Utshovঅধ্যায় 161
161.1
সংজয় উবাচ
ত্রিভাগমাত্রশেষায়াং রাত্র্যাং যুদ্ধমবর্তত
কুরূণাং পাণ্ডবানাং চ সংহৃষ্টানাং বিশাং পতে
161.2
অথ চন্দ্রপ্রভাং মুষ্ণন্নাদিত্যস্য পুরঃসরঃ
অরুণোঽভ্যুদয়াং চক্রে তাম্রীকুর্বন্নিবাম্বরম্
161.3
ততো দ্বৈধীকৃতে সৈন্যে দ্রোণঃ সোমকপাণ্ডবান্
অভ্যদ্রবত্সপাঞ্চালান্দুর্যোধনপুরোগমঃ
161.4
দ্বৈধীভূতান্কুরূন্দৃষ্ট্বা মাধবোঽর্জুনমব্রবীৎ
সপত্নান্সব্যতঃ কুর্মি সব্যসাচিন্নিমান্কুরূন্
161.5
স মাধবমনুজ্ঞায় কুরুষ্বেতি ধনংজয়ঃ
দ্রোণকর্ণৌ মহেষ্বাসৌ সব্যতঃ পর্যবর্তত
161.6
অভিপ্রায়ং তু কৃষ্ণস্য জ্ঞাত্বা পরপুরংজয়ঃ
আজিশীর্ষগতং দৃষ্ট্বা ভীমসেনং সমাসদৎ
161.7
ভীম উবাচ
অর্জুনার্জুন বীভত্সো শৃণু মে তত্ত্বতো বচঃ
যদর্থং ক্ষত্রিয়া সূতে তস্য কালোঽয়মাগতঃ
161.8
অস্মিংশ্চেদাগতে কালে শ্রেয়ো ন প্রতিপত্স্যসে
অসংভাবিতরূপঃ সন্নানৃশংস্যং করিষ্যসি
161.9
সত্যশ্রীধর্ময়শসাং বীর্যেণানৃণ্যমাপ্নুহি
ভিন্ধ্যনীকং যুধাং শ্রেষ্ঠ সব্যসাচিন্নিমান্কুরু
161.10
সংজয় উবাচ
স সব্যসাচী ভীমেন চোদিতঃ কেশবেন চ
কর্ণদ্রোণাবতিক্রম্য সমন্তাত্পর্যবারয়ৎ
161.11
তমাজিশীর্ষমায়ান্তং দহন্তং ক্ষত্রিয়র্ষভান্
পরাক্রান্তং পরাক্রম্য যতন্তঃ ক্ষত্রিয়র্ষভাঃ
নাশক্নুবন্বারয়িতুং বর্ধমানমিবানলম্
161.12
অথ দুর্যোধনঃ কর্ণঃ শকুনিশ্চাপি সৌবলঃ
অভ্যবর্ষঞ্শরব্রাতৈঃ কুন্তীপুত্রং ধনংজয়ম্
161.13
তেষামস্ত্রাণি সর্বেষামুত্তমাস্ত্রবিদাং বরঃ
কদর্থীকৃত্য রাজেন্দ্র শরবর্ষৈরবাকিরৎ
161.14
অস্ত্রৈরস্ত্রাণি সংবার্য লঘুহস্তো ধনংজয়ঃ
সর্বানবিধ্যন্নিশিতৈর্দশভির্দশভিঃ শরৈঃ
161.15
উদ্ধূতা রজসো বৃষ্টিঃ শরবৃষ্টিস্তথৈব চ
তমশ্চ ঘোরং শব্দশ্চ তদা সমভবন্মহান্
161.16
ন দ্যৌর্ন ভূমির্ন দিশঃ প্রাজ্ঞায়ন্ত তথা গতে
সৈন্যেন রজসা মূঢং সর্বমন্ধমিবাভবৎ
161.17
নৈব তে ন বয়ং রাজন্প্রজ্ঞাসিষ্ম পরস্পরম্
