Utshovঅধ্যায় 159
159.1
সংজয় উবাচ
ঘটোত্কচে তু নিহতে সূতপুত্রেণ তাং নিশাম্
দুঃখামর্ষবশং প্রাপ্তো ধর্মপুত্রো যুধিষ্ঠিরঃ
159.2
দৃষ্ট্ব ভীমেন মহতীং বার্যমাণাং চমূং তব
ধৃষ্টদ্যুম্নমুবাচেদং কুম্ভয়োনিং নিবারয়
159.3
ত্বং হি দ্রোণবিনাশায় সমুত্পন্নো হুতাশনাৎ
সশরঃ কবচী খড্গী ধন্বী চ পরতাপনঃ
অভিদ্রব রণে হৃষ্টো ন চ তে ভীঃ কথংচন
159.4
জনমেজয়ঃ শিখণ্ডী চ দৌর্মুখিশ্চ যশোধনঃ
অভিদ্রবন্তু সংহৃষ্টাঃ কুম্ভয়োনিং সমন্ততঃ
159.5
নকুলঃ সহদেবশ্চ দ্রৌপদেয়াঃ প্রভদ্রকাঃ
দ্রুপদশ্চ বিরাটশ্চ পুত্রভ্রাতৃসমন্বিতৌ
159.6
সাত্যকিঃ কেকয়াশ্চৈব পাণ্ডবশ্চ ধনংজয়ঃ
অভিদ্রবন্তু বেগেন ভারদ্বাজবধেপ্সয়া
159.7
তথৈব রথিনঃ সর্বে হস্ত্যশ্বং যচ্চ কিংচন
পাদাতাশ্চ রণে দ্রোণং প্রাপয়ন্তু মহারথম্
159.8
তথাজ্ঞপ্তাস্তু তে সর্বে পাণ্ডবেন মহাত্মনা
অভ্যদ্রবন্ত বেগেন কুম্ভয়োনিং যুয়ুত্সয়া
159.9
আগচ্ছতস্তান্সহসা সর্বোদ্যোগেন পাণ্ডবান্
প্রতিজগ্রাহ সমরে দ্রোণঃ শস্ত্রভৃতাং বরঃ
159.10
ততো দুর্যোধনো রাজা সর্বোদ্যোগেন পাণ্ডবান্
অভ্যদ্রবত্সুসংক্রুদ্ধ ইচ্ছন্দ্রোণস্য জীবিতম্
159.11
ততঃ প্রববৃতে যুদ্ধং শ্রান্তবাহনসৈনিকম্
পাণ্ডবানাং কুরূণাং চ গর্জতামিতরেতরম্
159.12
নিদ্রান্ধাস্তে মহারাজ পরিশ্রান্তাশ্চ সংয়ুগে
নাভ্যপদ্যন্ত সমরে কাংচিচ্চেষ্টাং মহারথাঃ
159.13
ত্রিয়ামা রজনী চৈষা ঘোররূপা ভয়ানকা
সহস্রয়ামপ্রতিমা বভূব প্রাণহারিণী
বধ্যতাং চ তথা তেষাং ক্ষতানাং চ বিশেষতঃ
159.14
অহো রাত্রিঃ সমাজজ্ঞে নিদ্রান্ধানাং বিশেষতঃ
সর্বে হ্যাসন্নিরুত্সাহাঃ ক্ষত্রিয়া দীনচেতসঃ
তব চৈব পরেষাং চ গতাস্ত্রা বিগতেষবঃ
159.15
তে তথা পারয়ন্তশ্চ হ্রীমন্তশ্চ বিশেষতঃ
স্বধর্মমনুপশ্যন্তো ন জহুঃ স্বামনীকিনীম্
159.16
শস্ত্রাণ্যন্যে সমুত্সৃজ্য নিদ্রান্ধাঃ শেরতে জনাঃ
গজেষ্বন্যে রথেষ্বন্যে হয়েষ্বন্যে চ ভারত
