Utshovঅধ্যায় 95
95.1
সংজয় উবাচ
প্রভাতায়াং তু শর্বর্যাং প্রাতরুত্থায় বৈ নৃপঃ
রাজ্ঞঃ সমাজ্ঞাপয়ত সেনাং যোজয়তেতি হ
অদ্য ভীষ্মো রণে ক্রুদ্ধো নিহনিষ্যতি সোমকান্
95.2
দুর্যোধনস্য তচ্ছ্রুত্বা রাত্রৌ বিলপিতং বহু
মন্যমানঃ স তং রাজন্প্রত্যাদেশমিবাত্মনঃ
95.3
নির্বেদং পরমং গত্বা বিনিন্দ্য পরবাচ্যতাম্
দীর্ঘং দধ্যৌ শাংতনবো যোদ্ধুকামোঽর্জুনং রণে
95.4
ইঙ্গিতেন তু তজ্জ্ঞাত্বা গাঙ্গেয়েন বিচিন্তিতম্
দুর্যোধনো মহারাজ দুঃশাসনমচোদয়ৎ
95.5
দুঃশাসন রথাস্তূর্ণং যুজ্যন্তাং ভীষ্মরক্ষিণঃ
দ্বাত্রিংশত্ত্বমনীকানি সর্বাণ্যেবাভিচোদয়
95.6
ইদং হি সমনুপ্রাপ্তং বর্ষপূগাভিচিন্তিতম্
পাণ্ডবানাং সসৈন্যানাং বধো রাজ্যস্য চাগমঃ
95.7
তত্র কার্যমহং মন্যে ভীষ্মস্যৈবাভিরক্ষণম্
স নো গুপ্তঃ সুখায় স্যাদ্ধন্যাত্পার্থাংশ্চ সংয়ুগে
95.8
অব্রবীচ্চ বিশুদ্ধাত্মা নাহং হন্যাং শিখণ্ডিনম্
স্ত্রীপূর্বকো হ্যসৌ জাতস্তস্মাদ্বর্জ্যো রণে ময়া
95.9
লোকস্তদ্বেদ যদহং পিতুঃ প্রিয়চিকীর্ষয়া
রাজ্যং স্ফীতং মহাবাহো স্ত্রিয়শ্চ ত্যক্তবান্পুরা
95.10
নৈব চাহং স্ত্রিয়ং জাতু ন স্ত্রীপূর্বং কথংচন
হন্যাং যুধি নরশ্রেষ্ঠ সত্যমেতদ্ব্রবীমি তে
95.11
অয়ং স্ত্রীপূর্বকো রাজঞ্শিখণ্ডী যদি তে শ্রুতঃ
উদ্যোগে কথিতং যত্তত্তথা জাতা শিখণ্ডিনী
95.12
কন্যা ভূত্বা পুমাঞ্জাতঃ স চ যোত্স্যতি ভারত
তস্যাহং প্রমুখে বাণান্ন মুঞ্চেয়ং কথংচন
95.13
যুদ্ধে তু ক্ষত্রিয়াংস্তাত পাণ্ডবানাং জয়ৈষিণঃ
সর্বানন্যান্হনিষ্যামি সংপ্রাপ্তান্বাণগোচরান্
95.14
এবং মাং ভরতশ্রেষ্ঠো গাঙ্গেয়ঃ প্রাহ শাস্ত্রবিৎ
তত্র সর্বাত্মনা মন্যে ভীষ্মস্যৈবাভিপালনম্
95.15
অরক্ষ্যমাণং হি বৃকো হন্যাত্সিংহং মহাবনে
মা বৃকেণেব শার্দূলং ঘাতয়েম শিখণ্ডিনা
95.16
মাতুলঃ শকুনিঃ শল্যঃ কৃপো দ্রোণো বিবিংশতিঃ
যত্তা রক্ষন্তু গাঙ্গেয়ং তস্মিন্গুপ্তে ধ্রুবো জয়ঃ
95.17
এতচ্ছ্রুত্বা তু রাজানো দুর্যোধনবচস্তদা
সর্বতো রথবংশেন গাঙ্গেয়ং পর্যবারয়ন্
95.18
পুত্রাশ্চ তব গাঙ্গেয়ং পরিবার্য যয়ুর্মুদা
