Utshovঅধ্যায় 173
173.1
ধৃতরাষ্ট্র উবাচ
তস্মিন্নতিরথে দ্রোণে নিহতে তত্র সংজয়
মামকাঃ পাণ্ডবাশ্চৈব কিমকুর্বন্নতঃ পরম্
173.2
সংজয় উবাচ
তস্মিন্নতিরথে দ্রোণে নিহতে পার্ষতেন বৈ
কৌরবেষু চ ভগ্নেষু কুন্তীপুত্রো ধনংজয়ঃ
173.3
দৃষ্ট্বা সুমহদাশ্চর্যমাত্মনো বিজয়াবহম্
যদৃচ্ছয়াগতং ব্যাসং পপ্রচ্ছ ভরতর্ষভ
173.4
সংগ্রামে নিঘ্নতঃ শত্রূঞ্শরৌঘৈর্বিমলৈরহম্
অগ্রতো লক্ষয়ে যান্তং পুরুষং পাবকপ্রভম্
173.5
জ্বলন্তং শূলমুদ্যম্য যাং দিশং প্রতিপদ্যতে
তস্যাং দিশি বিশীর্যন্তে শত্রবো মে মহামুনে
173.6
ন পদ্ভ্যাং স্পৃশতে ভূমিং ন চ শূলং বিমুঞ্চতি
শূলাচ্ছূলসহস্রাণি নিষ্পেতুস্তস্য তেজসা
173.7
তেন ভগ্নানরীন্সর্বান্মদ্ভগ্নান্মন্যতে জনঃ
তেন দগ্ধানি সৈন্যানি পৃষ্ঠতোঽনুদহাম্যহম্
173.8
ভগবংস্তন্মমাচক্ষ্ব কো বৈ স পুরুষোত্তমঃ
শূলপাণির্মহান্কৃষ্ণ তেজসা সূর্যসংনিভঃ
173.9
ব্যাস উবাচ
প্রজাপতীনাং প্রথমং তৈজসং পুরুষং বিভুম্
ভুবনং ভূর্ভুবং দেবং সর্বলোকেশ্বরং প্রভুম্
173.10
ঈশানং বরদং পার্থ দৃষ্টবানসি শংকরম্
তং গচ্ছ শরণং দেবং সর্বাদিং ভুবনেশ্বরম্
173.11
মহাদেবং মহাত্মানমীশানং জটিলং শিবম্
ত্র্যক্ষং মহাভুজং রুদ্রং শিখিনং চীরবাসসম্
দাতারং চৈব ভক্তানাং প্রসাদবিহিতান্বরান্
173.12
তস্য তে পার্ষদা দিব্যা রূপৈর্নানাবিধৈঃ বিভোঃ
বামনা জটিলা মুণ্ডা হ্রস্বগ্রীবা মহোদরাঃ
173.13
মহাকায়া মহোত্সাহা মহাকর্ণাস্তথাপরে
আননৈর্বিকৃতৈঃ পাদৈঃ পার্থ বেষৈশ্চ বৈকৃতৈঃ
173.14
ঈদৃশৈঃ স মহাদেবঃ পূজ্যমানো মহেশ্বরঃ
স শিবস্তাত তেজস্বী প্রসাদাদ্যাতি তেঽগ্রতঃ
তস্মিন্ঘোরে তদা পার্থ সংগ্রামে লোমহর্ষণে
173.15
দ্রোণকর্ণকৃপৈর্গুপ্তাং মহেষ্বাসৈঃ প্রহারিভিঃ
কস্তাং সেনাং তদা পার্থ মনসাপি প্রধর্ষয়েৎ
ঋতে দেবান্মহেষ্বাসাদ্বহুরূপান্মহেশ্বরাৎ
173.16
স্থাতুমুত্সহতে কশ্চিন্ন তস্মিন্নগ্রতঃ স্থিতে
ন হি ভূতং সমং তেন ত্রিষু লোকেষু বিদ্যতে
173.17
গন্ধেনাপি হি সংগ্রামে তস্য ক্রুদ্ধস্য শত্রবঃ
