Utshovঅধ্যায় 164
164.1
সংজয় উবাচ
তস্মিংস্তথা বর্তমানে নরাশ্বগজসংক্ষয়ে
দুঃশাসনো মহারাজ ধৃষ্টদ্যুম্নময়োধয়ৎ
164.2
স তু রুক্মরথাসক্তো দুঃশাসনশরার্দিতঃ
অমর্ষাত্তব পুত্রস্য শরৈর্বাহানবাকিরৎ
164.3
ক্ষণেন স রথস্তস্য সধ্বজঃ সহসারথিঃ
নাদৃশ্যত মহারাজ পার্ষতস্য শরৈশ্চিতঃ
164.4
দুঃশাসনস্তু রাজেন্দ্র পাঞ্চাল্যস্য মহাত্মনঃ
নাশকত্প্রমুখে স্থাতুং শরজালপ্রপীডিতঃ
164.5
স তু দুঃশাসনং বাণৈর্বিমুখীকৃত্য পার্ষতঃ
কিরঞ্শরসহস্রাণি দ্রোণমেবাভ্যয়াদ্রণে
164.6
প্রত্যপদ্যত হার্দিক্যঃ কৃতবর্মা তদন্তরম্
সোদর্যাণাং ত্রয়শ্চৈব ত এনং পর্যবারয়ন্
164.7
তং যমৌ পৃষ্ঠতোঽন্বৈতাং রক্ষন্তৌ পুরুষর্ষভৌ
দ্রোণায়াভিমুখং যান্তং দীপ্যমানমিবানলম্
164.8
সংপ্রহারমকুর্বংস্তে সর্বে সপ্ত মহারথাঃ
অমর্ষিতাঃ সত্ত্ববন্তঃ কৃত্বা মরণমগ্রতঃ
164.9
শুদ্ধাত্মানঃ শুদ্ধবৃত্তা রাজন্স্বর্গপুরস্কৃতাঃ
আর্যং যুদ্ধমকুর্বন্ত পরস্পরজিগীষবঃ
164.10
শুক্লাভিজনকর্মাণো মতিমন্তো জনাধিপাঃ
ধর্ময়ুদ্ধময়ুধ্যন্ত প্রেক্ষন্তো গতিমুত্তমাম্
164.11
ন তত্রাসীদধর্মিষ্ঠমশস্ত্রং যুদ্ধমেব চ
নাত্র কর্ণী ন নালীকো ন লিপ্তো ন চ বস্তকঃ
164.12
ন সূচী কপিশো নাত্র ন গবাস্থির্গজাস্থিকঃ
ইষুরাসীন্ন সংশ্লিষ্টো ন পূতির্ন চ জিহ্মগঃ
164.13
ঋজূন্যেব বিশুদ্ধানি সর্বে শস্ত্রাণ্যধারয়ন্
সুয়ুদ্ধেন পরাঁল্লোকানীপ্সন্তঃ কীর্তিমেব চ
164.14
তদাসীত্তুমুলং যুদ্ধং সর্বদোষবিবর্জিতম্
চতুর্ণাং তব যোধানাং তৈস্ত্রিভিঃ পাণ্ডবৈঃ সহ
164.15
ধৃষ্টদ্যুম্নস্তু তান্হিত্বা তব রাজন্রথর্ষভান্
যমাভ্যাং বারিতান্দৃষ্ট্বা শীঘ্রাস্ত্রো দ্রোণমভ্যয়াৎ
164.16
নিবারিতাস্তু তে বীরাস্তয়োঃ পুরুষসিংহয়োঃ
সমসজ্জন্ত চত্বারো বাতাঃ পর্বতয়োরিব
164.17
দ্বাভ্যাং দ্বাভ্যাং যমৌ সার্ধং রথাভ্যাং রথপুংগবৌ
সমাসক্তৌ ততো দ্রোণং ধৃষ্টদ্যুম্নোঽভ্যবর্তত
164.18
দৃষ্ট্বা দ্রোণায় পাঞ্চাল্যং ব্রজন্তং যুদ্ধদুর্মদম্
যমাভ্যাং তাংশ্চ সংসক্তাংস্তদন্তরমুপাদ্রবৎ
164.19
দুর্যোধনো মহারাজ কিরঞ্শোণিতভোজনান্
তং সাত্যকিঃ শীঘ্রতরং পুনরেবাভ্যবর্তত
164.20
তৌ পরস্পরমাসাদ্য সমীপে কুরুমাধবৌ
হসমানৌ নৃশার্দূলাবভীতৌ সমগচ্ছতাম্
164.21
