Utshovঅধ্যায় 166
166.1
ধৃতরাষ্ট্র উবাচ
অধর্মেণ হতং শ্রুত্বা ধৃষ্টদ্যুম্নেন সংজয়
ব্রাহ্মণং পিতরং বৃদ্ধমশ্বত্থামা কিমব্রবীৎ
166.2
মানুষং বারুণাগ্নেয়ং ব্রাহ্মমস্ত্রং চ বীর্যবান্
ঐন্দ্রং নারায়ণং চৈব যস্মিন্নিত্যং প্রতিষ্ঠিতম্
166.3
তমধর্মেণ ধর্মিষ্ঠং ধৃষ্টদ্যুম্নেন সংজয়
শ্রুত্বা নিহতমাচার্যমশ্বত্থামা কিমব্রবীৎ
166.4
যেন রামাদবাপ্যেহ ধনুর্বেদং মহাত্মনা
প্রোক্তান্যস্ত্রাণি দিব্যানি পুত্রায় গুরুকাঙ্ক্ষিণে
166.5
একমেব হি লোকেঽস্মিন্নাত্মনো গুণবত্তরম্
ইচ্ছন্তি পুত্রং পুরুষা লোকে নান্যং কথংচন
166.6
আচার্যাণাং ভবন্ত্যেব রহস্যানি মহাত্মনাম্
তানি পুত্রায় বা দদ্যুঃ শিষ্যায়ানুগতায় বা
166.7
স শিল্পং প্রাপ্য তত্সর্বং সবিশেষং চ সংজয়
শূরঃ শারদ্বতীপুত্রঃ সংখ্যে দ্রোণাদনন্তরঃ
166.8
রামস্যানুমতঃ শাস্ত্রে পুরংদরসমো যুধি
কার্তবীর্যসমো বীর্যে বৃহস্পতিসমো মতৌ
166.9
মহীধরসমো ধৃত্যা তেজসাগ্নিসমো যুবা
সমুদ্র ইব গাম্ভীর্যে ক্রোধে সর্পবিষোপমঃ
166.10
স রথী প্রথমো লোকে দৃঢধন্বা জিতক্লমঃ
শীঘ্রোঽনিল ইবাক্রন্দে চরন্ক্রুদ্ধ ইবান্তকঃ
166.11
অস্যতা যেন সংগ্রামে ধরণ্যভিনিপীডিতা
যো ন ব্যথতি সংগ্রামে বীরঃ সত্যপরাক্রমঃ
166.12
বেদস্নাতো ব্রতস্নাতো ধনুর্বেদে চ পারগঃ
মহোদধিরিবাক্ষোভ্যো রামো দাশরথির্যথা
166.13
তমধর্মেণ ধর্মিষ্ঠং ধৃষ্টদ্যুম্নেন সংয়ুগে
শ্রুত্বা নিহতমাচার্যমশ্বত্থামা কিমব্রবীৎ
166.14
ধৃষ্টদ্যুম্নস্য যো মৃত্যুঃ সৃষ্টস্তেন মহাত্মনা
যথা দ্রোণস্য পাঞ্চাল্যো যজ্ঞসেনসুতোঽভবৎ
166.15
তং নৃশংসেন পাপেন ক্রূরেণাত্যল্পদর্শিনা
শ্রুত্বা নিহতমাচার্যমশ্বত্থামা কিমব্রবীৎ
166.16
সংজয় উবাচ
ছদ্মনা নিহতং শ্রুত্বা পিতরং পাপকর্মণা
বাষ্পেণাপূর্যত দ্রৌণী রোষেণ চ নরর্ষভ
166.17
তস্য ক্রুদ্ধস্য রাজেন্দ্র বপুর্দিব্যমদৃশ্যত
অন্তকস্যেব ভূতানি জিহীর্ষোঃ কালপর্যয়ে
166.18
অশ্রুপূর্ণে ততো নেত্রে অপমৃজ্য পুনঃ পুনঃ
উবাচ কোপান্নিঃশ্বস্য দুর্যোধনমিদং বচঃ
166.19
পিতা মম যথা ক্ষুদ্রৈর্ন্যস্তশস্ত্রো নিপাতিতঃ
ধর্মধ্বজবতা পাপং কৃতং তদ্বিদিতং মম
অনার্যং সুনৃশংসস্য ধর্মপুত্রস্য মে শ্রুতম্
166.20
যুদ্ধেষ্বপি প্রবৃত্তানাং ধ্রুবৌ জয়পরাজয়ৌ
দ্বয়মেতদ্ভবেদ্রাজন্বধস্তত্র প্রশস্যতে
166.21