বিসংজ্ঞা হতভূয়িষ্ঠা বেপন্তি চ পতন্তি চ
173.18
তস্মৈ নমস্তু কুর্বন্তো দেবাস্তিষ্ঠন্তি বৈ দিবি
যে চান্যে মানবা লোকে যে চ স্বর্গজিতো নরাঃ
173.19
যে ভক্তা বরদং দেবং শিবং রুদ্রমুমাপতিম্
ইহ লোকে সুখং প্রাপ্য তে যান্তি পরমাং গতিম্
173.20
নমস্কুরুষ্ব কৌন্তেয় তস্মৈ শান্তায় বৈ সদা
রুদ্রায় শিতিকণ্ঠায় কনিষ্ঠায় সুবর্চসে
173.21
কপর্দিনে করালায় হর্যক্ষ্ণে বরদায় চ
যাম্যায়াব্যক্তকেশায় সদ্বৃত্তে শংকরায় চ
173.22
কাম্যায় হরিনেত্রায় স্থাণবে পুরুষায় চ
হরিকেশায় মুণ্ডায় কৃশায়োত্তরণায় চ
173.23
ভাস্করায় সুতীর্থায় দেবদেবায় রংহসে
বহুরূপায় শর্বায় প্রিয়ায় প্রিয়বাসসে
173.24
উষ্ণীষিণে সুবক্ত্রায় সহস্রাক্ষায় মীঢুষে
গিরিশায় প্রশান্তায় পতয়ে চীরবাসসে
173.25
হিরণ্যবাহবে চৈব উগ্রায় পতয়ে দিশাম্
পর্জন্যপতয়ে চৈব ভূতানাং পতয়ে নমঃ
173.26
বৃক্ষাণাং পতয়ে চৈব অপাং চ পতয়ে তথা
বৃক্ষৈরাবৃতকায়ায় সেনান্যে মধ্যমায় চ
173.27
স্রুবহস্তায় দেবায় ধন্বিনে ভার্গবায় চ
বহুরূপায় বিশ্বস্য পতয়ে চীরবাসসে
173.28
সহস্রশিরসে চৈব সহস্রনয়নায় চ
সহস্রবাহবে চৈব সহস্রচরণায় চ
173.29
শরণং প্রাপ্য কৌন্তেয় বরদং ভুবনেশ্বরম্
উমাপতিং বিরূপাক্ষং দক্ষয়জ্ঞনিবর্হণম্
প্রজানাং পতিমব্যগ্রং ভূতানাং পতিমব্যয়ম্
173.30
কপর্দিনং বৃষাবর্তং বৃষনাভং বৃষধ্বজম্
বৃষদর্পং বৃষপতিং বৃষশৃঙ্গং বৃষর্ষভম্
173.31
বৃষাঙ্কং বৃষভোদারং বৃষভং বৃষভেক্ষণম্
বৃষায়ুধং বৃষশরং বৃষভূতং মহেশ্বরম্
173.32
মহোদরং মহাকায়ং দ্বীপিচর্মনিবাসিনম্
লোকেশং বরদং মুণ্ডং ব্রহ্মণ্যং ব্রাহ্মণপ্রিয়ম্
173.33
ত্রিশূলপাণিং বরদং খড্গচর্মধরং প্রভুম্
পিনাকিনং খণ্ডপরশুং লোকানাং পতিমীশ্বরম্
প্রপদ্যে শরণং দেবং শরণ্যং চীরবাসসম্
173.34
নমস্তস্মৈ সুরেশায় যস্য বৈশ্রবণঃ সখা
সুবাসসে নমো নিত্যং সুব্রতায় সুধন্বিনে
173.35
স্রুবহস্তায় দেবায় সুখধন্বায় ধন্বিনে
