Utshovঅধ্যায় 167
167.1
সংজয় উবাচ
প্রাদুর্ভূতে ততস্তস্মিন্নস্ত্রে নারায়ণে তদা
প্রাবাত্সপৃষতো বায়ুরনভ্রে স্তনয়িত্নুমান্
167.2
চচাল পৃথিবী চাপি চুক্ষুভে চ মহোদধিঃ
প্রতিস্রোতঃ প্রবৃত্তাশ্চ গন্তুং তত্র সমুদ্রগাঃ
167.3
শিখরাণি ব্যদীর্যন্ত গিরীণাং তত্র ভারত
অপসব্যং মৃগাশ্চৈব পাণ্ডুপুত্রান্প্রচক্রিরে
167.4
তমসা চাবকীর্যন্ত সূর্যশ্চ কলুষোঽভবৎ
সংপতন্তি চ ভূতানি ক্রব্যাদানি প্রহৃষ্টবৎ
167.5
দেবদানবগন্ধর্বাস্ত্রস্তা আসন্বিশাং পতে
কথং কথাভবত্তীব্রা দৃষ্ট্বা তদ্ব্যাকুলং মহৎ
167.6
ব্যথিতাঃ সর্বরাজানস্তদা হ্যাসন্বিচেতসঃ
তদ্দৃষ্ট্বা ঘোররূপং তু দ্রৌণেরস্ত্রং ভয়াবহম্
167.7
ধৃতরাষ্ট্র উবাচ
নিবর্তিতেষু সৈন্যেষু দ্রোণপুত্রেণ সংয়ুগে
ভৃশং শোকাভিতপ্তেন পিতুর্বধমমৃষ্যতা
167.8
কুরূনাপততো দৃষ্ট্বা ধৃষ্টদ্যুম্নস্য রক্ষণে
কো মন্ত্রঃ পাণ্ডবেষ্বাসীত্তন্মমাচক্ষ্ব সংজয়
167.9
সংজয় উবাচ
প্রাগেব বিদ্রুতান্দৃষ্ট্বা ধার্তরাষ্ট্রান্যুধিষ্ঠিরঃ
পুনশ্চ তুমুলং শব্দং শ্রুত্বার্জুনমভাষত
167.10
আচার্যে নিহতে দ্রোণে ধৃষ্টদ্যুম্নেন সংয়ুগে
নিহতে বজ্রহস্তেন যথা বৃত্রে মহাসুরে
167.11
নাশংসন্ত জয়ং যুদ্ধে দীনাত্মানো ধনংজয়
আত্মত্রাণে মতিং কৃত্বা প্রাদ্রবন্কুরবো যথা
167.12
কেচিদ্ভ্রান্তৈ রথৈস্তূর্ণং নিহতপার্ষ্ণিয়ন্তৃভিঃ
বিপতাকধ্বজচ্ছত্রৈঃ পার্থিবাঃ শীর্ণকূবরৈঃ
167.13
ভগ্ননীডৈরাকুলাশ্বৈরারুহ্যান্যে বিচেতসঃ
ভীতাঃ পাদৈর্হয়ান্কেচিত্ত্বরয়ন্তঃ স্বয়ং রথৈঃ
যুগচক্রাক্ষভগ্নৈশ্চ দ্রুতাঃ কেচিদ্ভয়াতুরাঃ
167.14
গজস্কন্ধেষু সংস্যূতা নারাচৈশ্চলিতাসনাঃ
শরার্তৈর্বিদ্রুতৈর্নাগৈর্হৃতাঃ কেচিদ্দিশো দশ
167.15
বিশস্ত্রকবচাশ্চান্যে বাহনেভ্যঃ ক্ষিতিং গতাঃ
সংছিন্না নেমিষু গতা মৃদিতাশ্চ হয়দ্বিপৈঃ
167.16
ক্রোশন্তস্তাত পুত্রেতি পলায়ন্তোঽপরে ভয়াৎ
নাভিজানন্তি চান্যোন্যং কশ্মলাভিহতৌজসঃ
