ ব্যবর্ধত জনাধিপ
170.22
বধ্যমানাস্তথাস্ত্রেণ তেন নারায়ণেন বৈ
দহ্যমানানলেনেব সর্বতোঽভ্যর্দিতা রণে
170.23
যথা হি শিশিরাপায়ে দহেত্কক্ষং হুতাশনঃ
তথা তদস্ত্রং পাণ্ডূনাং দদাহ ধ্বজিনীং প্রভো
170.24
আপূর্যমাণেনাস্ত্রেণ সৈন্যে ক্ষীয়তি চাভিভো
জগাম পরমং ত্রাসং ধর্মপুত্রো যুধিষ্ঠিরঃ
170.25
দ্রবমাণং তু তত্সৈন্যং দৃষ্ট্বা বিগতচেতনম্
মধ্যস্থতাং চ পার্থস্য ধর্মপুত্রোঽব্রবীদিদম্
170.26
ধৃষ্টদ্যুম্ন পলায়স্ব সহ পাঞ্চালসেনয়া
সাত্যকে ত্বং চ গচ্ছস্ব বৃষ্ণ্যন্ধকবৃতো গৃহান্
170.27
বাসুদেবোঽপি ধর্মাত্মা করিষ্যত্যাত্মনঃ ক্ষমম্
উপদেষ্টুং সমর্থোঽয়ং লোকস্য কিমুতাত্মনঃ
170.28
সংগ্রামস্তু ন কর্তব্যঃ সর্বসৈন্যান্ব্রবীমি বঃ
অহং হি সহ সোদর্যৈঃ প্রবেক্ষ্যে হব্যবাহনম্
170.29
ভীষ্মদ্রোণার্ণবং তীর্ত্বা সংগ্রামং ভীরুদুস্তরম্
অবসত্স্যাম্যসলিলে সগণো দ্রৌণিগোষ্পদে
170.30
কামঃ সংপদ্যতামস্য বীভত্সোরাশু মাং প্রতি
কল্যাণবৃত্ত আচার্যো ময়া যুধি নিপাতিতঃ
170.31
যেন বালঃ স সৌভদ্রো যুদ্ধানামবিশারদঃ
সমর্থৈর্বহুভিঃ ক্রূরৈর্ঘাতিতো নাভিপালিতঃ
170.32
যেনাবিব্রুবতা প্রশ্নং তথা কৃষ্ণা সভাং গতা
উপেক্ষিতা সপুত্রেণ দাসভাবং নিয়চ্ছতী
170.33
জিঘাংসুর্ধার্তরাষ্ট্রশ্চ শ্রান্তেষ্বশ্বেষু ফল্গুনম্
কবচেন তথা যুক্তো রক্ষার্থং সৈন্ধবস্য চ
170.34
যেন ব্রহ্মাস্ত্রবিদুষা পাঞ্চালাঃ সত্যজিন্মুখাঃ
কুর্বাণা মজ্জয়ে যত্নং সমূলা বিনিপাতিতাঃ
170.35
যেন প্রব্রাজ্যমানাশ্চ রাজ্যাদ্বয়মধর্মতঃ
নিবার্যমাণেনাস্মাভিরনুগন্তুং তদেষিতাঃ
170.36
যোঽসাবত্যন্তমস্মাসু কুর্বাণঃ সৌহৃদং পরম্
হতস্তদর্থে মরণং গমিষ্যামি সবান্ধবঃ
170.37
এবং ব্রুবতি কৌন্তেয়ে দাশার্হস্ত্বরিতস্ততঃ
নিবার্য সৈন্যং বাহুভ্যামিদং বচনমব্রবীৎ
170.38
শীঘ্রং ন্যস্যত শস্ত্রাণি বাহেভ্যশ্চাবরোহত
এষ যোগোঽত্র বিহিতঃ প্রতিঘাতো মহাত্মনা
170.39
দ্বিপাশ্বস্যন্দনেভ্যশ্চ ক্ষিতিং সর্বেঽবরোহত
এবমেতন্ন বো হন্যাদস্ত্রং ভূমৌ নিরায়ুধান্
170.40
যথা যথা হি যুধ্যন্তে যোধা হ্যস্ত্রবলং প্রতি
তথা তথা ভবন্ত্যেতে কৌরবা বলবত্তরাঃ
170.41
নিক্ষেপ্স্যন্তি চ শস্ত্রাণি বাহনেভ্যোঽবরুহ্য যে
