Utshovঅধ্যায় 169
169.1
ধৃতরাষ্ট্র উবাচ
সাঙ্গা বেদা যথান্যায়ং যেনাধীতা মহাত্মনা
যস্মিন্সাক্ষাদ্ধনুর্বেদো হ্রীনিষেধে প্রতিষ্ঠিতঃ
169.2
তস্মিন্নাক্রুশ্যতি দ্রোণে মহর্ষিতনয়ে তদা
নীচাত্মনা নৃশংসেন ক্ষুদ্রেণ গুরুঘাতিনা
169.3
যস্য প্রসাদাত্কর্মাণি কুর্বন্তি পুরুষর্ষভাঃ
অমানুষাণি সংগ্রামে দেবৈরসুকরাণি চ
169.4
তস্মিন্নাক্রুশ্যতি দ্রোণে সমক্ষং পাপকর্মিণঃ
নামর্ষং তত্র কুর্বন্তি ধিক্ক্ষত্রং ধিগমর্ষিতম্
169.5
পার্থাঃ সর্বে চ রাজানঃ পৃথিব্যাং যে ধনুর্ধরাঃ
শ্রুত্বা কিমাহুঃ পাঞ্চাল্যং তন্মমাচক্ষ্ব সংজয়
169.6
সংজয় উবাচ
শ্রুত্বা দ্রুপদপুত্রস্য তা বাচঃ ক্রূরকর্মণঃ
তূষ্ণীং বভূবূ রাজানঃ সর্ব এব বিশাং পতে
169.7
অর্জুনস্তু কটাক্ষেণ জিহ্মং প্রেক্ষ্য চ পার্ষতম্
সবাষ্পমভিনিঃশ্বস্য ধিগ্ধিগ্ধিগিতি চাব্রবীৎ
169.8
যুধিষ্ঠিরশ্চ ভীমশ্চ যমৌ কৃষ্ণস্তথাপরে
আসন্সুব্রীডিতা রাজন্সাত্যকিরিদমব্রবীৎ
169.9
নেহাস্তি পুরুষঃ কশ্চিদ্য ইমং পাপপূরুষম্
ভাষমাণমকল্যাণং শীঘ্রং হন্যান্নরাধমম্
169.10
কথং চ শতধা জিহ্বা ন তে মূর্ধা চ দীর্যতে
গুরুমাক্রোশতঃ ক্ষুদ্র ন চাধর্মেণ পাত্যসে
169.11
যাপ্যস্ত্বমসি পার্থৈশ্চ সর্বৈশ্চান্ধকবৃষ্ণিভিঃ
যত্কর্ম কলুষং কৃত্বা শ্লাঘসে জনসংসদি
169.12
অকার্যং তাদৃশং কৃত্বা পুনরেব গুরুং ক্ষিপন্
বধ্যস্ত্বং ন ত্বয়ার্থোঽস্তি মুহূর্তমপি জীবতা
169.13
কস্ত্বেতদ্ব্যবসেদার্যস্ত্বদন্যঃ পুরুষাধমঃ
নিগৃহ্য কেশেষু বধং গুরোর্ধর্মাত্মনঃ সতঃ
169.14
সপ্তাবরে তথা পূর্বে বান্ধবাস্তে নিপাতিতাঃ
যশসা চ পরিত্যক্তাস্ত্বাং প্রাপ্য কুলপাংসনম্
169.15
উক্তবাংশ্চাপি যত্পার্থং ভীষ্মং প্রতি নরর্ষভম্
তথান্তো বিহিতস্তেন স্বয়মেব মহাত্মনা
169.16
তস্যাপি তব সোদর্যো নিহন্তা পাপকৃত্তমঃ
নান্যঃ পাঞ্চালপুত্রেভ্যো বিদ্যতে ভুবি পাপকৃৎ
169.17
স চাপি সৃষ্টঃ পিত্রা তে ভীষ্মস্যান্তকরঃ কিল
শিখণ্ডী রক্ষিতস্তেন স চ মৃত্যুর্মহাত্মনঃ
169.18
পাঞ্চালাশ্চলিতা ধর্মাত্ক্ষুদ্রা মিত্রগুরুদ্রুহঃ
ত্বাং প্রাপ্য সহসোদর্যং ধিক্কৃতং সর্বসাধুভিঃ
169.19
পুনশ্চেদীদৃশীং বাচং মত্সমীপে বদিষ্যসি
শিরস্তে পাতয়িষ্যামি গদয়া বজ্রকল্পয়া
169.20
সাত্বতেনৈবমাক্ষিপ্তঃ পার্ষতঃ পরুষাক্ষরম্
সংরব্ধঃ সাত্যকিং প্রাহ সংক্রুদ্ধঃ প্রহসন্নিব
169.21