উদ্দেশেন হি তেন স্ম সময়ুধ্যন্ত পার্থিবাঃ
161.18
বিরথা রথিনো রাজন্সমাসাদ্য পরস্পরম্
কেশেষু সমসজ্জন্ত কবচেষু ভুজেষু চ
161.19
হতাশ্বা হতসূতাশ্চ নিশ্চেষ্টা রথিনস্তদা
জীবন্ত ইব তত্র স্ম ব্যদৃশ্যন্ত ভয়ার্দিতাঃ
161.20
হতান্গজান্সমাশ্লিষ্য পর্বতানিব বাজিনঃ
গতসত্ত্বা ব্যদৃশ্যন্ত তথৈব সহ সাদিভিঃ
161.21
ততস্ত্বভ্যবসৃত্যৈব সংগ্রামাদুত্তরাং দিশম্
অতিষ্ঠদাহবে দ্রোণো বিধূম ইব পাবকঃ
161.22
তমাজিশীর্ষাদেকান্তমপক্রান্তং নিশাম্য তু
সমকম্পন্ত সৈন্যানি পাণ্ডবানাং বিশাং পতে
161.23
ভ্রাজমানং শ্রিয়া যুক্তং জ্বলন্তমিব তেজসা
দ্রোণং দৃষ্ট্বারয়স্ত্রেসুশ্চেলুর্মম্লুশ্চ মারিষ
161.24
আহ্বয়ন্তং পরানীকং প্রভিন্নমিব বারণম্
নৈনং শশংসিরে জেতুং দানবা বাসবং যথা
161.25
কেচিদাসন্নিরুত্সাহাঃ কেচিত্ক্রুদ্ধা মনস্বিনঃ
বিস্মিতাশ্চাভবন্কেচিত্কেচিদাসন্নমর্ষিতাঃ
161.26
হস্তৈর্হস্তাগ্রমপরে প্রত্যপিংষন্নরাধিপাঃ
অপরে দশনৈরোষ্ঠানদশন্ক্রোধমূর্ছিতাঃ
161.27
ব্যাক্ষিপন্নায়ুধানন্যে মমৃদুশ্চাপরে ভুজান্
অন্যে চান্বপতন্দ্রোণং ত্যক্তাত্মানো মহৌজসঃ
161.28
পাঞ্চালাস্তু বিশেষেণ দ্রোণসায়কপীডিতাঃ
সমসজ্জন্ত রাজেন্দ্র সমরে ভৃশবেদনাঃ
161.29
ততো বিরাটদ্রুপদৌ দ্রোণং প্রতিয়য়ূ রণে
তথা চরন্তং সংগ্রামে ভৃশং সমরদুর্জয়ম্
161.30
দ্রুপদস্য ততঃ পৌত্রাস্ত্রয় এব বিশাং পতে
চেদয়শ্চ মহেষ্বাসা দ্রোণমেবাভ্যয়ুর্যুধি
161.31
তেষাং দ্রুপদপৌত্রাণাং ত্রয়াণাং নিশিতৈঃ শরৈঃ
ত্রিভির্দ্রোণোঽহরত্প্রাণাংস্তে হতা ন্যপতন্ভুবি
161.32
ততো দ্রোণোঽজয়দ্যুদ্ধে চেদিকেকয়সৃঞ্জয়ান্
মত্স্যাংশ্চৈবাজয়ত্সর্বান্ভারদ্বাজো মহারথঃ
161.33
ততস্তু দ্রুপদঃ ক্রোধাচ্ছরবর্ষমবাকিরৎ
দ্রোণং প্রতি মহারাজ বিরাটশ্চৈব সংয়ুগে
161.34
ততো দ্রোণঃ সুপীতাভ্যাং ভল্লাভ্যামরিমর্দনঃ
দ্রুপদং চ বিরাটং চ প্রৈষীদ্বৈবস্বতক্ষয়ম্
161.35
হতে বিরাটে দ্রুপদে কেকয়েষু তথৈব চ
