Utshovঅধ্যায় 165
165.1
সংজয় উবাচ
ক্রূরমায়োধনং জজ্ঞে তস্মিন্রাজসমাগমে
রুদ্রস্যেব হি ক্রুদ্ধস্য নিঘ্নতস্তু পশূন্যথা
165.2
হস্তানামুত্তমাঙ্গানাং কার্মুকাণাং চ ভারত
ছত্রাণাং চাপবিদ্ধানাং চামরাণাং চ সংয়ুগে
165.3
ভগ্নচক্রৈ রথৈশ্চাপি পাতিতৈশ্চ মহাধ্বজৈঃ
সাদিভিশ্চ হতৈঃ শূরৈঃ সংকীর্ণা বসুধাভবৎ
165.4
বাণপাতনিকৃত্তাস্তু যোধাস্তে কুরুসত্তম
চেষ্টন্তো বিবিধাশ্চেষ্টা ব্যদৃশ্যন্ত মহাহবে
165.5
বর্তমানে তথা যুদ্ধে ঘোরে দেবাসুরোপমে
অব্রবীত্ক্ষত্রিয়াংস্তত্র ধর্মরাজো যুধিষ্ঠিরঃ
অভিদ্রবত সংয়ত্তাঃ কুম্ভয়োনিং মহারথাঃ
165.6
এষ বৈ পার্ষতো বীরো ভারদ্বাজেন সংগতঃ
ঘটতে চ যথাশক্তি ভারদ্বাজস্য নাশনে
165.7
যাদৃশানি হি রূপাণি দৃশ্যন্তে নো মহারণে
অদ্য দ্রোণং রণে ক্রুদ্ধঃ পাতয়িষ্যতি পার্ষতঃ
তে যূয়ং সহিতা ভূত্বা কুম্ভয়োনিং পরীপ্সত
165.8
যুধিষ্ঠিরসমাজ্ঞপ্তাঃ সৃঞ্জয়ানাং মহারথাঃ
অভ্যদ্রবন্ত সংয়ত্তা ভারদ্বাজং জিঘাংসবঃ
165.9
তান্সমাপততঃ সর্বান্ভারদ্বাজো মহারথঃ
অভ্যদ্রবত বেগেন মর্তব্যমিতি নিশ্চিতঃ
165.10
প্রয়াতে সত্যসংধে তু সমকম্পত মেদিনী
ববুর্বাতাঃ সনির্ঘাতাস্ত্রাসয়ন্তো বরূথিনীম্
165.11
পপাত মহতী চোল্কা আদিত্যান্নির্গতেব হ
দীপয়ন্তীব তাপেন শংসন্তীব মহদ্ভয়ম্
165.12
জজ্বলুশ্চৈব শস্ত্রাণি ভারদ্বাজস্য মারিষ
রথাঃ স্বনন্তি চাত্যর্থং হয়াশ্চাশ্রূণ্যবাসৃজন্
165.13
হতৌজা ইব চাপ্যাসীদ্ভারদ্বাজো মহারথঃ
ঋষীণাং ব্রহ্মবাদানাং স্বর্গস্য গমনং প্রতি
সুয়ুদ্ধেন ততঃ প্রাণানুত্স্রষ্টুমুপচক্রমে
165.14
ততশ্চতুর্দিশং সৈন্যৈর্দ্রুপদস্যাভিসংবৃতঃ
নির্দহন্ক্ষত্রিয়ব্রাতান্দ্রোণঃ পর্যচরদ্রণে
165.15
হত্বা বিংশতিসাহস্রান্ক্ষত্রিয়ানরিমর্দনঃ
দশায়ুতানি তীক্ষ্ণাগ্রৈরবধীদ্বিশিখৈঃ শিতৈঃ
165.16
সোঽতিষ্ঠদাহবে যত্তো বিধূম ইব পাবকঃ
ক্ষত্রিয়াণামভাবায় ব্রাহ্মমাত্মানমাস্থিতঃ
165.17
পাঞ্চাল্যং বিরথং ভীমো হতসর্বায়ুধং বশী
অবিষণ্ণং মহাত্মানং ত্বরমাণঃ সমভ্যয়াৎ
165.18
ততঃ স্বরথমারোপ্য পাঞ্চাল্যমরিমর্দনঃ
