Utshovঅধ্যায় 172
172.1
সংজয় উবাচ
তত্প্রভগ্নং বলং দৃষ্ট্বা কুন্তীপুত্রো ধনংজয়ঃ
ন্যবারয়দমেয়াত্মা দ্রোণপুত্রবধেপ্সয়া
172.2
ততস্তে সৈনিকা রাজন্নৈব তত্রাবতস্থিরে
সংস্থাপ্যমানা যত্নেন গোবিন্দেনার্জুনেন চ
172.3
এক এব তু বীভত্সুঃ সোমকাবয়বৈঃ সহ
মত্স্যৈরন্যৈশ্চ সংধায় কৌরবৈঃ সংন্যবর্তত
172.4
ততো দ্রুতমতিক্রম্য সিংহলাঙ্গূলকেতনম্
সব্যসাচী মহেষ্বাসমশ্বত্থামানমব্রবীৎ
172.5
যা শক্তির্যচ্চ তে বীর্যং যজ্জ্ঞানং যচ্চ পৌরুষম্
ধার্তরাষ্ট্রেষু যা প্রীতিঃ প্রদ্বেষোঽস্মাসু যশ্চ তে
যচ্চ ভূয়োঽস্তি তেজস্তত্পরমং মম দর্শয়
172.6
স এব দ্রোণহন্তা তে দর্পং ভেত্স্যতি পার্ষতঃ
কালানলসমপ্রখ্যো দ্বিষতামন্তকো যুধি
সমাসাদয় পাঞ্চাল্যং মাং চাপি সহকেশবম্
172.7
ধৃতরাষ্ট্র উবাচ
আচার্যপুত্রো মানার্হো বলবাংশ্চাপি সংজয়
প্রীতির্ধনংজয়ে চাস্য প্রিয়শ্চাপি স বাসবেঃ
172.8
ন ভূতপূর্বং বীভত্সোর্বাক্যং পরুষমীদৃশম্
অথ কস্মাত্স কৌন্তেয়ঃ সখায়ং রূক্ষমব্রবীৎ
172.9
সংজয় উবাচ
যুবরাজে হতে চৈব বৃদ্ধক্ষত্রে চ পৌরবে
ইষ্বস্ত্রবিধিসংপন্নে মালবে চ সুদর্শনে
172.10
ধৃষ্টদ্যুম্নে সাত্যকৌ চ ভীমে চাপি পরাজিতে
যুধিষ্ঠিরস্য তৈর্বাক্যৈর্মর্মণ্যপি চ ঘট্টিতে
172.11
অন্তর্ভেদে চ সংজাতে দুঃখং সংস্মৃত্য চ প্রভো
অভূতপূর্বো বীভত্সোর্দুঃখান্মন্যুরজায়ত
172.12
তস্মাদনর্হমশ্লীলমপ্রিয়ং দ্রৌণিমুক্তবান্
মান্যমাচার্যতনয়ং রূক্ষং কাপুরুষো যথা
172.13
এবমুক্তঃ শ্বসন্ক্রোধান্মহেষ্বাসতমো নৃপ
পার্থেন পরুষং বাক্যং সর্বমর্মঘ্নয়া গিরা
দ্রৌণিশ্চুকোপ পার্থায় কৃষ্ণায় চ বিশেষতঃ
172.14
স তু যত্তো রথে স্থিত্বা বার্যুপস্পৃশ্য বীর্যবান্
দেবৈরপি সুদুর্ধর্ষমস্ত্রমাগ্নেয়মাদদে
172.15
দৃশ্যাদৃশ্যানরিগণানুদ্দিশ্যাচার্যনন্দনঃ
সোঽভিমন্ত্র্য শরং দীপ্তং বিধূমমিব পাবকম্
সর্বতঃ ক্রোধমাবিশ্য চিক্ষেপ পরবীরহা
172.16
ততস্তুমুলমাকাশে শরবর্ষমজায়ত
ববুশ্চ শিশিরা বাতাঃ সূর্যো নৈব ততাপ চ
172.17
চুক্রুশুর্দানবাশ্চাপি দিক্ষু সর্বাসু ভৈরবম্
রুধিরং চাপি বর্ষন্তো বিনেদুস্তোয়দাম্বরে
172.18
পক্ষিণঃ পশবো গাবো মুনয়শ্চাপি সুব্রতাঃ
পরমং প্রয়তাত্মানো ন শান্তিমুপলেভিরে
172.19
ভ্রান্তসর্বমহাভূতমাবর্জিতদিবাকরম্
