UtshovChapter 165
165.1
संजय उवाच
क्रूरमायोधनं जज्ञे तस्मिन्राजसमागमे
रुद्रस्येव हि क्रुद्धस्य निघ्नतस्तु पशून्यथा
Sanjaya uvacha
Kruramayodhanam jagye tasminrajasamagame
Rudrasyeva hi kruddhasya nighnatastu pashunyatha
165.2
हस्तानामुत्तमाङ्गानां कार्मुकाणां च भारत
छत्राणां चापविद्धानां चामराणां च संयुगे
Hastanamuttamanganam karmukanam cha bharata
Chhatranam chapaviddhanam chamaranam cha sanyuge
165.3
भग्नचक्रै रथैश्चापि पातितैश्च महाध्वजैः
सादिभिश्च हतैः शूरैः संकीर्णा वसुधाभवत्
Bhagnachakrai rathaishchapi patitaishcha mahadhvajaih
Sadibhishcha hataih shuraih sankirna vasudhabhavat
165.4
बाणपातनिकृत्तास्तु योधास्ते कुरुसत्तम
चेष्टन्तो विविधाश्चेष्टा व्यदृश्यन्त महाहवे
Banapatanikrittastu yodhaste kurusattama
Cheshtanto vividhashcheshta vyadrishyanta mahahave
165.5
वर्तमाने तथा युद्धे घोरे देवासुरोपमे
अब्रवीत्क्षत्रियांस्तत्र धर्मराजो युधिष्ठिरः
अभिद्रवत संयत्ताः कुम्भयोनिं महारथाः
Vartamane tatha yuddhe ghore devasuropame
Abravitkshatriyanstatra dharmarajo yudhishthirah
Abhidravata sanyattah kumbhayonim maharathah
165.6
एष वै पार्षतो वीरो भारद्वाजेन संगतः
घटते च यथाशक्ति भारद्वाजस्य नाशने
Esha vai parshato viro bharadvajena sangatah
Ghatate cha yathashakti bharadvajasya nashane
165.7
यादृशानि हि रूपाणि दृश्यन्ते नो महारणे
अद्य द्रोणं रणे क्रुद्धः पातयिष्यति पार्षतः
ते यूयं सहिता भूत्वा कुम्भयोनिं परीप्सत
Yadrishani hi rupani drishyante no maharane
Adya dronam rane kruddhah patayishyati parshatah
Te yuyam sahita bhutva kumbhayonim paripsata
165.8
युधिष्ठिरसमाज्ञप्ताः सृञ्जयानां महारथाः
अभ्यद्रवन्त संयत्ता भारद्वाजं जिघांसवः
Yudhishthirasamagyaptah srinjayanam maharathah
Abhyadravanta sanyatta bharadvajam jighansavah
165.9
तान्समापततः सर्वान्भारद्वाजो महारथः
अभ्यद्रवत वेगेन मर्तव्यमिति निश्चितः
Tansamapatatah sarvanbharadvajo maharathah
Abhyadravata vegena martavyamiti nishchitah
165.10
प्रयाते सत्यसंधे तु समकम्पत मेदिनी
ववुर्वाताः सनिर्घातास्त्रासयन्तो वरूथिनीम्
Prayate satyasandhe tu samakampata medini
Vavurvatah sanirghatastrasayanto varuthinim
165.11
पपात महती चोल्का आदित्यान्निर्गतेव ह
दीपयन्तीव तापेन शंसन्तीव महद्भयम्
Papata mahati cholka adityannirgateva ha
Dipayantiva tapena shansantiva mahadbhayam
165.12
जज्वलुश्चैव शस्त्राणि भारद्वाजस्य मारिष
रथाः स्वनन्ति चात्यर्थं हयाश्चाश्रूण्यवासृजन्
Jajvalushchaiva shastrani bharadvajasya marisha
Rathah svananti chatyartham hayashchashrunyavasrijan
165.13
हतौजा इव चाप्यासीद्भारद्वाजो महारथः
ऋषीणां ब्रह्मवादानां स्वर्गस्य गमनं प्रति
सुयुद्धेन ततः प्राणानुत्स्रष्टुमुपचक्रमे
Hatauja iva chapyasidbharadvajo maharathah
Rishinam brahmavadanam svargasya gamanam prati
Suyuddhena tatah prananutsrashtumupachakrame
165.14
ततश्चतुर्दिशं सैन्यैर्द्रुपदस्याभिसंवृतः
निर्दहन्क्षत्रियव्रातान्द्रोणः पर्यचरद्रणे
Tatashchaturdisham sainyairdrupadasyabhisanvritah
Nirdahankshatriyavratandronah paryacharadrane
165.15
हत्वा विंशतिसाहस्रान्क्षत्रियानरिमर्दनः
दशायुतानि तीक्ष्णाग्रैरवधीद्विशिखैः शितैः
Hatva vinshatisahasrankshatriyanarimardanah
Dashayutani tikshnagrairavadhidvishikhaih shitaih
