Utshovঅধ্যায় 92
92.1
সংজয় উবাচ
পুত্রং তু নিহতং শ্রুত্বা ইরাবন্তং ধনংজয়ঃ
দুঃখেন মহতাবিষ্টো নিঃশ্বসন্পন্নগো যথা
92.2
অব্রবীত্সমরে রাজন্বাসুদেবমিদং বচঃ
ইদং নূনং মহাপ্রাজ্ঞো বিদুরো দৃষ্টবান্পুরা
92.3
কুরূণাং পাণ্ডবানাং চ ক্ষয়ং ঘোরং মহামতিঃ
ততো নিবারয়িতবান্ধৃতরাষ্ট্রং জনেশ্বরম্
92.4
অবধ্যা বহবো বীরাঃ সংগ্রামে মধুসূদন
নিহতাঃ কৌরবৈঃ সংখ্যে তথাস্মাভিশ্চ তে হতাঃ
92.5
অর্থহেতোর্নরশ্রেষ্ঠ ক্রিয়তে কর্ম কুত্সিতম্
ধিগর্থান্যত্কৃতে হ্যেবং ক্রিয়তে জ্ঞাতিসংক্ষয়ঃ
92.6
অধনস্য মৃতং শ্রেয়ো ন চ জ্ঞাতিবধাদ্ধনম্
কিং নু প্রাপ্স্যামহে কৃষ্ণ হত্বা জ্ঞাতীন্সমাগতান্
92.7
দুর্যোধনাপরাধেন শকুনেঃ সৌবলস্য চ
ক্ষত্রিয়া নিধনং যান্তি কর্ণদুর্মন্ত্রিতেন চ
92.8
ইদানীং চ বিজানামি সুকৃতং মধুসূদন
কৃতং রাজ্ঞা মহাবাহো যাচতা স্ম সুয়োধনম্
রাজ্যার্ধং পঞ্চ বা গ্রামান্নাকার্ষীত্স চ দুর্মতিঃ
92.9
দৃষ্ট্বা হি ক্ষত্রিয়াঞ্শূরাঞ্শয়ানান্ধরণীতলে
নিন্দামি ভৃশমাত্মানং ধিগস্তু ক্ষত্রজীবিকাম্
92.10
অশক্তমিতি মামেতে জ্ঞাস্যন্তি ক্ষত্রিয়া রণে
যুদ্ধং মমৈভিরুচিতং জ্ঞাতিভির্মধুসূদন
92.11
সংচোদয় হয়ান্ক্ষিপ্রং ধার্তরাষ্ট্রচমূং প্রতি
প্রতরিষ্যে মহাপারং ভুজাভ্যাং সমরোদধিম্
নায়ং ক্লীবয়িতুং কালো বিদ্যতে মাধব ক্বচিৎ
92.12
এবমুক্তস্তু পার্থেন কেশবঃ পরবীরহা
চোদয়ামাস তানশ্বান্পাণ্ডুরান্বাতরংহসঃ
92.13
অথ শব্দো মহানাসীত্তব সৈন্যস্য ভারত
মারুতোদ্ধূতবেগস্য সাগরস্যেব পর্বণি
92.14
অপরাহ্ণে মহারাজ সংগ্রামঃ সমপদ্যত
পর্জন্যসমনির্ঘোষো ভীষ্মস্য সহ পাণ্ডবৈঃ
92.15
ততো রাজংস্তব সুতা ভীমসেনমুপাদ্রবন্
পরিবার্য রণে দ্রোণং বসবো বাসবং যথা
92.16
ততঃ শাংতনবো ভীষ্মঃ কৃপশ্চ রথিনাং বরঃ
ভগদত্তঃ সুশর্মা চ ধনংজয়মুপাদ্রবন্
92.17
হার্দিক্যো বাহ্লিকশ্চৈব সাত্যকিং সমভিদ্রুতৌ
অম্বষ্ঠকস্তু নৃপতিরভিমন্যুমবারয়ৎ
92.18
শেষাস্ত্বন্যে মহারাজ শেষানেব মহারথান্
ততঃ প্রববৃতে যুদ্ধং ঘোররূপং ভয়াবহম্
92.19
ভীমসেনস্তু সংপ্রেক্ষ্য পুত্রাংস্তব জনেশ্বর
প্রজজ্বাল রণে ক্রুদ্ধো হবিষা হব্যবাডিব
