Utshovঅধ্যায় 93
93.1
সংজয় উবাচ
ততো দুর্যোধনো রাজা শকুনিশ্চাপি সৌবলঃ
দুঃশাসনশ্চ পুত্রস্তে সূতপুত্রশ্চ দুর্জয়ঃ
93.2
সমাগম্য মহারাজ মন্ত্রং চক্রূর্বিবক্ষিতম্
কথং পাণ্ডুসুতা যুদ্ধে জেতব্যাঃ সগণা ইতি
93.3
ততো দুর্যোধনো রাজা সর্বাংস্তানাহ মন্ত্রিণঃ
সূতপুত্রং সমাভাষ্য সৌবলং চ মহাবলম্
93.4
দ্রোণো ভীষ্মঃ কৃপঃ শল্যঃ সৌমদত্তিশ্চ সংয়ুগে
ন পার্থান্প্রতিবাধন্তে ন জানে তত্র কারণম্
93.5
অবধ্যমানাস্তে চাপি ক্ষপয়ন্তি বলং মম
সোঽস্মি ক্ষীণবলঃ কর্ণ ক্ষীণশস্ত্রশ্চ সংয়ুগে
93.6
নিকৃতঃ পাণ্ডবৈঃ শূরৈরবধ্যৈর্দৈবতৈরপি
সোঽহং সংশয়মাপন্নঃ প্রকরিষ্যে কথং রণম্
93.7
তমব্রবীন্মহারাজ সূতপুত্রো নরাধিপম্
মা শুচো ভরতশ্রেষ্ঠ প্রকরিষ্যে প্রিয়ং তব
93.8
ভীষ্মঃ শাংতনবস্তূর্ণমপয়াতু মহারণাৎ
নিবৃত্তে যুধি গাঙ্গেয়ে ন্যস্তশস্ত্রে চ ভারত
93.9
অহং পার্থান্হনিষ্যামি সহিতান্সর্বসোমকৈঃ
পশ্যতো যুধি ভীষ্মস্য শপে সত্যেন তে নৃপ
93.10
পাণ্ডবেষু দয়াং রাজন্সদা ভীষ্মঃ করোতি বৈ
অশক্তশ্চ রণে ভীষ্মো জেতুমেতান্মহারথান্
93.11
অভিমানী রণে ভীষ্মো নিত্যং চাপি রণপ্রিয়ঃ
স কথং পাণ্ডবান্যুদ্ধে জেষ্যতে তাত সংগতান্
93.12
স ত্বং শীঘ্রমিতো গত্বা ভীষ্মস্য শিবিরং প্রতি
অনুমান্য রণে ভীষ্মং শস্ত্রং ন্যাসয় ভারত
93.13
ন্যস্তশস্ত্রে ততো ভীষ্মে নিহতান্পশ্য পাণ্ডবান্
ময়ৈকেন রণে রাজন্সসুহৃদ্গণবান্ধবান্
93.14
এবমুক্তস্তু কর্ণেন পুত্রো দুর্যোধনস্তব
অব্রবীদ্ভ্রাতরং তত্র দুঃশাসনমিদং বচঃ
93.15
অনুয়াত্রং যথা সজ্জং সর্বং ভবতি সর্বতঃ
দুঃশাসন তথা ক্ষিপ্রং সর্বমেবোপপাদয়
93.16
এবমুক্ত্বা ততো রাজন্কর্ণমাহ জনেশ্বরঃ
অনুমান্য রণে ভীষ্মমিতোঽহং দ্বিপদাং বরম্
93.17
আগমিষ্যে ততঃ ক্ষিপ্রং ত্বত্সকাশমরিংদম
ততস্ত্বং পুরুষব্যাঘ্র প্রকরিষ্যসি সংয়ুগম্
93.18
নিষ্পপাত ততস্তূর্ণং পুত্রস্তব বিশাং পতে
সহিতো ভ্রাতৃভিঃ সর্বৈর্দেবৈরিব শতক্রতুঃ
93.19
ততস্তং নৃপশার্দূলং শার্দূলসমবিক্রমম্
আরোহয়দ্ধয়ং তূর্ণং ভ্রাতা দুঃশাসনস্তদা
93.20
অঙ্গদী বদ্ধমুকুটো হস্তাভরণবান্নৃপঃ
ধার্তরাষ্ট্রো মহারাজ বিবভৌ স মহেন্দ্রবৎ
93.21
ভাণ্ডীপুষ্পনিকাশেন তপনীয়নিভেন চ
অনুলিপ্তঃ পরার্ধ্যেন চন্দনেন সুগন্ধিনা
93.22
অরজোম্বরসংবীতঃ সিংহখেলগতির্নৃপঃ