165.16
सोऽतिष्ठदाहवे यत्तो विधूम इव पावकः
क्षत्रियाणामभावाय ब्राह्ममात्मानमास्थितः
Sotishthadahave yatto vidhuma iva pavakah
Kshatriyanamabhavaya brahmamatmanamasthitah
165.17
पाञ्चाल्यं विरथं भीमो हतसर्वायुधं वशी
अविषण्णं महात्मानं त्वरमाणः समभ्ययात्
Panchalyam viratham bhimo hatasarvayudham vashi
Avishannam mahatmanam tvaramanah samabhyayat
165.18
ततः स्वरथमारोप्य पाञ्चाल्यमरिमर्दनः
अब्रवीदभिसंप्रेक्ष्य द्रोणमस्यन्तमन्तिकात्
Tatah svarathamaropya panchalyamarimardanah
Abravidabhisamprekshya dronamasyantamantikat
165.19
न त्वदन्य इहाचार्यं योद्धुमुत्सहते पुमान्
त्वरस्व प्राग्वधायैव त्वयि भारः समाहितः
Na tvadanya ihacharyam yoddhumutsahate puman
Tvarasva pragvadhayaiva tvayi bharah samahitah
165.20
स तथोक्तो महाबाहुः सर्वभारसहं नवम्
अभिपत्याददे क्षिप्रमायुधप्रवरं दृढम्
Sa tathokto mahabahuh sarvabharasaham navam
Abhipatyadade kshipramayudhapravaram dridham
165.21
संरब्धश्च शरानस्यन्द्रोणं दुर्वारणं रणे
विवारयिषुराचार्यं शरवर्षैरवाकिरत्
Sanrabdhashcha sharanasyandronam durvaranam rane
Vivarayishuracharyam sharavarshairavakirat
165.22
तौ न्यवारयतां श्रेष्ठौ संरब्धौ रणशोभिनौ
उदीरयेतां ब्राह्माणि दिव्यान्यस्त्राण्यनेकशः
Tau nyavarayatam shreshthau sanrabdhau ranashobhinau
Udirayetam brahmani divyanyastranyanekashah
165.23
स महास्त्रैर्महाराज द्रोणमाच्छादयद्रणे
निहत्य सर्वाण्यस्त्राणि भारद्वाजस्य पार्षतः
Sa mahastrairmaharaja dronamachchhadayadrane
Nihatya sarvanyastrani bharadvajasya parshatah
165.24
स वसातीञ्शिबींश्चैव बाह्लीकान्कौरवानपि
रक्षिष्यमाणान्संग्रामे द्रोणं व्यधमदच्युतः
Sa vasatinshibinshchaiva bahlikankauravanapi
Rakshishyamanansangrame dronam vyadhamadachyutah
165.25
धृष्टद्युम्नस्तदा राजन्गभस्तिभिरिवांशुमान्
बभौ प्रच्छादयन्नाशाः शरजालैः समन्ततः
Dhrishtadyumnastada rajangabhastibhirivanshuman
Babhau prachchhadayannashah sharajalaih samantatah
165.26
तस्य द्रोणो धनुश्छित्त्वा विद्ध्वा चैनं शिलीमुखैः
मर्माण्यभ्यहनद्भूयः स व्यथां परमामगात्
Tasya drono dhanushchhittva viddhva chainam shilimukhaih
Marmanyabhyahanadbhuyah sa vyatham paramamagat
165.27
ततो भीमो दृढक्रोधो द्रोणस्याश्लिष्य तं रथम्
शनकैरिव राजेन्द्र द्रोणं वचनमब्रवीत्
Tato bhimo dridhakrodho dronasyashlishya tam ratham
Shanakairiva rajendra dronam vachanamabravit
165.28
यदि नाम न युध्येरञ्शिक्षिता ब्रह्मबन्धवः
स्वकर्मभिरसंतुष्टा न स्म क्षत्रं क्षयं व्रजेत्
Yadi nama na yudhyeranshikshita brahmabandhavah
Svakarmabhirasantushta na sma kshatram kshayam vrajet
165.29
अहिंसा सर्वभूतेषु धर्मं ज्यायस्तरं विदुः
तस्य च ब्राह्मणो मूलं भवांश्च ब्रह्मवित्तमः
Ahinsa sarvabhuteshu dharmam jyayastaram viduh
Tasya cha brahmano mulam bhavanshcha brahmavittamah
165.30
श्वपाकवन्म्लेच्छगणान्हत्वा चान्यान्पृथग्विधान्
अज्ञानान्मूढवद्ब्रह्मन्पुत्रदारधनेप्सया
Shvapakavanmlechchhagananhatva chanyanprithagvidhan
Agyananmudhavadbrahmanputradaradhanepsaya
165.31
एकस्यार्थे बहून्हत्वा पुत्रस्याधर्मविद्यथा
स्वकर्मस्थान्विकर्मस्थो न व्यपत्रपसे कथम्
Ekasyarthe bahunhatva putrasyadharmavidyatha
Svakarmasthanvikarmastho na vyapatrapase katham
165.32