ধন্বন্তরায় ধনুষে ধন্বাচার্যায় ধন্বিনে
173.36
উগ্রায়ুধায় দেবায় নমঃ সুরবরায় চ
নমোঽস্তু বহুরূপায় নমশ্চ বহুধন্বিনে
173.37
নমোঽস্তু স্থাণবে নিত্যং সুব্রতায় সুধন্বিনে
নমোঽস্তু ত্রিপুরঘ্নায় ভগঘ্নায় চ বৈ নমঃ
173.38
বনস্পতীনাং পতয়ে নরাণাং পতয়ে নমঃ
অপাং চ পতয়ে নিত্যং যজ্ঞানাং পতয়ে নমঃ
173.39
পূষ্ণো দন্তবিনাশায় ত্র্যক্ষায় বরদায় চ
নীলকণ্ঠায় পিঙ্গায় স্বর্ণকেশায় বৈ নমঃ
173.40
কর্মাণি চৈব দিব্যানি মহাদেবস্য ধীমতঃ
তানি তে কীর্তয়িষ্যামি যথাপ্রজ্ঞং যথাশ্রুতম্
173.41
ন সুরা নাসুরা লোকে ন গন্ধর্বা ন রাক্ষসাঃ
সুখমেধন্তি কুপিতে তস্মিন্নপি গুহাগতাঃ
173.42
বিব্যাধ কুপিতো যজ্ঞং নির্ভয়স্তু ভবস্তদা
ধনুষা বাণমুত্সৃজ্য সঘোষং বিননাদ চ
173.43
তে ন শর্ম কুতঃ শান্তিং লেভিরে স্ম সুরাস্তদা
বিদ্রুতে সহসা যজ্ঞে কুপিতে চ মহেশ্বরে
173.44
তেন জ্যাতলঘোষেণ সর্বে লোকাঃ সমাকুলাঃ
বভূবুর্বশগাঃ পার্থ নিপেতুশ্চ সুরাসুরাঃ
173.45
আপশ্চুক্ষুভিরে সর্বাশ্চকম্পে চ বসুংধরা
পর্বতাশ্চ ব্যশীর্যন্ত দিশো নাগাশ্চ মোহিতাঃ
173.46
অন্ধাশ্চ তমসা লোকা ন প্রকাশন্ত সংবৃতাঃ
জঘ্নিবান্সহ সূর্যেণ সর্বেষাং জ্যোতিষাং প্রভাঃ
173.47
চুক্রুশুর্ভয়ভীতাশ্চ শান্তিং চক্রুস্তথৈব চ
ঋষয়ঃ সর্বভূতানামাত্মনশ্চ সুখৈষিণঃ
173.48
পূষাণমভ্যদ্রবত শংকরঃ প্রহসন্নিব
পুরোডাশং ভক্ষয়তো দশনান্বৈ ব্যশাতয়ৎ
173.49
ততো নিশ্চক্রমুর্দেবা বেপমানা নতাঃ স্ম তম্
পুনশ্চ সংদধে দীপ্তং দেবানাং নিশিতং শরম্
173.50
রুদ্রস্য যজ্ঞভাগং চ বিশিষ্টং তে ন্বকল্পয়ন্
ভয়েন ত্রিদশা রাজঞ্শরণং চ প্রপেদিরে
173.51
তেন চৈবাতিকোপেন স যজ্ঞঃ সংধিতস্তদা
যত্তাশ্চাপি সুরা আসন্যত্তাশ্চাদ্যাপি তং প্রতি
173.52
অসুরাণাং পুরাণ্যাসংস্ত্রীণি বীর্যবতাং দিবি
আয়সং রাজতং চৈব সৌবর্ণমপরং মহৎ
173.53
আয়সং তারকাক্ষস্য কমলাক্ষস্য রাজতম্
সৌবর্ণং পরমং হ্যাসীদ্বিদ্যুন্মালিন এব চ
173.54
ন শক্তস্তানি মঘবান্ভেত্তুং সর্বায়ুধৈরপি
