Utshovঅধ্যায় 156
156.1
অর্জুন উবাচ
কথমস্মদ্ধিতার্থং তে কৈশ্চ যোগৈর্জনার্দন
জরাসংধপ্রভৃতয়ো ঘাতিতাঃ পৃথিবীষ্বরাঃ
156.2
বাসুদেব উবাচ
জরাসংধশ্চেদিরাজো নৈষাদিশ্চ মহাবলঃ
যদি স্যুর্ন হতাঃ পূর্বমিদানীং স্যুর্ভয়ংকরাঃ
156.3
সুয়োধনস্তানবশ্যং বৃণুয়াদ্রথসত্তমান্
তেঽস্মাভির্নিত্যসংদুষ্টাঃ সংশ্রয়েয়ুশ্চ কৌরবান্
156.4
তে হি বীরা মহাত্মানঃ কৃতাস্ত্রা দৃঢয়োধিনঃ
ধার্তরাষ্ট্রীং চমূং কৃত্স্নাং রক্ষেয়ুরমরা ইব
156.5
সূতপুত্রো জরাসংধশ্চেদিরাজো নিষাদজঃ
সুয়োধনং সমাশ্রিত্য তপেরন্পৃথিবীমিমাম্
156.6
যোগৈরপি হতা যৈস্তে তান্মে শৃণু ধনংজয়
অজয্যা হি বিনা যোগৈর্মৃধে তে দৈবতৈরপি
156.7
একৈকো হি পৃথক্তেষাং সমস্তাং সুরবাহিনীম্
যোধয়েত্সমরে পার্থ লোকপালাভিরক্ষিতাম্
156.8
জরাসংধো হি রুষিতো রৌহিণেয়প্রধর্ষিতঃ
অস্মদ্বধার্থং চিক্ষেপ গদাং বৈ লোহিতামুখীম্
156.9
সীমন্তমিব কুর্বাণাং নভসঃ পাবকপ্রভাম্
ব্যদৃশ্যতাপতন্তী সা শক্রমুক্তা যথাশনিঃ
156.10
তামাপতন্তীং দৃষ্ট্বৈব গদাং রোহিণিনন্দনঃ
প্রতিঘাতার্থমস্ত্রং বৈ স্থূণাকর্ণমবাসৃজৎ
156.11
অস্ত্রবেগপ্রতিহতা সা গদা প্রাপতদ্ভুবি
দারয়ন্তী ধরাং দেবীং কম্পয়ন্তীব পর্বতান্
156.12
তত্র স্ম রাক্ষসী ঘোরা জরা নামাশুবিক্রমা
সংধয়ামাস তং জাতং জরাসংধমরিংদমম্
156.13
দ্বাভ্যাং জাতো হি মাতৃভ্যামর্ধদেহঃ পৃথক্পৃথক্
তয়া স সংধিতো যস্মাজ্জরাসংধস্ততঃ স্মৃতঃ
156.14
সা তু ভূমিগতা পার্থ হতা সসুতবান্ধবা
গদয়া তেন চাস্ত্রেণ স্থূণাকর্ণেন রাক্ষসী
156.15
বিনাভূতঃ স গদয়া জরাসংধো মহামৃধে
নিহতো ভীমসেনেন পশ্যতস্তে ধনংজয়
156.16
যদি হি স্যাদ্গদাপাণির্জরাসংধঃ প্রতাপবান্
সেন্দ্রা দেবা ন তং হন্তুং রণে শক্তা নরোত্তম
156.17
ত্বদ্ধিতার্থং হি নৈষাদিরঙ্গুষ্ঠেন বিয়োজিতঃ
দ্রোণেনাচার্যকং কৃত্বা ছদ্মনা সত্যবিক্রমঃ
156.18
স তু বদ্ধাঙ্গুলিত্রাণো নৈষাদির্দৃঢবিক্রমঃ
অস্যন্নেকো বনচরো বভৌ রাম ইবাপরঃ
156.19
একলব্যং হি সাঙ্গুষ্ঠমশক্তা দেবদানবাঃ
সরাক্ষসোরগাঃ পার্থ বিজেতুং যুধি কর্হিচিৎ
156.20
কিমু মানুষমাত্রেণ শক্যঃ স্যাত্প্রতিবীক্ষিতুম্
দৃঢমুষ্টিঃ কৃতী নিত্যমস্যমানো দিবানিশম্
156.21
ত্বদ্ধিতার্থং তু স ময়া হতঃ সংগ্রামমূর্ধনি
চেদিরাজশ্চ বিক্রান্তঃ প্রত্যক্ষং নিহতস্তব
156.22
স চাপ্যশক্যঃ সংগ্রামে জেতুং সর্বৈঃ সুরাসুরৈঃ
বধার্থং তস্য জাতোঽহমন্যেষাং চ সুরদ্বিষাম্
156.23
ত্বত্সহায়ো নরব্যাঘ্র লোকানাং হিতকাম্যয়া
হিডিম্ববককির্মীরা ভীমসেনেন পাতিতাঃ
রাবণেন সমপ্রাণা ব্রহ্ময়জ্ঞবিনাশনাঃ
156.24
হতস্তথৈব মায়াবী হৈডিম্বেনাপ্যলায়ুধঃ
হৈডিম্বশ্চাপ্যুপায়েন শক্ত্যা কর্ণেন ঘাতিতঃ
156.25
যদি হ্যেনং নাহনিষ্যত্কর্ণঃ শক্ত্যা মহামৃধে
ময়া বধ্যোঽভবিষ্যত্স ভৈমসেনির্ঘটোত্কচঃ
156.26
ময়া ন নিহতঃ পূর্বমেষ যুষ্মত্প্রিয়েপ্সয়া
এষ হি ব্রাহ্মণদ্বেষী যজ্ঞদ্বেষী চ রাক্ষসঃ
156.27
ধর্মস্য লোপ্তা পাপাত্মা তস্মাদেষ নিপাতিতঃ
ব্যংসিতা চাপ্যুপায়েন শক্রদত্তা ময়ানঘ
156.28
যে হি ধর্মস্য লোপ্তারো বধ্যাস্তে মম পাণ্ডব
ধর্মসংস্থাপনার্থং হি প্রতিজ্ঞৈষা মমাব্যয়া
156.29
ব্রহ্ম সত্যং দমঃ শৌচং ধর্মো হ্রীঃ শ্রীর্ধৃতিঃ ক্ষমা
যত্র তত্র রমে নিত্যমহং সত্যেন তে শপে
156.30
ন বিষাদস্ত্বয়া কার্যঃ কর্ণং বৈকর্তনং প্রতি
উপদেক্ষ্যাম্যুপায়ং তে যেন তং প্রসহিষ্যসি
156.31
সুয়োধনং চাপি রণে হনিষ্যতি বৃকোদরঃ
তস্য চাপি বধোপায়ং বক্ষ্যামি তব পাণ্ডব
156.32
বর্ধতে তুমুলস্ত্বেষ শব্দঃ পরচমূং প্রতি
বিদ্রবন্তি চ সৈন্যানি ত্বদীয়ানি দিশো দশ
156.33
লব্ধলক্ষ্যা হি কৌরব্যা বিধমন্তি চমূং তব
দহত্যেষ চ বঃ সৈন্যং দ্রোণঃ প্রহরতাং বরঃ