Utshovঅধ্যায় 162
162.1
সংজয় উবাচ
তে তথৈব মহারাজ দংশিতা রণমূর্ধনি
সংধ্যাগতং সহস্রাংশুমাদিত্যমুপতস্থিরে
162.2
উদিতে তু সহস্রাংশৌ তপ্তকাঞ্চনসপ্রভে
প্রকাশিতেষু লোকেষু পুনর্যুদ্ধমবর্তত
162.3
দ্বংদ্বানি যানি তত্রাসন্সংসক্তানি পুরোদয়াৎ
তান্যেবাভ্যুদিতে সূর্যে সমসজ্জন্ত ভারত
162.4
রথৈর্হয়া হয়ৈর্নাগাঃ পাদাতাশ্চাপি কুঞ্জরৈঃ
হয়া হয়ৈঃ সমাজগ্মুঃ পাদাতাশ্চ পদাতিভিঃ
সংসক্তাশ্চ বিয়ুক্তাশ্চ যোধাঃ সংন্যপতন্রণে
162.5
তে রাত্রৌ কৃতকর্মাণঃ শ্রান্তাঃ সূর্যস্য তেজসা
ক্ষুত্পিপাসাপরীতাঙ্গা বিসংজ্ঞা বহবোঽভবন্
162.6
শঙ্খভেরীমৃদঙ্গানাং কুঞ্জরাণাং চ গর্জতাম্
বিস্ফারিতবিকৃষ্টানাং কার্মুকাণাং চ কূজতাম্
162.7
শব্দঃ সমভবদ্রাজন্দিবিস্পৃগ্ভরতর্ষভ
দ্রবতাং চ পদাতীনাং শস্ত্রাণাং বিনিপাত্যতাম্
162.8
হয়ানাং হেষতাং চৈব রথানাং চ নিবর্ততাম্
ক্রোশতাং গর্জতাং চৈব তদাসীত্তুমুলং মহৎ
162.9
বিবৃদ্ধস্তুমুলঃ শব্দো দ্যামগচ্ছন্মহাস্বনঃ
নানায়ুধনিকৃত্তানাং চেষ্টতামাতুরঃ স্বনঃ
162.10
ভূমাবশ্রূয়ত মহাংস্তদাসীত্কৃপণং মহৎ
পততাং পতিতানাং চ পত্ত্যশ্বরথহস্তিনাম্
162.11
তেষু সর্বেষ্বনীকেষু ব্যতিষক্তেষ্বনেকশঃ
স্বে স্বাঞ্জঘ্নুঃ পরে স্বাংশ্চ স্বে পরাংশ্চ পরান্পরে
162.12
বীরবাহুবিসৃষ্টাশ্চ যোধেষু চ গজেষু চ
অসয়ঃ প্রত্যদৃশ্যন্ত বাসসাং নেজনেষ্বিব
162.13
উদ্যতপ্রতিপিষ্টানাং খড্গানাং বীরবাহুভিঃ
স এব শব্দস্তদ্রূপো বাসসাং নিজ্যতামিব
162.14
অর্ধাসিভিস্তথা খড্গৈস্তোমরৈঃ সপরশ্বধৈঃ
নিকৃষ্টয়ুদ্ধং সংসক্তং মহদাসীত্সুদারুণম্
162.15
গজাশ্বকায়প্রভবাং নরদেহপ্রবাহিনীম্
শস্ত্রমত্স্যসুসংপূর্ণাং মাংসশোণিতকর্দমাম্
162.16
আর্তনাদস্বনবতীং পতাকাবস্ত্রফেনিলাম্
নদীং প্রাবর্তয়ন্বীরাঃ পরলোকপ্রবাহিনীম্
162.17
শরশক্ত্যর্দিতাঃ ক্লান্তা রাত্রিমূঢাল্পচেতসঃ
বিষ্টভ্য সর্বগাত্রাণি ব্যতিষ্ঠন্গজবাজিনঃ