তথৈব চেদিমত্স্যেষু পাঞ্চালেষু তথৈব চ
হতেষু ত্রিষু বীরেষু দ্রুপদস্য চ নপ্তৃষু
161.36
দ্রোণস্য কর্ম তদ্দৃষ্ট্বা কোপদুঃখসমন্বিতঃ
শশাপ রথিনাং মধ্যে ধৃষ্টদ্যুম্নো মহামনাঃ
161.37
ইষ্টাপূর্তাত্তথা ক্ষাত্রাদ্ব্রাহ্মণ্যাচ্চ স নশ্যতু
দ্রোণো যস্যাদ্য মুচ্যেত যো বা দ্রোণাত্পরাঙ্মুখঃ
161.38
ইতি তেষাং প্রতিশ্রুত্য মধ্যে সর্বধনুষ্মতাম্
আয়াদ্দ্রোণং সহানীকঃ পাঞ্চাল্যঃ পরবীরহা
পাঞ্চালাস্ত্বেকতো দ্রোণমভ্যঘ্নন্পাণ্ডবান্যতঃ
161.39
দুর্যোধনশ্চ কর্ণশ্চ শকুনিশ্চাপি সৌবলঃ
সোদর্যাশ্চ যথা মুখ্যাস্তেঽরক্ষন্দ্রোণমাহবে
161.40
রক্ষ্যমাণং তথা দ্রোণং সমরে তৈর্মহাত্মভিঃ
যতমানাপি পাঞ্চালা ন শেকুঃ প্রতিবীক্ষিতুম্
161.41
তত্রাক্রুধ্যদ্ভীমসেনো ধৃষ্টদ্যুম্নস্য মারিষ
স এনং বাগ্ভিরুগ্রাভিস্ততক্ষ পুরুষর্ষভ
161.42
দ্রুপদস্য কুলে জাতঃ সর্বাস্ত্রেষ্বস্ত্রবিত্তমঃ
কঃ ক্ষত্রিয়ো মন্যমানঃ প্রেক্ষেতারিমবস্থিতম্
161.43
পিতৃপুত্রবধং প্রাপ্য পুমান্কঃ পরিহাপয়েৎ
বিশেষতস্তু শপথং শপিত্বা রাজসংসদি
161.44
এষ বৈশ্বানর ইব সমিদ্ধঃ স্বেন তেজসা
শরচাপেন্ধনো দ্রোণঃ ক্ষত্রং দহতি তেজসা
161.45
পুরা করোতি নিঃশেষাং পাণ্ডবানামনীকিনীম্
স্থিতাঃ পশ্যত মে কর্ম দ্রোণমেব ব্রজাম্যহম্
161.46
ইত্যুক্ত্বা প্রাবিশত্ক্রুদ্ধো দ্রোণানীকং বৃকোদরঃ
দৃঢৈঃ পূর্ণায়তোত্সৃষ্টৈর্দ্রাবয়ংস্তব বাহিনীম্
161.47
ধৃষ্টদ্যুম্নোঽপি পাঞ্চাল্যঃ প্রবিশ্য মহতীং চমূম্
আসসাদ রণে দ্রোণং তদাসীত্তুমুলং মহৎ
161.48
নৈব নস্তাদৃশং যুদ্ধং দৃষ্টপূর্বং ন চ শ্রুতম্
যথা সূর্যোদয়ে রাজন্সমুত্পিঞ্জোঽভবন্মহান্
161.49
সংসক্তানি ব্যদৃশ্যন্ত রথবৃন্দানি মারিষ
হতানি চ বিকীর্ণানি শরীরাণি শরীরিণাম্
161.50
কেচিদন্যত্র গচ্ছন্তঃ পথি চান্যৈরুপদ্রুতাঃ
বিমুখাঃ পৃষ্ঠতশ্চান্যে তাড্যন্তে পার্শ্বতোঽপরে
161.51
তথা সংসক্তয়ুদ্ধং তদভবদ্ভৃশদারুণম্
অথ সংধ্যাগতঃ সূর্যঃ ক্ষণেন সমপদ্যত