ত্রৈলোক্যমভিসংতপ্তং জ্বরাবিষ্টমিবাতুরম্
172.20
শরতেজোঽভিসংতপ্তা নাগা ভূমিশয়াস্তথা
নিঃশ্বসন্তঃ সমুত্পেতুস্তেজো ঘোরং মুমুক্ষবঃ
172.21
জলজানি চ সত্ত্বানি দহ্যমানানি ভারত
ন শান্তিমুপজগ্মুর্হি তপ্যমানৈর্জলাশয়ৈঃ
172.22
দিশঃ খং প্রদিশশ্চৈব ভুবং চ শরবৃষ্টয়ঃ
উচ্চাবচা নিপেতুর্বৈ গরুডানিলরংহসঃ
172.23
তৈঃ শরৈর্দ্রোণপুত্রস্য বজ্রবেগসমাহিতৈঃ
প্রদগ্ধাঃ শত্রবঃ পেতুরগ্নিদগ্ধা ইব দ্রুমাঃ
172.24
দহ্যমানা মহানাগাঃ পেতুরুর্ব্যাং সমন্ততঃ
নদন্তো ভৈরবান্নাদাঞ্জলদোপমনিস্বনান্
172.25
অপরে প্রদ্রুতাস্তত্র দহ্যমানা মহাগজাঃ
ত্রেসুস্তথাপরে ঘোরে বনে দাবাগ্নিসংবৃতাঃ
172.26
দ্রুমাণাং শিখরাণীব দাবদগ্ধানি মারিষ
অশ্ববৃন্দান্যদৃশ্যন্ত রথবৃন্দানি চাভিভো
অপতন্ত রথৌঘাশ্চ তত্র তত্র সহস্রশঃ
172.27
তত্সৈন্যং ভগবানগ্নির্দদাহ যুধি ভারত
যুগান্তে সর্বভূতানি সংবর্তক ইবানলঃ
172.28
দৃষ্ট্বা তু পাণ্ডবীং সেনাং দহ্যমানাং মহাহবে
প্রহৃষ্টাস্তাবকা রাজন্সিংহনাদান্বিনেদিরে
172.29
ততস্তূর্যসহস্রাণি নানালিঙ্গানি ভারত
তূর্ণমাজঘ্নিরে হৃষ্টাস্তাবকা জিতকাশিনঃ
172.30
কৃত্স্না হ্যক্ষৌহিণী রাজন্সব্যসাচী চ পাণ্ডবঃ
তমসা সংবৃতে লোকে নাদৃশ্যত মহাহবে
172.31
নৈব নস্তাদৃশং রাজন্দৃষ্টপূর্বং ন চ শ্রুতম্
যাদৃশং দ্রোণপুত্রেণ সৃষ্টমস্ত্রমমর্ষিণা
172.32
অর্জুনস্তু মহারাজ ব্রাহ্মমস্ত্রমুদৈরয়ৎ
সর্বাস্ত্রপ্রতিঘাতায় বিহিতং পদ্ময়োনিনা
172.33
ততো মুহূর্তাদিব তত্তমো ব্যুপশশাম হ
প্রববৌ চানিলঃ শীতো দিশশ্চ বিমলাভবন্
172.34
তত্রাদ্ভুতমপশ্যাম কৃত্স্নামক্ষৌহিণীং হতাম্
অনভিজ্ঞেয়রূপাং চ প্রদগ্ধামস্ত্রমায়য়া
172.35
ততো বীরৌ মহেষ্বাসৌ বিমুক্তৌ কেশবার্জুনৌ
সহিতৌ সংপ্রদৃশ্যেতাং নভসীব তমোনুদৌ
172.36
সপতাকধ্বজহয়ঃ সানুকর্ষবরায়ুধঃ
প্রবভৌ স রথো মুক্তস্তাবকানাং ভয়ংকরঃ
172.37
ততঃ কিলকিলাশব্দঃ শঙ্খভেরীরবৈঃ সহ
পাণ্ডবানাং প্রহৃষ্টানাং ক্ষণেন সমজায়ত
172.38
হতাবিতি তয়োরাসীত্সেনয়োরুভয়োর্মতিঃ
তরসাভ্যাগতৌ দৃষ্ট্বা বিমুক্তৌ কেশবার্জুনৌ
172.39
তাবক্ষতৌ প্রমুদিতৌ দধ্মতুর্বারিজোত্তমৌ
দৃষ্ট্বা প্রমুদিতান্পার্থাংস্ত্বদীয়া ব্যথিতাভবন্
172.40
বিমুক্তৌ চ মহাত্মানৌ দৃষ্ট্বা দ্রৌণিঃ সুদুঃখিতঃ