বাল্যে বৃত্তানি সর্বাণি প্রীয়মাণৌ বিচিন্ত্য তৌ
অন্যোন্যং প্রেক্ষমাণৌ চ হসমানৌ পুনঃ পুনঃ
164.22
অথ দুর্যোধনো রাজা সাত্যকিং প্রত্যভাষত
প্রিয়ং সখায়ং সততং গর্হয়ন্বৃত্তমাত্মনঃ
164.23
ধিক্ক্রোধং ধিক্সখে লোভং ধিঙ্মোহং ধিগমর্ষিতম্
ধিগস্তু ক্ষাত্রমাচারং ধিগস্তু বলমৌরসম্
164.24
যত্ত্বং মামভিসংধত্সে ত্বাং চাহং শিনিপুংগব
ত্বং হি প্রাণৈঃ প্রিয়তরো মমাহং চ সদা তব
164.25
স্মরামি তানি সর্বাণি বাল্যে বৃত্তানি যানি নৌ
তানি সর্বাণি জীর্ণানি সাংপ্রতং নৌ রণাজিরে
কিমন্যত্ক্রোধলোভাভ্যাং যুধ্যামি ত্বাদ্য সাত্বত
164.26
তং তথাবাদিনং রাজন্সাত্যকিঃ প্রত্যভাষত
প্রহসন্বিশিখাংস্তীক্ষ্ণানুদ্যম্য পরমাস্ত্রবিৎ
164.27
নেয়ং সভা রাজপুত্র ন চাচার্যনিবেশনম্
যত্র ক্রীডিতমস্মাভিস্তদা রাজন্সমাগতৈঃ
164.28
দুর্যোধন উবাচ
ক্ব সা ক্রীডা গতাস্মাকং বাল্যে বৈ শিনিপুংগব
ক্ব চ যুদ্ধমিদং ভূয়ঃ কালো হি দুরতিক্রমঃ
164.29
কিং নু নো বিদ্যতে কৃত্যং ধনেন ধনলিপ্সয়া
যত্র যুধ্যামহে সর্বে ধনলোভাত্সমাগতাঃ
164.30
সংজয় উবাচ
তং তথাবাদিনং তত্র রাজানং মাধবোঽব্রবীৎ
এবংবৃত্তং সদা ক্ষত্রং যদ্ধন্তীহ গুরূনপি
164.31
যদি তেঽহং প্রিয়ো রাজঞ্জহি মাং মা চিরং কৃথাঃ
ত্বত্কৃতে সুকৃতাঁল্লোকান্গচ্ছেয়ং ভরতর্ষভ
164.32
যা তে শক্তির্বলং চৈব তত্ক্ষিপ্রং ময়ি দর্শয়
নেচ্ছাম্যেতদহং দ্রষ্টুং মিত্রাণাং ব্যসনং মহৎ
164.33
ইত্যেবং ব্যক্তমাভাষ্য প্রতিভাষ্য চ সাত্যকিঃ
অভ্যয়াত্তূর্ণমব্যগ্রো নিরপেক্ষো বিশাং পতে
164.34
তমায়ান্তমভিপ্রেক্ষ্য প্রত্যগৃহ্ণাত্তবাত্মজঃ
শরৈশ্চাবাকিরদ্রাজঞ্শৈনেয়ং তনয়স্তব
164.35
ততঃ প্রববৃতে যুদ্ধং কুরুমাধবসিংহয়োঃ
অন্যোন্যং ক্রুদ্ধয়োর্ঘোরং যথা দ্বিরদসিংহয়োঃ
164.36
ততঃ পূর্ণায়তোত্সৃষ্টৈঃ সাত্বতং যুদ্ধদুর্মদম্
দুর্যোধনঃ প্রত্যবিধ্যদ্দশভির্নিশিতৈঃ শরৈঃ
164.37
তং সাত্যকিঃ প্রত্যবিধ্যত্তথৈব দশভিঃ শরৈঃ
পঞ্চাশতা পুনশ্চাজৌ ত্রিংশতা দশভিশ্চ হ
164.38
তস্য সংদধতশ্চেষূন্সংহিতেষুং চ কার্মুকম্
অচ্ছিনত্সাত্যকিস্তূর্ণং শরৈশ্চৈবাভ্যবীবৃষৎ
164.39
স গাঢবিদ্ধো ব্যথিতঃ প্রত্যপায়াদ্রথান্তরম্
দুর্যোধনো মহারাজ দাশার্হশরপীডিতঃ
164.40
সমাশ্বস্য তু পুত্রস্তে সাত্যকিং পুনরভ্যয়াৎ
