Utshovঅধ্যায় 91
91.1
সংজয় উবাচ
তস্মিন্মহতি সংক্রন্দে রাজা দুর্যোধনস্তদা
গাঙ্গেয়মুপসংগম্য বিনয়েনাভিবাদ্য চ
91.2
তস্য সর্বং যথাবৃত্তমাখ্যাতুমুপচক্রমে
ঘটোত্কচস্য বিজয়মাত্মনশ্চ পরাজয়ম্
91.3
কথয়ামাস দুর্ধর্ষো বিনিঃশ্বস্য পুনঃ পুনঃ
অব্রবীচ্চ তদা রাজন্ভীষ্মং কুরুপিতামহম্
91.4
ভবন্তং সমুপাশ্রিত্য বাসুদেবং যথা পরৈঃ
পাণ্ডবৈর্বিগ্রহো ঘোরঃ সমারব্ধো ময়া প্রভো
91.5
একাদশ সমাখ্যাতা অক্ষৌহিণ্যশ্চ যা মম
নিদেশে তব তিষ্ঠন্তি ময়া সার্ধং পরংতপ
91.6
সোঽহং ভরতশার্দূল ভীমসেনপুরোগমৈঃ
ঘটোত্কচং সমাশ্রিত্য পাণ্ডবৈর্যুধি নির্জিতঃ
91.7
তন্মে দহতি গাত্রাণি শুষ্কবৃক্ষমিবানলঃ
তদিচ্ছামি মহাভাগ ত্বত্প্রসাদাত্পরংতপ
91.8
রাক্ষসাপসদং হন্তুং স্বয়মেব পিতামহ
ত্বাং সমাশ্রিত্য দুর্ধর্ষং তন্মে কর্তুং ত্বমর্হসি
91.9
এতচ্ছ্রুত্বা তু বচনং রাজ্ঞো ভরতসত্তম
দুর্যোধনমিদং বাক্যং ভীষ্মঃ শাংতনবোঽব্রবীৎ
91.10
শৃণু রাজন্মম বচো যত্ত্বা বক্ষ্যামি কৌরব
যথা ত্বয়া মহারাজ বর্তিতব্যং পরংতপ
91.11
আত্মা রক্ষ্যো রণে তাত সর্বাবস্থাস্বরিংদম
ধর্মরাজেন সংগ্রামস্ত্বয়া কার্যঃ সদানঘ
91.12
অর্জুনেন যমাভ্যাং বা ভীমসেনেন বা পুনঃ
রাজধর্মং পুরস্কৃত্য রাজা রাজানমৃচ্ছতি
91.13
অহং দ্রোণঃ কৃপো দ্রৌণিঃ কৃতবর্মা চ সাত্বতঃ
শল্যশ্চ সৌমদত্তিশ্চ বিকর্ণশ্চ মহারথঃ
91.14
তব চ ভ্রাতরঃ শূরা দুঃশাসনপুরোগমাঃ
ত্বদর্থং প্রতিয়োত্স্যামো রাক্ষসং তং মহাবলম্
91.15
তস্মিন্রৌদ্রে রাক্ষসেন্দ্রে যদি তে হৃচ্ছয়ো মহান্
অয়ং বা গচ্ছতু রণে তস্য যুদ্ধায় দুর্মতেঃ
ভগদত্তো মহীপালঃ পুরংদরসমো যুধি
91.16
এতাবদুক্ত্বা রাজানং ভগদত্তমথাব্রবীৎ
সমক্ষং পার্থিবেন্দ্রস্য বাক্যং বাক্যবিশারদঃ
91.17
গচ্ছ শীঘ্রং মহারাজ হৈডিম্বং যুদ্ধদুর্মদম্
বারয়স্ব রণে যত্তো মিষতাং সর্বধন্বিনাম্
রাক্ষসং ক্রূরকর্মাণং যথেন্দ্রস্তারকং পুরা
91.18
তব দিব্যানি চাস্ত্রাণি বিক্রমশ্চ পরংতপ
সমাগমশ্চ বহুভিঃ পুরাভূদসুরৈঃ সহ
91.19
ত্বং তস্য রাজশার্দূল প্রতিয়োদ্ধা মহাহবে
স্ববলেন বৃতো রাজঞ্জহি রাক্ষসপুংগবম্
91.20
এতচ্ছ্রুত্বা তু বচনং ভীষ্মস্য পৃতনাপতেঃ
প্রয়য়ৌ সিংহনাদেন পরানভিমুখো দ্রুতম্
91.21