অথ সর্বেঽমরা রুদ্রং জগ্মুঃ শরণমর্দিতাঃ
173.55
তে তমূচুর্মহাত্মানং সর্বে দেবাঃ সবাসবাঃ
রুদ্র রৌদ্রা ভবিষ্যন্তি পশবঃ সর্বকর্মসু
নিপাতয়িষ্যসে চৈনানসুরান্ভুবনেশ্বর
173.56
স তথোক্তস্তথেত্যুক্ত্বা দেবানাং হিতকাম্যয়া
অতিষ্ঠত্স্থাণুভূতঃ স সহস্রং পরিবত্সরান্
173.57
যদা ত্রীণি সমেতানি অন্তরিক্ষে পুরাণি বৈ
ত্রিপর্বণা ত্রিশল্যেন তেন তানি বিভেদ সঃ
173.58
পুরাণি ন চ তং শেকুর্দানবাঃ প্রতিবীক্ষিতুম্
শরং কালাগ্নিসংয়ুক্তং বিষ্ণুসোমসমায়ুতম্
173.59
বালমঙ্কগতং কৃত্বা স্বয়ং পঞ্চশিখং পুনঃ
উমা জিজ্ঞাসমানা বৈ কোঽয়মিত্যব্রবীত্সুরান্
173.60
বাহুং সবজ্রং শক্রস্য ক্রুদ্ধস্যাস্তম্ভয়ত্প্রভুঃ
স এষ ভগবান্দেবঃ সর্বলোকেশ্বরঃ প্রভুঃ
173.61
ন সংবুবুধিরে চৈনং দেবাস্তং ভুবনেশ্বরম্
সপ্রজাপতয়ঃ সর্বে বালার্কসদৃশপ্রভম্
173.62
অথাভ্যেত্য ততো ব্রহ্মা দৃষ্ট্বা চ স মহেশ্বরম্
অয়ং শ্রেষ্ঠ ইতি জ্ঞাত্বা ববন্দে তং পিতামহঃ
173.63
ততঃ প্রসাদয়ামাসুরুমাং রুদ্রং চ তে সুরাঃ
অভবচ্চ পুনর্বাহুর্যথাপ্রকৃতি বজ্রিণঃ
173.64
তেষাং প্রসন্নো ভগবান্সপত্নীকো বৃষধ্বজঃ
দেবানাং ত্রিদশশ্রেষ্ঠো দক্ষয়জ্ঞবিনাশনঃ
173.65
স বৈ রুদ্রঃ স চ শিবঃ সোঽগ্নিঃ শর্বঃ স সর্ববিৎ
স চেন্দ্রশ্চৈব বায়ুশ্চ সোঽশ্বিনৌ স চ বিদ্যুতঃ
173.66
স ভবঃ স চ পর্জন্যো মহাদেবঃ স চানঘঃ
স চন্দ্রমাঃ স চেশানঃ স সূর্যো বরুণশ্চ সঃ
173.67
স কালঃ সোঽন্তকো মৃত্যুঃ স যমো রাত্র্যহানি চ
মাসার্ধমাসা ঋতবঃ সংধ্যে সংবত্সরশ্চ সঃ
173.68
স চ ধাতা বিধাতা চ বিশ্বাত্মা বিশ্বকর্মকৃৎ
সর্বাসাং দেবতানাং চ ধারয়ত্যবপুর্বপুঃ
173.69
সর্বৈর্দেবৈঃ স্তুতো দেবঃ সৈকধা বহুধা চ সঃ
শতধা সহস্রধা চৈব তথা শতসহস্রধা
173.70
ঈদৃশঃ স মহাদেবো ভূয়শ্চ ভগবানজঃ
ন হি সর্বে ময়া শক্যা বক্তুং ভগবতো গুণাঃ
173.71
সর্বৈর্গ্রহৈর্গৃহীতান্বৈ সর্বপাপসমন্বিতান্
স মোচয়তি সুপ্রীতঃ শরণ্যঃ শরণাগতান্
173.72
আয়ুরারোগ্যমৈশ্বর্যং বিত্তং কামাংশ্চ পুষ্কলান্