स चाद्य पतितः शेते पृष्टेनावेदितस्तव
धर्मराजेन तद्वाक्यं नातिशङ्कितुमर्हसि
Sa chadya patitah shete prishtenaveditastava
Dharmarajena tadvakyam natishankitumarhasi
165.33
एवमुक्तस्ततो द्रोणो भीमेनोत्सृज्य तद्धनुः
सर्वाण्यस्त्राणि धर्मात्मा हातुकामोऽभ्यभाषत
कर्ण कर्ण महेष्वास कृप दुर्योधनेति च
Evamuktastato drono bhimenotsrijya taddhanuh
Sarvanyastrani dharmatma hatukamobhyabhashata
Karna karna maheshvasa kripa duryodhaneti cha
165.34
संग्रामे क्रियतां यत्नो ब्रवीम्येष पुनः पुनः
पाण्डवेभ्यः शिवं वोऽस्तु शस्त्रमभ्युत्सृजाम्यहम्
Sangrame kriyatam yatno bravimyesha punah punah
Pandavebhyah shivam vostu shastramabhyutsrijamyaham
165.35
इति तत्र महाराज प्राक्रोशद्द्रौणिमेव च
उत्सृज्य च रणे शस्त्रं रथोपस्थे निवेश्य च
अभयं सर्वभूतानां प्रददौ योगयुक्तवान्
Iti tatra maharaja prakroshaddraunimeva cha
Utsrijya cha rane shastram rathopasthe niveshya cha
Abhayam sarvabhutanam pradadau yogayuktavan
165.36
तस्य तच्छिद्रमाज्ञाय धृष्टद्युम्नः समुत्थितः
खड्गी रथादवप्लुत्य सहसा द्रोणमभ्ययात्
Tasya tachchhidramagyaya dhrishtadyumnah samutthitah
Khadgi rathadavaplutya sahasa dronamabhyayat
165.37
हाहाकृतानि भूतानि मानुषाणीतराणि च
द्रोणं तथागतं दृष्ट्वा धृष्टद्युम्नवशं गतम्
Hahakritani bhutani manushanitarani cha
Dronam tathagatam drishtva dhrishtadyumnavasham gatam
165.38
हाहाकारं भृशं चक्रुरहो धिगिति चाब्रुवन्
द्रोणोऽपि शस्त्राण्युत्सृज्य परमं साम्यमास्थितः
Hahakaram bhrisham chakruraho dhigiti chabruvan
Dronopi shastranyutsrijya paramam samyamasthitah
165.39
तथोक्त्वा योगमास्थाय ज्योतिर्भूतो महातपाः
दिवमाक्रामदाचार्यः सद्भिः सह दुराक्रमम्
Tathoktva yogamasthaya jyotirbhuto mahatapah
Divamakramadacharyah sadbhih saha durakramam
165.40
द्वौ सूर्याविति नो बुद्धिरासीत्तस्मिंस्तथा गते
एकाग्रमिव चासीद्धि ज्योतिर्भिः पूरितं नभः
समपद्यत चार्काभे भारद्वाजनिशाकरे
Dvau suryaviti no buddhirasittasminstatha gate
Ekagramiva chasiddhi jyotirbhih puritam nabhah
Samapadyata charkabhe bharadvajanishakare
165.41
निमेषमात्रेण च तज्ज्योतिरन्तरधीयत
आसीत्किलकिलाशब्दः प्रहृष्टानां दिवौकसाम्
ब्रह्मलोकं गते द्रोणे धृष्टद्युम्ने च मोहिते
Nimeshamatrena cha tajjyotirantaradhiyata
Asitkilakilashabdah prahrishtanam divaukasam
Brahmalokam gate drone dhrishtadyumne cha mohite
165.42
वयमेव तदाद्राक्ष्म पञ्च मानुषयोनयः
योगयुक्तं महात्मानं गच्छन्तं परमां गतिम्
Vayameva tadadrakshma pancha manushayonayah
Yogayuktam mahatmanam gachchhantam paramam gatim
165.43
अहं धनंजयः पार्थः कृपः शारद्वतो द्विजः
वासुदेवश्च वार्ष्णेयो धर्मराजश्च पाण्डवः
Aham dhananjayah parthah kripah sharadvato dvijah
Vasudevashcha varshneyo dharmarajashcha pandavah
165.44
अन्ये तु सर्वे नापश्यन्भारद्वाजस्य धीमतः
महिमानं महाराज योगयुक्तस्य गच्छतः
Anye tu sarve napashyanbharadvajasya dhimatah
Mahimanam maharaja yogayuktasya gachchhatah
165.45
गतिं परमिकां प्राप्तमजानन्तो नृयोनयः
नापश्यन्गच्छमानं हि तं सार्धमृषिपुंगवैः
आचार्यं योगमास्थाय ब्रह्मलोकमरिंदमम्
Gatim paramikam praptamajananto nriyonayah
Napashyangachchhamanam hi tam sardhamrishipungavaih
Acharyam yogamasthaya brahmalokamarindamam
165.46
