UtshovChapter 173
173.1
धृतराष्ट्र उवाच
तस्मिन्नतिरथे द्रोणे निहते तत्र संजय
मामकाः पाण्डवाश्चैव किमकुर्वन्नतः परम्
Dhritarashtra uvacha
Tasminnatirathe drone nihate tatra sanjaya
Mamakah pandavashchaiva kimakurvannatah param
173.2
संजय उवाच
तस्मिन्नतिरथे द्रोणे निहते पार्षतेन वै
कौरवेषु च भग्नेषु कुन्तीपुत्रो धनंजयः
Sanjaya uvacha
Tasminnatirathe drone nihate parshatena vai
Kauraveshu cha bhagneshu kuntiputro dhananjayah
173.3
दृष्ट्वा सुमहदाश्चर्यमात्मनो विजयावहम्
यदृच्छयागतं व्यासं पप्रच्छ भरतर्षभ
Drishtva sumahadashcharyamatmano vijayavaham
Yadrichchhayagatam vyasam paprachchha bharatarshabha
173.4
संग्रामे निघ्नतः शत्रूञ्शरौघैर्विमलैरहम्
अग्रतो लक्षये यान्तं पुरुषं पावकप्रभम्
Sangrame nighnatah shatrunsharaughairvimalairaham
Agrato lakshaye yantam purusham pavakaprabham
173.5
ज्वलन्तं शूलमुद्यम्य यां दिशं प्रतिपद्यते
तस्यां दिशि विशीर्यन्ते शत्रवो मे महामुने
Jvalantam shulamudyamya yam disham pratipadyate
Tasyam dishi vishiryante shatravo me mahamune
173.6
न पद्भ्यां स्पृशते भूमिं न च शूलं विमुञ्चति
शूलाच्छूलसहस्राणि निष्पेतुस्तस्य तेजसा
Na padbhyam sprishate bhumim na cha shulam vimunchati
Shulachchhulasahasrani nishpetustasya tejasa
173.7
तेन भग्नानरीन्सर्वान्मद्भग्नान्मन्यते जनः
तेन दग्धानि सैन्यानि पृष्ठतोऽनुदहाम्यहम्
Tena bhagnanarinsarvanmadbhagnanmanyate janah
Tena dagdhani sainyani prishthatonudahamyaham
173.8
भगवंस्तन्ममाचक्ष्व को वै स पुरुषोत्तमः
शूलपाणिर्महान्कृष्ण तेजसा सूर्यसंनिभः
Bhagavanstanmamachakshva ko vai sa purushottamah
Shulapanirmahankrishna tejasa suryasannibhah
173.9
व्यास उवाच
प्रजापतीनां प्रथमं तैजसं पुरुषं विभुम्
भुवनं भूर्भुवं देवं सर्वलोकेश्वरं प्रभुम्
Vyasa uvacha
Prajapatinam prathamam taijasam purusham vibhum
Bhuvanam bhurbhuvam devam sarvalokeshvaram prabhum
173.10
ईशानं वरदं पार्थ दृष्टवानसि शंकरम्
तं गच्छ शरणं देवं सर्वादिं भुवनेश्वरम्
Ishanam varadam partha drishtavanasi shankaram
Tam gachchha sharanam devam sarvadim bhuvaneshvaram
173.11
महादेवं महात्मानमीशानं जटिलं शिवम्
त्र्यक्षं महाभुजं रुद्रं शिखिनं चीरवाससम्
दातारं चैव भक्तानां प्रसादविहितान्वरान्
Mahadevam mahatmanamishanam jatilam shivam
Tryaksham mahabhujam rudram shikhinam chiravasasam
Dataram chaiva bhaktanam prasadavihitanvaran
173.12
तस्य ते पार्षदा दिव्या रूपैर्नानाविधैः विभोः
वामना जटिला मुण्डा ह्रस्वग्रीवा महोदराः
Tasya te parshada divya rupairnanavidhaih vibhoh
Vamana jatila munda hrasvagriva mahodarah
173.13
महाकाया महोत्साहा महाकर्णास्तथापरे
आननैर्विकृतैः पादैः पार्थ वेषैश्च वैकृतैः
Mahakaya mahotsaha mahakarnastathapare