92.20
পুত্রাস্তু তব কৌন্তেয়ং ছাদয়াং চক্রিরে শরৈঃ
প্রাবৃষীব মহারাজ জলদাঃ পর্বতং যথা
92.21
স চ্ছাদ্যমানো বহুধা পুত্রৈস্তব বিশাং পতে
সৃক্কিণী বিলিহন্বীরঃ শার্দূল ইব দর্পিতঃ
92.22
ব্যূঢোরস্কং ততো ভীমঃ পাতয়ামাস পার্থিব
ক্ষুরপ্রেণ সুতীক্ষ্ণেন সোঽভবদ্গতজীবিতঃ
92.23
অপরেণ তু ভল্লেন পীতেন নিশিতেন চ
অপাতয়ত্কুণ্ডলিনং সিংহঃ ক্ষুদ্রমৃগং যথা
92.24
ততঃ সুনিশিতান্পীতান্সমাদত্ত শিলীমুখান্
স সপ্ত ত্বরয়া যুক্তঃ পুত্রাংস্তে প্রাপ্য মারিষ
92.25
প্রেষিতা ভীমসেনেন শরাস্তে দৃঢধন্বনা
অপাতয়ন্ত পুত্রাংস্তে রথেভ্যঃ সুমহারথান্
92.26
অনাধৃষ্টিং কুণ্ডভেদং বৈরাটং দীর্ঘলোচনম্
দীর্ঘবাহুং সুবাহুং চ তথৈব কনকধ্বজম্
92.27
প্রপতন্ত স্ম তে বীরা বিরেজুর্ভরতর্ষভ
বসন্তে পুষ্পশবলাশ্চূতাঃ প্রপতিতা ইব
92.28
ততঃ প্রদুদ্রুবুঃ শেষাঃ পুত্রাস্তব বিশাং পতে
তং কালমিব মন্যন্তো ভীমসেনং মহাবলম্
92.29
দ্রোণস্তু সমরে বীরং নির্দহন্তং সুতাংস্তব
যথাদ্রিং বারিধারাভিঃ সমন্তাদ্ব্যকিরচ্ছরৈঃ
92.30
তত্রাদ্ভুতমপশ্যাম কুন্তীপুত্রস্য পৌরুষম্
দ্রোণেন বার্যমাণোঽপি নিজঘ্নে যত্সুতাংস্তব
92.31
যথা হি গোবৃষো বর্ষং সংধারয়তি খাত্পতৎ
ভীমস্তথা দ্রোণমুক্তং শরবর্ষমদীধরৎ
92.32
অদ্ভুতং চ মহারাজ তত্র চক্রে বৃকোদরঃ
যত্পুত্রাংস্তেঽবধীত্সংখ্যে দ্রোণং চৈব ন্যয়োধয়ৎ
92.33
পুত্রেষু তব বীরেষু চিক্রীডার্জুনপূর্বজঃ
মৃগেষ্বিব মহারাজ চরন্ব্যাঘ্রো মহাবলঃ
92.34
যথা বা পশুমধ্যস্থো দ্রাবয়েত পশূন্বৃকঃ
বৃকোদরস্তব সুতাংস্তথা ব্যদ্রাবয়দ্রণে
92.35
গাঙ্গেয়ো ভগদত্তশ্চ গৌতমশ্চ মহারথঃ
পাণ্ডবং রভসং যুদ্ধে বারয়ামাসুরর্জুনম্
92.36
অস্ত্রৈরস্ত্রাণি সংবার্য তেষাং সোঽতিরথো রণে
প্রবীরাংস্তব সৈন্যেষু প্রেষয়ামাস মৃত্যবে
92.37
অভিমন্যুশ্চ রাজানমম্বষ্ঠং লোকবিশ্রুতম্
বিরথং রথিনাং শ্রেষ্ঠং কারয়ামাস সায়কৈঃ
92.38
বিরথো বধ্যমানঃ স সৌভদ্রেণ যশস্বিনা
অবপ্লুত্য রথাত্তূর্ণং সব্রীডো মনুজাধিপঃ
92.39
অসিং চিক্ষেপ সমরে সৌভদ্রস্য মহাত্মনঃ
আরুরোহ রথং চৈব হার্দিক্যস্য মহাত্মনঃ
92.40
আপতন্তং তু নিস্ত্রিংশং যুদ্ধমার্গবিশারদঃ