ন্যায়বৃত্তো বধো যস্তু সংগ্রামে যুধ্যতো ভবেৎ
ন স দুঃখায় ভবতি তথা দৃষ্টো হি স দ্বিজঃ
166.22
গতঃ স বীরলোকায় পিতা মম ন সংশয়ঃ
ন শোচ্যঃ পুরুষব্যাঘ্রস্তথা স নিধনং গতঃ
166.23
যত্তু ধর্মপ্রবৃত্তঃ সন্কেশগ্রহণমাপ্তবান্
পশ্যতাং সর্বসৈন্যানাং তন্মে মর্মাণি কৃন্ততি
166.24
কামাত্ক্রোধাদবজ্ঞানাদ্দর্পাদ্বাল্যেন বা পুনঃ
বৈধর্মিকানি কুর্বন্তি তথা পরিভবেন চ
166.25
তদিদং পার্ষতেনেহ মহদাধর্মিকং কৃতম্
অবজ্ঞায় চ মাং নূনং নৃশংসেন দুরাত্মনা
166.26
তস্যানুবন্ধং স দ্রষ্টা ধৃষ্টদ্যুম্নঃ সুদারুণম্
অনার্যং পরমং কৃত্বা মিথ্যাবাদী চ পাণ্ডবঃ
166.27
যো হ্যসৌ ছদ্মনাচার্যং শস্ত্রং সংন্যাসয়ত্তদা
তস্যাদ্য ধর্মরাজস্য ভূমিঃ পাস্যতি শোণিতম্
166.28
সর্বোপায়ৈর্যতিষ্যামি পাঞ্চালানামহং বধে
ধৃষ্টদ্যুম্নং চ সমরে হন্তাহং পাপকারিণম্
166.29
কর্মণা যেন তেনেহ মৃদুনা দারুণেন বা
পাঞ্চালানাং বধং কৃত্বা শান্তিং লব্ধাস্মি কৌরব
166.30
যদর্থং পুরুষব্যাঘ্র পুত্রমিচ্ছন্তি মানবাঃ
প্রেত্য চেহ চ সংপ্রাপ্তং ত্রাণায় মহতো ভয়াৎ
166.31
পিত্রা তু মম সাবস্থা প্রাপ্তা নির্বন্ধুনা যথা
ময়ি শৈলপ্রতীকাশে পুত্রে শিষ্যে চ জীবতি
166.32
ধিঙ্মমাস্ত্রাণি দিব্যানি ধিগ্বাহূ ধিক্পরাক্রমম্
যন্মাং দ্রোণঃ সুতং প্রাপ্য কেশগ্রহণমাপ্তবান্
166.33
স তথাহং করিষ্যামি যথা ভরতসত্তম
পরলোকগতস্যাপি গমিষ্যাম্যনৃণঃ পিতুঃ
166.34
আর্যেণ তু ন বক্তব্যা কদাচিত্স্তুতিরাত্মনঃ
পিতুর্বধমমৃষ্যংস্তু বক্ষ্যাম্যদ্যেহ পৌরুষম্
166.35
অদ্য পশ্যন্তু মে বীর্যং পাণ্ডবাঃ সজনার্দনাঃ
মৃদ্নতঃ সর্বসৈন্যানি যুগান্তমিব কুর্বতঃ
166.36
ন হি দেবা ন গন্ধর্বা নাসুরা ন চ রাক্ষসাঃ
অদ্য শক্তা রণে জেতুং রথস্থং মাং নরর্ষভ
166.37
মদন্যো নাস্তি লোকেঽস্মিন্নর্জুনাদ্বাস্ত্রবিত্তমঃ
অহং হি জ্বলতাং মধ্যে ময়ূখানামিবাংশুমান্
প্রয়োক্তা দেবসৃষ্টানামস্ত্রাণাং পৃতনাগতঃ
166.38
কৃশাশ্বতনয়া হ্যদ্য মত্প্রয়ুক্তা মহামৃধে
দর্শয়ন্তোঽঽত্মনো বীর্যং প্রমথিষ্যন্তি পাণ্ডবান্
166.39
অদ্য সর্বা দিশো রাজন্ধারাভিরিব সংকুলাঃ
আবৃতাঃ পত্রিভিস্তীক্ষ্ণৈর্দ্রষ্টারো মামকৈরিহ
166.40
কিরন্হি শরজালানি সর্বতো ভৈরবস্বরম্
শত্রূন্নিপাতয়িষ্যামি মহাবাত ইব দ্রুমান্
166.41
ন চ জানাতি বীভত্সুস্তদস্ত্রং ন জনার্দনঃ