শ্রূয়তে শ্রূয়তে চেতি ক্ষম্যতে চেতি মাধব
ন চানার্য শুভং সাধুং পুরুষং ক্ষেপ্তুমর্হসি
169.22
ক্ষমা প্রশস্যতে লোকে ন তু পাপোঽর্হতি ক্ষমাম্
ক্ষমাবন্তং হি পাপাত্মা জিতোঽয়মিতি মন্যতে
169.23
স ত্বং ক্ষুদ্রসমাচারো নীচাত্মা পাপনিশ্চয়ঃ
আ কেশাগ্রান্নখাগ্রাচ্চ বক্তব্যো বক্তুমিচ্ছসি
169.24
যঃ স ভূরিশ্রবাশ্ছিন্নে ভুজে প্রায়গতস্ত্বয়া
বার্যমাণেন নিহতস্ততঃ পাপতরং নু কিম্
169.25
ব্যূহমানো ময়া দ্রোণো দিব্যেনাস্ত্রেণ সংয়ুগে
বিসৃষ্টশস্ত্রো নিহতঃ কিং তত্র ক্রূর দুষ্কৃতম্
169.26
অয়ুধ্যমানং যস্ত্বাজৌ তথা প্রায়গতং মুনিম্
ছিন্নবাহুং পরৈর্হন্যাত্সাত্যকে স কথং ভবেৎ
169.27
নিহত্য ত্বাং যদা ভূমৌ স বিক্রামতি বীর্যবান্
কিং তদা ন নিহংস্যেনং ভূত্বা পুরুষসত্তমঃ
169.28
ত্বয়া পুনরনার্যেণ পূর্বং পার্থেন নির্জিতঃ
যদা তদা হতঃ শূরঃ সৌমদত্তিঃ প্রতাপবান্
169.29
যত্র যত্র তু পাণ্ডূনাং দ্রোণো দ্রাবয়তে চমূম্
কিরঞ্শরসহস্রাণি তত্র তত্র প্রয়াম্যহম্
169.30
স ত্বমেবংবিধং কৃত্বা কর্ম চাণ্ডালবত্স্বয়ম্
বক্তুমিচ্ছসি বক্তব্যঃ কস্মান্মাং পরুষাণ্যথ
169.31
কর্তা ত্বং কর্মণোগ্রস্য নাহং বৃষ্ণিকুলাধম
পাপানাং চ ত্বমাবাসঃ কর্মণাং মা পুনর্বদ
169.32
জোষমাস্স্ব ন মাং ভূয়ো বক্তুমর্হস্যতঃ পরম্
অধরোত্তরমেতদ্ধি যন্মা ত্বং বক্তুমিচ্ছসি
169.33
অথ বক্ষ্যসি মাং মৌর্খ্যাদ্ভূয়ঃ পরুষমীদৃশম্
গময়িষ্যামি বাণৈস্ত্বাং যুধি বৈবস্বতক্ষয়ম্
169.34
ন চৈব মূর্খ ধর্মেণ কেবলেনৈব শক্যতে
তেষামপি হ্যধর্মেণ চেষ্টিতং শৃণু যাদৃশম্
169.35
বঞ্চিতঃ পাণ্ডবঃ পূর্বমধর্মেণ যুধিষ্ঠিরঃ
দ্রৌপদী চ পরিক্লিষ্টা তথাধর্মেণ সাত্যকে
169.36
প্রব্রাজিতা বনং সর্বে পাণ্ডবাঃ সহ কৃষ্ণয়া
সর্বস্বমপকৃষ্টং চ তথাধর্মেণ বালিশ
169.37
অধর্মেণাপকৃষ্টশ্চ মদ্ররাজঃ পরৈরিতঃ
ইতোঽপ্যধর্মেণ হতো ভীষ্মঃ কুরুপিতামহঃ
ভূরিশ্রবা হ্যধর্মেণ ত্বয়া ধর্মবিদা হতঃ
169.38
এবং পরৈরাচরিতং পাণ্ডবেয়ৈশ্চ সংয়ুগে
রক্ষমাণৈর্জয়ং বীরৈর্ধর্মজ্ঞৈরপি সাত্বত
169.39
দুর্জ্ঞেয়ঃ পরমো ধর্মস্তথাধর্মঃ সুদুর্বিদঃ
যুধ্যস্ব কৌরবৈঃ সার্ধং মা গাঃ পিতৃনিবেশনম্
169.40
এবমাদীনি বাক্যানি ক্রূরাণি পরুষাণি চ
শ্রাবিতঃ সাত্যকিঃ শ্রীমানাকম্পিত ইবাভবৎ
169.41
তচ্ছ্রুত্বা ক্রোধতাম্রাক্ষঃ সাত্যকিস্ত্বাদদে গদাম্