অব্রবীদভিসংপ্রেক্ষ্য দ্রোণমস্যন্তমন্তিকাৎ
165.19
ন ত্বদন্য ইহাচার্যং যোদ্ধুমুত্সহতে পুমান্
ত্বরস্ব প্রাগ্বধায়ৈব ত্বয়ি ভারঃ সমাহিতঃ
165.20
স তথোক্তো মহাবাহুঃ সর্বভারসহং নবম্
অভিপত্যাদদে ক্ষিপ্রমায়ুধপ্রবরং দৃঢম্
165.21
সংরব্ধশ্চ শরানস্যন্দ্রোণং দুর্বারণং রণে
বিবারয়িষুরাচার্যং শরবর্ষৈরবাকিরৎ
165.22
তৌ ন্যবারয়তাং শ্রেষ্ঠৌ সংরব্ধৌ রণশোভিনৌ
উদীরয়েতাং ব্রাহ্মাণি দিব্যান্যস্ত্রাণ্যনেকশঃ
165.23
স মহাস্ত্রৈর্মহারাজ দ্রোণমাচ্ছাদয়দ্রণে
নিহত্য সর্বাণ্যস্ত্রাণি ভারদ্বাজস্য পার্ষতঃ
165.24
স বসাতীঞ্শিবীংশ্চৈব বাহ্লীকান্কৌরবানপি
রক্ষিষ্যমাণান্সংগ্রামে দ্রোণং ব্যধমদচ্যুতঃ
165.25
ধৃষ্টদ্যুম্নস্তদা রাজন্গভস্তিভিরিবাংশুমান্
বভৌ প্রচ্ছাদয়ন্নাশাঃ শরজালৈঃ সমন্ততঃ
165.26
তস্য দ্রোণো ধনুশ্ছিত্ত্বা বিদ্ধ্বা চৈনং শিলীমুখৈঃ
মর্মাণ্যভ্যহনদ্ভূয়ঃ স ব্যথাং পরমামগাৎ
165.27
ততো ভীমো দৃঢক্রোধো দ্রোণস্যাশ্লিষ্য তং রথম্
শনকৈরিব রাজেন্দ্র দ্রোণং বচনমব্রবীৎ
165.28
যদি নাম ন যুধ্যেরঞ্শিক্ষিতা ব্রহ্মবন্ধবঃ
স্বকর্মভিরসংতুষ্টা ন স্ম ক্ষত্রং ক্ষয়ং ব্রজেৎ
165.29
অহিংসা সর্বভূতেষু ধর্মং জ্যায়স্তরং বিদুঃ
তস্য চ ব্রাহ্মণো মূলং ভবাংশ্চ ব্রহ্মবিত্তমঃ
165.30
শ্বপাকবন্ম্লেচ্ছগণান্হত্বা চান্যান্পৃথগ্বিধান্
অজ্ঞানান্মূঢবদ্ব্রহ্মন্পুত্রদারধনেপ্সয়া
165.31
একস্যার্থে বহূন্হত্বা পুত্রস্যাধর্মবিদ্যথা
স্বকর্মস্থান্বিকর্মস্থো ন ব্যপত্রপসে কথম্
165.32
স চাদ্য পতিতঃ শেতে পৃষ্টেনাবেদিতস্তব
ধর্মরাজেন তদ্বাক্যং নাতিশঙ্কিতুমর্হসি
165.33
এবমুক্তস্ততো দ্রোণো ভীমেনোত্সৃজ্য তদ্ধনুঃ
সর্বাণ্যস্ত্রাণি ধর্মাত্মা হাতুকামোঽভ্যভাষত
কর্ণ কর্ণ মহেষ্বাস কৃপ দুর্যোধনেতি চ
165.34
সংগ্রামে ক্রিয়তাং যত্নো ব্রবীম্যেষ পুনঃ পুনঃ
পাণ্ডবেভ্যঃ শিবং বোঽস্তু শস্ত্রমভ্যুত্সৃজাম্যহম্
165.35
ইতি তত্র মহারাজ প্রাক্রোশদ্দ্রৌণিমেব চ
উত্সৃজ্য চ রণে শস্ত্রং রথোপস্থে নিবেশ্য চ
অভয়ং সর্বভূতানাং প্রদদৌ যোগয়ুক্তবান্