Ananairvikritaih padaih partha veshaishcha vaikritaih
173.14
ईदृशैः स महादेवः पूज्यमानो महेश्वरः
स शिवस्तात तेजस्वी प्रसादाद्याति तेऽग्रतः
तस्मिन्घोरे तदा पार्थ संग्रामे लोमहर्षणे
Idrishaih sa mahadevah pujyamano maheshvarah
Sa shivastata tejasvi prasadadyati tegratah
Tasminghore tada partha sangrame lomaharshane
173.15
द्रोणकर्णकृपैर्गुप्तां महेष्वासैः प्रहारिभिः
कस्तां सेनां तदा पार्थ मनसापि प्रधर्षयेत्
ऋते देवान्महेष्वासाद्बहुरूपान्महेश्वरात्
Dronakarnakripairguptam maheshvasaih praharibhih
Kastam senam tada partha manasapi pradharshayet
Rite devanmaheshvasadbahurupanmaheshvarat
173.16
स्थातुमुत्सहते कश्चिन्न तस्मिन्नग्रतः स्थिते
न हि भूतं समं तेन त्रिषु लोकेषु विद्यते
Sthatumutsahate kashchinna tasminnagratah sthite
Na hi bhutam samam tena trishu lokeshu vidyate
173.17
गन्धेनापि हि संग्रामे तस्य क्रुद्धस्य शत्रवः
विसंज्ञा हतभूयिष्ठा वेपन्ति च पतन्ति च
Gandhenapi hi sangrame tasya kruddhasya shatravah
Visangya hatabhuyishtha vepanti cha patanti cha
173.18
तस्मै नमस्तु कुर्वन्तो देवास्तिष्ठन्ति वै दिवि
ये चान्ये मानवा लोके ये च स्वर्गजितो नराः
Tasmai namastu kurvanto devastishthanti vai divi
Ye chanye manava loke ye cha svargajito narah
173.19
ये भक्ता वरदं देवं शिवं रुद्रमुमापतिम्
इह लोके सुखं प्राप्य ते यान्ति परमां गतिम्
Ye bhakta varadam devam shivam rudramumapatim
Iha loke sukham prapya te yanti paramam gatim
173.20
नमस्कुरुष्व कौन्तेय तस्मै शान्ताय वै सदा
रुद्राय शितिकण्ठाय कनिष्ठाय सुवर्चसे
Namaskurushva kaunteya tasmai shantaya vai sada
Rudraya shitikanthaya kanishthaya suvarchase
173.21
कपर्दिने करालाय हर्यक्ष्णे वरदाय च
याम्यायाव्यक्तकेशाय सद्वृत्ते शंकराय च
Kapardine karalaya haryakshne varadaya cha
Yamyayavyaktakeshaya sadvritte shankaraya cha
173.22
काम्याय हरिनेत्राय स्थाणवे पुरुषाय च
हरिकेशाय मुण्डाय कृशायोत्तरणाय च
Kamyaya harinetraya sthanave purushaya cha
Harikeshaya mundaya krishayottaranaya cha
173.23
भास्कराय सुतीर्थाय देवदेवाय रंहसे
बहुरूपाय शर्वाय प्रियाय प्रियवाससे
Bhaskaraya sutirthaya devadevaya ranhase
Bahurupaya sharvaya priyaya priyavasase
173.24
उष्णीषिणे सुवक्त्राय सहस्राक्षाय मीढुषे
गिरिशाय प्रशान्ताय पतये चीरवाससे
Ushnishine suvaktraya sahasrakshaya midhushe
Girishaya prashantaya pataye chiravasase
173.25
हिरण्यबाहवे चैव उग्राय पतये दिशाम्
पर्जन्यपतये चैव भूतानां पतये नमः
Hiranyabahave chaiva ugraya pataye disham
Parjanyapataye chaiva bhutanam pataye namah
173.26
वृक्षाणां पतये चैव अपां च पतये तथा
वृक्षैरावृतकायाय सेनान्ये मध्यमाय च
Vrikshanam pataye chaiva apam cha pataye tatha
Vrikshairavritakayaya senanye madhyamaya cha