স দদাতি মনুষ্যেভ্যঃ স চৈবাক্ষিপতে পুনঃ
173.73
সেন্দ্রাদিষু চ দেবেষু তস্য চৈশ্বর্যমুচ্যতে
স চৈব ব্যাহৃতে লোকে মনুষ্যাণাং শুভাশুভে
173.74
ঐশ্বর্যাচ্চৈব কামানামীশ্বরঃ পুনরুচ্যতে
মহেশ্বরশ্চ ভূতানাং মহতামীশ্বরশ্চ সঃ
173.75
বহুভির্বহুধা রূপৈর্বিশ্বং ব্যাপ্নোতি বৈ জগৎ
অস্য দেবস্য যদ্বক্ত্রং সমুদ্রে তদতিষ্ঠত
173.76
এষ চৈব শ্মশানেষু দেবো বসতি নিত্যশঃ
যজন্ত্যেনং জনাস্তত্র বীরস্থান ইতীশ্বরম্
173.77
অস্য দীপ্তানি রূপাণি ঘোরাণি চ বহূনি চ
লোকে যান্যস্য কুর্বন্তি মনুষ্যাঃ প্রবদন্তি চ
173.78
নামধেয়ানি লোকেষু বহূন্যত্র যথার্থবৎ
নিরুচ্যন্তে মহত্ত্বাচ্চ বিভুত্বাত্কর্মভিস্তথা
173.79
বেদে চাস্য সমাম্নাতং শতরুদ্রীয়মুত্তমম্
নাম্না চানন্তরুদ্রেতি উপস্থানং মহাত্মনঃ
173.80
স কামানাং প্রভুর্দেবো যে দিব্যা যে চ মানুষাঃ
স বিভুঃ স প্রভুর্দেবো বিশ্বং ব্যাপ্নুবতে মহৎ
173.81
জ্যেষ্ঠং ভূতং বদন্ত্যেনং ব্রাহ্মণা মুনয়স্তথা
প্রথমো হ্যেষ দেবানাং মুখাদস্যানলোঽভবৎ
173.82
সর্বথা যত্পশূন্পাতি তৈশ্চ যদ্রমতে পুনঃ
তেষামধিপতির্যচ্চ তস্মাত্পশুপতিঃ স্মৃতঃ
173.83
নিত্যেন ব্রহ্মচর্যেণ লিঙ্গমস্য যদা স্থিতম্
মহয়ন্তি চ লোকাশ্চ মহেশ্বর ইতি স্মৃতঃ
173.84
ঋষয়শ্চৈব দেবাশ্চ গন্ধর্বাপ্সরসস্তথা
লিঙ্গমস্যার্চয়ন্তি স্ম তচ্চাপ্যূর্ধ্বং সমাস্থিতম্
173.85
পূজ্যমানে ততস্তস্মিন্মোদতে স মহেশ্বরঃ
সুখী প্রীতশ্চ ভবতি প্রহৃষ্টশ্চৈব শংকরঃ
173.86
যদস্য বহুধা রূপং ভূতভব্যভবত্স্থিতম্
স্থাবরং জঙ্গমং চৈব বহুরূপস্ততঃ স্মৃতঃ
173.87
একাক্ষো জাজ্বলন্নাস্তে সর্বতোক্ষিময়োঽপি বা
ক্রোধাদ্যশ্চাবিশল্লোকাংস্তস্মাচ্ছর্ব ইতি স্মৃতঃ
173.88
ধূম্রং রূপং চ যত্তস্য ধূর্জটিস্তেন উচ্যতে
বিশ্বে দেবাশ্চ যত্তস্মিন্বিশ্বরূপস্ততঃ স্মৃতঃ
173.89
তিস্রো দেবীর্যদা চৈব ভজতে ভুবনেশ্বরঃ
দ্যামপঃ পৃথিবীং চৈব ত্র্যম্বকশ্চ ততঃ স্মৃতঃ
173.90
সমেধয়তি যন্নিত্যং সর্বার্থান্সর্বকর্মসু