167.17
পুত্রান্পিতৄন্সখীন্ভ্রাতৄন্সমারোপ্য দৃঢক্ষতান্
জলেন ক্লেদয়ন্ত্যন্যে বিমুচ্য কবচান্যপি
167.18
অবস্থাং তাদৃশীং প্রাপ্য হতে দ্রোণে দ্রুতং বলম্
পুনরাবর্তিতং কেন যদি জানাসি শংস মে
167.19
হয়ানাং হেষতাং শব্দঃ কুঞ্জরাণাং চ বৃংহতাম্
রথনেমিস্বনশ্চাত্র বিমিশ্রঃ শ্রূয়তে মহান্
167.20
এতে শব্দা ভৃশং তীব্রাঃ প্রবৃত্তাঃ কুরুসাগরে
মুহুর্মুহুরুদীর্যন্তঃ কম্পয়ন্তি হি মামকান্
167.21
য এষ তুমুলঃ শব্দঃ শ্রূয়তে লোমহর্ষণঃ
সেন্দ্রানপ্যেষ লোকাংস্ত্রীন্ভঞ্জ্যাদিতি মতির্মম
167.22
মন্যে বজ্রধরস্যৈষ নিনাদো ভৈরবস্বনঃ
দ্রোণে হতে কৌরবার্থং ব্যক্তমভ্যেতি বাসবঃ
167.23
প্রহৃষ্টলোমকূপাঃ স্ম সংবিগ্নরথকুঞ্জরাঃ
ধনংজয় গুরুং শ্রুত্বা তত্র নাদং সুভীষণম্
167.24
ক এষ কৌরবান্দীর্ণানবস্থাপ্য মহারথঃ
নিবর্তয়তি যুদ্ধার্থং মৃধে দেবেশ্বরো যথা
167.25
অর্জুন উবাচ
উদ্যম্যাত্মানমুগ্রায় কর্মণে ধৈর্যমাস্থিতাঃ
ধমন্তি কৌরবাঃ শঙ্খান্যস্য বীর্যমুপাশ্রিতাঃ
167.26
যত্র তে সংশয়ো রাজন্ন্যস্তশস্ত্রে গুরৌ হতে
ধার্তরাষ্ট্রানবস্থাপ্য ক এষ নদতীতি হ
167.27
হ্রীমন্তং তং মহাবাহুং মত্তদ্বিরদগামিনম্
ব্যাখ্যাস্যাম্যুগ্রকর্মাণং কুরূণামভয়ংকরম্
167.28
যস্মিঞ্জাতে দদৌ দ্রোণো গবাং দশশতং ধনম্
ব্রাহ্মণেভ্যো মহার্হেভ্যঃ সোঽশ্বত্থামৈষ গর্জতি
167.29
জাতমাত্রেণ বীরেণ যেনোচ্চৈঃশ্রবসা ইব
হেষতা কম্পিতা ভূমির্লোকাশ্চ সকলাস্ত্রয়ঃ
167.30
তচ্ছ্রুত্বান্তর্হিতং ভূতং নাম চাস্যাকরোত্তদা
অশ্বত্থামেতি সোঽদ্যৈষ শূরো নদতি পাণ্ডব
167.31
যোঽদ্যানাথ ইবাক্রম্য পার্ষতেন হতস্তথা
কর্মণা সুনৃশংসেন তস্য নাথো ব্যবস্থিতঃ
167.32
গুরুং মে যত্র পাঞ্চাল্যঃ কেশপক্ষে পরামৃশৎ
তন্ন জাতু ক্ষমেদ্দ্রৌণির্জানন্পৌরুষমাত্মনঃ
167.33
উপচীর্ণো গুরুর্মিথ্যা ভবতা রাজ্যকারণাৎ
ধর্মজ্ঞেন সতা নাম সোঽধর্মঃ সুমহান্কৃতঃ
167.34