তমাদ্রবন্তং সংপ্রেক্ষ্য গর্জন্তমিব তোয়দম্
অভ্যবর্তন্ত সংক্রুদ্ধাঃ পাণ্ডবানাং মহারথাঃ
91.22
ভীমসেনোঽভিমন্যুশ্চ রাক্ষসশ্চ ঘটোত্কচঃ
দ্রৌপদেয়াঃ সত্যধৃতিঃ ক্ষত্রদেবশ্চ মারিষ
91.23
চেদিপো বসুদানশ্চ দশার্ণাধিপতিস্তথা
সুপ্রতীকেন তাংশ্চাপি ভগদত্তোঽপ্যুপাদ্রবৎ
91.24
ততঃ সমভবদ্যুদ্ধং ঘোররূপং ভয়ানকম্
পাণ্ডূনাং ভগদত্তেন যমরাষ্ট্রবিবর্ধনম্
91.25
প্রমুক্তা রথিভির্বাণা ভীমবেগাঃ সুতেজনাঃ
তে নিপেতুর্মহারাজ নাগেষু চ রথেষু চ
91.26
প্রভিন্নাশ্চ মহানাগা বিনীতা হস্তিসাদিভিঃ
পরস্পরং সমাসাদ্য সংনিপেতুরভীতবৎ
91.27
মদান্ধা রোষসংরব্ধা বিষাণাগ্রৈর্মহাহবে
বিভিদুর্দন্তমুসলৈঃ সমাসাদ্য পরস্পরম্
91.28
হয়াশ্চ চামরাপীডাঃ প্রাসপাণিভিরাস্থিতাঃ
চোদিতাঃ সাদিভিঃ ক্ষিপ্রং নিপেতুরিতরেতরম্
91.29
পাদাতাশ্চ পদাত্যোঘৈস্তাডিতাঃ শক্তিতোমরৈঃ
ন্যপতন্ত তদা ভূমৌ শতশোঽথ সহস্রশঃ
91.30
রথিনশ্চ তথা রাজন্কর্ণিনালীকসায়কৈঃ
নিহত্য সমরে বীরান্সিংহনাদান্বিনেদিরে
91.31
তস্মিংস্তথা বর্তমানে সংগ্রামে লোমহর্ষণে
ভগদত্তো মহেষ্বাসো ভীমসেনমথাদ্রবৎ
91.32
কুঞ্জরেণ প্রভিন্নেন সপ্তধা স্রবতা মদম্
পর্বতেন যথা তোয়ং স্রবমাণেন সর্বতঃ
91.33
কিরঞ্শরসহস্রাণি সুপ্রতীকশিরোগতঃ
ঐরাবতস্থো মঘবান্বারিধারা ইবানঘ
91.34
স ভীমং শরধারাভিস্তাডয়ামাস পার্থিবঃ
পর্বতং বারিধারাভিঃ প্রাবৃষীব বলাহকঃ
91.35
ভীমসেনস্তু সংক্রুদ্ধঃ পাদরক্ষান্পরঃশতান্
নিজঘান মহেষ্বাসঃ সংক্রুদ্ধঃ শরবৃষ্টিভিঃ
91.36
তান্দৃষ্ট্বা নিহতান্ক্রুদ্ধো ভগদত্তঃ প্রতাপবান্
চোদয়ামাস নাগেন্দ্রং ভীমসেনরথং প্রতি
91.37
স নাগঃ প্রেষিতস্তেন বাণো জ্যাচোদিতো যথা
অভ্যধাবত বেগেন ভীমসেনমরিংদমম্
91.38
তমাপতন্তং সংপ্রেক্ষ্য পাণ্ডবানাং মহারথাঃ
অভ্যবর্তন্ত বেগেন ভীমসেনপুরোগমাঃ
91.39
কেকয়াশ্চাভিমন্যুশ্চ দ্রৌপদেয়াশ্চ সর্বশঃ
দশার্ণাধিপতিঃ শূরঃ ক্ষত্রদেবশ্চ মারিষ
চেদিপশ্চিত্রকেতুশ্চ সংক্রুদ্ধাঃ সর্ব এব তে
91.40
উত্তমাস্ত্রাণি দিব্যানি দর্শয়ন্তো মহাবলাঃ
তমেকং কুঞ্জরং ক্রুদ্ধাঃ সমন্তাত্পর্যবারয়ন্
91.41
স বিদ্ধো বহুভির্বাণৈর্ব্যরোচত মহাদ্বিপঃ
সংজাতরুধিরোত্পীডো ধাতুচিত্র ইবাদ্রিরাট্
91.42
দশার্ণাধিপতিশ্চাপি গজং ভূমিধরোপমম্