173.27
स्रुवहस्ताय देवाय धन्विने भार्गवाय च
बहुरूपाय विश्वस्य पतये चीरवाससे
Sruvahastaya devaya dhanvine bhargavaya cha
Bahurupaya vishvasya pataye chiravasase
173.28
सहस्रशिरसे चैव सहस्रनयनाय च
सहस्रबाहवे चैव सहस्रचरणाय च
Sahasrashirase chaiva sahasranayanaya cha
Sahasrabahave chaiva sahasracharanaya cha
173.29
शरणं प्राप्य कौन्तेय वरदं भुवनेश्वरम्
उमापतिं विरूपाक्षं दक्षयज्ञनिबर्हणम्
प्रजानां पतिमव्यग्रं भूतानां पतिमव्ययम्
Sharanam prapya kaunteya varadam bhuvaneshvaram
Umapatim virupaksham dakshayagyanibarhanam
Prajanam patimavyagram bhutanam patimavyayam
173.30
कपर्दिनं वृषावर्तं वृषनाभं वृषध्वजम्
वृषदर्पं वृषपतिं वृषशृङ्गं वृषर्षभम्
Kapardinam vrishavartam vrishanabham vrishadhvajam
Vrishadarpam vrishapatim vrishashringam vrisharshabham
173.31
वृषाङ्कं वृषभोदारं वृषभं वृषभेक्षणम्
वृषायुधं वृषशरं वृषभूतं महेश्वरम्
Vrishankam vrishabhodaram vrishabham vrishabhekshanam
Vrishayudham vrishasharam vrishabhutam maheshvaram
173.32
महोदरं महाकायं द्वीपिचर्मनिवासिनम्
लोकेशं वरदं मुण्डं ब्रह्मण्यं ब्राह्मणप्रियम्
Mahodaram mahakayam dvipicharmanivasinam
Lokesham varadam mundam brahmanyam brahmanapriyam
173.33
त्रिशूलपाणिं वरदं खड्गचर्मधरं प्रभुम्
पिनाकिनं खण्डपरशुं लोकानां पतिमीश्वरम्
प्रपद्ये शरणं देवं शरण्यं चीरवाससम्
Trishulapanim varadam khadgacharmadharam prabhum
Pinakinam khandaparashum lokanam patimishvaram
Prapadye sharanam devam sharanyam chiravasasam
173.34
नमस्तस्मै सुरेशाय यस्य वैश्रवणः सखा
सुवाससे नमो नित्यं सुव्रताय सुधन्विने
Namastasmai sureshaya yasya vaishravanah sakha
Suvasase namo nityam suvrataya sudhanvine
173.35
स्रुवहस्ताय देवाय सुखधन्वाय धन्विने
धन्वन्तराय धनुषे धन्वाचार्याय धन्विने
Sruvahastaya devaya sukhadhanvaya dhanvine
Dhanvantaraya dhanushe dhanvacharyaya dhanvine
173.36
उग्रायुधाय देवाय नमः सुरवराय च
नमोऽस्तु बहुरूपाय नमश्च बहुधन्विने
Ugrayudhaya devaya namah suravaraya cha
Namostu bahurupaya namashcha bahudhanvine
173.37
नमोऽस्तु स्थाणवे नित्यं सुव्रताय सुधन्विने
नमोऽस्तु त्रिपुरघ्नाय भगघ्नाय च वै नमः
Namostu sthanave nityam suvrataya sudhanvine
Namostu tripuraghnaya bhagaghnaya cha vai namah
173.38
वनस्पतीनां पतये नराणां पतये नमः
अपां च पतये नित्यं यज्ञानां पतये नमः
Vanaspatinam pataye naranam pataye namah
Apam cha pataye nityam yagyanam pataye namah
173.39
पूष्णो दन्तविनाशाय त्र्यक्षाय वरदाय च
नीलकण्ठाय पिङ्गाय स्वर्णकेशाय वै नमः
Pushno dantavinashaya tryakshaya varadaya cha
Nilakanthaya pingaya svarnakeshaya vai namah
173.40
कर्माणि चैव दिव्यानि महादेवस्य धीमतः
तानि ते कीर्तयिष्यामि यथाप्रज्ञं यथाश्रुतम्
