Utshovঅধ্যায় 96
96.1
সংজয় উবাচ
অভিমন্যূ রথোদারঃ পিশঙ্গৈস্তুরগোত্তমৈঃ
অভিদুদ্রাব তেজস্বী দুর্যোধনবলং মহৎ
বিকিরঞ্শরবর্ষাণি বারিধারা ইবাম্বুদঃ
96.2
ন শেকুঃ সমরে ক্রুদ্ধং সৌভদ্রমরিসূদনম্
শস্ত্রৌঘিণং গাহমানং সেনাসাগরমক্ষয়ম্
নিবারয়িতুমপ্যাজৌ ত্বদীয়াঃ কুরুপুংগবাঃ
96.3
তেন মুক্তা রণে রাজঞ্শরাঃ শত্রুনিবর্হণাঃ
ক্ষত্রিয়াননয়ঞ্শূরান্প্রেতরাজনিবেশনম্
96.4
যমদণ্ডোপমান্ঘোরাঞ্জ্বলনাশীবিষোপমান্
সৌভদ্রঃ সমরে ক্রুদ্ধঃ প্রেষয়ামাস সায়কান্
96.5
রথিনং চ রথাত্তূর্ণং হয়পৃষ্ঠাচ্চ সাদিনম্
গজারোহাংশ্চ সগজান্পাতয়ামাস ফাল্গুনিঃ
96.6
তস্য তত্কুর্বতঃ কর্ম মহত্সংখ্যেঽদ্ভুতং নৃপাঃ
পূজয়াং চক্রিরে হৃষ্টাঃ প্রশশংসুশ্চ ফাল্গুনিম্
96.7
তান্যনীকানি সৌভদ্রো দ্রাবয়ন্বহ্বশোভত
তূলরাশিমিবাধূয় মারুতঃ সর্বতোদিশম্
96.8
তেন বিদ্রাব্যমাণানি তব সৈন্যানি ভারত
ত্রাতারং নাধ্যগচ্ছন্ত পঙ্কে মগ্না ইব দ্বিপাঃ
96.9
বিদ্রাব্য সর্বসৈন্যানি তাবকানি নরোত্তমঃ
অভিমন্যুঃ স্থিতো রাজন্বিধূমোঽগ্নিরিব জ্বলন্
96.10
ন চৈনং তাবকাঃ সর্বে বিষেহুররিঘাতিনম্
প্রদীপ্তং পাবকং যদ্বত্পতংগাঃ কালচোদিতাঃ
96.11
প্রহরন্সর্বশত্রুভ্যঃ পাণ্ডবানাং মহারথঃ
অদৃশ্যত মহেষ্বাসঃ সবজ্র ইব বজ্রভৃৎ
96.12
হেমপৃষ্ঠং ধনুশ্চাস্য দদৃশে চরতো দিশঃ
তোয়দেষু যথা রাজন্ভ্রাজমানাঃ শতহ্রদাঃ
96.13
শরাশ্চ নিশিতাঃ পীতা নিশ্চরন্তি স্ম সংয়ুগে
বনাত্ফুল্লদ্রুমাদ্রাজন্ভ্রমরাণামিব ব্রজাঃ
96.14
তথৈব চরতস্তস্য সৌভদ্রস্য মহাত্মনঃ
রথেন মেঘঘোষেণ দদৃশুর্নান্তরং জনাঃ
96.15
মোহয়িত্বা কৃপং দ্রোণং দ্রৌণিং চ স বৃহদ্বলম্
সৈন্ধবং চ মহেষ্বাসং ব্যচরল্লঘু সুষ্ঠু চ
96.16
মণ্ডলীকৃতমেবাস্য ধনুঃ পশ্যাম মারিষ
সূর্যমণ্ডলসংকাশং তপতস্তব বাহিনীম্
96.17
তং দৃষ্ট্বা ক্ষত্রিয়াঃ শূরাঃ প্রতপন্তং শরার্চিভিঃ