বিসৃজন্নিষুজালানি যুয়ুধানরথং প্রতি
164.41
তথৈব সাত্যকির্বাণান্দুর্যোধনরথং প্রতি
প্রততং ব্যসৃজদ্রাজংস্তত্সংকুলমবর্তত
164.42
তত্রেষুভিঃ ক্ষিপ্যমাণৈঃ পতদ্ভিশ্চ সমন্ততঃ
অগ্নেরিব মহাকক্ষে শব্দঃ সমভবন্মহান্
164.43
তত্রাভ্যধিকমালক্ষ্য মাধবং রথসত্তমম্
ক্ষিপ্রমভ্যপতত্কর্ণঃ পরীপ্সংস্তনয়ং তব
164.44
ন তু তং মর্ষয়ামাস ভীমসেনো মহাবলঃ
অভ্যয়াত্ত্বরিতঃ কর্ণং বিসৃজন্সায়কান্বহূন্
164.45
তস্য কর্ণঃ শিতান্বাণান্প্রতিহন্য হসন্নিব
ধনুঃ শরাংশ্চ চিচ্ছেদ সূতং চাভ্যহনচ্ছরৈঃ
164.46
ভীমসেনস্তু সংক্রুদ্ধো গদামাদায় পাণ্ডবঃ
ধ্বজং ধনুশ্চ সূতং চ সংমমর্দাহবে রিপোঃ
164.47
অমৃষ্যমাণঃ কর্ণস্তু ভীমসেনময়ুধ্যত
বিবিধৈরিষুজালৈশ্চ নানাশস্ত্রৈশ্চ সংয়ুগে
164.48
সংকুলে বর্তমানে তু রাজা ধর্মসুতোঽব্রবীৎ
পাঞ্চালানাং নরব্যাঘ্রান্মত্স্যানাং চ নরর্ষভান্
164.49
যে নঃ প্রাণাঃ শিরো যে নো যে নো যোধা মহাবলাঃ
ত এতে ধার্তরাষ্ট্রেষু বিষক্তাঃ পুরুষর্ষভাঃ
164.50
কিং তিষ্ঠত যথা মূঢাঃ সর্বে বিগতচেতসঃ
তত্র গচ্ছত যত্রৈতে যুধ্যন্তে মামকা রথাঃ
164.51
ক্ষত্রধর্মং পুরস্কৃত্য সর্ব এব গতজ্বরাঃ
জয়ন্তো বধ্যমানা বা গতিমিষ্টাং গমিষ্যথ
164.52
জিত্বা চ বহুভির্যজ্ঞৈর্যক্ষ্যধ্বং ভূরিদক্ষিণৈঃ
হতা বা দেবসাদ্ভূত্বা লোকান্প্রাপ্স্যথ পুষ্কলান্
164.53
তে রাজ্ঞা চোদিতা বীরা যোত্স্যমানা মহারথাঃ
চতুর্ধা বহিনীং কৃত্বা ত্বরিতা দ্রোণমভ্যয়ুঃ
164.54
পাঞ্চালাস্ত্বেকতো দ্রোণমভ্যঘ্নন্বহুভিঃ শরৈঃ
ভীমসেনপুরোগাশ্চ একতঃ পর্যবারয়ন্
164.55
আসংস্তু পাণ্ডুপুত্রাণাং ত্রয়োঽজিহ্মা মহারথাঃ
যমৌ চ ভীমসেনশ্চ প্রাক্রোশন্ত ধনংজয়ম্
164.56
অভিদ্রবার্জুন ক্ষিপ্রং কুরূন্দ্রোণাদপানুদ
তত এনং হনিষ্যন্তি পাঞ্চালা হতরক্ষিণম্
164.57
কৌরবেয়াংস্ততঃ পার্থঃ সহসা সমুপাদ্রবৎ
পাঞ্চালানেব তু দ্রোণো ধৃষ্টদ্যুম্নপুরোগমান্
164.58
পাঞ্চালানাং ততো দ্রোণোঽপ্যকরোত্কদনং মহৎ
যথা ক্রুদ্ধো রণে শক্রো দানবানাং ক্ষয়ং পুরা
164.59
দ্রোণাস্ত্রেণ মহারাজ বধ্যমানাঃ পরে যুধি
নাত্রসন্ত রণে দ্রোণাত্সত্ত্ববন্তো মহারথাঃ
164.60
বধ্যমানা মহারাজ পাঞ্চালাঃ সৃঞ্জয়াস্তথা
দ্রোণমেবাভ্যয়ুর্যুদ্ধে মোহয়ন্তো মহারথম্