সংশুষ্কবদনা বীরাঃ শিরোভিশ্চারুকুণ্ডলৈঃ
162.18
যুদ্ধোপকরণৈশ্চান্যৈস্তত্র তত্র প্রকাশিতৈঃ
ক্রব্যাদসংঘৈরাকীর্ণং মৃতৈরর্ধমৃতৈরপি
নাসীদ্রথপথস্তত্র সর্বমায়োধনং প্রতি
162.19
মজ্জত্সু চক্রেষু রথান্সত্ত্বমাস্থায় বাজিনঃ
কথংচিদবহঞ্শ্রান্তা বেপমানাঃ শরার্দিতাঃ
কুলসত্ত্ববলোপেতা বাজিনো বারণোপমাঃ
162.20
বিহ্বলং তত্সমুদ্ভ্রান্তং সভয়ং ভারতাতুরম্
বলমাসীত্তদা সর্বমৃতে দ্রোণার্জুনাবুভৌ
162.21
তাবেবাস্তাং নিলয়নং তাবার্তায়নমেব চ
তাবেবান্যে সমাসাদ্য জগ্মুর্বৈবস্বতক্ষয়ম্
162.22
আবিগ্নমভবত্সর্বং কৌরবাণাং মহদ্বলম্
পাঞ্চালানাং চ সংসক্তং ন প্রাজ্ঞায়ত কিংচন
162.23
অন্তকাক্রীডসদৃশে ভীরূণাং ভয়বর্ধনে
পৃথিব্যাং রাজবংশানামুত্থিতে মহতি ক্ষয়ে
162.24
ন তত্র কর্ণং ন দ্রোণং নার্জুনং ন যুধিষ্ঠিরম্
ন ভীমসেনং ন যমৌ ন পাঞ্চাল্যং ন সাত্যকিম্
162.25
ন চ দুঃশাসনং দ্রৌণিং ন দুর্যোধনসৌবলৌ
ন কৃপং মদ্ররাজং বা কৃতবর্মাণমেব চ
162.26
ন চান্যান্নৈব চাত্মানং ন ক্ষিতিং ন দিশস্তথা
পশ্যাম রাজন্সংসক্তান্সৈন্যেন রজসাবৃতান্
162.27
সংভ্রান্তে তুমুলে ঘোরে রজোমেঘে সমুত্থিতে
দ্বিতীয়ামিব সংপ্রাপ্তামমন্যন্ত নিশাং তদা
162.28
ন জ্ঞায়ন্তে কৌরবেয়া ন পাঞ্চালা ন পাণ্ডবাঃ
ন দিশো ন দিবং নোর্বীং ন সমং বিষমং তথা
162.29
হস্তসংস্পর্শমাপন্নান্পরান্বাপ্যথ বা স্বকান্
ন্যপাতয়ংস্তদা যুদ্ধে নরাঃ স্ম বিজয়ৈষিণঃ
162.30
উদ্ধূতত্বাত্তু রজসঃ প্রসেকাচ্ছোণিতস্য চ
প্রশশাম রজো ভৌমং শীঘ্রত্বাদনিলস্য চ
162.31
তত্র নাগা হয়া যোধা রথিনোঽথ পদাতয়ঃ
পারিজাতবনানীব ব্যরোচন্রুধিরোক্ষিতাঃ
162.32
ততো দুর্যোধনঃ কর্ণো দ্রোণো দুঃশাসনস্তথা
পাণ্ডবৈঃ সমসজ্জন্ত চতুর্ভিশ্চতুরো রথাঃ
162.33
দুর্যোধনঃ সহ ভ্রাত্রা যমাভ্যাং সমসজ্জত
বৃকোদরেণ রাধেয়ো ভারদ্বাজেন চার্জুনঃ
162.34
তদ্ঘোরং মহদাশ্চর্যং সর্বে প্রৈক্ষন্সমন্ততঃ
রথর্ষভাণামুগ্রাণাং সংনিপাতমমানুষম্
