Utshovঅধ্যায় 158
158.1
ধৃতরাষ্ট্র উবাচ
কর্ণদুর্যোধনাদীনাং শকুনেঃ সৌবলস্য চ
অপনীতং মহত্তাত তব চৈব বিশেষতঃ
158.2
যদাজানীত তাং শক্তিমেকঘ্নীং সততং রণে
অনিবার্যামসহ্যাং চ দেবৈরপি সবাসবৈঃ
158.3
সা কিমর্থং ন কর্ণেন প্রবৃত্তে সমরে পুরা
ন দেবকীসুতে মুক্তা ফল্গুনে বাপি সংজয়
158.4
সংজয় উবাচ
সংগ্রামাদ্বিনিবৃত্তানাং সর্বেষাং নো বিশাং পতে
রাত্রৌ কুরুকুলশ্রেষ্ঠ মন্ত্রোঽয়ং সমজায়ত
158.5
প্রভাতমাত্রে শ্বোভূতে কেশবায়ার্জুনায় বা
শক্তিরেষা বিমোক্তব্যা কর্ণ কর্ণেতি নিত্যশঃ
158.6
ততঃ প্রভাতসময়ে রাজন্কর্ণস্য দৈবতৈঃ
অন্যেষাং চৈব যোধানাং সা বুদ্ধির্নশ্যতে পুনঃ
158.7
দৈবমেব পরং মন্যে যত্কর্ণো হস্তসংস্থয়া
ন জঘান রণে পার্থং কৃষ্ণং বা দেবকীসুতম্
158.8
তস্য হস্তস্থিতা শক্তিঃ কালরাত্রিরিবোদ্যতা
দৈবোপহতবুদ্ধিত্বান্ন তাং কর্ণো বিমুক্তবান্
158.9
কৃষ্ণে বা দেবকীপুত্রে মোহিতো দেবমায়য়া
পার্থে বা শক্রকল্পে বৈ বধার্থং বাসবীং প্রভো
158.10
ধৃতরাষ্ট্র উবাচ
দৈবেনৈব হতা যূয়ং স্ববুদ্ধ্যা কেশবস্য চ
গতা হি বাসবী হত্বা তৃণভূতং ঘটোত্কচম্
158.11
কর্ণশ্চ মম পুত্রাশ্চ সর্বে চান্যে চ পার্থিবাঃ
অনেন দুষ্প্রণীতেন গতা বৈবস্বতক্ষয়ম্
158.12
ভূয় এব তু মে শংস যথা যুদ্ধমবর্তত
কুরূণাং পাণ্ডবানাং চ হৈডিম্বে নিহতে তদা
158.13
যে চ তেঽভ্যদ্রবন্দ্রোণং ব্যূঢানীকাঃ প্রহারিণঃ
সৃঞ্জয়াঃ সহ পাঞ্চালৈস্তেঽপ্যকুর্বন্কথং রণম্
158.14
সৌমদত্তের্বধাদ্দ্রোণমায়স্তং সৈন্ধবস্য চ
অমর্ষাজ্জীবিতং ত্যক্ত্বা গাহমানং বরূথিনীম্
158.15
জৃম্ভমাণমিব ব্যাঘ্রং ব্যাত্তাননমিবান্তকম্
কথং প্রত্যুদ্যয়ুর্দ্রোণমস্যন্তং পাণ্ডুসৃঞ্জয়াঃ
158.16
আচার্যং যে চ তেঽরক্ষন্দুর্যোধনপুরোগমাঃ
দ্রৌণিকর্ণকৃপাস্তাত তেঽপ্যকুর্বন্কিমাহবে
158.17
ভারদ্বাজং জিঘাংসন্তৌ সব্যসাচিবৃকোদরৌ
সমার্ছন্মামকা যুদ্ধে কথং সংজয় শংস মে
158.18
সিন্ধুরাজবধেনেমে ঘটোত্কচবধেন তে
অমর্ষিতাঃ সুসংক্রুদ্ধা রণং চক্রুঃ কথং নিশি
158.19
সংজয় উবাচ
হতে ঘটোত্কচে রাজন্কর্ণেন নিশি রাক্ষসে
প্রণদত্সু চ হৃষ্টেষু তাবকেষু যুয়ুত্সুষু
158.20
আপতত্সু চ বেগেন বধ্যমানে বলেঽপি চ
বিগাঢায়াং রজন্যাং চ রাজা দৈন্যং পরং গতঃ
158.21
অব্রবীচ্চ মহাবাহুর্ভীমসেনং পরংতপঃ
আবারয় মহাবাহো ধার্তরাষ্ট্রস্য বাহিনীম্
হৈডিম্বস্যাভিঘাতেন মোহো মামাবিশন্মহান্
158.22
এবং ভীমং সমাদিশ্য স্বরথে সমুপাবিশৎ