164.61
তেষাং তূত্সাদ্যমানানাং পাঞ্চালানাং সমন্ততঃ
অভবদ্ভৈরবো নাদো বধ্যতাং শরশক্তিভিঃ
164.62
বধ্যমানেষু সংগ্রামে পাঞ্চালেষু মহাত্মনা
উদীর্যমাণে দ্রোণাস্ত্রে পাণ্ডবান্ভয়মাবিশৎ
164.63
দৃষ্ট্বাশ্বনরসংঘানাং বিপুলং চ ক্ষয়ং যুধি
পাণ্ডবেয়া মহারাজ নাশংসুর্বিজয়ং তদা
164.64
কচ্চিদ্দ্রোণো ন নঃ সর্বান্ক্ষপয়েত্পরমাস্ত্রবিৎ
সমিদ্ধঃ শিশিরাপায়ে দহন্কক্ষমিবানলঃ
164.65
ন চৈনং সংয়ুগে কশ্চিত্সমর্থঃ প্রতিবীক্ষিতুম্
ন চৈনমর্জুনো জাতু প্রতিয়ুধ্যেত ধর্মবিৎ
164.66
ত্রস্তান্কুন্তীসুতান্দৃষ্ট্বা দ্রোণসায়কপীডিতান্
মতিমাঞ্শ্রেয়সে যুক্তঃ কেশবোঽর্জুনমব্রবীৎ
164.67
নৈষ যুদ্ধেন সংগ্রামে জেতুং শক্যঃ কথংচন
অপি বৃত্রহণা যুদ্ধে রথয়ূথপয়ূথপঃ
164.68
আস্থীয়তাং জয়ে যোগো ধর্মমুত্সৃজ্য পাণ্ডব
যথা বঃ সংয়ুগে সর্বান্ন হন্যাদ্রুক্মবাহনঃ
164.69
অশ্বত্থাম্নি হতে নৈষ যুধ্যেদিতি মতির্মম
তং হতং সংয়ুগে কশ্চিদস্মৈ শংসতু মানবঃ
164.70
এতন্নারোচয়দ্রাজন্কুন্তীপুত্রো ধনংজয়ঃ
অন্যে ত্বরোচয়ন্সর্বে কৃচ্ছ্রেণ তু যুধিষ্ঠিরঃ
164.71
ততো ভীমো মহাবাহুরনীকে স্বে মহাগজম্
জঘান গদয়া রাজন্নশ্বত্থামানমিত্যুত
164.72
ভীমসেনস্তু সব্রীডমুপেত্য দ্রোণমাহবে
অশ্বত্থামা হত ইতি শব্দমুচ্চৈশ্চকার হ
164.73
অশ্বত্থামেতি হি গজঃ খ্যাতো নাম্না হতোঽভবৎ
কৃত্বা মনসি তং ভীমো মিথ্যা ব্যাহৃতবাংস্তদা
164.74
ভীমসেনবচঃ শ্রুত্বা দ্রোণস্তত্পরমপ্রিয়ম্
মনসা সন্নগাত্রোঽভূদ্যথা সৈকতমম্ভসি
164.75
শঙ্কমানঃ স তন্মিথ্যা বীর্যজ্ঞঃ স্বসুতস্য বৈ
হতঃ স ইতি চ শ্রুত্বা নৈব ধৈর্যাদকম্পত
164.76
স লব্ধ্বা চেতনাং দ্রোণঃ ক্ষণেনৈব সমাশ্বসৎ
অনুচিন্ত্যাত্মনঃ পুত্রমবিষহ্যমরাতিভিঃ
164.77
স পার্ষতমভিদ্রুত্য জিঘাংসুর্মৃত্যুমাত্মনঃ
অবাকিরত্সহস্রেণ তীক্ষ্ণানাং কঙ্কপত্রিণাম্
164.78
তং বৈ বিংশতিসাহস্রাঃ পাঞ্চালানাং নরর্ষভাঃ
তথা চরন্তং সংগ্রামে সর্বতো ব্যকিরঞ্শরৈঃ
164.79
ততঃ প্রাদুষ্করোদ্দ্রোণো ব্রাহ্মমস্ত্রং পরংতপঃ
বধায় তেষাং শূরাণাং পাঞ্চালানামমর্ষিতঃ
164.80
ততো ব্যরোচত দ্রোণো বিনিঘ্নন্সর্বসোমকান্
শিরাংস্যপাতয়চ্চাপি পাঞ্চালানাং মহামৃধে
তথৈব পরিঘাকারান্বাহূন্কনকভূষণান্
