Utshovঅধ্যায় 168
168.1
সংজয় উবাচ
অর্জুনস্য বচঃ শ্রুত্বা নোচুস্তত্র মহারথাঃ
অপ্রিয়ং বা প্রিয়ং বাপি মহারাজ ধনংজয়ম্
168.2
ততঃ ক্রুদ্ধো মহাবাহুর্ভীমসেনোঽভ্যভাষত
উত্স্ময়ন্নিব কৌন্তেয়মর্জুনং ভরতর্ষভ
168.3
মুনির্যথারণ্যগতো ভাষসে ধর্মসংহিতম্
ন্যস্তদণ্ডো যথা পার্থ ব্রাহ্মণঃ সংশিতব্রতঃ
168.4
ক্ষতাত্ত্রাতা ক্ষতাজ্জীবন্ক্ষান্তস্ত্রিষ্বপি সাধুষু
ক্ষত্রিয়ঃ ক্ষিতিমাপ্নোতি ক্ষিপ্রং ধর্মং যশঃ শ্রিয়ম্
168.5
স ভবান্ক্ষত্রিয়গুণৈর্যুক্তঃ সর্বৈঃ কুলোদ্বহঃ
অবিপশ্চিদ্যথা বাক্যং ব্যাহরন্নাদ্য শোভসে
168.6
পরাক্রমস্তে কৌন্তেয় শক্রস্যেব শচীপতেঃ
ন চাতিবর্তসে ধর্মং বেলামিব মহোদধিঃ
168.7
ন পূজয়েত্ত্বা কোঽন্বদ্য যত্ত্রয়োদশবার্ষিকম্
অমর্ষং পৃষ্ঠতঃ কৃত্বা ধর্মমেবাভিকাঙ্ক্ষসে
168.8
দিষ্ট্যা তাত মনস্তেঽদ্য স্বধর্মমনুবর্ততে
আনৃশংস্যে চ তে দিষ্ট্যা বুদ্ধিঃ সততমচ্যুত
168.9
যত্তু ধর্মপ্রবৃত্তস্য হৃতং রাজ্যমধর্মতঃ
দ্রৌপদী চ পরামৃষ্টা সভামানীয় শত্রুভিঃ
168.10
বনং প্রব্রাজিতাশ্চাস্ম বল্কলাজিনবাসসঃ
অনর্হমাণাস্তং ভাবং ত্রয়োদশ সমাঃ পরৈঃ
168.11
এতান্যমর্ষস্থানানি মর্ষিতানি ত্বয়ানঘ
ক্ষত্রধর্মপ্রসক্তেন সর্বমেতদনুষ্ঠিতম্
168.12
তমধর্মমপাক্রষ্টুমারব্ধঃ সহিতস্ত্বয়া
সানুবন্ধান্হনিষ্যামি ক্ষুদ্রান্রাজ্যহরানহম্
168.13
ত্বয়া তু কথিতং পূর্বং যুদ্ধায়াভ্যাগতা বয়ম্
ঘটামশ্চ যথাশক্তি ত্বং তু নোঽদ্য জুগুপ্সসে
168.14
স্বধর্মং নেচ্ছসে জ্ঞাতুং মিথ্যা বচনমেব তে
ভয়ার্দিতানামস্মাকং বাচা মর্মাণি কৃন্তসি
168.15
বপন্ব্রণে ক্ষারমিব ক্ষতানাং শত্রুকর্শন
বিদীর্যতে মে হৃদয়ং ত্বয়া বাক্শল্যপীডিতম্
168.16
অধর্মমেতদ্বিপুলং ধার্মিকঃ সন্ন বুধ্যসে
যত্ত্বমাত্মানমস্মাংশ্চ প্রশংস্যান্ন প্রশংসসি
যঃ কলাং ষোডশীং ত্বত্তো নার্হতে তং প্রশংসসি
168.17
স্বয়মেবাত্মনো বক্তুং ন যুক্তং গুণসংস্তবম্
দারয়েয়ং মহীং ক্রোধাদ্বিকিরেয়ং চ পর্বতান্
168.18
আবিধ্য চ গদাং গুর্বীং ভীমাং কাঞ্চনমালিনীম্
গিরিপ্রকাশান্ক্ষিতিজান্ভঞ্জেয়মনিলো যথা
168.19
স ত্বমেবংবিধং জানন্ভ্রাতরং মাং নরর্ষভ
দ্রোণপুত্রাদ্ভয়ং কর্তুং নার্হস্যমিতবিক্রম
168.20
