Utshovঅধ্যায় 97
97.1
ধৃতরাষ্ট্র উবাচ
আর্জুনিং সমরে শূরং বিনিঘ্নন্তং মহারথম্
অলম্বুসঃ কথং যুদ্ধে প্রত্যয়ুধ্যত সংজয়
97.2
আর্শ্যশৃঙ্গিং কথং চাপি সৌভদ্রঃ পরবীরহা
তন্মমাচক্ষ্ব তত্ত্বেন যথা বৃত্তং স্ম সংয়ুগে
97.3
ধনংজয়শ্চ কিং চক্রে মম সৈন্যেষু সংজয়
ভীমো বা বলিনাং শ্রেষ্ঠো রাক্ষসো বা ঘটোত্কচঃ
97.4
নকুলঃ সহদেবো বা সাত্যকির্বা মহারথঃ
এতদাচক্ষ্ব মে সর্বং কুশলো হ্যসি সংজয়
97.5
সংজয় উবাচ
হন্ত তেঽহং প্রবক্ষ্যামি সংগ্রামং লোমহর্ষণম্
যথাভূদ্রাক্ষসেন্দ্রস্য সৌভদ্রস্য চ মারিষ
97.6
অর্জুনশ্চ যথা সংখ্যে ভীমসেনশ্চ পাণ্ডবঃ
নকুলঃ সহদেবশ্চ রণে চক্রুঃ পরাক্রমম্
97.7
তথৈব তাবকাঃ সর্বে ভীষ্মদ্রোণপুরোগমাঃ
অদ্ভুতানি বিচিত্রাণি চক্রুঃ কর্মাণ্যভীতবৎ
97.8
অলম্বুসস্তু সমরে অভিমন্যুং মহারথম্
বিনদ্য সুমহানাদং তর্জয়িত্বা মুহুর্মুহুঃ
অভিদুদ্রাব বেগেন তিষ্ঠ তিষ্ঠেতি চাব্রবীৎ
97.9
সৌভদ্রোঽপি রণে রাজন্সিংহবদ্বিনদন্মুহুঃ
আর্শ্যশৃঙ্গিং মহেষ্বাসং পিতুরত্যন্তবৈরিণম্
97.10
ততঃ সমেয়তুঃ সংখ্যে ত্বরিতৌ নররাক্ষসৌ
রথাভ্যাং রথিনাং শ্রেষ্ঠৌ যথা বৈ দেবদানবৌ
মায়াবী রাক্ষসশ্রেষ্ঠো দিব্যাস্ত্রজ্ঞশ্চ ফাল্গুনিঃ
97.11
ততঃ কার্ষ্ণির্মহারাজ নিশিতৈঃ সায়কৈস্ত্রিভিঃ
আর্শ্যশৃঙ্গিং রণে বিদ্ধ্বা পুনর্বিব্যাধ পঞ্চভিঃ
97.12
অলম্বুসোঽপি সংক্রুদ্ধঃ কার্ষ্ণিং নবভিরাশুগৈঃ
হৃদি বিব্যাধ বেগেন তোত্ত্রৈরিব মহাদ্বিপম্
97.13
ততঃ শরসহস্রেণ ক্ষিপ্রকারী নিশাচরঃ
অর্জুনস্য সুতং সংখ্যে পীডয়ামাস ভারত
97.14
অভিমন্যুস্ততঃ ক্রুদ্ধো নবতিং নতপর্বণাম্
চিক্ষেপ নিশিতান্বাণান্রাক্ষসস্য মহোরসি
97.15
তে তস্য বিবিশুস্তূর্ণং কায়ং নির্ভিদ্য মর্মণি
স তৈর্বিভিন্নসর্বাঙ্গঃ শুশুভে রাক্ষসোত্তমঃ
পুষ্পিতৈঃ কিংশুকৈ রাজন্সংস্তীর্ণ ইব পর্বতঃ
97.16
স ধারয়ঞ্শরান্হেমপুঙ্খানপি মহাবলঃ
বিবভৌ রাক্ষসশ্রেষ্ঠঃ সজ্বাল ইব পর্বতঃ
97.17
ততঃ ক্রুদ্ধো মহারাজ আর্শ্যশৃঙ্গির্মহাবলঃ
মহেন্দ্রপ্রতিমং কার্ষ্ণিং ছাদয়ামাস পত্রিভিঃ
97.18
তেন তে বিশিখা মুক্তা যমদণ্ডোপমাঃ শিতাঃ