164.81
তে বধ্যমানাঃ সমরে ভারদ্বাজেন পার্থিবাঃ
মেদিন্যামন্বকীর্যন্ত বাতনুন্না ইব দ্রুমাঃ
164.82
কুঞ্জরাণাং চ পততাং হয়ৌঘানাং চ ভারত
অগম্যরূপা পৃথিবী মাংসশোণিতকর্দমা
164.83
হত্বা বিংশতিসাহস্রান্পাঞ্চালানাং রথব্রজান্
অতিষ্ঠদাহবে দ্রোণো বিধূমোঽগ্নিরিব জ্বলন্
164.84
তথৈব চ পুনঃ ক্রুদ্ধো ভারদ্বাজঃ প্রতাপবান্
বসুদানস্য ভল্লেন শিরঃ কায়াদপাহরৎ
164.85
পুনঃ পঞ্চশতান্মত্স্যান্ষট্সহস্রাংশ্চ সৃঞ্জয়ান্
হস্তিনাময়ুতং হত্বা জঘানাশ্বায়ুতং পুনঃ
164.86
ক্ষত্রিয়াণামভাবায় দৃষ্ট্বা দ্রোণমবস্থিতম্
ঋষয়োঽভ্যাগমংস্তূর্ণং হব্যবাহপুরোগমাঃ
164.87
বিশ্বামিত্রো জমদগ্নির্ভারদ্বাজোঽথ গৌতমঃ
বসিষ্ঠঃ কশ্যপোঽত্রিশ্চ ব্রহ্মলোকং নিনীষবঃ
164.88
সিকতাঃ পৃশ্নয়ো গর্গা বালখিল্যা মরীচিপাঃ
ভৃগবোঽঙ্গিরসশ্চৈব সূক্ষ্মাশ্চান্যে মহর্ষয়ঃ
164.89
ত এনমব্রুবন্সর্বে দ্রোণমাহবশোভিনম্
অধর্মতঃ কৃতং যুদ্ধং সময়ো নিধনস্য তে
164.90
ন্যস্যায়ুধং রণে দ্রোণ সমেত্যাস্মানবস্থিতান্
নাতঃ ক্রূরতরং কর্ম পুনঃ কর্তুং ত্বমর্হসি
164.91
বেদবেদাঙ্গবিদুষঃ সত্যধর্মপরস্য চ
ব্রাহ্মণস্য বিশেষেণ তবৈতন্নোপপদ্যতে
164.92
ন্যস্যায়ুধমমোঘেষো তিষ্ঠ বর্ত্মনি শাশ্বতে
পরিপূর্ণশ্চ কালস্তে বস্তুং লোকেঽদ্য মানুষে
164.93
ইতি তেষাং বচঃ শ্রুত্বা ভীমসেনবচশ্চ তৎ
ধৃষ্টদ্যুম্নং চ সংপ্রেক্ষ্য রণে স বিমনাভবৎ
164.94
স দহ্যমানো ব্যথিতঃ কুন্তীপুত্রং যুধিষ্ঠিরম্
অহতং বা হতং বেতি পপ্রচ্ছ সুতমাত্মনঃ
164.95
স্থিরা বুদ্ধির্হি দ্রোণস্য ন পার্থো বক্ষ্যতেঽনৃতম্
ত্রয়াণামপি লোকানামৈশ্বর্যার্থে কথংচন
164.96
তস্মাত্তং পরিপপ্রচ্ছ নান্যং কংচিদ্বিশেষতঃ
তস্মিংস্তস্য হি সত্যাশা বাল্যাত্প্রভৃতি পাণ্ডবে
164.97
ততো নিষ্পাণ্ডবামুর্বীং করিষ্যন্তং যুধাং পতিম্
দ্রোণং জ্ঞাত্বা ধর্মরাজং গোবিন্দো ব্যথিতোঽব্রবীৎ
164.98
যদ্যর্ধদিবসং দ্রোণো যুধ্যতে মন্যুমাস্থিতঃ
সত্যং ব্রবীমি তে সেনা বিনাশং সমুপৈষ্যতি
164.99
স ভবাংস্ত্রাতু নো দ্রোণাত্সত্যাজ্জ্যায়োঽনৃতং ভবেৎ
অনৃতং জীবিতস্যার্থে বদন্ন স্পৃশ্যতেঽনৃতৈঃ
164.100
তয়োঃ সংবদতোরেবং ভীমসেনোঽব্রবীদিদম্
শ্রুত্বৈব তং মহারাজ বধোপায়ং মহাত্মনঃ
164.101