মুহূর্তং চিন্তয়ামাস কিং ত্বেতদিতি মারিষ
172.41
চিন্তয়িত্বা তু রাজেন্দ্র ধ্যানশোকপরায়ণঃ
নিঃশ্বসন্দীর্ঘমুষ্ণং চ বিমনাশ্চাভবত্তদা
172.42
ততো দ্রৌণির্ধনুর্ন্যস্য রথাত্প্রস্কন্দ্য বেগিতঃ
ধিগ্ধিক্সর্বমিদং মিথ্যেত্যুক্ত্বা সংপ্রাদ্রবদ্রণাৎ
172.43
ততঃ স্নিগ্ধাম্বুদাভাসং বেদব্যাসমকল্মষম্
আবাসং চ সরস্বত্যাঃ স বৈ ব্যাসং দদর্শ হ
172.44
তং দ্রৌণিরগ্রতো দৃষ্ট্বা স্থিতং কুরুকুলোদ্বহ
সন্নকণ্ঠোঽব্রবীদ্বাক্যমভিবাদ্য সুদীনবৎ
172.45
ভো ভো মায়া যদৃচ্ছা বা ন বিদ্মঃ কিমিদং ভবেৎ
অস্ত্রং ত্বিদং কথং মিথ্যা মম কশ্চ ব্যতিক্রমঃ
172.46
অধরোত্তরমেতদ্বা লোকানাং বা পরাভবঃ
যদিমৌ জীবতঃ কৃষ্ণৌ কালো হি দুরতিক্রমঃ
172.47
নাসুরামরগন্ধর্বা ন পিশাচা ন রাক্ষসাঃ
ন সর্পয়ক্ষপতগা ন মনুষ্যাঃ কথংচন
172.48
উত্সহন্তেঽন্যথা কর্তুমেতদস্ত্রং ময়েরিতম্
তদিদং কেবলং হত্বা যুক্তামক্ষৌহিণীং জ্বলৎ
172.49
কেনেমৌ মর্ত্যধর্মাণৌ নাবধীত্কেশবার্জুনৌ
এতত্প্রব্রূহি ভগবন্ময়া পৃষ্টো যথাতথম্
172.50
ব্যাস উবাচ
মহান্তমেতমর্থং মাং যং ত্বং পৃচ্ছসি বিস্ময়াৎ
তত্প্রবক্ষ্যামি তে সর্বং সমাধায় মনঃ শৃণু
172.51
যোঽসৌ নারায়ণো নাম পূর্বেষামপি পূর্বজঃ
অজায়ত চ কার্যার্থং পুত্রো ধর্মস্য বিশ্বকৃৎ
172.52
স তপস্তীব্রমাতস্থে মৈনাকং গিরিমাস্থিতঃ
ঊর্ধ্ববাহুর্মহাতেজা জ্বলনাদিত্যসংনিভঃ
172.53
ষষ্টিং বর্ষসহস্রাণি তাবন্ত্যেব শতানি চ
অশোষয়ত্তদাত্মানং বায়ুভক্ষোঽম্বুজেক্ষণঃ
172.54
অথাপরং তপস্তপ্ত্বা দ্বিস্ততোঽন্যত্পুনর্মহৎ
দ্যাবাপৃথিব্যোর্বিবরং তেজসা সমপূরয়ৎ
172.55
স তেন তপসা তাত ব্রহ্মভূতো যদাভবৎ
ততো বিশ্বেশ্বরং যোনিং বিশ্বস্য জগতঃ পতিম্
172.56
দদর্শ ভৃশদুর্দর্শং সর্বদেবৈরপীশ্বরম্
অণীয়সামণীয়াংসং বৃহদ্ভ্যশ্চ বৃহত্তরম্
172.57
রুদ্রমীশানমৃষভং চেকিতানমজং পরম্
গচ্ছতস্তিষ্ঠতো বাপি সর্বভূতহৃদি স্থিতম্
172.58
দুর্বারণং দুর্দৃশং তিগ্মমন্যুং; মহাত্মানং সর্বহরং প্রচেতসম্
দিব্যং চাপমিষুধী চাদদানং; হিরণ্যবর্মাণমনন্তবীর্যম্
172.59
পিনাকিনং বজ্রিণং দীপ্তশূলং; পরশ্বধিং গদিনং স্বায়তাসিম্
সুভ্রুং জটামণ্ডলচন্দ্রমৌলিং; ব্যাঘ্রাজিনং পরিঘং দণ্ডপাণিম্
172.60
শুভাঙ্গদং নাগয়জ্ঞোপবীতিং; বিশ্বৈর্গণৈঃ শোভিতং ভূতসংঘৈঃ