वितुन्नाङ्गं शरशतैर्न्यस्तायुधमसृक्क्षरम्
धिक्कृतः पार्षतस्तं तु सर्वभूतैः परामृशत्
Vitunnangam sharashatairnyastayudhamasrikksharam
Dhikkritah parshatastam tu sarvabhutaih paramrishat
165.47
तस्य मूर्धानमालम्ब्य गतसत्त्वस्य देहिनः
किंचिदब्रुवतः कायाद्विचकर्तासिना शिरः
Tasya murdhanamalambya gatasattvasya dehinah
Kinchidabruvatah kayadvichakartasina shirah
165.48
हर्षेण महता युक्तो भारद्वाजे निपातिते
सिंहनादरवं चक्रे भ्रामयन्खड्गमाहवे
Harshena mahata yukto bharadvaje nipatite
Sinhanadaravam chakre bhramayankhadgamahave
165.49
आकर्णपलितः श्यामो वयसाशीतिपञ्चकः
त्वत्कृते व्यचरत्संख्ये स तु षोडशवर्षवत्
Akarnapalitah shyamo vayasashitipanchakah
Tvatkrite vyacharatsankhye sa tu shodashavarshavat
165.50
उक्तवांश्च महाबाहुः कुन्तीपुत्रो धनंजयः
जीवन्तमानयाचार्यं मा वधीर्द्रुपदात्मज
Uktavanshcha mahabahuh kuntiputro dhananjayah
Jivantamanayacharyam ma vadhirdrupadatmaja
165.51
न हन्तव्यो न हन्तव्य इति ते सैनिकाश्च ह
उत्क्रोशन्नर्जुनश्चैव सानुक्रोशस्तमाद्रवत्
Na hantavyo na hantavya iti te sainikashcha ha
Utkroshannarjunashchaiva sanukroshastamadravat
165.52
क्रोशमानेऽर्जुने चैव पार्थिवेषु च सर्वशः
धृष्टद्युम्नोऽवधीद्द्रोणं रथतल्पे नरर्षभम्
Kroshamanerjune chaiva parthiveshu cha sarvashah
Dhrishtadyumnovadhiddronam rathatalpe nararshabham
165.53
शोणितेन परिक्लिन्नो रथाद्भूमिमरिंदमः
लोहिताङ्ग इवादित्यो दुर्दर्शः समपद्यत
एवं तं निहतं संख्ये ददृशे सैनिको जनः
Shonitena pariklinno rathadbhumimarindamah
Lohitanga ivadityo durdarshah samapadyata
Evam tam nihatam sankhye dadrishe sainiko janah
165.54
धृष्टद्युम्नस्तु तद्राजन्भारद्वाजशिरो महत्
तावकानां महेष्वासः प्रमुखे तत्समाक्षिपत्
Dhrishtadyumnastu tadrajanbharadvajashiro mahat
Tavakanam maheshvasah pramukhe tatsamakshipat
165.55
ते तु दृष्ट्वा शिरो राजन्भारद्वाजस्य तावकाः
पलायनकृतोत्साहा दुद्रुवुः सर्वतोदिशम्
Te tu drishtva shiro rajanbharadvajasya tavakah
Palayanakritotsaha dudruvuh sarvatodisham
165.56
द्रोणस्तु दिवमास्थाय नक्षत्रपथमाविशत्
अहमेव तदाद्राक्षं द्रोणस्य निधनं नृप
Dronastu divamasthaya nakshatrapathamavishat
Ahameva tadadraksham dronasya nidhanam nripa
165.57
ऋषेः प्रसादात्कृष्णस्य सत्यवत्याः सुतस्य च
विधूमामिव संयान्तीमुल्कां प्रज्वलितामिव
अपश्याम दिवं स्तब्ध्वा गच्छन्तं तं महाद्युतिम्
Risheh prasadatkrishnasya satyavatyah sutasya cha
Vidhumamiva sanyantimulkam prajvalitamiva
Apashyama divam stabdhva gachchhantam tam mahadyutim
165.58
हते द्रोणे निरुत्साहान्कुरून्पाण्डवसृञ्जयाः
अभ्यद्रवन्महावेगास्ततः सैन्यं व्यदीर्यत
Hate drone nirutsahankurunpandavasrinjayah
Abhyadravanmahavegastatah sainyam vyadiryata
165.59
निहता हयभूयिष्ठाः संग्रामे निशितैः शरैः
तावका निहते द्रोणे गतासव इवाभवन्
Nihata hayabhuyishthah sangrame nishitaih sharaih
Tavaka nihate drone gatasava ivabhavan
165.60
पराजयमथावाप्य परत्र च महद्भयम्
उभयेनैव ते हीना नाविन्दन्धृतिमात्मनः
Parajayamathavapya paratra cha mahadbhayam
Ubhayenaiva te hina navindandhritimatmanah
165.61
अन्विच्छन्तः शरीरं तु भारद्वाजस्य पार्थिवाः
नाध्यगच्छंस्तदा राजन्कबन्धायुतसंकुले
Anvichchhantah shariram tu bharadvajasya parthivah