গাহমানস্য তে সেনাং মালবস্যেন্দ্রবর্মণঃ
অশ্বত্থামেতি বিখ্যাতো গজঃ শক্রগজোপমঃ
164.102
নিহতো যুধি বিক্রম্য ততোঽহং দ্রোণমব্রুবম্
অশ্বত্থামা হতো ব্রহ্মন্নিবর্তস্বাহবাদিতি
164.103
নূনং নাশ্রদ্দধদ্বাক্যমেষ মে পুরুষর্ষভঃ
স ত্বং গোবিন্দবাক্যানি মানয়স্ব জয়ৈষিণঃ
164.104
দ্রোণায় নিহতং শংস রাজঞ্শারদ্বতীসুতম্
ত্বয়োক্তো নৈষ যুধ্যেত জাতু রাজন্দ্বিজর্ষভঃ
সত্যবান্হি নৃলোকেঽস্মিন্ভবান্খ্যাতো জনাধিপ
164.105
তস্য তদ্বচনং শ্রুত্বা কৃষ্ণবাক্যপ্রচোদিতঃ
ভাবিত্বাচ্চ মহারাজ বক্তুং সমুপচক্রমে
164.106
তমতথ্যভয়ে মগ্নো জয়ে সক্তো যুধিষ্ঠিরঃ
অব্যক্তমব্রবীদ্রাজন্হতঃ কুঞ্জর ইত্যুত
164.107
তস্য পূর্বং রথঃ পৃথ্ব্যাশ্চতুরঙ্গুল উত্তরঃ
বভূবৈবং তু তেনোক্তে তস্য বাহাস্পৃশন্মহীম্
164.108
যুধিষ্ঠিরাত্তু তদ্বাক্যং শ্রুত্বা দ্রোণো মহারথঃ
পুত্রব্যসনসংতপ্তো নিরাশো জীবিতেঽভবৎ
164.109
আগস্কৃতমিবাত্মানং পাণ্ডবানাং মহাত্মনাম্
ঋষিবাক্যং চ মন্বানঃ শ্রুত্বা চ নিহতং সুতম্
164.110
বিচেতাঃ পরমোদ্বিগ্নো ধৃষ্টদ্যুম্নমবেক্ষ্য চ
যোদ্ধুং নাশক্নুবদ্রাজন্যথাপূর্বমরিংদম
164.111
তং দৃষ্ট্বা পরমোদ্বিগ্নং শোকোপহতচেতসম্
পাঞ্চালরাজস্য সুতো ধৃষ্টদ্যুম্নঃ সমাদ্রবৎ
164.112
য ইষ্ট্বা মনুজেন্দ্রেণ দ্রুপদেন মহামখে
লব্ধো দ্রোণবিনাশায় সমিদ্ধাদ্ধব্যবাহনাৎ
164.113
স ধনুর্জৈত্রমাদায় ঘোরং জলদনিস্বনম্
দৃঢজ্যমজরং দিব্যং শরাংশ্চাশীবিষোপমান্
164.114
সংদধে কার্মুকে তস্মিঞ্শরমাশীবিষোপমম্
দ্রোণং জিঘাংসুঃ পাঞ্চাল্যো মহাজ্বালমিবানলম্
164.115
তস্য রূপং শরস্যাসীদ্ধনুর্জ্যামণ্ডলান্তরে
দ্যোততো ভাস্করস্যেব ঘনান্তে পরিবেশিনঃ
164.116
পার্ষতেন পরামৃষ্টং জ্বলন্তমিব তদ্ধনুঃ
অন্তকালমিব প্রাপ্তং মেনিরে বীক্ষ্য সৈনিকাঃ
164.117
তমিষুং সংহিতং তেন ভারদ্বাজঃ প্রতাপবান্
দৃষ্ট্বামন্যত দেহস্য কালপর্যায়মাগতম্
164.118
ততঃ স যত্নমাতিষ্ঠদাচার্যস্তস্য বারণে
ন চাস্যাস্ত্রাণি রাজেন্দ্র প্রাদুরাসন্মহাত্মনঃ
164.119
তস্য ত্বহানি চত্বারি ক্ষপা চৈকাস্যতো গতা
তস্য চাহ্নস্ত্রিভাগেন ক্ষয়ং জগ্মুঃ পতত্রিণঃ
164.120
স শরক্ষয়মাসাদ্য পুত্রশোকেন চার্দিতঃ
বিবিধানাং চ দিব্যানামস্ত্রাণামপ্রসন্নতাম্