সর্বধর্মোপপন্নোঽয়ং মম শিষ্যশ্চ পাণ্ডবঃ
নায়ং বক্ষ্যতি মিথ্যেতি প্রত্যয়ং কৃতবাংস্ত্বয়ি
167.35
স সত্যকঞ্চুকং নাম প্রবিষ্টেন ততোঽনৃতম্
আচার্য উক্তো ভবতা হতঃ কুঞ্জর ইত্যুত
167.36
ততঃ শস্ত্রং সমুত্সৃজ্য নির্মমো গতচেতনঃ
আসীত্স বিহ্বলো রাজন্যথা দৃষ্টস্ত্বয়া বিভুঃ
167.37
স তু শোকেন চাবিষ্টো বিমুখঃ পুত্রবত্সলঃ
শাশ্বতং ধর্মমুত্সৃজ্য গুরুঃ শিষ্যেণ ঘাতিতঃ
167.38
ন্যস্তশস্ত্রমধর্মেণ ঘাতয়িত্বা গুরুং ভবান্
রক্ষত্বিদানীং সামাত্যো যদি শক্নোষি পার্ষতম্
167.39
গ্রস্তমাচার্যপুত্রেণ ক্রুদ্ধেন হতবন্ধুনা
সর্বে বয়ং পরিত্রাতুং ন শক্ষ্যামোঽদ্য পার্ষতম্
167.40
সৌহার্দং সর্বভূতেষু যঃ করোত্যতিমাত্রশঃ
সোঽদ্য কেশগ্রহং শ্রুত্বা পিতুর্ধক্ষ্যতি নো রণে
167.41
বিক্রোশমানে হি ময়ি ভৃশমাচার্যগৃদ্ধিনি
অবকীর্য স্বধর্মং হি শিষ্যেণ নিহতো গুরুঃ
167.42
যদা গতং বয়ো ভূয়ঃ শিষ্টমল্পতরং চ নঃ
তস্যেদানীং বিকারোঽয়মধর্মো যত্কৃতো মহান্
167.43
পিতেব নিত্যং সৌহার্দাত্পিতেব স হি ধর্মতঃ
সোঽল্পকালস্য রাজ্যস্য কারণান্নিহতো গুরুঃ
167.44
ধৃতরাষ্ট্রেণ ভীষ্মায় দ্রোণায় চ বিশাং পতে
বিসৃষ্টা পৃথিবী সর্বা সহ পুত্রৈশ্চ তত্পরৈঃ
167.45
স প্রাপ্য তাদৃশীং বৃত্তিং সত্কৃতঃ সততং পরৈঃ
অবৃণীত সদা পুত্রান্মামেবাভ্যধিকং গুরুঃ
167.46
অক্ষীয়মাণো ন্যস্তাস্ত্রস্ত্বদ্বাক্যেনাহবে হতঃ
ন ত্বেনং যুধ্যমানং বৈ হন্যাদপি শতক্রতুঃ
167.47
তস্যাচার্যস্য বৃদ্ধস্য দ্রোহো নিত্যোপকারিণঃ
কৃতো হ্যনার্যৈরস্মাভী রাজ্যার্থে লঘুবুদ্ধিভিঃ
167.48
পুত্রান্ভ্রাতৄন্পিতৄন্দারাঞ্জীবিতং চৈব বাসবিঃ
ত্যজেত্সর্বং মম প্রেম্ণা জানাত্যেতদ্ধি মে গুরুঃ
167.49
স ময়া রাজ্যকামেন হন্যমানোঽপ্যুপেক্ষিতঃ
তস্মাদবাক্শিরা রাজন্প্রাপ্তোঽস্মি নরকং বিভো
167.50
ব্রাহ্মণং বৃদ্ধমাচার্যং ন্যস্তশস্ত্রং যথা মুনিম্
ঘাতয়িত্বাদ্য রাজ্যার্থে মৃতং শ্রেয়ো ন জীবিতম্