সমাস্থিতোঽভিদুদ্রাব ভগদত্তস্য বারণম্
91.43
তমাপতন্তং সমরে গজং গজপতিঃ স চ
দধার সুপ্রতীকোঽপি বেলেব মকরালয়ম্
91.44
বারিতং প্রেক্ষ্য নাগেন্দ্রং দশার্ণস্য মহাত্মনঃ
সাধু সাধ্বিতি সৈন্যানি পাণ্ডবেয়ান্যপূজয়ন্
91.45
ততঃ প্রাগ্জ্যোতিষঃ ক্রুদ্ধস্তোমরান্বৈ চতুর্দশ
প্রাহিণোত্তস্য নাগস্য প্রমুখে নৃপসত্তম
91.46
তস্য বর্ম মুখত্রাণং শাতকুম্ভপরিষ্কৃতম্
বিদার্য প্রাবিশন্ক্ষিপ্রং বল্মীকমিব পন্নগাঃ
91.47
স গাঢবিদ্ধো ব্যথিতো নাগো ভরতসত্তম
উপাবৃত্তমদঃ ক্ষিপ্রং স ন্যবর্তত বেগতঃ
91.48
প্রদুদ্রাব চ বেগেন প্রণদন্ভৈরবং স্বনম্
স মর্দমানঃ স্ববলং বায়ুর্বৃক্ষানিবৌজসা
91.49
তস্মিন্পরাজিতে নাগে পাণ্ডবানাং মহারথাঃ
সিংহনাদং বিনদ্যোচ্চৈর্যুদ্ধায়ৈবোপতস্থিরে
91.50
ততো ভীমং পুরস্কৃত্য ভগদত্তমুপাদ্রবন্
কিরন্তো বিবিধান্বাণাঞ্শস্ত্রাণি বিবিধানি চ
91.51
তেষামাপততাং রাজন্সংক্রুদ্ধানামমর্ষিণাম্
শ্রুত্বা স নিনদং ঘোরমমর্ষাদ্গতসাধ্বসঃ
ভগদত্তো মহেষ্বাসঃ স্বনাগং প্রত্যচোদয়ৎ
91.52
অঙ্কুশাঙ্গুষ্ঠনুদিতঃ স গজপ্রবরো যুধি
তস্মিন্ক্ষণে সমভবত্সংবর্তক ইবানলঃ
91.53
রথসংঘাংস্তথা নাগান্হয়াংশ্চ সহ সাদিভিঃ
পাদাতাংশ্চ সুসংক্রুদ্ধঃ শতশোঽথ সহস্রশঃ
অমৃদ্নাত্সমরে রাজন্সংপ্রধাবংস্ততস্ততঃ
91.54
তেন সংলোড্যমানং তু পাণ্ডূনাং তদ্বলং মহৎ
সংচুকোচ মহারাজ চর্মেবাগ্নৌ সমাহিতম্
91.55
ভগ্নং তু স্ববলং দৃষ্ট্বা ভগদত্তেন ধীমতা
ঘটোত্কচোঽথ সংক্রুদ্ধো ভগদত্তমুপাদ্রবৎ
91.56
বিকটঃ পুরুষো রাজন্দীপ্তাস্যো দীপ্তলোচনঃ
রূপং বিভীষণং কৃত্বা রোষেণ প্রজ্বলন্নিব
91.57
জগ্রাহ বিপুলং শূলং গিরীণামপি দারণম্
নাগং জিঘাংসুঃ সহসা চিক্ষেপ চ মহাবলঃ
সবিষ্ফুলিঙ্গজ্বালাভিঃ সমন্তাত্পরিবেষ্টিতম্
91.58
তমাপতন্তং সহসা দৃষ্ট্বা জ্বালাকুলং রণে
চিক্ষেপ রুচিরং তীক্ষ্ণমর্ধচন্দ্রং স পার্থিবঃ
চিচ্ছেদ সুমহচ্ছূলং তেন বাণেন বেগবৎ
91.59
নিপপাত দ্বিধা ছিন্নং শূলং হেমপরিষ্কৃতম্
মহাশনির্যথা ভ্রষ্টা শক্রমুক্তা নভোগতা
91.60
শূলং নিপতিতং দৃষ্ট্বা দ্বিধা কৃত্তং স পার্থিবঃ
রুক্মদণ্ডাং মহাশক্তিং জগ্রাহাগ্নিশিখোপমাম্
চিক্ষেপ তাং রাক্ষসস্য তিষ্ঠ তিষ্ঠেতি চাব্রবীৎ
91.61
তামাপতন্তীং সংপ্রেক্ষ্য বিয়ত্স্থামশনীমিব