লাঘবাদ্ব্যংসয়ামাস সৌভদ্রঃ পরবীরহা
92.41
ব্যংসিতং বীক্ষ্য নিস্ত্রিংশং সৌভদ্রেণ রণে তদা
সাধু সাধ্বিতি সৈন্যানাং প্রণাদোঽভূদ্বিশাং পতে
92.42
ধৃষ্টদ্যুম্নমুখাস্ত্বন্যে তব সৈন্যময়োধয়ন্
তথৈব তাবকাঃ সর্বে পাণ্ডুসৈন্যময়োধয়ন্
92.43
তত্রাক্রন্দো মহানাসীত্তব তেষাং চ ভারত
নিঘ্নতাং ভৃশমন্যোন্যং কুর্বতাং কর্ম দুষ্করম্
92.44
অন্যোন্যং হি রণে শূরাঃ কেশেষ্বাক্ষিপ্য মারিষ
নখৈর্দন্তৈরয়ুধ্যন্ত মুষ্টিভির্জানুভিস্তথা
92.45
বাহুভিশ্চ তলৈশ্চৈব নিস্ত্রিংশৈশ্চ সুসংশিতৈঃ
বিবরং প্রাপ্য চান্যোন্যমনয়ন্যমসাদনম্
92.46
ন্যহনচ্চ পিতা পুত্রং পুত্রশ্চ পিতরং রণে
ব্যাকুলীকৃতসংকল্পা যুয়ুধুস্তত্র মানবাঃ
92.47
রণে চারূণি চাপানি হেমপৃষ্ঠানি ভারত
হতানামপবিদ্ধানি কলাপাশ্চ মহাধনাঃ
92.48
জাতরূপময়ৈঃ পুঙ্খৈ রাজতৈশ্চ শিতাঃ শরাঃ
তৈলধৌতা ব্যরাজন্ত নির্মুক্তভুজগোপমাঃ
92.49
হস্তিদন্তত্সরূন্খড্গাঞ্জাতরূপপরিষ্কৃতান্
চর্মাণি চাপবিদ্ধানি রুক্মপৃষ্ঠানি ধন্বিনাম্
92.50
সুবর্ণবিকৃতপ্রাসান্পট্টিশান্হেমভূষিতান্
জাতরূপময়াশ্চর্ষ্টীঃ শক্ত্যশ্চ কনকোজ্জ্বলাঃ
92.51
অপকৃত্তাশ্চ পতিতা মুসলানি গুরূণি চ
পরিঘান্পট্টিশাংশ্চৈব ভিণ্ডিপালাংশ্চ মারিষ
92.52
পতিতাংস্তোমরাংশ্চাপি চিত্রা হেমপরিষ্কৃতাঃ
কুথাশ্চ বহুধাকারাশ্চামরব্যজনানি চ
92.53
নানাবিধানি শস্ত্রাণি বিসৃজ্য পতিতা নরাঃ
জীবন্ত ইব দৃশ্যন্তে গতসত্ত্বা মহারথাঃ
92.54
গদাবিমথিতৈর্গাত্রৈর্মুসলৈর্ভিন্নমস্তকাঃ
গজবাজিরথক্ষুণ্ণাঃ শেরতে স্ম নরাঃ ক্ষিতৌ
92.55
তথৈবাশ্বনৃনাগানাং শরীরৈরাবভৌ তদা
সংছন্না বসুধা রাজন্পর্বতৈরিব সর্বতঃ
92.56
সমরে পতিতৈশ্চৈব শক্ত্যৃষ্টিশরতোমরৈঃ
নিস্ত্রিংশৈঃ পট্টিশৈঃ প্রাসৈরয়স্কুন্তৈঃ পরশ্বধৈঃ
92.57
পরিঘৈর্ভিণ্ডিপালৈশ্চ শতঘ্নীভিস্তথৈব চ
শরীরৈঃ শস্ত্রভিন্নৈশ্চ সমাস্তীর্যত মেদিনী
92.58
নিঃশব্দৈরল্পশব্দৈশ্চ শোণিতৌঘপরিপ্লুতৈঃ
গতাসুভিরমিত্রঘ্ন বিবভৌ সংবৃতা মহী
92.59
সতলত্রৈঃ সকেয়ূরৈর্বাহুভিশ্চন্দনোক্ষিতৈঃ
হস্তিহস্তোপমৈশ্ছিন্নৈরূরুভিশ্চ তরস্বিনাম্
92.60
বদ্ধচূডামণিধরৈঃ শিরোভিশ্চ সকুণ্ডলৈঃ
