Utshovঅধ্যায় 163
163.1
সংজয় উবাচ
ততো দুঃশাসনঃ ক্রুদ্ধঃ সহদেবমুপাদ্রবৎ
রথবেগেন তীব্রেণ কম্পয়ন্নিব মেদিনীম্
163.2
তস্যাপতত এবাশু ভল্লেনামিত্রকর্শনঃ
মাদ্রীসুতঃ শিরো যন্তুঃ সশিরস্ত্রাণমচ্ছিনৎ
163.3
নৈনং দুঃশাসনঃ সূতং নাপি কশ্চন সৈনিকঃ
হৃতোত্তমাঙ্গমাশুত্বাত্সহদেবেন বুদ্ধবান্
163.4
যদা ত্বসংগৃহীতত্বাত্প্রয়ান্ত্যশ্বা যথাসুখম্
ততো দুঃশাসনঃ সূতং বুদ্ধবান্গতচেতসম্
163.5
স হয়ান্সংনিগৃহ্যাজৌ স্বয়ং হয়বিশারদঃ
যুয়ুধে রথিনাং শ্রেষ্ঠশ্চিত্রং লঘু চ সুষ্ঠু চ
163.6
তদস্যাপূজয়ন্কর্ম স্বে পরে চৈব সংয়ুগে
হতসূতরথেনাজৌ ব্যচরদ্যদভীতবৎ
163.7
সহদেবস্তু তানশ্বাংস্তীক্ষ্ণৈর্বাণৈরবাকিরৎ
পীড্যমানাঃ শরৈশ্চাশু প্রাদ্রবংস্তে ততস্ততঃ
163.8
স রশ্মিষু বিষক্তত্বাদুত্সসর্জ শরাসনম্
ধনুষা কর্ম কুর্বংস্তু রশ্মীন্স পুনরুত্সৃজৎ
163.9
ছিদ্রেষু তেষু তং বাণৈর্মাদ্রীপুত্রোঽভ্যবাকিরৎ
পরীপ্সংস্ত্বত্সুতং কর্ণস্তদন্তরমবাপতৎ
163.10
বৃকোদরস্ততঃ কর্ণং ত্রিভির্ভল্লৈঃ সমাহিতৈঃ
আকর্ণপূর্ণৈরভ্যঘ্নন্বাহ্বোরুরসি চানদৎ
163.11
সংন্যবর্তত তং কর্ণঃ সংঘট্টিত ইবোরগঃ
তদভূত্তুমুলং যুদ্ধং ভীমরাধেয়য়োস্তদা
163.12
তৌ বৃষাবিব সংক্রুদ্ধৌ বিবৃত্তনয়নাবুভৌ
বেগেন মহতান্যোন্যং সংরব্ধাবভিপেততুঃ
163.13
অভিসংশ্লিষ্টয়োস্তত্র তয়োরাহবশৌণ্ডয়োঃ
অভিন্নশরপাতত্বাদ্গদায়ুদ্ধমবর্তত
163.14
গদয়া ভীমসেনস্তু কর্ণস্য রথকূবরম্
বিভেদাশু তদা রাজংস্তদদ্ভুতমিবাভবৎ
163.15
ততো ভীমস্য রাধেয়ো গদামাদায় বীর্যবান্
অবাসৃজদ্রথে তাং তু বিভেদ গদয়া গদাম্
163.16
ততো ভীমঃ পুনর্গুর্বীং চিক্ষেপাধিরথের্গদাম্
তাং শরৈর্দশভিঃ কর্ণঃ সুপুঙ্খৈঃ সুসমাহিতৈঃ
প্রত্যবিধ্যত্পুনশ্চান্যৈঃ সা ভীমং পুনরাব্রজৎ
163.17
তস্যাঃ প্রতিনিপাতেন ভীমস্য বিপুলো ধ্বজঃ
পপাত সারথিশ্চাস্য মুমোহ গদয়া হতঃ
163.18
স কর্ণে সায়কানষ্টৌ ব্যসৃজত্ক্রোধমূর্ছিতঃ
ধ্বজে শরাসনে চৈব শরাবাপে চ ভারত
163.19
ততঃ পুনস্তু রাধেয়ো হয়ানস্য রথেষুভিঃ
ঋষ্যবর্ণাঞ্জঘানাশু তথোভৌ পার্ষ্ণিসারথী
163.20
স বিপন্নরথো ভীমো নকুলস্যাপ্লুতো রথম্
হরির্যথা গিরেঃ শৃঙ্গং সমাক্রামদরিংদমঃ
163.21
তথা দ্রোণার্জুনৌ চিত্রময়ুধ্যেতাং মহারথৌ
আচার্যশিষ্যৌ রাজেন্দ্র কৃতপ্রহরণৌ যুধি
163.22
লঘুসংধানয়োগাভ্যাং রথয়োশ্চ রণেন চ
মোহয়ন্তৌ মনুষ্যাণাং চক্ষূংষি চ মনাংসি চ
163.23
উপারমন্ত তে সর্বে যোধাস্মাকং পরে তথা
অদৃষ্টপূর্বং পশ্যন্তস্তদ্যুদ্ধং গুরুশিষ্যয়োঃ
163.24
বিচিত্রান্পৃতনামধ্যে রথমার্গানুদীর্যতঃ
অন্যোন্যমপসব্যং চ কর্তুং বীরৌ তদৈষতুঃ
পরাক্রমং তয়োর্যোধা দদৃশুস্তং সুবিস্মিতাঃ
163.25
তয়োঃ সমভবদ্যুদ্ধং দ্রোণপাণ্ডবয়োর্মহৎ
আমিষার্থং মহারাজ গগনে শ্যেনয়োরিব
163.26