159.17
নিদ্রান্ধা নো বুবুধিরে কাংচিচ্চেষ্টাং নরাধিপাঃ
তেঽন্যোন্যং সমরে যোধাঃ প্রেষয়ন্ত যমক্ষয়ম্
159.18
স্বপ্নায়মানাস্ত্বপরে পরানিতি বিচেতসঃ
আত্মানং সমরে জঘ্নুঃ স্বানেব চ পরানপি
159.19
নানাবাচো বিমুঞ্চন্তো নিদ্রান্ধাস্তে মহারণে
যোদ্ধব্যমিতি তিষ্ঠন্তো নিদ্রাসংসক্তলোচনাঃ
159.20
সংমর্দ্যান্যে রণে কেচিন্নিদ্রান্ধাশ্চ পরস্পরম্
জঘ্নুঃ শূরা রণে রাজংস্তস্মিংস্তমসি দারুণে
159.21
হন্যমানং তথাত্মানং পরেভ্যো বহবো জনাঃ
নাভ্যজানন্ত সমরে নিদ্রয়া মোহিতা ভৃশম্
159.22
তেষামেতাদৃশীং চেষ্টাং বিজ্ঞায় পুরুষর্ষভঃ
উবাচ বাক্যং বীভত্সুরুচ্চৈঃ সংনাদয়ন্দিশঃ
159.23
শ্রান্তা ভবন্তো নিদ্রান্ধাঃ সর্ব এব সবাহনাঃ
তমসা চাবৃতে সৈন্যে রজসা বহুলেন চ
159.24
তে যূয়ং যদি মন্যধ্বমুপারমত সৈনিকাঃ
নিমীলয়ত চাত্রৈব রণভূমৌ মুহূর্তকম্
159.25
ততো বিনিদ্রা বিশ্রান্তাশ্চন্দ্রমস্যুদিতে পুনঃ
সংসাধয়িষ্যথান্যোন্যং স্বর্গায় কুরুপাণ্ডবাঃ
159.26
তদ্বচঃ সর্বধর্মজ্ঞা ধার্মিকস্য নিশম্য তে
অরোচয়ন্ত সৈন্যানি তথা চান্যোন্যমব্রুবন্
159.27
চুক্রুশুঃ কর্ণ কর্ণেতি রাজন্দুর্যোধনেতি চ
উপারমত পাণ্ডূনাং বিরতা হি বরূথিনী
159.28
তথা বিক্রোশমানস্য ফল্গুনস্য ততস্ততঃ
উপারমত পাণ্ডূনাং সেনা তব চ ভারত
159.29
তামস্য বাচং দেবাশ্চ ঋষয়শ্চ মহাত্মনঃ
সর্বসৈন্যানি চাক্ষুদ্রাঃ প্রহৃষ্টাঃ প্রত্যপূজয়ন্
159.30
তত্সংপূজ্য বচোঽক্রূরং সর্বসৈন্যানি ভারত
মুহূর্তমস্বপন্রাজঞ্শ্রান্তানি ভরতর্ষভ
159.31
সা তু সংপ্রাপ্য বিশ্রামং ধ্বজিনী তব ভারত
সুখমাপ্তবতী বীরমর্জুনং প্রত্যপূজয়ৎ
159.32
ত্বয়ি বেদাস্তথাস্ত্রাণি ত্বয়ি বুদ্ধিপরাক্রমৌ
ধর্মস্ত্বয়ি মহাবাহো দয়া ভূতেষু চানঘ
159.33
যচ্চাশ্বস্তাস্তবেচ্ছামঃ শর্ম পার্থ তদস্তু তে
মনসশ্চ প্রিয়ানর্থান্বীর ক্ষিপ্রমবাপ্নুহি
159.34