165.36
তস্য তচ্ছিদ্রমাজ্ঞায় ধৃষ্টদ্যুম্নঃ সমুত্থিতঃ
খড্গী রথাদবপ্লুত্য সহসা দ্রোণমভ্যয়াৎ
165.37
হাহাকৃতানি ভূতানি মানুষাণীতরাণি চ
দ্রোণং তথাগতং দৃষ্ট্বা ধৃষ্টদ্যুম্নবশং গতম্
165.38
হাহাকারং ভৃশং চক্রুরহো ধিগিতি চাব্রুবন্
দ্রোণোঽপি শস্ত্রাণ্যুত্সৃজ্য পরমং সাম্যমাস্থিতঃ
165.39
তথোক্ত্বা যোগমাস্থায় জ্যোতির্ভূতো মহাতপাঃ
দিবমাক্রামদাচার্যঃ সদ্ভিঃ সহ দুরাক্রমম্
165.40
দ্বৌ সূর্যাবিতি নো বুদ্ধিরাসীত্তস্মিংস্তথা গতে
একাগ্রমিব চাসীদ্ধি জ্যোতির্ভিঃ পূরিতং নভঃ
সমপদ্যত চার্কাভে ভারদ্বাজনিশাকরে
165.41
নিমেষমাত্রেণ চ তজ্জ্যোতিরন্তরধীয়ত
আসীত্কিলকিলাশব্দঃ প্রহৃষ্টানাং দিবৌকসাম্
ব্রহ্মলোকং গতে দ্রোণে ধৃষ্টদ্যুম্নে চ মোহিতে
165.42
বয়মেব তদাদ্রাক্ষ্ম পঞ্চ মানুষয়োনয়ঃ
যোগয়ুক্তং মহাত্মানং গচ্ছন্তং পরমাং গতিম্
165.43
অহং ধনংজয়ঃ পার্থঃ কৃপঃ শারদ্বতো দ্বিজঃ
বাসুদেবশ্চ বার্ষ্ণেয়ো ধর্মরাজশ্চ পাণ্ডবঃ
165.44
অন্যে তু সর্বে নাপশ্যন্ভারদ্বাজস্য ধীমতঃ
মহিমানং মহারাজ যোগয়ুক্তস্য গচ্ছতঃ
165.45
গতিং পরমিকাং প্রাপ্তমজানন্তো নৃয়োনয়ঃ
নাপশ্যন্গচ্ছমানং হি তং সার্ধমৃষিপুংগবৈঃ
আচার্যং যোগমাস্থায় ব্রহ্মলোকমরিংদমম্
165.46
বিতুন্নাঙ্গং শরশতৈর্ন্যস্তায়ুধমসৃক্ক্ষরম্
ধিক্কৃতঃ পার্ষতস্তং তু সর্বভূতৈঃ পরামৃশৎ
165.47
তস্য মূর্ধানমালম্ব্য গতসত্ত্বস্য দেহিনঃ
কিংচিদব্রুবতঃ কায়াদ্বিচকর্তাসিনা শিরঃ
165.48
হর্ষেণ মহতা যুক্তো ভারদ্বাজে নিপাতিতে
সিংহনাদরবং চক্রে ভ্রাময়ন্খড্গমাহবে
165.49
আকর্ণপলিতঃ শ্যামো বয়সাশীতিপঞ্চকঃ
ত্বত্কৃতে ব্যচরত্সংখ্যে স তু ষোডশবর্ষবৎ
165.50
উক্তবাংশ্চ মহাবাহুঃ কুন্তীপুত্রো ধনংজয়ঃ
জীবন্তমানয়াচার্যং মা বধীর্দ্রুপদাত্মজ
165.51
ন হন্তব্যো ন হন্তব্য ইতি তে সৈনিকাশ্চ হ
উত্ক্রোশন্নর্জুনশ্চৈব সানুক্রোশস্তমাদ্রবৎ
165.52
ক্রোশমানেঽর্জুনে চৈব পার্থিবেষু চ সর্বশঃ
ধৃষ্টদ্যুম্নোঽবধীদ্দ্রোণং রথতল্পে নরর্ষভম্
165.53
শোণিতেন পরিক্লিন্নো রথাদ্ভূমিমরিংদমঃ