দ্বিফল্গুনমিমং লোকং মেনিরে তস্য কর্মভিঃ
96.18
তেনার্দিতা মহারাজ ভারতী সা মহাচমূঃ
বভ্রাম তত্র তত্রৈব যোষিন্মদবশাদিব
96.19
দ্রাবয়িত্বা চ তত্সৈন্যং কম্পয়িত্বা মহারথান্
নন্দয়ামাস সুহৃদো ময়ং জিত্বেব বাসবঃ
96.20
তেন বিদ্রাব্যমাণানি তব সৈন্যানি সংয়ুগে
চক্রুরার্তস্বরং ঘোরং পর্জন্যনিনদোপমম্
96.21
তং শ্রুত্বা নিনদং ঘোরং তব সৈন্যস্য মারিষ
মারুতোদ্ধূতবেগস্য সমুদ্রস্যেব পর্বণি
দুর্যোধনস্তদা রাজা আর্শ্যশৃঙ্গিমভাষত
96.22
এষ কার্ষ্ণির্মহেষ্বাসো দ্বিতীয় ইব ফল্গুনঃ
চমূং দ্রাবয়তে ক্রোধাদ্বৃত্রো দেবচমূমিব
96.23
তস্য নান্যং প্রপশ্যামি সংয়ুগে ভেষজং মহৎ
ঋতে ত্বাং রাক্ষসশ্রেষ্ঠ সর্ববিদ্যাসু পারগম্
96.24
স গত্বা ত্বরিতং বীরং জহি সৌভদ্রমাহবে
বয়ং পার্থান্হনিষ্যামো ভীষ্মদ্রোণপুরঃসরাঃ
96.25
স এবমুক্তো বলবান্রাক্ষসেন্দ্রঃ প্রতাপবান্
প্রয়য়ৌ সমরে তূর্ণং তব পুত্রস্য শাসনাৎ
নর্দমানো মহানাদং প্রাবৃষীব বলাহকঃ
96.26
তস্য শব্দেন মহতা পাণ্ডবানাং মহদ্বলম্
প্রাচলত্সর্বতো রাজন্পূর্যমাণ ইবার্ণবঃ
96.27
বহবশ্চ নরা রাজংস্তস্য নাদেন ভীষিতাঃ
প্রিয়ান্প্রাণান্পরিত্যজ্য নিপেতুর্ধরণীতলে
96.28
কার্ষ্ণিশ্চাপি মুদা যুক্তঃ প্রগৃহীতশরাসনঃ
নৃত্যন্নিব রথোপস্থে তদ্রক্ষঃ সমুপাদ্রবৎ
96.29
ততঃ স রাক্ষসঃ ক্রুদ্ধঃ সংপ্রাপ্যৈবার্জুনিং রণে
নাতিদূরে স্থিতস্তস্য দ্রাবয়ামাস বৈ চমূম্
96.30
সা বধ্যমানা সমরে পাণ্ডবানাং মহাচমূঃ
প্রত্যুদ্যয়ৌ রণে রক্ষো দেবসেনা যথা বলিম্
96.31
বিমর্দঃ সুমহানাসীত্তস্য সৈন্যস্য মারিষ
রক্ষসা ঘোররূপেণ বধ্যমানস্য সংয়ুগে
96.32
ততঃ শরসহস্রৈস্তাং পাণ্ডবানাং মহাচমূম্
ব্যদ্রাবয়দ্রণে রক্ষো দর্শয়দ্বৈ পরাক্রমম্
96.33
সা বধ্যমানা চ তথা পাণ্ডবানামনীকিনী
রক্ষসা ঘোররূপেণ প্রদুদ্রাব রণে ভয়াৎ
96.34
তাং প্রমৃদ্য ততঃ সেনাং পদ্মিনীং বারণো যথা