যদ্যচ্চকার দ্রোণস্তু কুন্তীপুত্রজিগীষয়া
তত্তত্প্রতিজঘানাশু প্রহসংস্তস্য পাণ্ডবঃ
163.27
যদা দ্রোণো ন শক্নোতি পাণ্ডবস্য বিশেষণে
ততঃ প্রাদুশ্চকারাস্ত্রমস্ত্রমার্গবিশারদঃ
163.28
ঐন্দ্রং পাশুপতং ত্বাষ্ট্রং বায়ব্যমথ বারুণম্
মুক্তং মুক্তং দ্রোণচাপাত্তজ্জঘান ধনংজয়ঃ
163.29
অস্ত্রাণ্যস্ত্রৈর্যদা তস্য বিধিবদ্ধন্তি পাণ্ডবঃ
ততোঽস্ত্রৈঃ পরমৈর্দিব্যৈর্দ্রোণঃ পার্থমবাকিরৎ
163.30
যদ্যদস্ত্রং স পার্থায় প্রয়ুঙ্ক্তে বিজিগীষয়া
তস্যাস্ত্রস্য বিঘাতার্থং তত্তত্স কুরুতেঽর্জুনঃ
163.31
স বধ্যমানেষ্বস্ত্রেষু দিব্যেষ্বপি যথাবিধি
অর্জুনেনার্জুনং দ্রোণো মনসৈবাভ্যপূজয়ৎ
163.32
মেনে চাত্মানমধিকং পৃথিব্যামপি ভারত
তেন শিষ্যেণ সর্বেভ্যঃ শস্ত্রবিদ্ভ্যঃ সমন্ততঃ
163.33
বার্যমাণস্তু পার্থেন তথা মধ্যে মহাত্মনাম্
যতমানোঽর্জুনং প্রীত্যা প্রত্যবারয়দুত্স্ময়ন্
163.34
ততোঽন্তরিক্ষে দেবাশ্চ গন্ধর্বাশ্চ সহস্রশঃ
ঋষয়ঃ সিদ্ধসংঘাশ্চ ব্যতিষ্ঠন্ত দিদৃক্ষয়া
163.35
তদপ্সরোভিরাকীর্ণং যক্ষরাক্ষসসংকুলম্
শ্রীমদাকাশমভবদ্ভূয়ো মেঘাকুলং যথা
163.36
তত্র স্মান্তর্হিতা বাচো ব্যচরন্ত পুনঃ পুনঃ
দ্রোণস্য স্তবসংয়ুক্তাঃ পার্থস্য চ মহাত্মনঃ
বিসৃজ্যমানেষ্বস্ত্রেষু জ্বালয়ত্সু দিশো দশ
163.37
নৈবেদং মানুষং যুদ্ধং নাসুরং ন চ রাক্ষসম্
ন দৈবং ন চ গান্ধর্বং ব্রাহ্মং ধ্রুবমিদং পরম্
বিচিত্রমিদমাশ্চর্যং ন নো দৃষ্টং ন চ শ্রুতম্
163.38
অতি পাণ্ডবমাচার্যো দ্রোণং চাপ্যতি পাণ্ডবঃ
নানয়োরন্তরং দ্রষ্টুং শক্যমস্ত্রেণ কেনচিৎ
163.39
যদি রুদ্রো দ্বিধাকৃত্য যুধ্যেতাত্মানমাত্মনা
তত্র শক্যোপমা কর্তুমন্যত্র তু ন বিদ্যতে
163.40
জ্ঞানমেকস্থমাচার্যে জ্ঞানং যোগশ্চ পাণ্ডবে
শৌর্যমেকস্থমাচার্যে বলং শৌর্যং চ পাণ্ডবে
163.41
নেমৌ শক্যৌ মহেষ্বাসৌ রণে ক্ষেপয়িতুং পরৈঃ
ইচ্ছমানৌ পুনরিমৌ হন্যেতাং সামরং জগৎ
163.42
ইত্যব্রুবন্মহারাজ দৃষ্ট্বা তৌ পুরুষর্ষভৌ
অন্তর্হিতানি ভূতানি প্রকাশানি চ সংঘশঃ
163.43
ততো দ্রোণো ব্রাহ্মমস্ত্রং প্রাদুশ্চক্রে মহামতিঃ
সংতাপয়ন্রণে পার্থং ভূতান্যন্তর্হিতানি চ
163.44
ততশ্চচাল পৃথিবী সপর্বতবনদ্রুমা
ববৌ চ বিষমো বায়ুঃ সাগরাশ্চাপি চুক্ষুভুঃ
163.45
ততস্ত্রাসো মহানাসীত্কুরুপাণ্ডবসেনয়োঃ
সর্বেষাং চৈব ভূতানামুদ্যতেঽস্ত্রে মহাত্মনা
163.46
ততঃ পার্থোঽপ্যসংভ্রান্তস্তদস্ত্রং প্রতিজঘ্নিবান্
ব্রহ্মাস্ত্রেণৈব রাজেন্দ্র ততঃ সর্বমশীশমৎ
163.47
যদা ন গম্যতে পারং তয়োরন্যতরস্য বা
ততঃ সংকুলয়ুদ্ধেন তদ্যুদ্ধং ব্যকুলীকৃতম্
163.48
নাজ্ঞায়ত ততঃ কিংচিত্পুনরেব বিশাং পতে
প্রবৃত্তে তুমুলে যুদ্ধে দ্রোণপাণ্ডবয়োর্মৃধে
163.49
শরজালৈঃ সমাকীর্ণে মেঘজালৈরিবাম্বরে
ন স্ম সংপততে কশ্চিদন্তরিক্ষচরস্তদা