লোহিতাঙ্গ ইবাদিত্যো দুর্দর্শঃ সমপদ্যত
এবং তং নিহতং সংখ্যে দদৃশে সৈনিকো জনঃ
165.54
ধৃষ্টদ্যুম্নস্তু তদ্রাজন্ভারদ্বাজশিরো মহৎ
তাবকানাং মহেষ্বাসঃ প্রমুখে তত্সমাক্ষিপৎ
165.55
তে তু দৃষ্ট্বা শিরো রাজন্ভারদ্বাজস্য তাবকাঃ
পলায়নকৃতোত্সাহা দুদ্রুবুঃ সর্বতোদিশম্
165.56
দ্রোণস্তু দিবমাস্থায় নক্ষত্রপথমাবিশৎ
অহমেব তদাদ্রাক্ষং দ্রোণস্য নিধনং নৃপ
165.57
ঋষেঃ প্রসাদাত্কৃষ্ণস্য সত্যবত্যাঃ সুতস্য চ
বিধূমামিব সংয়ান্তীমুল্কাং প্রজ্বলিতামিব
অপশ্যাম দিবং স্তব্ধ্বা গচ্ছন্তং তং মহাদ্যুতিম্
165.58
হতে দ্রোণে নিরুত্সাহান্কুরূন্পাণ্ডবসৃঞ্জয়াঃ
অভ্যদ্রবন্মহাবেগাস্ততঃ সৈন্যং ব্যদীর্যত
165.59
নিহতা হয়ভূয়িষ্ঠাঃ সংগ্রামে নিশিতৈঃ শরৈঃ
তাবকা নিহতে দ্রোণে গতাসব ইবাভবন্
165.60
পরাজয়মথাবাপ্য পরত্র চ মহদ্ভয়ম্
উভয়েনৈব তে হীনা নাবিন্দন্ধৃতিমাত্মনঃ
165.61
অন্বিচ্ছন্তঃ শরীরং তু ভারদ্বাজস্য পার্থিবাঃ
নাধ্যগচ্ছংস্তদা রাজন্কবন্ধায়ুতসংকুলে
165.62
পাণ্ডবাস্তু জয়ং লব্ধ্বা পরত্র চ মহদ্যশঃ
বাণশব্দরবাংশ্চক্রুঃ সিংহনাদাংশ্চ পুষ্কলান্
165.63
ভীমসেনস্ততো রাজন্ধৃষ্টদ্যুম্নশ্চ পার্ষতঃ
বরূথিন্যামনৃত্যেতাং পরিষ্বজ্য পরস্পরম্
165.64
অব্রবীচ্চ তদা ভীমঃ পার্ষতং শত্রুতাপনম্
ভূয়োঽহং ত্বাং বিজয়িনং পরিষ্বক্ষ্যামি পার্ষত
সূতপুত্রে হতে পাপে ধার্তরাষ্ট্রে চ সংয়ুগে
165.65
এতাবদুক্ত্বা ভীমস্তু হর্ষেণ মহতা যুতঃ
বাহুশব্দেন পৃথিবীং কম্পয়ামাস পাণ্ডবঃ
165.66
তস্য শব্দেন বিত্রস্তাঃ প্রাদ্রবংস্তাবকা যুধি
ক্ষত্রধর্মং সমুত্সৃজ্য পলায়নপরায়ণাঃ
165.67
পাণ্ডবাস্তু জয়ং লব্ধ্বা হৃষ্টা হ্যাসন্বিশাং পতে
অরিক্ষয়ং চ সংগ্রামে তেন তে সুখমাপ্নুবন্
165.68
ততো দ্রোণে হতে রাজন্কুরবঃ শস্ত্রপীডিতাঃ
হতপ্রবীরা বিধ্বস্তা ভৃশং শোকপরায়ণাঃ
165.69
বিচেতসো হতোত্সাহাঃ কশ্মলাভিহতৌজসঃ
আর্তস্বরেণ মহতা পুত্রং তে পর্যবারয়ন্
165.70
রজস্বলা বেপমানা বীক্ষমাণা দিশো দশ
অশ্রুকণ্ঠা যথা দৈত্যা হিরণ্যাক্ষে পুরা হতে