162.35
রথমার্গৈর্বিচিত্রৈশ্চ বিচিত্ররথসংকুলম্
অপশ্যন্রথিনো যুদ্ধং বিচিত্রং চিত্রয়োধিনাম্
162.36
যতমানাঃ পরাক্রান্তাঃ পরস্পরজিগীষবঃ
জীমূতা ইব ঘর্মান্তে শরবর্ষৈরবাকিরন্
162.37
তে রথান্সূর্যসংকাশানাস্থিতাঃ পুরুষর্ষভাঃ
অশোভন্ত যথা মেঘাঃ শারদাঃ সমুপস্থিতাঃ
162.38
স্পর্ধিনস্তে মহেষ্বাসাঃ কৃতয়ত্না ধনুর্ধরাঃ
অভ্যগচ্ছংস্তথান্যোন্যং মত্তা গজবৃষা ইব
162.39
ন নূনং দেহভেদোঽস্তি কালে তস্মিন্সমাগতে
যত্র সর্বে ন যুগপদ্ব্যশীর্যন্ত মহারথাঃ
162.40
বাহুভিশ্চরণৈশ্ছিন্নৈঃ শিরোভিশ্চারুকুণ্ডলৈঃ
কার্মুকৈর্বিশিখৈঃ প্রাসৈঃ খড্গৈঃ পরশুপট্টিশৈঃ
162.41
নালীকক্ষুরনারাচৈর্নখরৈঃ শক্তিতোমরৈঃ
অন্যৈশ্চ বিবিধাকারৈর্ধৌতৈঃ প্রহরণোত্তমৈঃ
162.42
চিত্রৈশ্চ বিবিধাকারৈঃ শরীরাবরণৈরপি
বিচিত্রৈশ্চ রথৈর্ভগ্নৈর্হতৈশ্চ গজবাজিভিঃ
162.43
শূন্যৈশ্চ নগরাকারৈর্হতয়োধধ্বজৈ রথৈঃ
অমনুষ্যৈর্হয়ৈস্ত্রস্তৈঃ কৃষ্যমাণৈস্ততস্ততঃ
162.44
বাতায়মানৈরসকৃদ্ধতবীরৈরলংকৃতৈঃ
ব্যজনৈঃ কঙ্কটৈশ্চৈব ধ্বজৈশ্চ বিনিপাতিতৈঃ
162.45
ছত্রৈরাভরণৈর্বস্ত্রৈর্মাল্যৈশ্চ সুসুগন্ধিভিঃ
হারৈঃ কিরীটৈর্মুকুটৈরুষ্ণীষৈঃ কিঙ্কিণীগণৈঃ
162.46
উরস্যৈর্মণিভির্নিষ্কৈশ্চূডামণিভিরেব চ
আসীদায়োধনং তত্র নভস্তারাগণৈরিব
162.47
ততো দুর্যোধনস্যাসীন্নকুলেন সমাগমঃ
অমর্ষিতেন ক্রুদ্ধস্য ক্রুদ্ধেনামর্ষিতস্য চ
162.48
অপসব্যং চকারাথ মাদ্রীপুত্রস্তবাত্মজম্
কিরঞ্শরশতৈর্হৃষ্টস্তত্র নাদো মহানভূৎ
162.49
অপসব্যং কৃতঃ সংখ্যে ভ্রাতৃব্যেনাত্যমর্ষিণা
সোঽমর্ষিতস্তমপ্যাজৌ প্রতিচক্রেঽপসব্যতঃ
162.50
ততঃ প্রতিচিকীর্ষন্তমপসব্যং তু তে সুতম্
ন্যবারয়ত তেজস্বী নকুলশ্চিত্রমার্গবিৎ
162.51
সর্বতো বিনিবার্যৈনং শরজালেন পীডয়ন্
বিমুখং নকুলশ্চক্রে তত্সৈন্যাঃ সমপূজয়ন্
162.52
তিষ্ঠ তিষ্ঠেতি নকুলো বভাষে তনয়ং তব
সংস্মৃত্য সর্বদুঃখানি তব দুর্মন্ত্রিতেন চ