Utshovঅধ্যায় 157
157.1
ধৃতরাষ্ট্র উবাচ
একবীরবধে মোঘা শক্তিঃ সূতাত্মজে যদা
কস্মাত্সর্বান্সমুত্সৃজ্য স তাং পার্থে ন মুক্তবান্
157.2
তস্মিন্হতে হতা হি স্যুঃ সর্বে পাণ্ডবসৃঞ্জয়াঃ
একবীরবধে কস্মান্ন যুদ্ধে জয়মাদধৎ
157.3
আহূতো ন নিবর্তেয়মিতি তস্য মহাব্রতম্
স্বয়মাহ্বয়িতব্যঃ স সূতপুত্রেণ ফল্গুনঃ
157.4
ততো দ্বৈরথমানীয় ফল্গুনং শক্রদত্তয়া
ন জঘান বৃষা কস্মাত্তন্মমাচক্ষ্ব সংজয়
157.5
নূনং বুদ্ধিবিহীনশ্চাপ্যসহায়শ্চ মে সুতঃ
শত্রুভির্ব্যংসিতোপায়ঃ কথং নু স জয়েদরীন্
157.6
যা হ্যস্য পরমা শক্তির্জয়স্য চ পরায়ণম্
সা শক্তির্বাসুদেবেন ব্যংসিতাস্য ঘটোত্কচে
157.7
কুণের্যথা হস্তগতং হ্রিয়েদ্বিল্বং বলীয়সা
তথা শক্তিরমোঘা সা মোঘীভূতা ঘটোত্কচে
157.8
যথা বরাহস্য শুনশ্চ যুধ্যতো;স্তয়োরভাবে শ্বপচস্য লাভঃ
মন্যে বিদ্বন্বাসুদেবস্য তদ্ব;দ্যুদ্ধে লাভঃ কর্ণহৈডিম্বয়োর্বৈ
157.9
ঘটোত্কচো যদি হন্যাদ্ধি কর্ণং; পরো লাভঃ স ভবেত্পাণ্ডবানাম্
বৈকর্তনো বা যদি তং নিহন্যা;ত্তথাপি কৃত্যং শক্তিনাশাত্কৃতং স্যাৎ
157.10
ইতি প্রাজ্ঞঃ প্রজ্ঞয়ৈতদ্বিচার্য; ঘটোত্কচং সূতপুত্রেণ যুদ্ধে
অয়োধয়দ্বাসুদেবো নৃসিংহঃ; প্রিয়ং কুর্বন্পাণ্ডবানাং হিতং চ
157.11
সংজয় উবাচ
এতচ্চিকীর্ষিতং জ্ঞাত্বা কর্ণে মধুনিহা নৃপ
নিয়োজয়ামাস তদা দ্বৈরথে রাক্ষসেশ্বরম্
157.12
ঘটোত্কচং মহাবীর্যং মহাবুদ্ধির্জনার্দনঃ
অমোঘায়া বিঘাতার্থং রাজন্দুর্মন্ত্রিতে তব
157.13
তদৈব কৃতকার্যা হি বয়ং স্যাম কুরূদ্বহ
ন রক্ষেদ্যদি কৃষ্ণস্তং পার্থং কর্ণান্মহারথাৎ
157.14
সাশ্বধ্বজরথঃ সংখ্যে ধৃতরাষ্ট্র পতেদ্ভুবি
বিনা জনার্দনং পার্থো যোগানামীশ্বরং প্রভুম্
157.15
তৈস্তৈরুপায়ৈর্বহুভী রক্ষ্যমাণঃ স পার্থিব
জয়ত্যভিমুখঃ শত্রূন্পার্থঃ কৃষ্ণেন পালিতঃ
157.16
সবিশেষং ত্বমোঘায়াঃ কৃষ্ণোঽরক্ষত পাণ্ডবম্
হন্যাত্ক্ষিপ্তা হি কৌন্তেয়ং শক্তির্বৃক্ষমিবাশনিঃ
157.17
ধৃতরাষ্ট্র উবাচ
বিরোধী চ কুমন্ত্রী চ প্রাজ্ঞমানী মমাত্মজঃ
যস্যৈষ সমতিক্রান্তো বধোপায়ো জয়ং প্রতি
157.18
তবাপি সমতিক্রান্তমেতদ্গাবল্গণে কথম্
এতমর্থং মহাবুদ্ধে যত্ত্বয়া নাববোধিতঃ
157.19
সংজয় উবাচ
দুর্যোধনস্য শকুনের্মম দুঃশাসনস্য চ
রাত্রৌ রাত্রৌ ভবত্যেষা নিত্যমেব সমর্থনা
157.20
শ্বঃ সর্বসৈন্যানুত্সৃজ্য জহি কর্ণ ধনংজয়ম্
প্রেষ্যবত্পাণ্ডুপাঞ্চালানুপভোক্ষ্যামহে ততঃ
157.21
অথ বা নিহতে পার্থে পাণ্ডুষ্বন্যতমং ততঃ
স্থাপয়েদ্যুধি বার্ষ্ণেয়স্তস্মাত্কৃষ্ণো নিপাত্যতাম্
157.22
কৃষ্ণো হি মূলং পাণ্ডূনাং পার্থঃ স্কন্ধ ইবোদ্গতঃ