বিনিঃশ্বস্য যথা সর্পঃ প্রণিধায় রথে ধনুঃ
169.42
ততোঽভিপত্য পাঞ্চাল্যং সংরম্ভেণেদমব্রবীৎ
ন ত্বাং বক্ষ্যামি পরুষং হনিষ্যে ত্বাং বধক্ষমম্
169.43
তমাপতন্তং সহসা মহাবলমমর্ষণম্
পাঞ্চাল্যায়াভিসংক্রুদ্ধমন্তকায়ান্তকোপমম্
169.44
চোদিতো বাসুদেবেন ভীমসেনো মহাবলঃ
অবপ্লুত্য রথাত্তূর্ণং বাহুভ্যাং সমবারয়ৎ
169.45
দ্রবমাণং তথা ক্রুদ্ধং সাত্যকিং পাণ্ডবো বলী
প্রস্কন্দমানমাদায় জগাম বলিনং বলাৎ
169.46
স্থিত্বা বিষ্টভ্য চরণৌ ভীমেন শিনিপুংগবঃ
নিগৃহীতঃ পদে ষষ্ঠে বলেন বলিনাং বরঃ
169.47
অবরুহ্য রথাত্তং তু হ্রিয়মাণং বলীয়সা
উবাচ শ্লক্ষ্ণয়া বাচা সহদেবো বিশাং পতে
169.48
অস্মাকং পুরুষব্যাঘ্র মিত্রমন্যন্ন বিদ্যতে
পরমন্ধকবৃষ্ণিভ্যঃ পাঞ্চালেভ্যশ্চ মাধব
169.49
তথৈবান্ধকবৃষ্ণীনাং তব চৈব বিশেষতঃ
কৃষ্ণস্য চ তথাস্মত্তো মিত্রমন্যন্ন বিদ্যতে
169.50
পাঞ্চালানাং চ বার্ষ্ণেয় সমুদ্রান্তাং বিচিন্বতাম্
নান্যদস্তি পরং মিত্রং যথা পাণ্ডববৃষ্ণয়ঃ
169.51
স ভবানীদৃশং মিত্রং মন্যতে চ যথা ভবান্
ভবন্তশ্চ যথাস্মাকং ভবতাং চ তথা বয়ম্
169.52
স এবং সর্বধর্মজ্ঞো মিত্রধর্মমনুস্মরন্
নিয়চ্ছ মন্যুং পাঞ্চাল্যাত্প্রশাম্য শিনিপুংগব
169.53
পার্ষতস্য ক্ষম ত্বং বৈ ক্ষমতাং তব পার্ষতঃ
বয়ং ক্ষময়িতারশ্চ কিমন্যত্র শমাদ্ভবেৎ
169.54
প্রশাম্যমানে শৈনেয়ে সহদেবেন মারিষ
পাঞ্চালরাজস্য সুতঃ প্রহসন্নিদমব্রবীৎ
169.55
মুঞ্চ মুঞ্চ শিনেঃ পৌত্রং ভীম যুদ্ধমদান্বিতম্
আসাদয়তু মামেষ ধরাধরমিবানিলঃ
169.56
যাবদস্য শিতৈর্বাণৈঃ সংরম্ভং বিনয়াম্যহম্
যুদ্ধশ্রদ্ধাং চ কৌন্তেয় জীবিতস্য চ সংয়ুগে
169.57
কিং নু শক্যং ময়া কর্তুং কার্যং যদিদমুদ্যতম্
সুমহত্পাণ্ডুপুত্রাণামায়ান্ত্যেতে হি কৌরবাঃ
169.58
অথ বা ফল্গুনঃ সর্বান্বারয়িষ্যতি সংয়ুগে
অহমপ্যস্য মূর্ধানং পাতয়িষ্যামি সায়কৈঃ
169.59
মন্যতে ছিন্নবাহুং মাং ভূরিশ্রবসমাহবে
উত্সৃজৈনমহং বৈনমেষ মাং বা হনিষ্যতি
169.60
শৃণ্বন্পাঞ্চালবাক্যানি সাত্যকিঃ সর্পবচ্ছ্বসন্
ভীমবাহ্বন্তরে সক্তো বিস্ফুরত্যনিশং বলী
169.61
ত্বরয়া বাসুদেবশ্চ ধর্মরাজশ্চ মারিষ
যত্নেন মহতা বীরৌ বারয়ামাসতুস্ততঃ
169.62
নিবার্য পরমেষ্বাসৌ ক্রোধসংরক্তলোচনৌ
যুয়ুত্সবঃ পরান্সংখ্যে প্রতীয়ুঃ ক্ষত্রিয়র্ষভাঃ