Karmani chaiva divyani mahadevasya dhimatah
Tani te kirtayishyami yathapragyam yathashrutam
173.41
न सुरा नासुरा लोके न गन्धर्वा न राक्षसाः
सुखमेधन्ति कुपिते तस्मिन्नपि गुहागताः
Na sura nasura loke na gandharva na rakshasah
Sukhamedhanti kupite tasminnapi guhagatah
173.42
विव्याध कुपितो यज्ञं निर्भयस्तु भवस्तदा
धनुषा बाणमुत्सृज्य सघोषं विननाद च
Vivyadha kupito yagyam nirbhayastu bhavastada
Dhanusha banamutsrijya saghosham vinanada cha
173.43
ते न शर्म कुतः शान्तिं लेभिरे स्म सुरास्तदा
विद्रुते सहसा यज्ञे कुपिते च महेश्वरे
Te na sharma kutah shantim lebhire sma surastada
Vidrute sahasa yagye kupite cha maheshvare
173.44
तेन ज्यातलघोषेण सर्वे लोकाः समाकुलाः
बभूवुर्वशगाः पार्थ निपेतुश्च सुरासुराः
Tena jyatalaghoshena sarve lokah samakulah
Babhuvurvashagah partha nipetushcha surasurah
173.45
आपश्चुक्षुभिरे सर्वाश्चकम्पे च वसुंधरा
पर्वताश्च व्यशीर्यन्त दिशो नागाश्च मोहिताः
Apashchukshubhire sarvashchakampe cha vasundhara
Parvatashcha vyashiryanta disho nagashcha mohitah
173.46
अन्धाश्च तमसा लोका न प्रकाशन्त संवृताः
जघ्निवान्सह सूर्येण सर्वेषां ज्योतिषां प्रभाः
Andhashcha tamasa loka na prakashanta sanvritah
Jaghnivansaha suryena sarvesham jyotisham prabhah
173.47
चुक्रुशुर्भयभीताश्च शान्तिं चक्रुस्तथैव च
ऋषयः सर्वभूतानामात्मनश्च सुखैषिणः
Chukrushurbhayabhitashcha shantim chakrustathaiva cha
Rishayah sarvabhutanamatmanashcha sukhaishinah
173.48
पूषाणमभ्यद्रवत शंकरः प्रहसन्निव
पुरोडाशं भक्षयतो दशनान्वै व्यशातयत्
Pushanamabhyadravata shankarah prahasanniva
Purodasham bhakshayato dashananvai vyashatayat
173.49
ततो निश्चक्रमुर्देवा वेपमाना नताः स्म तम्
पुनश्च संदधे दीप्तं देवानां निशितं शरम्
Tato nishchakramurdeva vepamana natah sma tam
Punashcha sandadhe diptam devanam nishitam sharam
173.50
रुद्रस्य यज्ञभागं च विशिष्टं ते न्वकल्पयन्
भयेन त्रिदशा राजञ्शरणं च प्रपेदिरे
Rudrasya yagyabhagam cha vishishtam te nvakalpayan
Bhayena tridasha rajansharanam cha prapedire
173.51
तेन चैवातिकोपेन स यज्ञः संधितस्तदा
यत्ताश्चापि सुरा आसन्यत्ताश्चाद्यापि तं प्रति
Tena chaivatikopena sa yagyah sandhitastada
Yattashchapi sura asanyattashchadyapi tam prati
173.52
असुराणां पुराण्यासंस्त्रीणि वीर्यवतां दिवि
आयसं राजतं चैव सौवर्णमपरं महत्
Asuranam puranyasanstrini viryavatam divi
Ayasam rajatam chaiva sauvarnamaparam mahat
173.53
आयसं तारकाक्षस्य कमलाक्षस्य राजतम्
सौवर्णं परमं ह्यासीद्विद्युन्मालिन एव च
Ayasam tarakakshasya kamalakshasya rajatam
Sauvarnam paramam hyasidvidyunmalina eva cha
173.54
न शक्तस्तानि मघवान्भेत्तुं सर्वायुधैरपि
अथ सर्वेऽमरा रुद्रं जग्मुः शरणमर्दिताः