শাখা ইবেতরে পার্থাঃ পাঞ্চালাঃ পত্রসংজ্ঞিতাঃ
157.23
কৃষ্ণাশ্রয়াঃ কৃষ্ণবলাঃ কৃষ্ণনাথাশ্চ পাণ্ডবাঃ
কৃষ্ণঃ পরায়ণং চৈষাং জ্যোতিষামিব চন্দ্রমাঃ
157.24
তস্মাত্পর্ণানি শাখাশ্চ স্কন্ধং চোত্সৃজ্য সূতজ
কৃষ্ণং নিকৃন্ধি পাণ্ডূনাং মূলং সর্বত্র সর্বদা
157.25
হন্যাদ্যদি হি দাশার্হং কর্ণো যাদবনন্দনম্
কৃত্স্না বসুমতী রাজন্বশে তে স্যান্ন সংশয়ঃ
157.26
যদি হি স নিহতঃ শয়ীত ভূমৌ; যদুকুলপাণ্ডবনন্দনো মহাত্মা
ননু তব বসুধা নরেন্দ্র সর্বা; সগিরিসমুদ্রবনা বশং ব্রজেত
157.27
সা তু বুদ্ধিঃ কৃতাপ্যেবং জাগ্রতি ত্রিদশেশ্বরে
অপ্রমেয়ে হৃষীকেশে যুদ্ধকালে ব্যমুহ্যত
157.28
অর্জুনং চাপি কৌন্তেয়ং সদা রক্ষতি কেশবঃ
ন হ্যেনমৈচ্ছত্প্রমুখে সৌতেঃ স্থাপয়িতুং রণে
157.29
অন্যাংশ্চাস্মৈ রথোদারানুপস্থাপয়দচ্যুতঃ
অমোঘাং তাং কথং শক্তিং মোঘাং কুর্যামিতি প্রভো
157.30
ততঃ কৃষ্ণং মহাবাহুঃ সাত্যকিঃ সত্যবিক্রমঃ
পপ্রচ্ছ রথশার্দূল কর্ণং প্রতি মহারথম্
157.31
অয়ং চ প্রত্যয়ঃ কর্ণে শক্ত্যা চামিতবিক্রম
কিমর্থং সূতপুত্রেণ ন মুক্তা ফল্গুনে তু সা
157.32
বাসুদেব উবাচ
দুঃশাসনশ্চ কর্ণশ্চ শকুনিশ্চ সসৈন্ধবঃ
সততং মন্ত্রয়ন্তি স্ম দুর্যোধনপুরোগমাঃ
157.33
কর্ণ কর্ণ মহেষ্বাস রণেঽমিতপরাক্রম
নান্যস্য শক্তিরেষা তে মোক্তব্যা জয়তাং বর
157.34
ঋতে মহারথাত্পার্থাত্কুন্তীপুত্রাদ্ধনংজয়াৎ
স হি তেষামতিয়শা দেবানামিব বাসবঃ
157.35
তস্মিন্বিনিহতে সর্বে পাণ্ডবাঃ সৃঞ্জয়ৈঃ সহ
ভবিষ্যন্তি গতাত্মানঃ সুরা ইব নিরগ্নয়ঃ
157.36
তথেতি চ প্রতিজ্ঞাতং কর্ণেন শিনিপুংগব
হৃদি নিত্যং তু কর্ণস্য বধো গাণ্ডীবধন্বনঃ
157.37
অহমেব তু রাধেয়ং মোহয়ামি যুধাং বর
যতো নাবসৃজচ্ছক্তিং পাণ্ডবে শ্বেতবাহনে
157.38
ফল্গুনস্য হি তাং মৃত্যুমবগম্য যুয়ুত্সতঃ
ন নিদ্রা ন চ মে হর্ষো মনসোঽস্তি যুধাং বর
157.39
ঘটোত্কচে ব্যংসিতাং তু দৃষ্ট্বা তাং শিনিপুংগব
মৃত্যোরাস্যান্তরান্মুক্তং পশ্যাম্যদ্য ধনংজয়ম্
157.40
ন পিতা ন চ মে মাতা ন যূয়ং ভ্রাতরস্তথা
ন চ প্রাণাস্তথা রক্ষ্যা যথা বীভত্সুরাহবে
157.41
ত্রৈলোক্যরাজ্যাদ্যত্কিংচিদ্ভবেদন্যত্সুদুর্লভম্
নেচ্ছেয়ং সাত্বতাহং তদ্বিনা পার্থং ধনংজয়ম্
157.42
অতঃ প্রহর্ষঃ সুমহান্যুয়ুধানাদ্য মেঽভবৎ
মৃতং প্রত্যাগতমিব দৃষ্ট্বা পার্থং ধনংজয়ম্
157.43
অতশ্চ প্রহিতো যুদ্ধে ময়া কর্ণায় রাক্ষসঃ
ন হ্যন্যঃ সমরে রাত্রৌ শক্তঃ কর্ণং প্রবাধিতুম্
157.44
সংজয় উবাচ
ইতি সাত্যকয়ে প্রাহ তদা দেবকিনন্দনঃ
ধনংজয়হিতে যুক্তস্তত্প্রিয়ে সততং রতঃ