164.121
উত্স্রষ্টুকামঃ শস্ত্রাণি বিপ্রবাক্যাভিচোদিতঃ
তেজসা প্রের্যমাণশ্চ যুয়ুধে সোঽতিমানুষম্
164.122
অথান্যত্স সমাদায় দিব্যমাঙ্গিরসং ধনুঃ
শরাংশ্চ ব্রহ্মদণ্ডাভান্ধৃষ্টদ্যুম্নময়োধয়ৎ
164.123
ততস্তং শরবর্ষেণ মহতা সমবাকিরৎ
ব্যশাতয়চ্চ সংক্রুদ্ধো ধৃষ্টদ্যুম্নমমর্ষণঃ
164.124
তং শরং শতধা চাস্য দ্রোণশ্চিচ্ছেদ সায়কৈঃ
ধ্বজং ধনুশ্চ নিশিতৈঃ সারথিং চাপ্যপাতয়ৎ
164.125
ধৃষ্টদ্যুম্নঃ প্রহস্যান্যত্পুনরাদায় কার্মুকম্
শিতেন চৈনং বাণেন প্রত্যবিধ্যত্স্তনান্তরে
164.126
সোঽতিবিদ্ধো মহেষ্বাসঃ সংভ্রান্ত ইব সংয়ুগে
ভল্লেন শিতধারেণ চিচ্ছেদাস্য মহদ্ধনুঃ
164.127
যচ্চাস্য বাণং বিকৃতং ধনূংষি চ বিশাং পতে
সর্বং সংছিদ্য দুর্ধর্ষো গদাং খড্গমথাপি চ
164.128
ধৃষ্টদ্যুম্নং ততোঽবিধ্যন্নবভির্নিশিতৈঃ শরৈঃ
জীবিতান্তকরৈঃ ক্রুদ্ধঃ ক্রুদ্ধরূপং পরংতপঃ
164.129
ধৃষ্টদ্যুম্নরথস্যাশ্বান্স্বরথাশ্বৈর্মহারথঃ
অমিশ্রয়দমেয়াত্মা ব্রাহ্মমস্ত্রমুদীরয়ন্
164.130
তে মিশ্রা বহ্বশোভন্ত জবনা বাতরংহসঃ
পারাবতসবর্ণাশ্চ শোণাশ্চ ভরতর্ষভ
164.131
যথা সবিদ্যুতো মেঘা নদন্তো জলদাগমে
তথা রেজুর্মহারাজ মিশ্রিতা রণমূর্ধনি
164.132
ঈষাবন্ধং চক্রবন্ধং রথবন্ধং তথৈব চ
প্রণাশয়দমেয়াত্মা ধৃষ্টদ্যুম্নস্য স দ্বিজঃ
164.133
স ছিন্নধন্বা বিরথো হতাশ্বো হতসারথিঃ
উত্তমামাপদং প্রাপ্য গদাং বীরঃ পরামৃশৎ
164.134
তামস্য বিশিখৈস্তীক্ষ্ণৈঃ ক্ষিপ্যমাণাং মহারথঃ
নিজঘান শরৈর্দ্রোণঃ ক্রুদ্ধঃ সত্যপরাক্রমঃ
164.135
তাং দৃষ্ট্বা তু নরব্যাঘ্রো দ্রোণেন নিহতাং শরৈঃ
বিমলং খড্গমাদত্ত শতচন্দ্রং চ ভানুমৎ
164.136
অসংশয়ং তথাভূতে পাঞ্চাল্যঃ সাধ্বমন্যত
বধমাচার্যমুখ্যস্য প্রাপ্তকালং মহাত্মনঃ
164.137
ততঃ স্বরথনীডস্থঃ স্বরথস্য রথেষয়া
অগচ্ছদসিমুদ্যম্য শতচন্দ্রং চ ভানুমৎ
164.138
চিকীর্ষুর্দুষ্করং কর্ম ধৃষ্টদ্যুম্নো মহারথঃ
ইয়েষ বক্ষো ভেত্তুং চ ভারদ্বাজস্য সংয়ুগে
164.139
সোঽতিষ্ঠদ্যুগমধ্যে বৈ যুগসংনহনেষু চ
শোণানাং জঘনার্ধেষু তত্সৈন্যাঃ সমপূজয়ন্
164.140
তিষ্ঠতো যুগপালীষু শোণানপ্যধিতিষ্ঠতঃ
নাপশ্যদন্তরং দ্রোণস্তদদ্ভুতমিবাভবৎ
164.141
ক্ষিপ্রং শ্যেনস্য চরতো যথৈবামিষগৃদ্ধিনঃ