শুশুভে বিমলার্চিষ্মঞ্শরদীব দিবাকরঃ
93.23
তং প্রয়ান্তং নরব্যাঘ্রং ভীষ্মস্য শিবিরং প্রতি
অনুজগ্মুর্মহেষ্বাসাঃ সর্বলোকস্য ধন্বিনঃ
ভ্রাতরশ্চ মহেষ্বাসাস্ত্রিদশা ইব বাসবম্
93.24
হয়ানন্যে সমারুহ্য গজানন্যে চ ভারত
রথৈরন্যে নরশ্রেষ্ঠাঃ পরিবব্রুঃ সমন্ততঃ
93.25
আত্তশস্ত্রাশ্চ সুহৃদো রক্ষণার্থং মহীপতেঃ
প্রাদুর্বভূবুঃ সহিতাঃ শক্রস্যেবামরা দিবি
93.26
সংপূজ্যমানঃ কুরুভিঃ কৌরবাণাং মহারথঃ
প্রয়য়ৌ সদনং রাজন্গাঙ্গেয়স্য যশস্বিনঃ
অন্বীয়মানঃ সহিতৈঃ সোদরৈঃ সর্বতো নৃপঃ
93.27
দক্ষিণং দক্ষিণঃ কালে সংভৃত্য স্বভুজং তদা
হস্তিহস্তোপমং শৈক্ষং সর্বশত্রুনিবর্হণম্
93.28
প্রগৃহ্ণন্নঞ্জলীন্নৄণামুদ্যতান্সর্বতোদিশম্
শুশ্রাব মধুরা বাচো নানাদেশনিবাসিনাম্
93.29
সংস্তূয়মানঃ সূতৈশ্চ মাগধৈশ্চ মহায়শাঃ
পূজয়ানশ্চ তান্সর্বান্সর্বলোকেশ্বরেশ্বরঃ
93.30
প্রদীপৈঃ কাঞ্চনৈস্তত্র গন্ধতৈলাবসেচনৈঃ
পরিবব্রুর্মহাত্মানং প্রজ্বলদ্ভিঃ সমন্ততঃ
93.31
স তৈঃ পরিবৃতো রাজা প্রদীপৈঃ কাঞ্চনৈঃ শুভৈঃ
শুশুভে চন্দ্রমা যুক্তো দীপ্তৈরিব মহাগ্রহৈঃ
93.32
কঞ্চুকোষ্ণীষিণস্তত্র বেত্রঝর্ঝরপাণয়ঃ
প্রোত্সারয়ন্তঃ শনকৈস্তং জনং সর্বতোদিশম্
93.33
সংপ্রাপ্য তু ততো রাজা ভীষ্মস্য সদনং শুভম্
অবতীর্য হয়াচ্চাপি ভীষ্মং প্রাপ্য জনেশ্বরঃ
93.34
অভিবাদ্য ততো ভীষ্মং নিষণ্ণঃ পরমাসনে
কাঞ্চনে সর্বতোভদ্রে স্পর্ধ্যাস্তরণসংবৃতে
উবাচ প্রাঞ্জলির্ভীষ্মং বাষ্পকণ্ঠোঽশ্রুলোচনঃ
93.35
ত্বাং বয়ং সমুপাশ্রিত্য সংয়ুগে শত্রুসূদন
উত্সহেম রণে জেতুং সেন্দ্রানপি সুরাসুরান্
93.36
কিমু পাণ্ডুসুতান্বীরান্সসুহৃদ্গণবান্ধবান্
তস্মাদর্হসি গাঙ্গেয় কৃপাং কর্তুং ময়ি প্রভো
জহি পাণ্ডুসুতান্বীরান্মহেন্দ্র ইব দানবান্
93.37
পূর্বমুক্তং মহাবাহো নিহনিষ্যামি সোমকান্
পাঞ্চালান্পাণ্ডবৈঃ সার্ধং করূষাংশ্চেতি ভারত
93.38
তদ্বচঃ সত্যমেবাস্তু জহি পার্থান্সমাগতান্
সোমকাংশ্চ মহেষ্বাসান্সত্যবাগ্ভব ভারত
93.39
দয়য়া যদি বা রাজন্দ্বেষ্যভাবান্মম প্রভো
মন্দভাগ্যতয়া বাপি মম রক্ষসি পাণ্ডবান্
93.40
অনুজানীহি সমরে কর্ণমাহবশোভিনম্
স জেষ্যতি রণে পার্থান্সসুহৃদ্গণবান্ধবান্
93.41
এতাবদুক্ত্বা নৃপতিঃ পুত্রো দুর্যোধনস্তব
নোবাচ বচনং কিংচিদ্ভীষ্মং ভীমপরাক্রমম্