Nadhyagachchhanstada rajankabandhayutasankule
165.62
पाण्डवास्तु जयं लब्ध्वा परत्र च महद्यशः
बाणशब्दरवांश्चक्रुः सिंहनादांश्च पुष्कलान्
Pandavastu jayam labdhva paratra cha mahadyashah
Banashabdaravanshchakruh sinhanadanshcha pushkalan
165.63
भीमसेनस्ततो राजन्धृष्टद्युम्नश्च पार्षतः
वरूथिन्यामनृत्येतां परिष्वज्य परस्परम्
Bhimasenastato rajandhrishtadyumnashcha parshatah
Varuthinyamanrityetam parishvajya parasparam
165.64
अब्रवीच्च तदा भीमः पार्षतं शत्रुतापनम्
भूयोऽहं त्वां विजयिनं परिष्वक्ष्यामि पार्षत
सूतपुत्रे हते पापे धार्तराष्ट्रे च संयुगे
Abravichcha tada bhimah parshatam shatrutapanam
Bhuyoham tvam vijayinam parishvakshyami parshata
Sutaputre hate pape dhartarashtre cha sanyuge
165.65
एतावदुक्त्वा भीमस्तु हर्षेण महता युतः
बाहुशब्देन पृथिवीं कम्पयामास पाण्डवः
Etavaduktva bhimastu harshena mahata yutah
Bahushabdena prithivim kampayamasa pandavah
165.66
तस्य शब्देन वित्रस्ताः प्राद्रवंस्तावका युधि
क्षत्रधर्मं समुत्सृज्य पलायनपरायणाः
Tasya shabdena vitrastah pradravanstavaka yudhi
Kshatradharmam samutsrijya palayanaparayanah
165.67
पाण्डवास्तु जयं लब्ध्वा हृष्टा ह्यासन्विशां पते
अरिक्षयं च संग्रामे तेन ते सुखमाप्नुवन्
Pandavastu jayam labdhva hrishta hyasanvisham pate
Arikshayam cha sangrame tena te sukhamapnuvan
165.68
ततो द्रोणे हते राजन्कुरवः शस्त्रपीडिताः
हतप्रवीरा विध्वस्ता भृशं शोकपरायणाः
Tato drone hate rajankuravah shastrapiditah
Hatapravira vidhvasta bhrisham shokaparayanah
165.69
विचेतसो हतोत्साहाः कश्मलाभिहतौजसः
आर्तस्वरेण महता पुत्रं ते पर्यवारयन्
Vichetaso hatotsahah kashmalabhihataujasah
Artasvarena mahata putram te paryavarayan
165.70
रजस्वला वेपमाना वीक्षमाणा दिशो दश
अश्रुकण्ठा यथा दैत्या हिरण्याक्षे पुरा हते
Rajasvala vepamana vikshamana disho dasha
Ashrukantha yatha daitya hiranyakshe pura hate
165.71
स तैः परिवृतो राजा त्रस्तैः क्षुद्रमृगैरिव
अशक्नुवन्नवस्थातुमपायात्तनयस्तव
Sa taih parivrito raja trastaih kshudramrigairiva
Ashaknuvannavasthatumapayattanayastava
165.72
क्षुत्पिपासापरिश्रान्तास्ते योधास्तव भारत
आदित्येन च संतप्ता भृशं विमनसोऽभवन्
Kshutpipasaparishrantaste yodhastava bharata
Adityena cha santapta bhrisham vimanasobhavan
165.73
भास्करस्येव पतनं समुद्रस्येव शोषणम्
विपर्यासं यथा मेरोर्वासवस्येव निर्जयम्
Bhaskarasyeva patanam samudrasyeva shoshanam
Viparyasam yatha merorvasavasyeva nirjayam
165.74
अमर्षणीयं तद्दृष्ट्वा भारद्वाजस्य पातनम्
त्रस्तरूपतरा राजन्कौरवाः प्राद्रवन्भयात्
Amarshaniyam taddrishtva bharadvajasya patanam
Trastarupatara rajankauravah pradravanbhayat
165.75
गान्धारराजः शकुनिस्त्रस्तस्त्रस्ततरैः सह
हतं रुक्मरथं दृष्ट्वा प्राद्रवत्सहितो रथैः
Gandhararajah shakunistrastastrastataraih saha
Hatam rukmaratham drishtva pradravatsahito rathaih
165.76
वरूथिनीं वेगवतीं विद्रुतां सपताकिनीम्
परिगृह्य महासेनां सूतपुत्रोऽपयाद्भयात्
Varuthinim vegavatim vidrutam sapatakinim
Parigrihya mahasenam sutaputropayadbhayat
165.77
रथनागाश्वकलिलां पुरस्कृत्य तु वाहिनीम्
मद्राणामीश्वरः शल्यो वीक्षमाणोऽपयाद्भयात्
Rathanagashvakalilam puraskritya tu vahinim
Madranamishvarah shalyo vikshamanopayadbhayat
