অধ্যায় 94

94.1

সংজয় উবাচ
বাক্শল্যৈস্তব পুত্রেণ সোঽতিবিদ্ধঃ পিতামহঃ
দুঃখেন মহতাবিষ্টো নোবাচাপ্রিয়মণ্বপি

স ধ্যাত্বা সুচিরং কালং দুঃখরোষসমন্বিতঃ
শ্বসমানো যথা নাগঃ প্রণুন্নো বৈ শলাকয়া

উদ্বৃত্য চক্ষুষী কোপান্নির্দহন্নিব ভারত
সদেবাসুরগন্ধর্বং লোকং লোকবিদাং বরঃ
অব্রবীত্তব পুত্রং তু সামপূর্বমিদং বচঃ

কিং নু দুর্যোধনৈবং মাং বাক্শল্যৈরুপবিধ্যসি
ঘটমানং যথাশক্তি কুর্বাণং চ তব প্রিয়ম্
জুহ্বানং সমরে প্রাণাংস্তবৈব হিতকাম্যয়া

যদা তু পাণ্ডবঃ শূরঃ খাণ্ডবেঽগ্নিমতর্পয়ৎ
পরাজিত্য রণে শক্রং পর্যাপ্তং তন্নিদর্শনম্

যদা চ ত্বাং মহাবাহো গন্ধর্বৈর্হৃতমোজসা
অমোচয়ত্পাণ্ডুসুতঃ পর্যাপ্তং তন্নিদর্শনম্

দ্রবমাণেষু শূরেষু সোদরেষু তথাভিভো
সূতপুত্রে চ রাধেয়ে পর্যাপ্তং তন্নিদর্শনম্

যচ্চ নঃ সহিতান্সর্বান্বিরাটনগরে তদা
এক এব সমুদ্যাতঃ পর্যাপ্তং তন্নিদর্শনম্

দ্রোণং চ যুধি সংরব্ধং মাং চ নির্জিত্য সংয়ুগে
কর্ণং চ ত্বাং চ দ্রৌণিং চ কৃপং চ সুমহারথম্
বাসাংসি স সমাদত্ত পর্যাপ্তং তন্নিদর্শনম্

নিবাতকবচান্যুদ্ধে বাসবেনাপি দুর্জয়ান্
জিতবান্সমরে পার্থঃ পর্যাপ্তং তন্নিদর্শনম্

কো হি শক্তো রণে জেতুং পাণ্ডবং রভসং রণে
ত্বং তু মোহান্ন জানীষে বাচ্যাবাচ্যং সুয়োধন

মুমূর্ষুর্হি নরঃ সর্বান্বৃক্ষান্পশ্যতি কাঞ্চনান্
তথা ত্বমপি গান্ধারে বিপরীতানি পশ্যসি

স্বয়ং বৈরং মহত্কৃত্বা পাণ্ডবৈঃ সহসৃঞ্জয়ৈঃ
যুধ্যস্ব তানদ্য রণে পশ্যামঃ পুরুষো ভব

অহং তু সোমকান্সর্বান্সপাঞ্চালান্সমাগতান্
নিহনিষ্যে নরব্যাঘ্র বর্জয়িত্বা শিখণ্ডিনম্

তৈর্বাহং নিহতঃ সংখ্যে গমিষ্যে যমসাদনম্
তান্বা নিহত্য সংগ্রামে প্রীতিং দাস্যামি বৈ তব

পূর্বং হি স্ত্রী সমুত্পন্না শিখণ্ডী রাজবেশ্মনি
বরদানাত্পুমাঞ্জাতঃ সৈষা বৈ স্ত্রী শিখণ্ডিনী

তামহং ন হনিষ্যামি প্রাণত্যাগেঽপি ভারত
যাসৌ প্রাঙ্নির্মিতা ধাত্রা সৈষা বৈ স্ত্রী শিখণ্ডিনী

সুখং স্বপিহি গান্ধারে শ্বোঽস্মি কর্তা মহারণম্
যজ্জনাঃ কথয়িষ্যন্তি যাবত্স্থাস্যতি মেদিনী

এবমুক্তস্তব সুতো নির্জগাম জনেশ্বর
অভিবাদ্য গুরুং মূর্ধ্না প্রয়য়ৌ স্বং নিবেশনম্

আগম্য তু ততো রাজা বিসৃজ্য চ মহাজনম্
প্রবিবেশ ততস্তূর্ণং ক্ষয়ং শত্রুক্ষয়ংকরঃ
প্রবিষ্টঃ স নিশাং তাং চ গময়ামাস পার্থিবঃ