শিবমিচ্ছন্মনুষ্যাণাং তস্মাদেশ শিবঃ স্মৃতঃ
173.91
সহস্রাক্ষোঽয়ুতাক্ষো বা সর্বতোক্ষিময়োঽপি বা
যচ্চ বিশ্বং মহত্পাতি মহাদেবস্ততঃ স্মৃতঃ
173.92
দহত্যূর্ধ্বং স্থিতো যচ্চ প্রাণোত্পত্তিস্থিতশ্চ যৎ
স্থিতলিঙ্গশ্চ যন্নিত্যং তস্মাত্স্থাণুরিতি স্মৃতঃ
173.93
বিষমস্থঃ শরীরেষু সমশ্চ প্রাণিনামিহ
স বায়ুর্বিষমস্থেষু প্রাণাপানশরীরিষু
173.94
পূজয়েদ্বিগ্রহং যস্তু লিঙ্গং বাপি সমর্চয়েৎ
লিঙ্গং পূজয়িতা নিত্যং মহতীং শ্রিয়মশ্নুতে
173.95
ঊরুভ্যামর্ধমাগ্নেয়ং সোমার্ধং চ শিবা তনুঃ
আত্মনোঽর্ধং চ তস্যাগ্নিঃ সোমোঽর্ধং পুনরুচ্যতে
173.96
তৈজসী মহতী দীপ্তা দেবেভ্যশ্চ শিবা তনুঃ
ভাস্বতী মানুষেষ্বস্য তনুর্ঘোরাগ্নিরুচ্যতে
173.97
ব্রহ্মচর্যং চরত্যেষ শিবা যাস্য তনুস্তয়া
যাস্য ঘোরতরা মূর্তিঃ সর্বানত্তি তয়েশ্বরঃ
173.98
যন্নির্দহতি যত্তীক্ষ্ণো যদুগ্রো যত্প্রতাপবান্
মাংসশোণিতমজ্জাদো যত্ততো রুদ্র উচ্যতে
173.99
এষ দেবো মহাদেবো যোঽসৌ পার্থ তবাগ্রতঃ
সংগ্রামে শাত্রবান্নিঘ্নংস্ত্বয়া দৃষ্টঃ পিনাকধৃক্
173.100
এষ বৈ ভগবান্দেবঃ সংগ্রামে যাতি তেঽগ্রতঃ
যেন দত্তানি তেঽস্ত্রাণি যৈস্ত্বয়া দানবা হতাঃ
173.101
ধন্যং যশস্যমায়ুষ্যং পুণ্যং বেদৈশ্চ সংজ্ঞিতম্
দেবদেবস্য তে পার্থ ব্যাখ্যাতং শতরুদ্রিয়ম্
173.102
সর্বার্থসাধকং পুণ্যং সর্বকিল্বিষনাশনম্
সর্বপাপপ্রশমনং সর্বদুঃখভয়াপহম্
173.103
চতুর্বিধমিদং স্তোত্রং যঃ শৃণোতি নরঃ সদা
বিজিত্য সর্বাঞ্শত্রূন্স রুদ্রলোকে মহীয়তে
173.104
চরিতং মহাত্মনো দিব্যং সাংগ্রামিকমিদং শুভম্
পঠন্বৈ শতরুদ্রীয়ং শৃণ্বংশ্চ সততোত্থিতঃ
173.105
ভক্তো বিশ্বেশ্বরং দেবং মানুষেষু তু যঃ সদা
বরান্স কামাঁল্লভতে প্রসন্নে ত্র্যম্বকে নরঃ
173.106
গচ্ছ যুধ্যস্ব কৌন্তেয় ন তবাস্তি পরাজয়ঃ
যস্য মন্ত্রী চ গোপ্তা চ পার্শ্বতস্তে জনার্দনঃ
173.107
সংজয় উবাচ
এবমুক্ত্বার্জুনং সংখ্যে পরাশরসুতস্তদা
জগাম ভরতশ্রেষ্ঠ যথাগতমরিংদম