165.71
স তৈঃ পরিবৃতো রাজা ত্রস্তৈঃ ক্ষুদ্রমৃগৈরিব
অশক্নুবন্নবস্থাতুমপায়াত্তনয়স্তব
165.72
ক্ষুত্পিপাসাপরিশ্রান্তাস্তে যোধাস্তব ভারত
আদিত্যেন চ সংতপ্তা ভৃশং বিমনসোঽভবন্
165.73
ভাস্করস্যেব পতনং সমুদ্রস্যেব শোষণম্
বিপর্যাসং যথা মেরোর্বাসবস্যেব নির্জয়ম্
165.74
অমর্ষণীয়ং তদ্দৃষ্ট্বা ভারদ্বাজস্য পাতনম্
ত্রস্তরূপতরা রাজন্কৌরবাঃ প্রাদ্রবন্ভয়াৎ
165.75
গান্ধাররাজঃ শকুনিস্ত্রস্তস্ত্রস্ততরৈঃ সহ
হতং রুক্মরথং দৃষ্ট্বা প্রাদ্রবত্সহিতো রথৈঃ
165.76
বরূথিনীং বেগবতীং বিদ্রুতাং সপতাকিনীম্
পরিগৃহ্য মহাসেনাং সূতপুত্রোঽপয়াদ্ভয়াৎ
165.77
রথনাগাশ্বকলিলাং পুরস্কৃত্য তু বাহিনীম্
মদ্রাণামীশ্বরঃ শল্যো বীক্ষমাণোঽপয়াদ্ভয়াৎ
165.78
হতপ্রবীরৈর্ভূয়িষ্ঠং দ্বিপৈর্বহুপদাতিভিঃ
বৃতঃ শারদ্বতোঽগচ্ছত্কষ্টং কষ্টমিতি ব্রুবন্
165.79
ভোজানীকেন শিষ্টেন কলিঙ্গারট্টবাহ্লিকৈঃ
কৃতবর্মা বৃতো রাজন্প্রায়াত্সুজবনৈর্হয়ৈঃ
165.80
পদাতিগণসংয়ুক্তস্ত্রস্তো রাজন্ভয়ার্দিতঃ
উলূকঃ প্রাদ্রবত্তত্র দৃষ্ট্বা দ্রোণং নিপাতিতম্
165.81
দর্শনীয়ো যুবা চৈব শৌর্যে চ কৃতলক্ষণঃ
দুঃশাসনো ভৃশোদ্বিগ্নঃ প্রাদ্রবদ্গজসংবৃতঃ
165.82
গজাশ্বরথসংয়ুক্তো বৃতশ্চৈব পদাতিভিঃ
দুর্যোধনো মহারাজ প্রায়াত্তত্র মহারথঃ
165.83
গজান্রথান্সমারুহ্য পরস্যাপি হয়াঞ্জনাঃ
প্রকীর্ণকেশা বিধ্বস্তা ন দ্বাবেকত্র ধাবতঃ
165.84
নেদমস্তীতি পুরুষা হতোত্সাহা হতৌজসঃ
উত্সৃজ্য কবচানন্যে প্রাদ্রবংস্তাবকা বিভো
165.85
অন্যোন্যং তে সমাক্রোশন্সৈনিকা ভরতর্ষভ
তিষ্ঠ তিষ্ঠেতি ন চ তে স্বয়ং তত্রাবতস্থিরে
165.86
ধুর্যান্প্রমুচ্য তু রথাদ্ধতসূতান্স্বলংকৃতান্
অধিরুহ্য হয়ান্যোধাঃ ক্ষিপ্রং পদ্ভিরচোদয়ন্
165.87
দ্রবমাণে তথা সৈন্যে ত্রস্তরূপে হতৌজসি
প্রতিস্রোত ইব গ্রাহো দ্রোণপুত্রঃ পরানিয়াৎ
165.88
হত্বা বহুবিধাং সেনাং পাণ্ডূনাং যুদ্ধদুর্মদঃ
কথংচিত্সংকটান্মুক্তো মত্তদ্বিরদবিক্রমঃ
165.89
দ্রবমাণং বলং দৃষ্ট্বা পলায়নকৃতক্ষণম্