তান্নৈতদস্ত্রং সংগ্রামে নিহনিষ্যতি মানবান্
170.42
যে ত্বেতত্প্রতিয়োত্স্যন্তি মনসাপীহ কেচন
নিহনিষ্যতি তান্সর্বান্রসাতলগতানপি
170.43
তে বচস্তস্য তচ্ছ্রুত্বা বাসুদেবস্য ভারত
ঈষুঃ সর্বেঽস্ত্রমুত্স্রষ্টুং মনোভিঃ করণেন চ
170.44
তত উত্স্রষ্টুকামাংস্তানস্ত্রাণ্যালক্ষ্য পাণ্ডবঃ
ভীমসেনোঽব্রবীদ্রাজন্নিদং সংহর্ষয়ন্বচঃ
170.45
ন কথংচন শস্ত্রাণি মোক্তব্যানীহ কেনচিৎ
অহমাবারয়িষ্যামি দ্রোণপুত্রাস্ত্রমাশুগৈঃ
170.46
অথ বাপ্যনয়া গুর্ব্যা হেমবিগ্রহয়া রণে
কালবদ্বিচরিষ্যামি দ্রৌণেরস্ত্রং বিশাতয়ন্
170.47
ন হি মে বিক্রমে তুল্যঃ কশ্চিদস্তি পুমানিহ
যথৈব সবিতুস্তুল্যং জ্যোতিরন্যন্ন বিদ্যতে
170.48
পশ্যধ্বং মে দৃঢৌ বাহূ নাগরাজকরোপমা
সমর্থৌ পর্বতস্যাপি শৈশিরস্য নিপাতনে
170.49
নাগায়ুতসমপ্রাণো হ্যহমেকো নরেষ্বিহ
শক্রো যথা প্রতিদ্বংদ্বো দিবি দেবেষু বিশ্রুতঃ
170.50
অদ্য পশ্যত মে বীর্যং বাহ্বোঃ পীনাংসয়োর্যুধি
জ্বলমানস্য দীপ্তস্য দ্রৌণেরস্ত্রস্য বারণে
170.51
যদি নারায়ণাস্ত্রস্য প্রতিয়োদ্ধা ন বিদ্যতে
অদ্যৈনং প্রতিয়োত্স্যামি পশ্যত্সু কুরুপাণ্ডুষু
170.52
এবমুক্ত্বা ততো ভীমো দ্রোণপুত্রমরিংদমঃ
অভ্যয়ান্মেঘঘোষেণ রথেনাদিত্যবর্চসা
170.53
স এনমিষুজালেন লঘুত্বাচ্ছীঘ্রবিক্রমঃ
নিমেষমাত্রেণাসাদ্য কুন্তীপুত্রোঽভ্যবাকিরৎ
170.54
ততো দ্রৌণিঃ প্রহস্যৈনমুদাসমভিভাষ্য চ
অবাকিরত্প্রদীপ্তাগ্রৈঃ শরৈস্তৈরভিমন্ত্রিতৈঃ
170.55
পন্নগৈরিব দীপ্তাস্যৈর্বমদ্ভিরনলং রণে
অবকীর্ণোঽভবত্পার্থঃ স্ফুলিঙ্গৈরিব কাঞ্চনৈঃ
170.56
তস্য রূপমভূদ্রাজন্ভীমসেনস্য সংয়ুগে
খদ্যোতৈরাবৃতস্যেব পর্বতস্য দিনক্ষয়ে
170.57
তদস্ত্রং দ্রোণপুত্রস্য তস্মিন্প্রতিসমস্যতি
অবর্ধত মহারাজ যথাগ্নিরনিলোদ্ধতঃ
170.58
বিবর্ধমানমালক্ষ্য তদস্ত্রং ভীমবিক্রমম্
পাণ্ডুসৈন্যমৃতে ভীমং সুমহদ্ভয়মাবিশৎ
170.59
ততঃ শস্ত্রাণি তে সর্বে সমুত্সৃজ্য মহীতলে
অবারোহন্রথেভ্যশ্চ হস্ত্যশ্বেভ্যশ্চ সর্বশঃ
170.60
তেষু নিক্ষিপ্তশস্ত্রেষু বাহনেভ্যশ্চ্যুতেষু চ
তদস্ত্রবীর্যং বিপুলং ভীমমূর্ধন্যথাপতৎ
170.61
হাহাকৃতানি ভূতানি পাণ্ডবাশ্চ বিশেষতঃ
ভীমসেনমপশ্যন্ত তেজসা সংবৃতং তদা