Utshovঅধ্যায় 160
160.1
সংজয় উবাচ
ততো দুর্যোধনো দ্রোণমভিগম্যেদমব্রবীৎ
অমর্ষবশমাপন্নো জনয়ন্হর্ষতেজসী
160.2
ন মর্ষণীয়াঃ সংগ্রামে বিশ্রমন্তঃ শ্রমান্বিতাঃ
সপত্না গ্লানমনসো লব্ধলক্ষ্যা বিশেষতঃ
160.3
তত্তু মর্ষিতমস্মাভির্ভবতঃ প্রিয়কাম্যয়া
ত এতে পরিবিশ্রান্তাঃ পাণ্ডবা বলবত্তরাঃ
160.4
সর্বথা পরিহীনাঃ স্ম তেজসা চ বলেন চ
ভবতা পাল্যমানাস্তে বিবর্ধন্তে পুনঃ পুনঃ
160.5
দিব্যান্যস্ত্রাণি সর্বাণি ব্রহ্মাস্ত্রাদীনি যান্যপি
তানি সর্বাণি তিষ্ঠন্তি ভবত্যেব বিশেষতঃ
160.6
ন পাণ্ডবেয়া ন বয়ং নান্যে লোকে ধনুর্ধরাঃ
যুধ্যমানস্য তে তুল্যাঃ সত্যমেতদ্ব্রবীমি তে
160.7
সসুরাসুরগন্ধর্বানিমাঁল্লোকান্দ্বিজোত্তম
সর্বাস্ত্রবিদ্ভবান্হন্যাদ্দিব্যৈরস্ত্রৈর্ন সংশয়ঃ
160.8
স ভবান্মর্ষয়ত্যেনাংস্ত্বত্তো ভীতান্বিশেষতঃ
শিষ্যত্বং বা পুরস্কৃত্য মম বা মন্দভাগ্যতাম্
160.9
এবমুদ্ধর্ষিতো দ্রোণঃ কোপিতশ্চাত্মজেন তে
সমন্যুরব্রবীদ্রাজন্দুর্যোধনমিদং বচঃ
160.10
স্থবিরঃ সন্পরং শক্ত্যা ঘটে দুর্যোধনাহবে
অতঃ পরং ময়া কার্যং ক্ষুদ্রং বিজয়গৃদ্ধিনা
অনস্ত্রবিদয়ং সর্বো হন্তব্যোঽস্ত্রবিদা জনঃ
160.11
যদ্ভবান্মন্যতে চাপি শুভং বা যদি বাশুভম্
তদ্বৈ কর্তাস্মি কৌরব্য বচনাত্তব নান্যথা
160.12
নিহত্য সর্বপাঞ্চালান্যুদ্ধে কৃত্বা পরাক্রমম্
বিমোক্ষ্যে কবচং রাজন্সত্যেনায়ুধমালভে
160.13
মন্যসে যচ্চ কৌন্তেয়মর্জুনং শ্রান্তমাহবে
তস্য বীর্যং মহাবাহো শৃণু সত্যেন কৌরব
160.14
তং ন দেবা ন গন্ধর্বা ন যক্ষা ন চ রাক্ষসাঃ
উত্সহন্তে রণে সোঢুং কুপিতং সব্যসাচিনম্
160.15
খাণ্ডবে যেন ভগবান্প্রত্যুদ্যাতঃ সুরেশ্বরঃ
সায়কৈর্বারিতশ্চাপি বর্ষমাণো মহাত্মনা
160.16
যক্ষা নাগাস্তথা দৈত্যা যে চান্যে বলগর্বিতাঃ
নিহতাঃ পুরুষেন্দ্রেণ তচ্চাপি বিদিতং তব
160.17
গন্ধর্বা ঘোষয়াত্রায়াং চিত্রসেনাদয়ো জিতাঃ
যূয়ং তৈর্হ্রিয়মাণাশ্চ মোক্ষিতা দৃঢধন্বনা
160.18
নিবাতকবচাশ্চাপি দেবানাং শত্রবস্তথা
সুরৈরবধ্যাঃ সংগ্রামে তেন বীরেণ নির্জিতাঃ
160.19
দানবানাং সহস্রাণি হিরণ্যপুরবাসিনাম্