165.78
हतप्रवीरैर्भूयिष्ठं द्विपैर्बहुपदातिभिः
वृतः शारद्वतोऽगच्छत्कष्टं कष्टमिति ब्रुवन्
Hatapravirairbhuyishtham dvipairbahupadatibhih
Vritah sharadvatogachchhatkashtam kashtamiti bruvan
165.79
भोजानीकेन शिष्टेन कलिङ्गारट्टबाह्लिकैः
कृतवर्मा वृतो राजन्प्रायात्सुजवनैर्हयैः
Bhojanikena shishtena kalingarattabahlikaih
Kritavarma vrito rajanprayatsujavanairhayaih
165.80
पदातिगणसंयुक्तस्त्रस्तो राजन्भयार्दितः
उलूकः प्राद्रवत्तत्र दृष्ट्वा द्रोणं निपातितम्
Padatiganasanyuktastrasto rajanbhayarditah
Ulukah pradravattatra drishtva dronam nipatitam
165.81
दर्शनीयो युवा चैव शौर्ये च कृतलक्षणः
दुःशासनो भृशोद्विग्नः प्राद्रवद्गजसंवृतः
Darshaniyo yuva chaiva shaurye cha kritalakshanah
Duhshasano bhrishodvignah pradravadgajasanvritah
165.82
गजाश्वरथसंयुक्तो वृतश्चैव पदातिभिः
दुर्योधनो महाराज प्रायात्तत्र महारथः
Gajashvarathasanyukto vritashchaiva padatibhih
Duryodhano maharaja prayattatra maharathah
165.83
गजान्रथान्समारुह्य परस्यापि हयाञ्जनाः
प्रकीर्णकेशा विध्वस्ता न द्वावेकत्र धावतः
Gajanrathansamaruhya parasyapi hayanjanah
Prakirnakesha vidhvasta na dvavekatra dhavatah
165.84
नेदमस्तीति पुरुषा हतोत्साहा हतौजसः
उत्सृज्य कवचानन्ये प्राद्रवंस्तावका विभो
Nedamastiti purusha hatotsaha hataujasah
Utsrijya kavachananye pradravanstavaka vibho
165.85
अन्योन्यं ते समाक्रोशन्सैनिका भरतर्षभ
तिष्ठ तिष्ठेति न च ते स्वयं तत्रावतस्थिरे
Anyonyam te samakroshansainika bharatarshabha
Tishtha tishtheti na cha te svayam tatravatasthire
165.86
धुर्यान्प्रमुच्य तु रथाद्धतसूतान्स्वलंकृतान्
अधिरुह्य हयान्योधाः क्षिप्रं पद्भिरचोदयन्
Dhuryanpramuchya tu rathaddhatasutansvalankritan
Adhiruhya hayanyodhah kshipram padbhirachodayan
165.87
द्रवमाणे तथा सैन्ये त्रस्तरूपे हतौजसि
प्रतिस्रोत इव ग्राहो द्रोणपुत्रः परानियात्
Dravamane tatha sainye trastarupe hataujasi
Pratisrota iva graho dronaputrah paraniyat
165.88
हत्वा बहुविधां सेनां पाण्डूनां युद्धदुर्मदः
कथंचित्संकटान्मुक्तो मत्तद्विरदविक्रमः
Hatva bahuvidham senam pandunam yuddhadurmadah
Kathanchitsankatanmukto mattadviradavikramah
165.89
द्रवमाणं बलं दृष्ट्वा पलायनकृतक्षणम्
दुर्योधनं समासाद्य द्रोणपुत्रोऽब्रवीदिदम्
Dravamanam balam drishtva palayanakritakshanam
Duryodhanam samasadya dronaputrobravididam
165.90
किमियं द्रवते सेना त्रस्तरूपेव भारत
द्रवमाणां च राजेन्द्र नावस्थापयसे रणे
Kimiyam dravate sena trastarupeva bharata
Dravamanam cha rajendra navasthapayase rane
165.91
त्वं चापि न यथापूर्वं प्रकृतिस्थो नराधिप
कर्णप्रभृतयश्चेमे नावतिष्ठन्ति पार्थिवाः
Tvam chapi na yathapurvam prakritistho naradhipa
Karnaprabhritayashcheme navatishthanti parthivah
165.92
अन्येष्वपि च युद्धेषु नैव सेनाद्रवत्तदा
कच्चित्क्षेमं महाबाहो तव सैन्यस्य भारत
Anyeshvapi cha yuddheshu naiva senadravattada
Kachchitkshemam mahabaho tava sainyasya bharata
165.93
कस्मिन्निदं हते राजन्रथसिंहे बलं तव
एतामवस्थां संप्राप्तं तन्ममाचक्ष्व कौरव
Kasminnidam hate rajanrathasinhe balam tava
Etamavastham sampraptam tanmamachakshva kaurava
165.94
तत्तु दुर्योधनः श्रुत्वा द्रोणपुत्रस्य भाषितम्
घोरमप्रियमाख्यातुं नाशकत्पार्थिवर्षभः