Na shaktastani maghavanbhettum sarvayudhairapi
Atha sarvemara rudram jagmuh sharanamarditah
173.55
ते तमूचुर्महात्मानं सर्वे देवाः सवासवाः
रुद्र रौद्रा भविष्यन्ति पशवः सर्वकर्मसु
निपातयिष्यसे चैनानसुरान्भुवनेश्वर
Te tamuchurmahatmanam sarve devah savasavah
Rudra raudra bhavishyanti pashavah sarvakarmasu
Nipatayishyase chainanasuranbhuvaneshvara
173.56
स तथोक्तस्तथेत्युक्त्वा देवानां हितकाम्यया
अतिष्ठत्स्थाणुभूतः स सहस्रं परिवत्सरान्
Sa tathoktastathetyuktva devanam hitakamyaya
Atishthatsthanubhutah sa sahasram parivatsaran
173.57
यदा त्रीणि समेतानि अन्तरिक्षे पुराणि वै
त्रिपर्वणा त्रिशल्येन तेन तानि बिभेद सः
Yada trini sametani antarikshe purani vai
Triparvana trishalyena tena tani bibheda sah
173.58
पुराणि न च तं शेकुर्दानवाः प्रतिवीक्षितुम्
शरं कालाग्निसंयुक्तं विष्णुसोमसमायुतम्
Purani na cha tam shekurdanavah prativikshitum
Sharam kalagnisanyuktam vishnusomasamayutam
173.59
बालमङ्कगतं कृत्वा स्वयं पञ्चशिखं पुनः
उमा जिज्ञासमाना वै कोऽयमित्यब्रवीत्सुरान्
Balamankagatam kritva svayam panchashikham punah
Uma jigyasamana vai koyamityabravitsuran
173.60
बाहुं सवज्रं शक्रस्य क्रुद्धस्यास्तम्भयत्प्रभुः
स एष भगवान्देवः सर्वलोकेश्वरः प्रभुः
Bahum savajram shakrasya kruddhasyastambhayatprabhuh
Sa esha bhagavandevah sarvalokeshvarah prabhuh
173.61
न संबुबुधिरे चैनं देवास्तं भुवनेश्वरम्
सप्रजापतयः सर्वे बालार्कसदृशप्रभम्
Na sambubudhire chainam devastam bhuvaneshvaram
Saprajapatayah sarve balarkasadrishaprabham
173.62
अथाभ्येत्य ततो ब्रह्मा दृष्ट्वा च स महेश्वरम्
अयं श्रेष्ठ इति ज्ञात्वा ववन्दे तं पितामहः
Athabhyetya tato brahma drishtva cha sa maheshvaram
Ayam shreshtha iti gyatva vavande tam pitamahah
173.63
ततः प्रसादयामासुरुमां रुद्रं च ते सुराः
अभवच्च पुनर्बाहुर्यथाप्रकृति वज्रिणः
Tatah prasadayamasurumam rudram cha te surah
Abhavachcha punarbahuryathaprakriti vajrinah
173.64
तेषां प्रसन्नो भगवान्सपत्नीको वृषध्वजः
देवानां त्रिदशश्रेष्ठो दक्षयज्ञविनाशनः
Tesham prasanno bhagavansapatniko vrishadhvajah
Devanam tridashashreshtho dakshayagyavinashanah
173.65
स वै रुद्रः स च शिवः सोऽग्निः शर्वः स सर्ववित्
स चेन्द्रश्चैव वायुश्च सोऽश्विनौ स च विद्युतः
Sa vai rudrah sa cha shivah sognih sharvah sa sarvavit
Sa chendrashchaiva vayushcha soshvinau sa cha vidyutah
173.66
स भवः स च पर्जन्यो महादेवः स चानघः
स चन्द्रमाः स चेशानः स सूर्यो वरुणश्च सः
Sa bhavah sa cha parjanyo mahadevah sa chanaghah
Sa chandramah sa cheshanah sa suryo varunashcha sah
173.67
स कालः सोऽन्तको मृत्युः स यमो रात्र्यहानि च
मासार्धमासा ऋतवः संध्ये संवत्सरश्च सः
Sa kalah sontako mrityuh sa yamo ratryahani cha