তদ্বদাসীদভীসারো দ্রোণং প্রার্থয়তো রণে
164.142
তস্যাশ্বান্রথশক্ত্যাসৌ তদা ক্রুদ্ধঃ পরাক্রমী
সর্বানেকৈকশো দ্রোণঃ কপোতাভানজীঘনৎ
164.143
তে হতা ন্যপতন্ভূমৌ ধৃষ্টদ্যুম্নস্য বাজিনঃ
শোণাশ্চ পর্যমুচ্যন্ত রথবন্ধাদ্বিশাং পতে
164.144
তান্হয়ান্নিহতান্দৃষ্ট্বা দ্বিজাগ্র্যেণ স পার্ষতঃ
নামৃষ্যত যুধাং শ্রেষ্ঠো যাজ্ঞসেনির্মহারথঃ
164.145
বিরথঃ স গৃহীত্বা তু খড্গং খড্গভৃতাং বরঃ
দ্রোণমভ্যপতদ্রাজন্বৈনতেয় ইবোরগম্
164.146
তস্য রূপং বভৌ রাজন্ভারদ্বাজং জিঘাংসতঃ
যথা রূপং পরং বিষ্ণোর্হিরণ্যকশিপোর্বধে
164.147
সোঽচরদ্বিবিধান্মার্গান্প্রকারানেকবিংশতিম্
ভ্রান্তমুদ্ভ্রান্তমাবিদ্ধমাপ্লুতং প্রসৃতং সৃতম্
164.148
পরিবৃত্তং নিবৃত্তং চ খড্গং চর্ম চ ধারয়ন্
সংপাতং সমুদীর্ণং চ দর্শয়ামাস পার্ষতঃ
164.149
ততঃ শরসহস্রেণ শতচন্দ্রমপাতয়ৎ
খড্গং চর্ম চ সংবাধে ধৃষ্টদ্যুম্নস্য স দ্বিজঃ
164.150
তে তু বৈতস্তিকা নাম শরা হ্যাসন্নঘাতিনঃ
নিকৃষ্টয়ুদ্ধে দ্রোণস্য নান্যেষাং সন্তি তে শরাঃ
164.151
শারদ্বতস্য পার্থস্য দ্রৌণের্বৈকর্তনস্য চ
প্রদ্যুম্নয়ুয়ুধানাভ্যামভিমন্যোশ্চ তে শরাঃ
164.152
অথাস্যেষুং সমাধত্ত দৃঢং পরমসংশিতম্
অন্তেবাসিনমাচার্যো জিঘাংসুঃ পুত্রসংমিতম্
164.153
তং শরৈর্দশভিস্তীক্ষ্ণৈশ্চিচ্ছেদ শিনিপুংগবঃ
পশ্যতস্তব পুত্রস্য কর্ণস্য চ মহাত্মনঃ
গ্রস্তমাচার্যমুখ্যেন ধৃষ্টদ্যুম্নমমোচয়ৎ
164.154
চরন্তং রথমার্গেষু সাত্যকিং সত্যবিক্রমম্
দ্রোণকর্ণান্তরগতং কৃপস্যাপি চ ভারত
অপশ্যেতাং মহাত্মানৌ বিষ্বক্সেনধনংজয়ৌ
164.155
অপূজয়েতাং বার্ষ্ণেয়ং ব্রুবাণৌ সাধু সাধ্বিতি
দিব্যান্যস্ত্রাণি সর্বেষাং যুধি নিঘ্নন্তমচ্যুতম্
অভিপত্য ততঃ সেনাং বিষ্বক্সেনধনংজয়ৌ
164.156
ধনংজয়স্ততঃ কৃষ্ণমব্রবীত্পশ্য কেশব
আচার্যবরমুখ্যানাং মধ্যে ক্রীডন্মধূদ্বহঃ
164.157
আনন্দয়তি মাং ভূয়ঃ সাত্যকিঃ সত্যবিক্রমঃ
মাদ্রীপুত্রৌ চ ভীমং চ রাজানং চ যুধিষ্ঠিরম্
164.158
যচ্ছিক্ষয়ানুদ্ধতঃ সন্রণে চরতি সাত্যকিঃ
মহারথানুপক্রীডন্বৃষ্ণীনাং কীর্তিবর্ধনঃ
164.159
তমেতে প্রতিনন্দন্তি সিদ্ধাঃ সৈন্যাশ্চ বিস্মিতাঃ
অজয্যং সমরে দৃষ্ট্বা সাধু সাধ্বিতি সাত্বতম্
যোধাশ্চোভয়তঃ সর্বে কর্মভিঃ সমপূজয়ন্