বিজিগ্যে পুরুষব্যাঘ্রঃ স শক্যো মানুষৈঃ কথম্
160.20
প্রত্যক্ষং চৈব তে সর্বং যথা বলমিদং তব
ক্ষপিতং পাণ্ডুপুত্রেণ চেষ্টতাং নো বিশাং পতে
160.21
তং তথাভিপ্রশংসন্তমর্জুনং কুপিতস্তদা
দ্রোণং তব সুতো রাজন্পুনরেবেদমব্রবীৎ
160.22
অহং দুঃশাসনঃ কর্ণঃ শকুনির্মাতুলশ্চ মে
হনিষ্যামোঽর্জুনং সংখ্যে দ্বৈধীকৃত্যাদ্য ভারতীম্
160.23
তস্য তদ্বচনং শ্রুত্বা ভারদ্বাজো হসন্নিব
অন্ববর্তত রাজানং স্বস্তি তেঽস্ত্বিতি চাব্রবীৎ
160.24
কো হি গাণ্ডীবধন্বানং জ্বলন্তমিব তেজসা
অক্ষয়ং ক্ষপয়েত্কশ্চিত্ক্ষত্রিয়ঃ ক্ষত্রিয়র্ষভম্
160.25
তং ন বিত্তপতির্নেন্দ্রো ন যমো ন জলেশ্বরঃ
নাসুরোরগরক্ষাংসি ক্ষপয়েয়ুঃ সহায়ুধম্
160.26
মূঢাস্ত্বেতানি ভাষন্তে যানীমান্যাত্থ ভারত
যুদ্ধে হ্যর্জুনমাসাদ্য স্বস্তিমান্কো ব্রজেদ্গৃহান্
160.27
ত্বং তু সর্বাতিশঙ্কিত্বান্নিষ্ঠুরঃ পাপনিশ্চয়ঃ
শ্রেয়সস্ত্বদ্ধিতে যুক্তাংস্তত্তদ্বক্তুমিহেচ্ছসি
160.28
গচ্ছ ত্বমপি কৌন্তেয়মাত্মার্থেভ্যো হি মাচিরম্
ত্বমপ্যাশংসসে যোদ্ধুং কুলজঃ ক্ষত্রিয়ো হ্যসি
160.29
ইমান্কিং পার্থিবান্সর্বান্ঘাতয়িষ্যস্যনাগসঃ
ত্বমস্য মূলং বৈরস্য তস্মাদাসাদয়ার্জুনম্
160.30
এষ তে মাতুলঃ প্রাজ্ঞঃ ক্ষত্রধর্মমনুব্রতঃ
দূর্দ্যূতদেবী গান্ধারিঃ প্রয়াত্বর্জুনমাহবে
160.31
এষোঽক্ষকুশলো জিহ্মো দ্যূতকৃত্কিতবঃ শঠঃ
দেবিতা নিকৃতিপ্রজ্ঞো যুধি জেষ্যতি পাণ্ডবান্
160.32
ত্বয়া কথিতমত্যন্তং কর্ণেন সহ হৃষ্টবৎ
অসকৃচ্ছূন্যবন্মোহাদ্ধৃতরাষ্ট্রস্য শৃণ্বতঃ
160.33
অহং চ তাত কর্ণশ্চ ভ্রাতা দুঃশাসনশ্চ মে
পাণ্ডুপুত্রান্হনিষ্যামঃ সহিতাঃ সমরে ত্রয়ঃ
160.34
ইতি তে কত্থমানস্য শ্রুতং সংসদি সংসদি
অনুতিষ্ঠ প্রতিজ্ঞাং তাং সত্যবাগ্ভব তৈঃ সহ
160.35
এষ তে পাণ্ডবঃ শত্রুরবিষহ্যোঽগ্রতঃ স্থিতঃ
ক্ষত্রধর্মমবেক্ষস্ব শ্লাঘ্যস্তব বধো জয়াৎ
160.36
দত্তং ভুক্তমধীতং চ প্রাপ্তমৈশ্বর্যমীপ্সিতম্
কৃতকৃত্যোঽনৃণশ্চাসি মা ভৈর্যুধ্যস্ব পাণ্ডবম্
160.37
ইত্যুক্ত্বা সমরে দ্রোণো ন্যবর্তত যতঃ পরে
দ্বৈধীকৃত্য ততঃ সেনাং যুদ্ধং সমভবত্তদা