Masardhamasa ritavah sandhye sanvatsarashcha sah
173.68
स च धाता विधाता च विश्वात्मा विश्वकर्मकृत्
सर्वासां देवतानां च धारयत्यवपुर्वपुः
Sa cha dhata vidhata cha vishvatma vishvakarmakrit
Sarvasam devatanam cha dharayatyavapurvapuh
173.69
सर्वैर्देवैः स्तुतो देवः सैकधा बहुधा च सः
शतधा सहस्रधा चैव तथा शतसहस्रधा
Sarvairdevaih stuto devah saikadha bahudha cha sah
Shatadha sahasradha chaiva tatha shatasahasradha
173.70
ईदृशः स महादेवो भूयश्च भगवानजः
न हि सर्वे मया शक्या वक्तुं भगवतो गुणाः
Idrishah sa mahadevo bhuyashcha bhagavanajah
Na hi sarve maya shakya vaktum bhagavato gunah
173.71
सर्वैर्ग्रहैर्गृहीतान्वै सर्वपापसमन्वितान्
स मोचयति सुप्रीतः शरण्यः शरणागतान्
Sarvairgrahairgrihitanvai sarvapapasamanvitan
Sa mochayati supritah sharanyah sharanagatan
173.72
आयुरारोग्यमैश्वर्यं वित्तं कामांश्च पुष्कलान्
स ददाति मनुष्येभ्यः स चैवाक्षिपते पुनः
Ayurarogyamaishvaryam vittam kamanshcha pushkalan
Sa dadati manushyebhyah sa chaivakshipate punah
173.73
सेन्द्रादिषु च देवेषु तस्य चैश्वर्यमुच्यते
स चैव व्याहृते लोके मनुष्याणां शुभाशुभे
Sendradishu cha deveshu tasya chaishvaryamuchyate
Sa chaiva vyahrite loke manushyanam shubhashubhe
173.74
ऐश्वर्याच्चैव कामानामीश्वरः पुनरुच्यते
महेश्वरश्च भूतानां महतामीश्वरश्च सः
Aishvaryachchaiva kamanamishvarah punaruchyate
Maheshvarashcha bhutanam mahatamishvarashcha sah
173.75
बहुभिर्बहुधा रूपैर्विश्वं व्याप्नोति वै जगत्
अस्य देवस्य यद्वक्त्रं समुद्रे तदतिष्ठत
Bahubhirbahudha rupairvishvam vyapnoti vai jagat
Asya devasya yadvaktram samudre tadatishthata
173.76
एष चैव श्मशानेषु देवो वसति नित्यशः
यजन्त्येनं जनास्तत्र वीरस्थान इतीश्वरम्
Esha chaiva shmashaneshu devo vasati nityashah
Yajantyenam janastatra virasthana itishvaram
173.77
अस्य दीप्तानि रूपाणि घोराणि च बहूनि च
लोके यान्यस्य कुर्वन्ति मनुष्याः प्रवदन्ति च
Asya diptani rupani ghorani cha bahuni cha
Loke yanyasya kurvanti manushyah pravadanti cha
173.78
नामधेयानि लोकेषु बहून्यत्र यथार्थवत्
निरुच्यन्ते महत्त्वाच्च विभुत्वात्कर्मभिस्तथा
Namadheyani lokeshu bahunyatra yatharthavat
Niruchyante mahattvachcha vibhutvatkarmabhistatha
173.79
वेदे चास्य समाम्नातं शतरुद्रीयमुत्तमम्
नाम्ना चानन्तरुद्रेति उपस्थानं महात्मनः
Vede chasya samamnatam shatarudriyamuttamam
Namna chanantarudreti upasthanam mahatmanah
173.80
स कामानां प्रभुर्देवो ये दिव्या ये च मानुषाः
स विभुः स प्रभुर्देवो विश्वं व्याप्नुवते महत्
Sa kamanam prabhurdevo ye divya ye cha manushah
Sa vibhuh sa prabhurdevo vishvam vyapnuvate mahat
173.81
ज्येष्ठं भूतं वदन्त्येनं ब्राह्मणा मुनयस्तथा