একীভূতং তপসাং সংনিধানং; বয়োতিগৈঃ সুষ্টুতমিষ্টবাগ্ভিঃ
172.61
জলং দিবং খং ক্ষিতিং চন্দ্রসূর্যৌ; তথা বায্বগ্নী প্রতিমানং জগচ্চ
নালং দ্রষ্টুং যমজং ভিন্নবৃত্তা; ব্রহ্মদ্বিষঘ্নমমৃতস্য যোনিম্
172.62
যং পশ্যন্তি ব্রাহ্মণাঃ সাধুবৃত্তাঃ; ক্ষীণে পাপে মনসা যে বিশোকাঃ
স তন্নিষ্ঠস্তপসা ধর্মমীড্যং; তদ্ভক্ত্যা বৈ বিশ্বরূপং দদর্শ
দৃষ্ট্বা চৈনং বাঙ্মনোবুদ্ধিদেহৈঃ; সংহৃষ্টাত্মা মুমুদে দেবদেবম্
172.63
অক্ষমালাপরিক্ষিপ্তং জ্যোতিষাং পরমং নিধিম্
ততো নারায়ণো দৃষ্ট্বা ববন্দে বিশ্বসংভবম্
172.64
বরদং পৃথুচার্বঙ্গ্যা পার্বত্যা সহিতং প্রভুম্
অজমীশানমব্যগ্রং কারণাত্মানমচ্যুতম্
172.65
অভিবাদ্যাথ রুদ্রায় সদ্যোঽন্ধকনিপাতিনে
পদ্মাক্ষস্তং বিরূপাক্ষমভিতুষ্টাব ভক্তিমান্
172.66
ত্বত্সংভূতা ভূতকৃতো বরেণ্য; গোপ্তারোঽদ্য ভুবনং পূর্বদেবাঃ
আবিশ্যেমাং ধরণীং যেঽভ্যরক্ষ;ন্পুরা পুরাণাং তব দেব সৃষ্টিম্
172.67
সুরাসুরান্নাগরক্ষঃপিশাচা;ন্নরান্সুপর্ণানথ গন্ধর্বয়ক্ষান্
পৃথগ্বিধান্ভূতসংঘাংশ্চ বিশ্বাং;স্ত্বত্সংভূতান্বিদ্ম সর্বাংস্তথৈব
ঐন্দ্রং যাম্যং বারুণং বৈত্তপাল্যং; মৈত্রং ত্বাষ্ট্রং কর্ম সৌম্যং চ তুভ্যম্
172.68
রূপং জ্যোতিঃ শব্দ আকাশবায়ুঃ; স্পর্শঃ স্বাদ্যং সলিলং গন্ধ উর্বী
কামো ব্রহ্মা ব্রহ্ম চ ব্রাহ্মণাশ্চ; ত্বত্সংভূতং স্থাস্নু চরিষ্ণু চেদম্
172.69
অদ্ভ্যঃ স্তোকা যান্তি যথা পৃথক্ত্বং; তাভিশ্চৈক্যং সংক্ষয়ে যান্তি ভূয়ঃ
এবং বিদ্বান্প্রভবং চাপ্যয়ং চ; হিত্বা ভূতানাং তত্র সায়ুজ্যমেতি
172.70
দিব্যাবৃতৌ মানসৌ দ্বৌ সুপর্ণা;ববাক্শাখঃ পিপ্পলঃ সপ্ত গোপাঃ
দশাপ্যন্যে যে পুরং ধারয়ন্তি; ত্বয়া সৃষ্টাস্তে হি তেভ্যঃ পরস্ত্বম্
ভূতং ভব্যং ভবিতা চাপ্যধৃষ্যং; ত্বত্সংভূতা ভুবনানীহ বিশ্বা
172.71
ভক্তং চ মাং ভজমানং ভজস্ব; মা রীরিষো মামহিতাহিতেন
আত্মানং ত্বামাত্মনোঽনন্যভাবো; বিদ্বানেবং গচ্ছতি ব্রহ্ম শুক্রম্
172.72
অস্তৌষং ত্বাং তব সংমানমিচ্ছ;ন্বিচিন্বন্বৈ সবৃষং দেববর্য
সুদুর্লভান্দেহি বরান্মমেষ্টা;নভিষ্টুতঃ প্রতিকার্ষীশ্চ মা মাম্
172.73
তস্মৈ বরানচিন্ত্যাত্মা নীলকণ্ঠঃ পিনাকধৃক্
অর্হতে দেবমুখ্যায় প্রায়চ্ছদৃষিসংস্তুতঃ
172.74
নীলকণ্ঠ উবাচ
মত্প্রসাদান্মনুষ্যেষু দেবগন্ধর্বয়োনিষু