কম্পয়ন্তো ভুবং দ্যাং চ ক্ষোভয়ন্তশ্চ পাণ্ডবান্
95.19
তৈ রথৈশ্চ সুসংয়ুক্তৈর্দন্তিভিশ্চ মহারথাঃ
পরিবার্য রণে ভীষ্মং দংশিতাঃ সমবস্থিতাঃ
95.20
যথা দেবাসুরে যুদ্ধে ত্রিদশা বজ্রধারিণম্
সর্বে তে স্ম ব্যতিষ্ঠন্ত রক্ষন্তস্তং মহারথম্
95.21
ততো দুর্যোধনো রাজা পুনর্ভ্রাতরমব্রবীৎ
সব্যং চক্রং যুধামন্যুরুত্তমৌজাশ্চ দক্ষিণম্
গোপ্তারাবর্জুনস্যৈতাবর্জুনোঽপি শিখণ্ডিনঃ
95.22
স রক্ষ্যমাণঃ পার্থেন তথাস্মাভির্বিবর্জিতঃ
যথা ভীষ্মং ন নো হন্যাদ্দুঃশাসন তথা কুরু
95.23
ভ্রাতুস্তদ্বচনং শ্রুত্বা পুত্রো দুঃশাসনস্তব
ভীষ্মং প্রমুখতঃ কৃত্বা প্রয়য়ৌ সেনয়া সহ
95.24
ভীষ্মং তু রথবংশেন দৃষ্ট্বা তমভিসংবৃতম্
অর্জুনো রথিনাং শ্রেষ্ঠো ধৃষ্টদ্যুম্নমুবাচ হ
95.25
শিখণ্ডিনং নরব্যাঘ্র ভীষ্মস্য প্রমুখেঽনঘ
স্থাপয়স্বাদ্য পাঞ্চাল্য তস্য গোপ্তাহমপ্যুত
95.26
ততঃ শাংতনবো ভীষ্মো নির্যয়ৌ সেনয়া সহ
ব্যূহং চাব্যূহত মহত্সর্বতোভদ্রমাহবে
95.27
কৃপশ্চ কৃতবর্মা চ শৈব্যশ্চৈব মহারথঃ
শকুনিঃ সৈন্ধবশ্চৈব কাম্বোজশ্চ সুদক্ষিণঃ
95.28
ভীষ্মেণ সহিতাঃ সর্বে পুত্রৈশ্চ তব ভারত
অগ্রতঃ সর্বসৈন্যানাং ব্যূহস্য প্রমুখে স্থিতাঃ
95.29
দ্রোণো ভূরিশ্রবাঃ শল্যো ভগদত্তশ্চ মারিষ
দক্ষিণং পক্ষমাশ্রিত্য স্থিতা ব্যূহস্য দংশিতাঃ
95.30
অশ্বত্থামা সোমদত্ত আবন্ত্যৌ চ মহারথৌ
মহত্যা সেনয়া যুক্তা বামং পক্ষমপালয়ন্
95.31
দুর্যোধনো মহারাজ ত্রিগর্তৈঃ সর্বতো বৃতঃ
ব্যূহমধ্যে স্থিতো রাজন্পাণ্ডবান্প্রতি ভারত
95.32
অলম্বুসো রথশ্রেষ্ঠঃ শ্রুতায়ুশ্চ মহারথঃ
পৃষ্ঠতঃ সর্বসৈন্যানাং স্থিতৌ ব্যূহস্য দংশিতৌ
95.33
এবমেতে তদা ব্যূহং কৃত্বা ভারত তাবকাঃ
সংনদ্ধাঃ সমদৃশ্যন্ত প্রতপন্ত ইবাগ্নয়ঃ
95.34
তথা যুধিষ্ঠিরো রাজা ভীমসেনশ্চ পাণ্ডবঃ
নকুলঃ সহদেবশ্চ মাদ্রীপুত্রাবুভাবপি
অগ্রতঃ সর্বসৈন্যানাং স্থিতা ব্যূহস্য দংশিতাঃ
95.35
ধৃষ্টদ্যুম্নো বিরাটশ্চ সাত্যকিশ্চ মহারথঃ
স্থিতাঃ সৈন্যেন মহতা পরানীকবিনাশনাঃ
95.36
শিখণ্ডী বিজয়শ্চৈব রাক্ষসশ্চ ঘটোত্কচঃ