পতিতৈর্বৃষভাক্ষাণাং বভৌ ভারত মেদিনী
92.61
কবচৈঃ শোণিতাদিগ্ধৈর্বিপ্রকীর্ণৈশ্চ কাঞ্চনৈঃ
ররাজ সুভৃশং ভূমিঃ শান্তার্চিভিরিবানলৈঃ
92.62
বিপ্রবিদ্ধৈঃ কলাপৈশ্চ পতিতৈশ্চ শরাসনৈঃ
বিপ্রকীর্ণৈঃ শরৈশ্চাপি রুক্মপুঙ্খৈঃ সমন্ততঃ
92.63
রথৈশ্চ বহুভির্ভগ্নৈঃ কিঙ্কিণীজালমালিভিঃ
বাজিভিশ্চ হতৈঃ কীর্ণৈঃ স্রস্তজিহ্বৈঃ সশোণিতৈঃ
92.64
অনুকর্ষৈঃ পতাকাভিরুপাসঙ্গৈর্ধ্বজৈরপি
প্রবীরাণাং মহাশঙ্খৈর্বিপ্রকীর্ণৈশ্চ পাণ্ডুরৈঃ
92.65
স্রস্তহস্তৈশ্চ মাতঙ্গৈঃ শয়ানৈর্বিবভৌ মহী
নানারূপৈরলংকারৈঃ প্রমদেবাভ্যলংকৃতা
92.66
দন্তিভিশ্চাপরৈস্তত্র সপ্রাসৈর্গাঢবেদনৈঃ
করৈঃ শব্দং বিমুঞ্চদ্ভিঃ শীকরং চ মুহুর্মুহুঃ
বিবভৌ তদ্রণস্থানং ধম্যমানৈরিবাচলৈঃ
92.67
নানারাগৈঃ কম্বলৈশ্চ পরিস্তোমৈশ্চ দন্তিনাম্
বৈডূর্যমণিদণ্ডৈশ্চ পতিতৈরঙ্কুশৈঃ শুভৈঃ
92.68
ঘণ্টাভিশ্চ গজেন্দ্রাণাং পতিতাভিঃ সমন্ততঃ
বিঘাটিতবিচিত্রাভিঃ কুথাভী রাঙ্কবৈস্তথা
92.69
গ্রৈবেয়ৈশ্চিত্ররূপৈশ্চ রুক্মকক্ষ্যাভিরেব চ
যন্ত্রৈশ্চ বহুধা ছিন্নৈস্তোমরৈশ্চ সকম্পনৈঃ
92.70
অশ্বানাং রেণুকপিলৈ রুক্মচ্ছন্নৈরুরশ্ছদৈঃ
সাদিনাং চ ভুজৈশ্ছিন্নৈঃ পতিতৈঃ সাঙ্গদৈস্তথা
92.71
প্রাসৈশ্চ বিমলৈস্তীক্ষ্ণৈর্বিমলাভিস্তথর্ষ্টিভিঃ
উষ্ণীষৈশ্চ তথা ছিন্নৈঃ প্রবিদ্ধৈশ্চ ততস্ততঃ
92.72
বিচিত্রৈরর্ধচন্দ্রৈশ্চ জাতরূপপরিষ্কৃতৈঃ
অশ্বাস্তরপরিস্তোমৈ রাঙ্কবৈর্মৃদিতৈস্তথা
92.73
নরেন্দ্রচূডামণিভির্বিচিত্রৈশ্চ মহাধনৈঃ
ছত্রৈস্তথাপবিদ্ধৈশ্চ চামরব্যজনৈরপি
92.74
পদ্মেন্দুদ্যুতিভিশ্চৈব বদনৈশ্চারুকুণ্ডলৈঃ
কৢপ্তশ্মশ্রুভিরত্যর্থং বীরাণাং সমলংকৃতৈঃ
92.75
অপবিদ্ধৈর্মহারাজ সুবর্ণোজ্জ্বলকুণ্ডলৈঃ
গ্রহনক্ষত্রশবলা দ্যৌরিবাসীদ্বসুংধরা
92.76
এবমেতে মহাসেনে মৃদিতে তত্র ভারত
পরস্পরং সমাসাদ্য তব তেষাং চ সংয়ুগে
92.77
তেষু শ্রান্তেষু ভগ্নেষু মৃদিতেষু চ ভারত
রাত্রিঃ সমভবদ্ঘোরা নাপশ্যাম ততো রণম্
92.78
ততোঽবহারং সৈন্যানাং প্রচক্রুঃ কুরুপাণ্ডবাঃ
ঘোরে নিশামুখে রৌদ্রে বর্তমানে সুদারুণে
92.79
অবহারং ততঃ কৃত্বা সহিতাঃ কুরুপাণ্ডবাঃ
ন্যবিশন্ত যথাকালং গত্বা স্বশিবিরং তদা