দুর্যোধনং সমাসাদ্য দ্রোণপুত্রোঽব্রবীদিদম্
165.90
কিমিয়ং দ্রবতে সেনা ত্রস্তরূপেব ভারত
দ্রবমাণাং চ রাজেন্দ্র নাবস্থাপয়সে রণে
165.91
ত্বং চাপি ন যথাপূর্বং প্রকৃতিস্থো নরাধিপ
কর্ণপ্রভৃতয়শ্চেমে নাবতিষ্ঠন্তি পার্থিবাঃ
165.92
অন্যেষ্বপি চ যুদ্ধেষু নৈব সেনাদ্রবত্তদা
কচ্চিত্ক্ষেমং মহাবাহো তব সৈন্যস্য ভারত
165.93
কস্মিন্নিদং হতে রাজন্রথসিংহে বলং তব
এতামবস্থাং সংপ্রাপ্তং তন্মমাচক্ষ্ব কৌরব
165.94
তত্তু দুর্যোধনঃ শ্রুত্বা দ্রোণপুত্রস্য ভাষিতম্
ঘোরমপ্রিয়মাখ্যাতুং নাশকত্পার্থিবর্ষভঃ
165.95
ভিন্না নৌরিব তে পুত্রো নিমগ্নঃ শোকসাগরে
বাষ্পেণ পিহিতো দৃষ্ট্বা দ্রোণপুত্রং রথে স্থিতম্
165.96
ততঃ শারদ্বতং রাজা সব্রীডমিদমব্রবীৎ
শংসেহ সর্বং ভদ্রং তে যথা সৈন্যমিদং দ্রুতম্
165.97
অথ শারদ্বতো রাজন্নার্তিং গচ্ছন্পুনঃ পুনঃ
শশংস দ্রোণপুত্রায় যথা দ্রোণো নিপাতিতঃ
165.98
কৃপ উবাচ
বয়ং দ্রোণং পুরস্কৃত্য পৃথিব্যাং প্রবরং রথম্
প্রাবর্তয়াম সংগ্রামং পাঞ্চালৈরেব কেবলৈঃ
165.99
ততঃ প্রবৃত্তে সংগ্রামে বিমিশ্রাঃ কুরুসোমকাঃ
অন্যোন্যমভিগর্জন্তঃ শস্ত্রৈর্দেহানপাতয়ন্
165.100
ততো দ্রোণো ব্রাহ্মমস্ত্রং বিকুর্বাণো নরর্ষভঃ
অহনচ্ছাত্রবান্ভল্লৈঃ শতশোঽথ সহস্রশঃ
165.101
পাণ্ডবাঃ কেকয়া মত্স্যাঃ পাঞ্চালাশ্চ বিশেষতঃ
সংখ্যে দ্রোণরথং প্রাপ্য ব্যনশন্কালচোদিতাঃ
165.102
সহস্রং রথসিংহানাং দ্বিসাহস্রং চ দন্তিনাম্
দ্রোণো ব্রহ্মাস্ত্রনির্দগ্ধং প্রেষয়ামাস মৃত্যবে
165.103
আকর্ণপলিতঃ শ্যামো বয়সাশীতিপঞ্চকঃ
রণে পর্যচরদ্দ্রোণো বৃদ্ধঃ ষোডশবর্ষবৎ
165.104
ক্লিশ্যমানেষু সৈন্যেষু বধ্যমানেষু রাজসু
অমর্ষবশমাপন্নাঃ পাঞ্চালা বিমুখাভবন্
165.105
তেষু কিংচিত্প্রভগ্নেষু বিমুখেষু সপত্নজিৎ
দিব্যমস্ত্রং বিকুর্বাণো বভূবার্ক ইবোদিতঃ
165.106
স মধ্যং প্রাপ্য পাণ্ডূনাং শররশ্মিঃ প্রতাপবান্
মধ্যংগত ইবাদিত্যো দুষ্প্রেক্ষ্যস্তে পিতাভবৎ
165.107
তে দহ্যমানা দ্রোণেন সূর্যেণেব বিরাজতা
দগ্ধবীর্যা নিরুত্সাহা বভূবুর্গতচেতসঃ
165.108