Tattu duryodhanah shrutva dronaputrasya bhashitam
Ghoramapriyamakhyatum nashakatparthivarshabhah
165.95
भिन्ना नौरिव ते पुत्रो निमग्नः शोकसागरे
बाष्पेण पिहितो दृष्ट्वा द्रोणपुत्रं रथे स्थितम्
Bhinna nauriva te putro nimagnah shokasagare
Bashpena pihito drishtva dronaputram rathe sthitam
165.96
ततः शारद्वतं राजा सव्रीडमिदमब्रवीत्
शंसेह सर्वं भद्रं ते यथा सैन्यमिदं द्रुतम्
Tatah sharadvatam raja savridamidamabravit
Shanseha sarvam bhadram te yatha sainyamidam drutam
165.97
अथ शारद्वतो राजन्नार्तिं गच्छन्पुनः पुनः
शशंस द्रोणपुत्राय यथा द्रोणो निपातितः
Atha sharadvato rajannartim gachchhanpunah punah
Shashansa dronaputraya yatha drono nipatitah
165.98
कृप उवाच
वयं द्रोणं पुरस्कृत्य पृथिव्यां प्रवरं रथम्
प्रावर्तयाम संग्रामं पाञ्चालैरेव केवलैः
Kripa uvacha
Vayam dronam puraskritya prithivyam pravaram ratham
Pravartayama sangramam panchalaireva kevalaih
165.99
ततः प्रवृत्ते संग्रामे विमिश्राः कुरुसोमकाः
अन्योन्यमभिगर्जन्तः शस्त्रैर्देहानपातयन्
Tatah pravritte sangrame vimishrah kurusomakah
Anyonyamabhigarjantah shastrairdehanapatayan
165.100
ततो द्रोणो ब्राह्ममस्त्रं विकुर्वाणो नरर्षभः
अहनच्छात्रवान्भल्लैः शतशोऽथ सहस्रशः
Tato drono brahmamastram vikurvano nararshabhah
Ahanachchhatravanbhallaih shatashotha sahasrashah
165.101
पाण्डवाः केकया मत्स्याः पाञ्चालाश्च विशेषतः
संख्ये द्रोणरथं प्राप्य व्यनशन्कालचोदिताः
Pandavah kekaya matsyah panchalashcha visheshatah
Sankhye dronaratham prapya vyanashankalachoditah
165.102
सहस्रं रथसिंहानां द्विसाहस्रं च दन्तिनाम्
द्रोणो ब्रह्मास्त्रनिर्दग्धं प्रेषयामास मृत्यवे
Sahasram rathasinhanam dvisahasram cha dantinam
Drono brahmastranirdagdham preshayamasa mrityave
165.103
आकर्णपलितः श्यामो वयसाशीतिपञ्चकः
रणे पर्यचरद्द्रोणो वृद्धः षोडशवर्षवत्
Akarnapalitah shyamo vayasashitipanchakah
Rane paryacharaddrono vriddhah shodashavarshavat
165.104
क्लिश्यमानेषु सैन्येषु वध्यमानेषु राजसु
अमर्षवशमापन्नाः पाञ्चाला विमुखाभवन्
Klishyamaneshu sainyeshu vadhyamaneshu rajasu
Amarshavashamapannah panchala vimukhabhavan
165.105
तेषु किंचित्प्रभग्नेषु विमुखेषु सपत्नजित्
दिव्यमस्त्रं विकुर्वाणो बभूवार्क इवोदितः
Teshu kinchitprabhagneshu vimukheshu sapatnajit
Divyamastram vikurvano babhuvarka ivoditah
165.106
स मध्यं प्राप्य पाण्डूनां शररश्मिः प्रतापवान्
मध्यंगत इवादित्यो दुष्प्रेक्ष्यस्ते पिताभवत्
Sa madhyam prapya pandunam shararashmih pratapavan
Madhyangata ivadityo dushprekshyaste pitabhavat
165.107
ते दह्यमाना द्रोणेन सूर्येणेव विराजता
दग्धवीर्या निरुत्साहा बभूवुर्गतचेतसः
Te dahyamana dronena suryeneva virajata
Dagdhavirya nirutsaha babhuvurgatachetasah
165.108
तान्दृष्ट्वा पीडितान्बाणैर्द्रोणेन मधुसूदनः
जयैषी पाण्डुपुत्राणामिदं वचनमब्रवीत्
Tandrishtva piditanbanairdronena madhusudanah
Jayaishi panduputranamidam vachanamabravit
165.109
नैष जातु परैः शक्यो जेतुं शस्त्रभृतां वरः
अपि वृत्रहणा संख्ये रथयूथपयूथपः
Naisha jatu paraih shakyo jetum shastrabhritam varah
Api vritrahana sankhye rathayuthapayuthapah
165.110
ते यूयं धर्ममुत्सृज्य जयं रक्षत पाण्डवाः
यथा वः संयुगे सर्वान्न हन्याद्रुक्मवाहनः