চেকিতানো মহাবাহুঃ কুন্তিভোজশ্চ বীর্যবান্
স্থিতা রণে মহারাজ মহত্যা সেনয়া বৃতাঃ
95.37
অভিমন্যুর্মহেষ্বাসো দ্রুপদশ্চ মহারথঃ
কেকয়া ভ্রাতরঃ পঞ্চ স্থিতা যুদ্ধায় দংশিতাঃ
95.38
এবং তেঽপি মহাব্যূহং প্রতিব্যূহ্য সুদুর্জয়ম্
পাণ্ডবাঃ সমরে শূরাঃ স্থিতা যুদ্ধায় মারিষ
95.39
তাবকাস্তু রণে যত্তাঃ সহসেনা নরাধিপাঃ
অভ্যুদ্যয়ূ রণে পার্থান্ভীষ্মং কৃত্বাগ্রতো নৃপ
95.40
তথৈব পাণ্ডবা রাজন্ভীমসেনপুরোগমাঃ
ভীষ্মং যুদ্ধপরিপ্রেপ্সুং সংগ্রামে বিজিগীষবঃ
95.41
ক্ষ্বেডাঃ কিলিকিলাশব্দান্ক্রকচান্গোবিষাণিকাঃ
ভেরীমৃদঙ্গপণবান্নাদয়ন্তশ্চ পুষ্করান্
পাণ্ডবা অভ্যধাবন্ত নদন্তো ভৈরবান্রবান্
95.42
ভেরীমৃদঙ্গশঙ্খানাং দুন্দুভীনাং চ নিস্বনৈঃ
উত্ক্রুষ্টসিংহনাদৈশ্চ বল্গিতৈশ্চ পৃথগ্বিধৈঃ
95.43
বয়ং প্রতিনদন্তস্তানভ্যগচ্ছাম সত্বরাঃ
সহসৈবাভিসংক্রুদ্ধাস্তদাসীত্তুমুলং মহৎ
95.44
ততোঽন্যোন্যং প্রধাবন্তঃ সংপ্রহারং প্রচক্রিরে
ততঃ শব্দেন মহতা প্রচকম্পে বসুংধরা
95.45
পক্ষিণশ্চ মহাঘোরং ব্যাহরন্তো বিবভ্রমুঃ
সপ্রভশ্চোদিতঃ সূর্যো নিষ্প্রভঃ সমপদ্যত
95.46
ববুশ্চ তুমুলা বাতাঃ শংসন্তঃ সুমহদ্ভয়ম্
ঘোরাশ্চ ঘোরনির্হ্রাদাঃ শিবাস্তত্র ববাশিরে
বেদয়ন্ত্যো মহারাজ মহদ্বৈশসমাগতম্
95.47
দিশঃ প্রজ্বলিতা রাজন্পাংসুবর্ষং পপাত চ
রুধিরেণ সমুন্মিশ্রমস্থিবর্ষং তথৈব চ
95.48
রুদতাং বাহনানাং চ নেত্রেভ্যঃ প্রাপতজ্জলম্
সুস্রুবুশ্চ শকৃন্মূত্রং প্রধ্যায়ন্তো বিশাং পতে
95.49
অন্তর্হিতা মহানাদাঃ শ্রূয়ন্তে ভরতর্ষভ
রক্ষসাং পুরুষাদানাং নদতাং ভৈরবান্রবান্
95.50
সংপতন্তঃ স্ম দৃশ্যন্তে গোমায়ুবকবায়সাঃ
শ্বানশ্চ বিবিধৈর্নাদৈর্ভষন্তস্তত্র তস্থিরে
95.51
জ্বলিতাশ্চ মহোল্কা বৈ সমাহত্য দিবাকরম্
নিপেতুঃ সহসা ভূমৌ বেদয়ানা মহদ্ভয়ম্
95.52
মহান্ত্যনীকানি মহাসমুচ্ছ্রয়ে; সমাগমে পাণ্ডবধার্তরাষ্ট্রয়োঃ
প্রকাশিরে শঙ্খমৃদঙ্গনিস্বনৈঃ; প্রকম্পিতানীব বনানি বায়ুনা
95.53
নরেন্দ্রনাগাশ্বসমাকুলানা;মভ্যায়তীনামশিবে মুহূর্তে
বভূব ঘোষস্তুমুলশ্চমূনাং; বাতোদ্ধুতানামিব সাগরাণাম্