ইতি তে তং নরব্যাঘ্রং প্রশংসন্তো মহারথাঃ
নিদ্রয়া সমবাক্ষিপ্তাস্তূষ্ণীমাসন্বিশাং পতে
159.35
অশ্বপৃষ্ঠেষু চাপ্যন্যে রথনীডেষু চাপরে
গজস্কন্ধগতাশ্চান্যে শেরতে চাপরে ক্ষিতৌ
159.36
সায়ুধাঃ সগদাশ্চৈব সখড্গাঃ সপরশ্বধাঃ
সপ্রাসকবচাশ্চান্যে নরাঃ সুপ্তাঃ পৃথক্পৃথক্
159.37
গজাস্তে পন্নগাভোগৈর্হস্তৈর্ভূরেণুরূষিতৈঃ
নিদ্রান্ধা বসুধাং চক্রুর্ঘ্রাণনিঃশ্বাসশীতলাম্
159.38
গজাঃ শুশুভিরে তত্র নিঃশ্বসন্তো মহীতলে
বিশীর্ণা গিরয়ো যদ্বন্নিঃশ্বসদ্ভির্মহোরগৈঃ
159.39
সমাং চ বিষমাং চক্রুঃ খুরাগ্রৈর্বিক্ষতাং মহীম্
হয়াঃ কাঞ্চনয়োক্ত্রাশ্চ কেসরালম্বিভির্যুগৈঃ
সুষুপুস্তত্র রাজেন্দ্র যুক্তা বাহেষু সর্বশঃ
159.40
তত্তথা নিদ্রয়া ভগ্নমবাচমস্বপদ্বলম্
কুশলৈরিব বিন্যস্তং পটে চিত্রমিবাদ্ভুতম্
159.41
তে ক্ষত্রিয়াঃ কুণ্ডলিনো যুবানঃ; পরস্পরং সায়কবিক্ষতাঙ্গাঃ
কুম্ভেষু লীনাঃ সুষুপুর্গজানাং; কুচেষু লগ্না ইব কামিনীনাম্
159.42
ততঃ কুমুদনাথেন কামিনীগণ্ডপাণ্ডুনা
নেত্রানন্দেন চন্দ্রেণ মাহেন্দ্রী দিগলংকৃতা
159.43
ততো মুহূর্তাদ্ভগবান্পুরস্তাচ্ছশলক্ষণঃ
অরুণং দর্শয়ামাস গ্রসঞ্জ্যোতিঃপ্রভং প্রভুঃ
159.44
অরুণস্য তু তস্যানু জাতরূপসমপ্রভম্
রশ্মিজালং মহচ্চন্দ্রো মন্দং মন্দমবাসৃজৎ
159.45
উত্সারয়ন্তঃ প্রভয়া তমস্তে চন্দ্ররশ্ময়ঃ
পর্যগচ্ছঞ্শনৈঃ সর্বা দিশঃ খং চ ক্ষিতিং তথা
159.46
ততো মুহূর্তাদ্ভুবনং জ্যোতির্ভূতমিবাভবৎ
অপ্রখ্যমপ্রকাশং চ জগামাশু তমস্তথা
159.47
প্রতিপ্রকাশিতে লোকে দিবাভূতে নিশাকরে
বিচেরুর্ন বিচেরুশ্চ রাজন্নক্তংচরাস্ততঃ
159.48
বোধ্যমানং তু তত্সৈন্যং রাজংশ্চন্দ্রস্য রশ্মিভিঃ
বুবুধে শতপত্রাণাং বনং মহদিবাম্ভসি
159.49
যথা চন্দ্রোদয়োদ্ধূতঃ ক্ষুভিতঃ সাগরো ভবেৎ
তথা চন্দ্রোদয়োদ্ধূতঃ স বভূব বলার্ণবঃ
159.50
ততঃ প্রববৃতে যুদ্ধং পুনরেব বিশাং পতে
লোকে লোকবিনাশায় পরং লোকমভীপ্সতাম্