অভিমন্যুং বিনির্ভিদ্য প্রাবিশন্ধরণীতলম্
97.19
তথৈবার্জুনিনির্মুক্তাঃ শরাঃ কাঞ্চনভূষণাঃ
অলম্বুসং বিনির্ভিদ্য প্রাবিশন্ত ধরাতলম্
97.20
সৌভদ্রস্তু রণে রক্ষঃ শরৈঃ সংনতপর্বভিঃ
চক্রে বিমুখমাসাদ্য ময়ং শক্র ইবাহবে
97.21
বিমুখং চ ততো রক্ষো বধ্যমানং রণেঽরিণা
প্রাদুশ্চক্রে মহামায়াং তামসীং পরতাপনঃ
97.22
ততস্তে তমসা সর্বে হৃতা হ্যাসন্মহীতলে
নাভিমন্যুমপশ্যন্ত নৈব স্বান্ন পরান্রণে
97.23
অভিমন্যুশ্চ তদ্দৃষ্ট্বা ঘোররূপং মহত্তমঃ
প্রাদুশ্চক্রেঽস্ত্রমত্যুগ্রং ভাস্করং কুরুনন্দনঃ
97.24
ততঃ প্রকাশমভবজ্জগত্সর্বং মহীপতে
তাং চাপি জঘ্নিবান্মায়াং রাক্ষসস্য দুরাত্মনঃ
97.25
সংক্রুদ্ধশ্চ মহাবীর্যো রাক্ষসেন্দ্রং নরোত্তমঃ
ছাদয়ামাস সমরে শরৈঃ সংনতপর্বভিঃ
97.26
বহ্বীস্তথান্যা মায়াশ্চ প্রয়ুক্তাস্তেন রক্ষসা
সর্বাস্ত্রবিদমেয়াত্মা বারয়ামাস ফাল্গুনিঃ
97.27
হতমায়ং ততো রক্ষো বধ্যমানং চ সায়কৈঃ
রথং তত্রৈব সংত্যজ্য প্রাদ্রবন্মহতো ভয়াৎ
97.28
তস্মিন্বিনির্জিতে তূর্ণং কূটয়োধিনি রাক্ষসে
আর্জুনিঃ সমরে সৈন্যং তাবকং সংমমর্দ হ
মদান্ধো বন্যনাগেন্দ্রঃ সপদ্মাং পদ্মিনীমিব
97.29
ততঃ শাংতনবো ভীষ্মঃ সৈন্যং দৃষ্ট্বাভিবিদ্রুতম্
মহতা রথবংশেন সৌভদ্রং পর্যবারয়ৎ
97.30
কোষ্ঠকীকৃত্য তং বীরং ধার্তরাষ্ট্রা মহারথাঃ
একং সুবহবো যুদ্ধে ততক্ষুঃ সায়কৈর্দৃঢম্
97.31
স তেষাং রথিনাং বীরঃ পিতুস্তুল্যপরাক্রমঃ
সদৃশো বাসুদেবস্য বিক্রমেণ বলেন চ
97.32
উভয়োঃ সদৃশং কর্ম স পিতুর্মাতুলস্য চ
রণে বহুবিধং চক্রে সর্বশস্ত্রভৃতাং বরঃ
97.33
ততো ধনংজয়ো রাজন্বিনিঘ্নংস্তব সৈনিকান্
আসসাদ রণে ভীষ্মং পুত্রপ্রেপ্সুরমর্ষণঃ
97.34
তথৈব সমরে রাজন্পিতা দেবব্রতস্তব
আসসাদ রণে পার্থং স্বর্ভানুরিব ভাস্করম্
97.35
ততঃ সরথনাগাশ্বাঃ পুত্রাস্তব বিশাং পতে
পরিবব্রূ রণে ভীষ্মং জুগুপুশ্চ সমন্ততঃ
97.36
তথৈব পাণ্ডবা রাজন্পরিবার্য ধনংজয়ম্
রণায় মহতে যুক্তা দংশিতা ভরতর্ষভ
97.37
শারদ্বতস্ততো রাজন্ভীষ্মস্য প্রমুখে স্থিতম্
অর্জুনং পঞ্চবিংশত্যা সায়কানাং সমাচিনোৎ