ন ভীমসেনো ন যমৌ ন চ রাজা যুধিষ্ঠিরঃ
166.42
ন পার্ষতো দুরাত্মাসৌ ন শিখণ্ডী ন সাত্যকিঃ
যদিদং ময়ি কৌরব্য সকল্যং সনিবর্তনম্
166.43
নারায়ণায় মে পিত্রা প্রণম্য বিধিপূর্বকম্
উপহারঃ পুরা দত্তো ব্রহ্মরূপ উপস্থিতে
166.44
তং স্বয়ং প্রতিগৃহ্যাথ ভগবান্স বরং দদৌ
বব্রে পিতা মে পরমমস্ত্রং নারায়ণং ততঃ
166.45
অথৈনমব্রবীদ্রাজন্ভগবান্দেবসত্তমঃ
ভবিতা ত্বত্সমো নান্যঃ কশ্চিদ্যুধি নরঃ ক্বচিৎ
166.46
ন ত্বিদং সহসা ব্রহ্মন্প্রয়োক্তব্যং কথংচন
ন হ্যেতদস্ত্রমন্যত্র বধাচ্ছত্রোর্নিবর্ততে
166.47
ন চৈতচ্ছক্যতে জ্ঞাতুং কো ন বধ্যেদিতি প্রভো
অবধ্যমপি হন্যাদ্ধি তস্মান্নৈতত্প্রয়োজয়েৎ
166.48
বধঃ সংখ্যে দ্রবশ্চৈব শস্ত্রাণাং চ বিসর্জনম্
প্রয়াচনং চ শত্রূণাং গমনং শরণস্য চ
166.49
এতে প্রশমনে যোগা মহাস্ত্রস্য পরংতপ
সর্বথা পীডিতো হি স্যাদবধ্যান্পীডয়ন্রণে
166.50
তজ্জগ্রাহ পিতা মহ্যমব্রবীচ্চৈব স প্রভুঃ
ত্বং বর্ষিষ্যসি দিব্যানি শস্ত্রবর্ষাণ্যনেকশঃ
অনেনাস্ত্রেণ সংগ্রামে তেজসা চ জ্বলিষ্যসি
166.51
এবমুক্ত্বা স ভগবান্দিবমাচক্রমে প্রভুঃ
এতন্নারায়ণাদস্ত্রং তত্প্রাপ্তং মম বন্ধুনা
166.52
তেনাহং পাণ্ডবাংশ্চৈব পাঞ্চালান্মত্স্যকেকয়ান্
বিদ্রাবয়িষ্যামি রণে শচীপতিরিবাসুরান্
166.53
যথা যথাহমিচ্ছেয়ং তথা ভূত্বা শরা মম
নিপতেয়ুঃ সপত্নেষু বিক্রমত্স্বপি ভারত
166.54
যথেষ্টমশ্মবর্ষেণ প্রবর্ষিষ্যে রণে স্থিতঃ
অয়োমুখৈশ্চ বিহগৈর্দ্রাবয়িষ্যে মহারথান্
পরশ্বধাংশ্চ বিবিধান্প্রসক্ষ্যেঽহমসংশয়ম্
166.55
সোঽহং নারায়ণাস্ত্রেণ মহতা শত্রুতাপন
শত্রূন্বিধ্বংসয়িষ্যামি কদর্থীকৃত্য পাণ্ডবান্
166.56
মিত্রব্রহ্মগুরুদ্বেষী জাল্মকঃ সুবিগর্হিতঃ
পাঞ্চালাপসদশ্চাদ্য ন মে জীবন্বিমোক্ষ্যতে
166.57
তচ্ছ্রুত্বা দ্রোণপুত্রস্য পর্যবর্তত বাহিনী
ততঃ সর্বে মহাশঙ্খান্দধ্মুঃ পুরুষসত্তমাঃ
166.58
ভেরীশ্চাভ্যহনন্হৃষ্টা ডিণ্ডিমাংশ্চ সহস্রশঃ
তথা ননাদ বসুধা খুরনেমিপ্রপীডিতা
স শব্দস্তুমুলঃ খং দ্যাং পৃথিবীং চ ব্যনাদয়ৎ
166.59
তং শব্দং পাণ্ডবাঃ শ্রুত্বা পর্জন্যনিনদোপমম্
সমেত্য রথিনাং শ্রেষ্ঠাঃ সহিতাঃ সংন্যমন্ত্রয়ন্
166.60
তথোক্ত্বা দ্রোণপুত্রোঽপি তদোপস্পৃশ্য ভারত
প্রাদুশ্চকার তদ্দিব্যমস্ত্রং নারায়ণং তদা