উত্পত্য রাক্ষসস্তূর্ণং জগ্রাহ চ ননাদ চ
91.62
বভঞ্জ চৈনাং ত্বরিতো জানুন্যারোপ্য ভারত
পশ্যতঃ পার্থিবেন্দ্রস্য তদদ্ভুতমিবাভবৎ
91.63
তদবেক্ষ্য কৃতং কর্ম রাক্ষসেন বলীয়সা
দিবি দেবাঃ সগন্ধর্বা মুনয়শ্চাপি বিস্মিতাঃ
91.64
পাণ্ডবাশ্চ মহেষ্বাসা ভীমসেনপুরোগমাঃ
সাধু সাধ্বিতি নাদেন পৃথিবীমনুনাদয়ন্
91.65
তং তু শ্রুত্বা মহানাদং প্রহৃষ্টানাং মহাত্মনাম্
নামৃষ্যত মহেষ্বাসো ভগদত্তঃ প্রতাপবান্
91.66
স বিস্ফার্য মহচ্চাপমিন্দ্রাশনিসমস্বনম্
অভিদুদ্রাব বেগেন পাণ্ডবানাং মহারথান্
বিসৃজন্বিমলাংস্তীক্ষ্ণান্নারাচাঞ্জ্বলনপ্রভান্
91.67
ভীমমেকেন বিব্যাধ রাক্ষসং নবভিঃ শরৈঃ
অভিমন্যুং ত্রিভিশ্চৈব কেকয়ান্পঞ্চভিস্তথা
91.68
পূর্ণায়তবিসৃষ্টেন স্বর্ণপুঙ্খেন পত্রিণা
বিভেদ দক্ষিণং বাহুং ক্ষত্রদেবস্য চাহবে
পপাত সহসা তস্য সশরং ধনুরুত্তমম্
91.69
দ্রৌপদেয়াংস্ততঃ পঞ্চ পঞ্চভিঃ সমতাডয়ৎ
ভীমসেনস্য চ ক্রোধান্নিজঘান তুরংগমান্
91.70
ধ্বজং কেসরিণং চাস্য চিচ্ছেদ বিশিখৈস্ত্রিভিঃ
নির্বিভেদ ত্রিভিশ্চান্যৈঃ সারথিং চাস্য পত্রিভিঃ
91.71
স গাঢবিদ্ধো ব্যথিতো রথোপস্থ উপাবিশৎ
বিশোকো ভরতশ্রেষ্ঠ ভগদত্তেন সংয়ুগে
91.72
ততো ভীমো মহারাজ বিরথো রথিনাং বরঃ
গদাং প্রগৃহ্য বেগেন প্রচস্কন্দ মহারথাৎ
91.73
তমুদ্যতগদং দৃষ্ট্বা সশৃঙ্গমিব পর্বতম্
তাবকানাং ভয়ং ঘোরং সমপদ্যত ভারত
91.74
এতস্মিন্নেব কালে তু পাণ্ডবঃ কৃষ্ণসারথিঃ
আজগাম মহারাজ নিঘ্নঞ্শত্রূন্সহস্রশঃ
91.75
যত্র তৌ পুরুষব্যাঘ্রৌ পিতাপুত্রৌ পরংতপৌ
প্রাগ্জ্যোতিষেণ সংসক্তৌ ভীমসেনঘটোত্কচৌ
91.76
দৃষ্ট্বা তু পাণ্ডবো রাজন্যুধ্যমানান্মহারথান্
ত্বরিতো ভরতশ্রেষ্ঠ তত্রায়াদ্বিকিরঞ্শরান্
91.77
ততো দুর্যোধনো রাজা ত্বরমাণো মহারথঃ
সেনামচোদয়ত্ক্ষিপ্রং রথনাগাশ্বসংকুলাম্
91.78
তামাপতন্তীং সহসা কৌরবাণাং মহাচমূম্
অভিদুদ্রাব বেগেন পাণ্ডবঃ শ্বেতবাহনঃ
91.79
ভগদত্তোঽপি সমরে তেন নাগেন ভারত
বিমৃদ্নন্পাণ্ডববলং যুধিষ্ঠিরমুপাদ্রবৎ
91.80
তদাসীত্তুমুলং যুদ্ধং ভগদত্তস্য মারিষ
পাঞ্চালৈঃ সৃঞ্জয়ৈশ্চৈব কেকয়ৈশ্চোদ্যতায়ুধৈঃ
91.81
ভীমসেনোঽপি সমরে তাবুভৌ কেশবার্জুনৌ
আশ্রাবয়দ্যথাবৃত্তমিরাবদ্বধমুত্তমম্