অশ্রুপূর্ণমুখো রাজা নিঃশ্বসংশ্চ পুনঃ পুনঃ
কশ্মলং প্রাবিশদ্ঘোরং দৃষ্ট্বা কর্ণস্য বিক্রমম্
158.23
তং তথা ব্যথিতং দৃষ্ট্বা কৃষ্ণো বচনমব্রবীৎ
মা ব্যথাং কুরু কৌন্তেয় নৈতত্ত্বয্যুপপদ্যতে
বৈক্লব্যং ভরতশ্রেষ্ঠ যথা প্রাকৃতপূরুষে
158.24
উত্তিষ্ঠ রাজন্যুধ্যস্ব বহ গুর্বীং ধুরং বিভো
ত্বয়ি বৈক্লব্যমাপন্নে সংশয়ো বিজয়ে ভবেৎ
158.25
শ্রুত্বা কৃষ্ণস্য বচনং ধর্মরাজো যুধিষ্ঠিরঃ
বিমৃজ্য নেত্রে পাণিভ্যাং কৃষ্ণং বচনমব্রবীৎ
158.26
বিদিতা তে মহাবাহো ধর্মাণাং পরমা গতিঃ
ব্রহ্মহত্যাফলং তস্য যঃ কৃতং নাববুধ্যতে
158.27
অস্মাকং হি বনস্থানাং হৈডিম্বেন মহাত্মনা
বালেনাপি সতা তেন কৃতং সাহ্যং জনার্দন
158.28
অস্ত্রহেতোর্গতং জ্ঞাত্বা পাণ্ডবং শ্বেতবাহনম্
অসৌ কৃষ্ণ মহেষ্বাসঃ কাম্যকে মামুপস্থিতঃ
উষিতশ্চ সহাস্মাভির্যাবন্নাসীদ্ধনংজয়ঃ
158.29
গন্ধমাদনয়াত্রায়াং দুর্গেভ্যশ্চ স্ম তারিতাঃ
পাঞ্চালী চ পরিশ্রান্তা পৃষ্ঠেনোঢা মহাত্মনা
158.30
আরম্ভাচ্চৈব যুদ্ধানাং যদেষ কৃতবান্প্রভো
মদর্থং দুষ্করং কর্ম কৃতং তেন মহাত্মনা
158.31
স্বভাবাদ্যা চ মে প্রীতিঃ সহদেবে জনার্দন
সৈব মে দ্বিগুণা প্রীতী রাক্ষসেন্দ্রে ঘটোত্কচে
158.32
ভক্তশ্চ মে মহাবাহুঃ প্রিয়োঽস্যাহং প্রিয়শ্চ মে
যেন বিন্দামি বার্ষ্ণেয় কশ্মলং শোকতাপিতঃ
158.33
পশ্য সৈন্যানি বার্ষ্ণেয় দ্রাব্যমাণানি কৌরবৈঃ
দ্রোণকর্ণৌ চ সংয়ত্তৌ পশ্য যুদ্ধে মহারথৌ
158.34
নিশীথে পাণ্ডবং সৈন্যমাভ্যাং পশ্য প্রমর্দিতম্
গজাভ্যামিব মত্তাভ্যাং যথা নডবনং মহৎ
158.35
অনাদৃত্য বলং বাহ্বোর্ভীমসেনস্য মাধব
চিত্রাস্ত্রতাং চ পার্থস্য বিক্রমন্তে স্ম কৌরবাঃ
158.36
এষ দ্রোণশ্চ কর্ণশ্চ রাজা চৈব সুয়োধনঃ
নিহত্য রাক্ষসং যুদ্ধে হৃষ্টা নর্দন্তি সংয়ুগে
158.37
কথমস্মাসু জীবত্সু ত্বয়ি চৈব জনার্দন
হৈডিম্বঃ প্রাপ্তবান্মৃত্যুং সূতপুত্রেণ সংগতঃ
158.38
কদর্থীকৃত্য নঃ সর্বান্পশ্যতঃ সব্যসাচিনঃ
নিহতো রাক্ষসঃ কৃষ্ণ ভৈমসেনির্মহাবলঃ
158.39
যদাভিমন্যুর্নিহতো ধার্তরাষ্ট্রৈর্দুরাত্মভিঃ
নাসীত্তত্র রণে কৃষ্ণ সব্যসাচী মহারথঃ
158.40
নিরুদ্ধাশ্চ বয়ং সর্বে সৈন্ধবেন দুরাত্মনা
নিমিত্তমভবদ্দ্রোণঃ সপুত্রস্তত্র কর্মণি
158.41
উপদিষ্টো বধোপায়ঃ কর্ণস্য গুরুণা স্বয়ম্
ব্যায়চ্ছতশ্চ খড্গেন দ্বিধা খড্গং চকার হ
158.42
ব্যসনে বর্তমানস্য কৃতবর্মা নৃশংসবৎ
অশ্বাঞ্জঘান সহসা তথোভৌ পার্ষ্ণিসারথী
তথেতরে মহেষ্বাসাঃ সৌভদ্রং যুধ্যপাতয়ন্