97.38
প্রত্যুদ্গম্যাথ বিব্যাধ সাত্যকিস্তং শিতৈঃ শরৈঃ
পাণ্ডবপ্রিয়কামার্থং শার্দূল ইব কুঞ্জরম্
97.39
গৌতমোঽপি ত্বরায়ুক্তো মাধবং নবভিঃ শরৈঃ
হৃদি বিব্যাধ সংক্রুদ্ধঃ কঙ্কপত্রপরিচ্ছদৈঃ
97.40
শৈনেয়োঽপি ততঃ ক্রুদ্ধো ভৃশং বিদ্ধো মহারথঃ
গৌতমান্তকরং ঘোরং সমাদত্ত শিলীমুখম্
97.41
তমাপতন্তং বেগেন শক্রাশনিসমদ্যুতিম্
দ্বিধা চিচ্ছেদ সংক্রুদ্ধো দ্রৌণিঃ পরমকোপনঃ
97.42
সমুত্সৃজ্যাথ শৈনেয়ো গৌতমং রথিনাং বরম্
অভ্যদ্রবদ্রণে দ্রৌণিং রাহুঃ খে শশিনং যথা
97.43
তস্য দ্রোণসুতশ্চাপং দ্বিধা চিচ্ছেদ ভারত
অথৈনং ছিন্নধন্বানং তাডয়ামাস সায়কৈঃ
97.44
সোঽন্যত্কার্মুকমাদায় শত্রুঘ্নং ভারসাধনম্
দ্রৌণিং ষষ্ট্যা মহারাজ বাহ্বোরুরসি চার্পয়ৎ
97.45
স বিদ্ধো ব্যথিতশ্চৈব মুহূর্তং কশ্মলায়ুতঃ
নিষসাদ রথোপস্থে ধ্বজয়ষ্টিমুপাশ্রিতঃ
97.46
প্রতিলভ্য ততঃ সংজ্ঞাং দ্রোণপুত্রঃ প্রতাপবান্
বার্ষ্ণেয়ং সমরে ক্রুদ্ধো নারাচেন সমর্দয়ৎ
97.47
শৈনেয়ং স তু নির্ভিদ্য প্রাবিশদ্ধরণীতলম্
বসন্তকালে বলবান্বিলং সর্পশিশুর্যথা
97.48
ততোঽপরেণ ভল্লেন মাধবস্য ধ্বজোত্তমম্
চিচ্ছেদ সমরে দ্রৌণিঃ সিংহনাদং ননাদ চ
97.49
পুনশ্চৈনং শরৈর্ঘোরৈশ্ছাদয়ামাস ভারত
নিদাঘান্তে মহারাজ যথা মেঘো দিবাকরম্
97.50
সাত্যকিশ্চ মহারাজ শরজালং নিহত্য তৎ
দ্রৌণিমভ্যপতত্তূর্ণং শরজালৈরনেকধা
97.51
তাপয়ামাস চ দ্রৌণিং শৈনেয়ঃ পরবীরহা
বিমুক্তো মেঘজালেন যথৈব তপনস্তথা
97.52
শরাণাং চ সহস্রেণ পুনরেনং সমুদ্যতম্
সাত্যকিশ্ছাদয়ামাস ননাদ চ মহাবলঃ
97.53
দৃষ্ট্বা পুত্রং তথা গ্রস্তং রাহুণেব নিশাকরম্
অভ্যদ্রবত শৈনেয়ং ভারদ্বাজঃ প্রতাপবান্
97.54
বিব্যাধ চ পৃষত্কেন সুতীক্ষ্ণেন মহামৃধে
পরীপ্সন্স্বসুতং রাজন্বার্ষ্ণেয়েনাভিতাপিতম্
97.55
সাত্যকিস্তু রণে জিত্বা গুরুপুত্রং মহারথম্
দ্রোণং বিব্যাধ বিংশত্যা সর্বপারশবৈঃ শরৈঃ
97.56
তদন্তরমমেয়াত্মা কৌন্তেয়ঃ শ্বেতবাহনঃ
অভ্যদ্রবদ্রণে ক্রুদ্ধো দ্রোণং প্রতি মহারথঃ
97.57
ততো দ্রোণশ্চ পার্থশ্চ সমেয়াতাং মহামৃধে
যথা বুধশ্চ শুক্রশ্চ মহারাজ নভস্তলে