प्रथमो ह्येष देवानां मुखादस्यानलोऽभवत्
Jyeshtham bhutam vadantyenam brahmana munayastatha
Prathamo hyesha devanam mukhadasyanalobhavat
173.82
सर्वथा यत्पशून्पाति तैश्च यद्रमते पुनः
तेषामधिपतिर्यच्च तस्मात्पशुपतिः स्मृतः
Sarvatha yatpashunpati taishcha yadramate punah
Teshamadhipatiryachcha tasmatpashupatih smritah
173.83
नित्येन ब्रह्मचर्येण लिङ्गमस्य यदा स्थितम्
महयन्ति च लोकाश्च महेश्वर इति स्मृतः
Nityena brahmacharyena lingamasya yada sthitam
Mahayanti cha lokashcha maheshvara iti smritah
173.84
ऋषयश्चैव देवाश्च गन्धर्वाप्सरसस्तथा
लिङ्गमस्यार्चयन्ति स्म तच्चाप्यूर्ध्वं समास्थितम्
Rishayashchaiva devashcha gandharvapsarasastatha
Lingamasyarchayanti sma tachchapyurdhvam samasthitam
173.85
पूज्यमाने ततस्तस्मिन्मोदते स महेश्वरः
सुखी प्रीतश्च भवति प्रहृष्टश्चैव शंकरः
Pujyamane tatastasminmodate sa maheshvarah
Sukhi pritashcha bhavati prahrishtashchaiva shankarah
173.86
यदस्य बहुधा रूपं भूतभव्यभवत्स्थितम्
स्थावरं जङ्गमं चैव बहुरूपस्ततः स्मृतः
Yadasya bahudha rupam bhutabhavyabhavatsthitam
Sthavaram jangamam chaiva bahurupastatah smritah
173.87
एकाक्षो जाज्वलन्नास्ते सर्वतोक्षिमयोऽपि वा
क्रोधाद्यश्चाविशल्लोकांस्तस्माच्छर्व इति स्मृतः
Ekaksho jajvalannaste sarvatokshimayopi va
Krodhadyashchavishallokanstasmachchharva iti smritah
173.88
धूम्रं रूपं च यत्तस्य धूर्जटिस्तेन उच्यते
विश्वे देवाश्च यत्तस्मिन्विश्वरूपस्ततः स्मृतः
Dhumram rupam cha yattasya dhurjatistena uchyate
Vishve devashcha yattasminvishvarupastatah smritah
173.89
तिस्रो देवीर्यदा चैव भजते भुवनेश्वरः
द्यामपः पृथिवीं चैव त्र्यम्बकश्च ततः स्मृतः
Tisro deviryada chaiva bhajate bhuvaneshvarah
Dyamapah prithivim chaiva tryambakashcha tatah smritah
173.90
समेधयति यन्नित्यं सर्वार्थान्सर्वकर्मसु
शिवमिच्छन्मनुष्याणां तस्मादेश शिवः स्मृतः
Samedhayati yannityam sarvarthansarvakarmasu
Shivamichchhanmanushyanam tasmadesha shivah smritah
173.91
सहस्राक्षोऽयुताक्षो वा सर्वतोक्षिमयोऽपि वा
यच्च विश्वं महत्पाति महादेवस्ततः स्मृतः
Sahasrakshoyutaksho va sarvatokshimayopi va
Yachcha vishvam mahatpati mahadevastatah smritah
173.92
दहत्यूर्ध्वं स्थितो यच्च प्राणोत्पत्तिस्थितश्च यत्
स्थितलिङ्गश्च यन्नित्यं तस्मात्स्थाणुरिति स्मृतः
Dahatyurdhvam sthito yachcha pranotpattisthitashcha yat
Sthitalingashcha yannityam tasmatsthanuriti smritah
173.93
विषमस्थः शरीरेषु समश्च प्राणिनामिह
स वायुर्विषमस्थेषु प्राणापानशरीरिषु
Vishamasthah sharireshu samashcha praninamiha
Sa vayurvishamastheshu pranapanasharirishu
173.94
पूजयेद्विग्रहं यस्तु लिङ्गं वापि समर्चयेत्
लिङ्गं पूजयिता नित्यं महतीं श्रियमश्नुते