ততোঽভিদুদ্রাব রণে দ্রৌপদেয়ান্মহাবলান্
96.35
তে তু ক্রুদ্ধা মহেষ্বাসা দ্রৌপদেয়াঃ প্রহারিণঃ
রাক্ষসং দুদ্রুবুঃ সর্বে গ্রহাঃ পঞ্চ যথা রবিম্
96.36
বীর্যবদ্ভিস্ততস্তৈস্তু পীডিতো রাক্ষসোত্তমঃ
যথা যুগক্ষয়ে ঘোরে চন্দ্রমাঃ পঞ্চভির্গ্রহৈঃ
96.37
প্রতিবিন্ধ্যস্ততো রক্ষো বিভেদ নিশিতৈঃ শরৈঃ
সর্বপারশবৈস্তূর্ণমকুণ্ঠাগ্রৈর্মহাবলঃ
96.38
স তৈর্ভিন্নতনুত্রাণঃ শুশুভে রাক্ষসোত্তমঃ
মরীচিভিরিবার্কস্য সংস্যূতো জলদো মহান্
96.39
বিষক্তৈঃ স শরৈশ্চাপি তপনীয়পরিচ্ছদৈঃ
আর্শ্যশৃঙ্গির্বভৌ রাজন্দীপ্তশৃঙ্গ ইবাচলঃ
96.40
ততস্তে ভ্রাতরঃ পঞ্চ রাক্ষসেন্দ্রং মহাহবে
বিব্যধুর্নিশিতৈর্বাণৈস্তপনীয়বিভূষিতৈঃ
96.41
স নির্ভিন্নঃ শরৈর্ঘোরৈর্ভুজগৈঃ কোপিতৈরিব
অলম্বুসো ভৃশং রাজন্নাগেন্দ্র ইব চুক্রুধে
96.42
সোঽতিবিদ্ধো মহারাজ মুহূর্তমথ মারিষ
প্রবিবেশ তমো দীর্ঘং পীডিতস্তৈর্মহারথৈঃ
96.43
প্রতিলভ্য ততঃ সংজ্ঞাং ক্রোধেন দ্বিগুণীকৃতঃ
চিচ্ছেদ সায়কৈস্তেষাং ধ্বজাংশ্চৈব ধনূংষি চ
96.44
একৈকং চ ত্রিভির্বাণৈরাজঘান স্ময়ন্নিব
অলম্বুসো রথোপস্থে নৃত্যন্নিব মহারথঃ
96.45
ত্বরমাণশ্চ সংক্রুদ্ধো হয়াংস্তেষাং মহাত্মনাম্
জঘান রাক্ষসঃ ক্রুদ্ধঃ সারথীংশ্চ মহাবলঃ
96.46
বিভেদ চ সুসংহৃষ্টঃ পুনশ্চৈনান্সুসংশিতৈঃ
শরৈর্বহুবিধাকারৈঃ শতশোঽথ সহস্রশঃ
96.47
বিরথাংশ্চ মহেষ্বাসান্কৃত্বা তত্র স রাক্ষসঃ
অভিদুদ্রাব বেগেন হন্তুকামো নিশাচরঃ
96.48
তানর্দিতান্রণে তেন রাক্ষসেন দুরাত্মনা
দৃষ্ট্বার্জুনসুতঃ সংখ্যে রাক্ষসং সমুপাদ্রবৎ
96.49
তয়োঃ সমভবদ্যুদ্ধং বৃত্রবাসবয়োরিব
দদৃশুস্তাবকাঃ সর্বে পাণ্ডবাশ্চ মহারথাঃ
96.50
তৌ সমেতৌ মহায়ুদ্ধে ক্রোধদীপ্তৌ পরস্পরম্
মহাবলৌ মহারাজ ক্রোধসংরক্তলোচনৌ
পরস্পরমবেক্ষেতাং কালানলসমৌ যুধি
96.51
তয়োঃ সমাগমো ঘোরো বভূব কটুকোদয়ঃ
যথা দেবাসুরে যুদ্ধে শক্রশম্বরয়োরিব