অপ্রমেয়বলাত্মা ত্বং নারায়ণ ভবিষ্যসি
172.75
ন চ ত্বা প্রসহিষ্যন্তি দেবাসুরমহোরগাঃ
ন পিশাচা ন গন্ধর্বা ন নরা ন চ রাক্ষসাঃ
172.76
ন সুপর্ণাস্তথা নাগা ন চ বিশ্বে বিয়োনিজাঃ
ন কশ্চিত্ত্বাং চ দেবোঽপি সমরেষু বিজেষ্যতি
172.77
ন শস্ত্রেণ ন বজ্রেণ নাগ্নিনা ন চ বায়ুনা
নার্দ্রেণ ন চ শুষ্কেণ ত্রসেন স্থাবরেণ বা
172.78
কশ্চিত্তব রুজং কর্তা মত্প্রসাদাত্কথংচন
অপি চেত্সমরং গত্বা ভবিষ্যসি মমাধিকঃ
172.79
ব্যাস উবাচ
এবমেতে বরা লব্ধাঃ পুরস্তাদ্বিদ্ধি শৌরিণা
স এষ দেবশ্চরতি মায়য়া মোহয়ঞ্জগৎ
172.80
তস্যৈব তপসা জাতং নরং নাম মহামুনিম্
তুল্যমেতেন দেবেন তং জানীহ্যর্জুনং সদা
172.81
তাবেতৌ পূর্বদেবানাং পরমোপচিতাবৃষী
লোকয়াত্রাবিধানার্থং সংজায়েতে যুগে যুগে
172.82
তথৈব কর্মণঃ কৃত্স্নং মহতস্তপসোঽপি চ
তেজোমন্যুশ্চ বিদ্বংস্ত্বং জাতো রৌদ্রো মহামতে
172.83
স ভবান্দেববত্প্রাজ্ঞো জ্ঞাত্বা ভবময়ং জগৎ
অবাকর্ষস্ত্বমাত্মানং নিয়মৈস্তত্প্রিয়েপ্সয়া
172.84
শুভমৌর্বং নবং কৃত্বা মহাপুরুষবিগ্রহম্
ঈজিবাংস্ত্বং জপৈর্হোমৈরুপহারৈশ্চ মানদ
172.85
স তথা পূজ্যমানস্তে পূর্বদেবোঽপ্যতূতুষৎ
পুষ্কলাংশ্চ বরান্প্রাদাত্তব বিদ্বন্হৃদি স্থিতান্
172.86
জন্মকর্মতপোয়োগাস্তয়োস্তব চ পুষ্কলাঃ
তাভ্যাং লিঙ্গেঽর্চিতো দেবস্ত্বয়ার্চায়াং যুগে যুগে
172.87
সর্বরূপং ভবং জ্ঞাত্বা লিঙ্গে যোঽর্চয়তি প্রভুম্
আত্ময়োগাশ্চ তস্মিন্বৈ শাস্ত্রয়োগাশ্চ শাশ্বতাঃ
172.88
এবং দেবা যজন্তো হি সিদ্ধাশ্চ পরমর্ষয়ঃ
প্রার্থয়ন্তি পরং লোকে স্থানমেব চ শাশ্বতম্
172.89
স এষ রুদ্রভক্তশ্চ কেশবো রুদ্রসংভবঃ
কৃষ্ণ এব হি যষ্টব্যো যজ্ঞৈশ্চৈষ সনাতনঃ
172.90
সর্বভূতভবং জ্ঞাত্বা লিঙ্গেঽর্চয়তি যঃ প্রভুম্
তস্মিন্নভ্যধিকাং প্রীতিং করোতি বৃষভধ্বজঃ
172.91
সংজয় উবাচ
তস্য তদ্বচনং শ্রুত্বা দ্রোণপুত্রো মহারথঃ
নমশ্চকার রুদ্রায় বহু মেনে চ কেশবম্
172.92
হৃষ্টলোমা চ বশ্যাত্মা নমস্কৃত্য মহর্ষয়ে
বরূথিনীমভিপ্রেত্য অবহারমকারয়ৎ
172.93
ততঃ প্রত্যবহারোঽভূত্পাণ্ডবানাং বিশাং পতে
কৌরবাণাং চ দীনানাং দ্রোণে যুধি নিপাতিতে
172.94
যুদ্ধং কৃত্বা দিনান্পঞ্চ দ্রোণো হত্বা বরূথিনীম্
ব্রহ্মলোকং গতো রাজন্ব্রাহ্মণো বেদপারগঃ