Te yuyam dharmamutsrijya jayam rakshata pandavah
Yatha vah sanyuge sarvanna hanyadrukmavahanah
165.111
अश्वत्थाम्नि हते नैष युध्येदिति मतिर्मम
हतं तं संयुगे कश्चिदाख्यात्वस्मै मृषा नरः
Ashvatthamni hate naisha yudhyediti matirmama
Hatam tam sanyuge kashchidakhyatvasmai mrisha narah
165.112
एतन्नारोचयद्वाक्यं कुन्तीपुत्रो धनंजयः
अरोचयंस्तु सर्वेऽन्ये कृच्छ्रेण तु युधिष्ठिरः
Etannarochayadvakyam kuntiputro dhananjayah
Arochayanstu sarvenye krichchhrena tu yudhishthirah
165.113
भीमसेनस्तु सव्रीडमब्रवीत्पितरं तव
अश्वत्थामा हत इति तच्चाबुध्यत ते पिता
Bhimasenastu savridamabravitpitaram tava
Ashvatthama hata iti tachchabudhyata te pita
165.114
स शङ्कमानस्तन्मिथ्या धर्मराजमपृच्छत
हतं वाप्यहतं वाजौ त्वां पिता पुत्रवत्सलः
Sa shankamanastanmithya dharmarajamaprichchhata
Hatam vapyahatam vajau tvam pita putravatsalah
165.115
तदतथ्यभये मग्नो जये सक्तो युधिष्ठिरः
अश्वत्थामानमाहेदं हतः कुञ्जर इत्युत
भीमेन गिरिवर्ष्माणं मालवस्येन्द्रवर्मणः
Tadatathyabhaye magno jaye sakto yudhishthirah
Ashvatthamanamahedam hatah kunjara ityuta
Bhimena girivarshmanam malavasyendravarmanah
165.116
उपसृत्य तदा द्रोणमुच्चैरिदमभाषत
यस्यार्थे शस्त्रमाधत्से यमवेक्ष्य च जीवसि
पुत्रस्ते दयितो नित्यं सोऽश्वत्थामा निपातितः
Upasritya tada dronamuchchairidamabhashata
Yasyarthe shastramadhatse yamavekshya cha jivasi
Putraste dayito nityam soshvatthama nipatitah
165.117
तच्छ्रुत्वा विमनास्तत्र आचार्यो महदप्रियम्
नियम्य दिव्यान्यस्त्राणि नायुध्यत यथा पुरा
Tachchhrutva vimanastatra acharyo mahadapriyam
Niyamya divyanyastrani nayudhyata yatha pura
165.118
तं दृष्ट्वा परमोद्विग्नं शोकोपहतचेतसम्
पाञ्चालराजस्य सुतः क्रूरकर्मा समाद्रवत्
Tam drishtva paramodvignam shokopahatachetasam
Panchalarajasya sutah krurakarma samadravat
165.119
तं दृष्ट्वा विहितं मृत्युं लोकतत्त्वविचक्षणः
दिव्यान्यस्त्राण्यथोत्सृज्य रणे प्राय उपाविशत्
Tam drishtva vihitam mrityum lokatattvavichakshanah
Divyanyastranyathotsrijya rane praya upavishat
165.120
ततोऽस्य केशान्सव्येन गृहीत्वा पाणिना तदा
पार्षतः क्रोशमानानां वीराणामच्छिनच्छिरः
Tatosya keshansavyena grihitva panina tada
Parshatah kroshamananam viranamachchhinachchhirah
165.121
न हन्तव्यो न हन्तव्य इति ते सर्वतोऽब्रुवन्
तथैव चार्जुनो वाहादवरुह्यैनमाद्रवत्
Na hantavyo na hantavya iti te sarvatobruvan
Tathaiva charjuno vahadavaruhyainamadravat
165.122
उद्यम्य बाहू त्वरितो ब्रुवाणश्च पुनः पुनः
जीवन्तमानयाचार्यं मा वधीरिति धर्मवित्
Udyamya bahu tvarito bruvanashcha punah punah
Jivantamanayacharyam ma vadhiriti dharmavit
165.123
तथापि वार्यमाणेन कौरवैरर्जुनेन च
हत एव नृशंसेन पिता तव नरर्षभ
Tathapi varyamanena kauravairarjunena cha
Hata eva nrishansena pita tava nararshabha
165.124
सैनिकाश्च ततः सर्वे प्राद्रवन्त भयार्दिताः
वयं चापि निरुत्साहा हते पितरि तेऽनघ
Sainikashcha tatah sarve pradravanta bhayarditah
Vayam chapi nirutsaha hate pitari tenagha
165.125
संजय उवाच
तच्छ्रुत्वा द्रोणपुत्रस्तु निधनं पितुराहवे
क्रोधमाहारयत्तीव्रं पदाहत इवोरगः
Sanjaya uvacha
Tachchhrutva dronaputrastu nidhanam piturahave
Krodhamaharayattivram padahata ivoragah