158.43
অল্পে চ কারণে কৃষ্ণ হতো গাণ্ডীবধন্বনা
সৈন্ধবো যাদবশ্রেষ্ঠ তচ্চ নাতিপ্রিয়ং মম
158.44
যদি শত্রুবধে ন্যায্যো ভবেত্কর্তুং চ পাণ্ডবৈঃ
দ্রোণকর্ণৌ রণে পূর্বং হন্তব্যাবিতি মে মতিঃ
158.45
এতৌ মূলং হি দুঃখানামস্মাকং পুরুষর্ষভ
এতৌ রণে সমাসাদ্য পরাশ্বস্তঃ সুয়োধনঃ
158.46
যত্র বধ্যো ভবেদ্দ্রোণঃ সূতপুত্রশ্চ সানুগঃ
তত্রাবধীন্মহাবাহুঃ সৈন্ধবং দূরবাসিনম্
158.47
অবশ্যং তু ময়া কার্যঃ সূতপুত্রস্য নিগ্রহঃ
ততো যাস্যাম্যহং বীর স্বয়ং কর্ণজিঘাংসয়া
ভীমসেনো মহাবাহুর্দ্রোণানীকেন সংগতঃ
158.48
এবমুক্ত্বা যয়ৌ তূর্ণং ত্বরমাণো যুধিষ্ঠিরঃ
স বিস্ফার্য মহচ্চাপং শঙ্খং প্রধ্মাপ্য ভৈরবম্
158.49
ততো রথসহস্রেণ গজানাং চ শতৈস্ত্রিভিঃ
বাজিভিঃ পঞ্চসাহস্রৈস্ত্রিসাহস্রৈঃ প্রভদ্রকৈঃ
বৃতঃ শিখণ্ডী ত্বরিতো রাজানং পৃষ্ঠতোঽন্বয়াৎ
158.50
ততো ভেরীঃ সমাজঘ্নুঃ শঙ্খান্দধ্মুশ্চ দংশিতাঃ
পাঞ্চালাঃ পাণ্ডবাশ্চৈব যুধিষ্ঠিরপুরোগমাঃ
158.51
ততোঽব্রবীন্মহাবাহুর্বাসুদেবো ধনংজয়ম্
এষ প্রয়াতি ত্বরিতো ক্রোধাবিষ্টো যুধিষ্ঠিরঃ
জিঘাংসুঃ সূতপুত্রস্য তস্যোপেক্ষা ন যুজ্যতে
158.52
এবমুক্ত্বা হৃষীকেশঃ শীঘ্রমশ্বানচোদয়ৎ
দূরং চ যাতং রাজানমন্বগচ্ছজ্জনার্দনঃ
158.53
তং দৃষ্ট্বা সহসা যান্তং সূতপুত্রজিঘাংসয়া
শোকোপহতসংকল্পং দহ্যমানমিবাগ্নিনা
অভিগম্যাব্রবীদ্ব্যাসো ধর্মপুত্রং যুধিষ্ঠিরম্
158.54
কর্ণমাসাদ্য সংগ্রামে দিষ্ট্যা জীবতি ফল্গুনঃ
সব্যসাচিবধাকাঙ্ক্ষী শক্তিং রক্ষিতবান্হি সঃ
158.55
ন চাগাদ্দ্বৈরথং জিষ্ণুর্দিষ্ট্যা তং ভরতর্ষভ
সৃজেতাং স্পর্ধিনাবেতৌ দিব্যান্যস্ত্রাণি সর্বশঃ
158.56
বধ্যমানেষু চাস্ত্রেষু পীডিতঃ সূতনন্দনঃ
বাসবীং সমরে শক্তিং ধ্রুবং মুঞ্চেদ্যুধিষ্ঠির
158.57
ততো ভবেত্তে ব্যসনং ঘোরং ভরতসত্তম
দিষ্ট্যা রক্ষো হতং যুদ্ধে সূতপুত্রেণ মানদ
158.58
বাসবীং কারণং কৃত্বা কালেনাপহতো হ্যসৌ
তবৈব কারণাদ্রক্ষো নিহতং তাত সংয়ুগে
158.59
মা ক্রুধো ভরতশ্রেষ্ঠ মা চ শোকে মনঃ কৃথাঃ
প্রাণিনামিহ সর্বেষামেষা নিষ্ঠা যুধিষ্ঠির
158.60
ভ্রাতৃভিঃ সহিতঃ সর্বৈঃ পার্থিবৈশ্চ মহাত্মভিঃ
কৌরবান্সমরে রাজন্নভিয়ুধ্যস্ব ভারত
পঞ্চমে দিবসে চৈব পৃথিবী তে ভবিষ্যতি
158.61
নিত্যং চ পুরুষব্যাঘ্র ধর্মমেব বিচিন্তয়
আনৃশংস্যং তপো দানং ক্ষমাং সত্যং চ পাণ্ডব
158.62
সেবেথাঃ পরমপ্রীতো যতো ধর্মস্ততো জয়ঃ
ইত্যুক্ত্বা পাণ্ডবং ব্যাসস্তত্রৈবান্তরধীয়ত