অথ বা তিষ্ঠ বীভত্সো সহ সর্বৈর্নরর্ষভৈঃ
অহমেনং গদাপাণির্জেষ্যাম্যেকো মহাহবে
168.21
ততঃ পাঞ্চালরাজস্য পুত্রঃ পার্থমথাব্রবীৎ
সংক্রুদ্ধমিব নর্দন্তং হিরণ্যকশিপুং হরিঃ
168.22
বীভত্সো বিপ্রকর্মাণি বিদিতানি মনীষিণাম্
যাজনাধ্যাপনে দানং তথা যজ্ঞপ্রতিগ্রহৌ
168.23
ষষ্ঠমধ্যয়নং নাম তেষাং কস্মিন্প্রতিষ্ঠিতঃ
হতো দ্রোণো ময়া যত্তত্কিং মাং পার্থ বিগর্হসে
168.24
অপক্রান্তঃ স্বধর্মাচ্চ ক্ষত্রধর্মমুপাশ্রিতঃ
অমানুষেণ হন্ত্যস্মানস্ত্রেণ ক্ষুদ্রকর্মকৃৎ
168.25
তথা মায়াং প্রয়ুঞ্জানমসহ্যং ব্রাহ্মণব্রুবম্
মায়য়ৈব নিহন্যাদ্যো ন যুক্তং পার্থ তত্র কিম্
168.26
তস্মিংস্তথা ময়া শস্তে যদি দ্রৌণায়নী রুষা
কুরুতে ভৈরবং নাদং তত্র কিং মম হীয়তে
168.27
ন চাদ্ভুতমিদং মন্যে যদ্দ্রৌণিঃ শুদ্ধগর্জয়া
ঘাতয়িষ্যতি কৌরব্যান্পরিত্রাতুমশক্নুবন্
168.28
যচ্চ মাং ধার্মিকো ভূত্বা ব্রবীষি গুরুঘাতিনম্
তদর্থমহমুত্পন্নঃ পাঞ্চাল্যস্য সুতোঽনলাৎ
168.29
যস্য কার্যমকার্যং বা যুধ্যতঃ স্যাত্সমং রণে
তং কথং ব্রাহ্মণং ব্রূয়াঃ ক্ষত্রিয়ং বা ধনংজয়
168.30
যো হ্যনস্ত্রবিদো হন্যাদ্ব্রহ্মাস্ত্রৈঃ ক্রোধমূর্ছিতঃ
সর্বোপায়ৈর্ন স কথং বধ্যঃ পুরুষসত্তম
168.31
বিধর্মিণং ধর্মবিদ্ভিঃ প্রোক্তং তেষাং বিষোপমম্
জানন্ধর্মার্থতত্ত্বজ্ঞঃ কিমর্জুন বিগর্হসে
168.32
নৃশংসঃ স ময়াক্রম্য রথ এব নিপাতিতঃ
তন্মাভিনন্দ্যং বীভত্সো কিমর্থং নাভিনন্দসে
168.33
কৃতে রণে কথং পার্থ জ্বলনার্কবিষোপমম্
ভীমং দ্রোণশিরশ্ছেদে প্রশস্যং ন প্রশংসসি
168.34
যোঽসৌ মমৈব নান্যস্য বান্ধবান্যুধি জঘ্নিবান্
ছিত্ত্বাপি তস্য মূর্ধানং নৈবাস্মি বিগতজ্বরঃ
168.35
তচ্চ মে কৃন্ততে মর্ম যন্ন তস্য শিরো ময়া
নিষাদবিষয়ে ক্ষিপ্তং জয়দ্রথশিরো যথা
168.36
অবধশ্চাপি শত্রূণামধর্মঃ শিষ্যতেঽর্জুন
ক্ষত্রিয়স্য হ্যয়ং ধর্মো হন্যাদ্ধন্যেত বা পুনঃ
168.37
স শত্রুর্নিহতঃ সংখ্যে ময়া ধর্মেণ পাণ্ডব
যথা ত্বয়া হতঃ শূরো ভগদত্তঃ পিতুঃ সখা
168.38
পিতামহং রণে হত্বা মন্যসে ধর্মমাত্মনঃ
ময়া শত্রৌ হতে কস্মাত্পাপে ধর্মং ন মন্যসে
168.39
নানৃতঃ পাণ্ডবো জ্যেষ্ঠো নাহং বাধার্মিকোঽর্জুন
শিষ্যধ্রুঙ্নিহতঃ পাপো যুধ্যস্ব বিজয়স্তব