তান্দৃষ্ট্বা পীডিতান্বাণৈর্দ্রোণেন মধুসূদনঃ
জয়ৈষী পাণ্ডুপুত্রাণামিদং বচনমব্রবীৎ
165.109
নৈষ জাতু পরৈঃ শক্যো জেতুং শস্ত্রভৃতাং বরঃ
অপি বৃত্রহণা সংখ্যে রথয়ূথপয়ূথপঃ
165.110
তে যূয়ং ধর্মমুত্সৃজ্য জয়ং রক্ষত পাণ্ডবাঃ
যথা বঃ সংয়ুগে সর্বান্ন হন্যাদ্রুক্মবাহনঃ
165.111
অশ্বত্থাম্নি হতে নৈষ যুধ্যেদিতি মতির্মম
হতং তং সংয়ুগে কশ্চিদাখ্যাত্বস্মৈ মৃষা নরঃ
165.112
এতন্নারোচয়দ্বাক্যং কুন্তীপুত্রো ধনংজয়ঃ
অরোচয়ংস্তু সর্বেঽন্যে কৃচ্ছ্রেণ তু যুধিষ্ঠিরঃ
165.113
ভীমসেনস্তু সব্রীডমব্রবীত্পিতরং তব
অশ্বত্থামা হত ইতি তচ্চাবুধ্যত তে পিতা
165.114
স শঙ্কমানস্তন্মিথ্যা ধর্মরাজমপৃচ্ছত
হতং বাপ্যহতং বাজৌ ত্বাং পিতা পুত্রবত্সলঃ
165.115
তদতথ্যভয়ে মগ্নো জয়ে সক্তো যুধিষ্ঠিরঃ
অশ্বত্থামানমাহেদং হতঃ কুঞ্জর ইত্যুত
ভীমেন গিরিবর্ষ্মাণং মালবস্যেন্দ্রবর্মণঃ
165.116
উপসৃত্য তদা দ্রোণমুচ্চৈরিদমভাষত
যস্যার্থে শস্ত্রমাধত্সে যমবেক্ষ্য চ জীবসি
পুত্রস্তে দয়িতো নিত্যং সোঽশ্বত্থামা নিপাতিতঃ
165.117
তচ্ছ্রুত্বা বিমনাস্তত্র আচার্যো মহদপ্রিয়ম্
নিয়ম্য দিব্যান্যস্ত্রাণি নায়ুধ্যত যথা পুরা
165.118
তং দৃষ্ট্বা পরমোদ্বিগ্নং শোকোপহতচেতসম্
পাঞ্চালরাজস্য সুতঃ ক্রূরকর্মা সমাদ্রবৎ
165.119
তং দৃষ্ট্বা বিহিতং মৃত্যুং লোকতত্ত্ববিচক্ষণঃ
দিব্যান্যস্ত্রাণ্যথোত্সৃজ্য রণে প্রায় উপাবিশৎ
165.120
ততোঽস্য কেশান্সব্যেন গৃহীত্বা পাণিনা তদা
পার্ষতঃ ক্রোশমানানাং বীরাণামচ্ছিনচ্ছিরঃ
165.121
ন হন্তব্যো ন হন্তব্য ইতি তে সর্বতোঽব্রুবন্
তথৈব চার্জুনো বাহাদবরুহ্যৈনমাদ্রবৎ
165.122
উদ্যম্য বাহূ ত্বরিতো ব্রুবাণশ্চ পুনঃ পুনঃ
জীবন্তমানয়াচার্যং মা বধীরিতি ধর্মবিৎ
165.123
তথাপি বার্যমাণেন কৌরবৈরর্জুনেন চ
হত এব নৃশংসেন পিতা তব নরর্ষভ
165.124
সৈনিকাশ্চ ততঃ সর্বে প্রাদ্রবন্ত ভয়ার্দিতাঃ
বয়ং চাপি নিরুত্সাহা হতে পিতরি তেঽনঘ
165.125
সংজয় উবাচ
তচ্ছ্রুত্বা দ্রোণপুত্রস্তু নিধনং পিতুরাহবে
ক্রোধমাহারয়ত্তীব্রং পদাহত ইবোরগঃ