Pujayedvigraham yastu lingam vapi samarchayet
Lingam pujayita nityam mahatim shriyamashnute
173.95
ऊरुभ्यामर्धमाग्नेयं सोमार्धं च शिवा तनुः
आत्मनोऽर्धं च तस्याग्निः सोमोऽर्धं पुनरुच्यते
Urubhyamardhamagneyam somardham cha shiva tanuh
Atmanordham cha tasyagnih somordham punaruchyate
173.96
तैजसी महती दीप्ता देवेभ्यश्च शिवा तनुः
भास्वती मानुषेष्वस्य तनुर्घोराग्निरुच्यते
Taijasi mahati dipta devebhyashcha shiva tanuh
Bhasvati manusheshvasya tanurghoragniruchyate
173.97
ब्रह्मचर्यं चरत्येष शिवा यास्य तनुस्तया
यास्य घोरतरा मूर्तिः सर्वानत्ति तयेश्वरः
Brahmacharyam charatyesha shiva yasya tanustaya
Yasya ghoratara murtih sarvanatti tayeshvarah
173.98
यन्निर्दहति यत्तीक्ष्णो यदुग्रो यत्प्रतापवान्
मांसशोणितमज्जादो यत्ततो रुद्र उच्यते
Yannirdahati yattikshno yadugro yatpratapavan
Mansashonitamajjado yattato rudra uchyate
173.99
एष देवो महादेवो योऽसौ पार्थ तवाग्रतः
संग्रामे शात्रवान्निघ्नंस्त्वया दृष्टः पिनाकधृक्
Esha devo mahadevo yosau partha tavagratah
Sangrame shatravannighnanstvaya drishtah pinakadhrik
173.100
एष वै भगवान्देवः संग्रामे याति तेऽग्रतः
येन दत्तानि तेऽस्त्राणि यैस्त्वया दानवा हताः
Esha vai bhagavandevah sangrame yati tegratah
Yena dattani testrani yaistvaya danava hatah
173.101
धन्यं यशस्यमायुष्यं पुण्यं वेदैश्च संज्ञितम्
देवदेवस्य ते पार्थ व्याख्यातं शतरुद्रियम्
Dhanyam yashasyamayushyam punyam vedaishcha sangyitam
Devadevasya te partha vyakhyatam shatarudriyam
173.102
सर्वार्थसाधकं पुण्यं सर्वकिल्बिषनाशनम्
सर्वपापप्रशमनं सर्वदुःखभयापहम्
Sarvarthasadhakam punyam sarvakilbishanashanam
Sarvapapaprashamanam sarvaduhkhabhayapaham
173.103
चतुर्विधमिदं स्तोत्रं यः शृणोति नरः सदा
विजित्य सर्वाञ्शत्रून्स रुद्रलोके महीयते
Chaturvidhamidam stotram yah shrinoti narah sada
Vijitya sarvanshatrunsa rudraloke mahiyate
173.104
चरितं महात्मनो दिव्यं सांग्रामिकमिदं शुभम्
पठन्वै शतरुद्रीयं शृण्वंश्च सततोत्थितः
Charitam mahatmano divyam sangramikamidam shubham
Pathanvai shatarudriyam shrinvanshcha satatotthitah
173.105
भक्तो विश्वेश्वरं देवं मानुषेषु तु यः सदा
वरान्स कामाँल्लभते प्रसन्ने त्र्यम्बके नरः
Bhakto vishveshvaram devam manusheshu tu yah sada
Varansa kamanllabhate prasanne tryambake narah
173.106
गच्छ युध्यस्व कौन्तेय न तवास्ति पराजयः
यस्य मन्त्री च गोप्ता च पार्श्वतस्ते जनार्दनः
Gachchha yudhyasva kaunteya na tavasti parajayah
Yasya mantri cha gopta cha parshvataste janardanah
173.107
संजय उवाच
एवमुक्त्वार्जुनं संख्ये पराशरसुतस्तदा
जगाम भरतश्रेष्ठ यथागतमरिंदम
Sanjaya uvacha
Evamuktvarjunam sankhye parasharasutastada
Jagama bharatashreshtha yathagatamarindama