Utshovঅধ্যায় 90
90.1
সংজয় উবাচ
স্বসৈন্যং নিহতং দৃষ্ট্বা রাজা দুর্যোধনঃ স্বয়ম্
অভ্যধাবত সংক্রুদ্ধো ভীমসেনমরিংদমম্
90.2
প্রগৃহ্য সুমহচ্চাপমিন্দ্রাশনিসমস্বনম্
মহতা শরবর্ষেণ পাণ্ডবং সমবাকিরৎ
90.3
অর্ধচন্দ্রং চ সংধায় সুতীক্ষ্ণং লোমবাহিনম্
ভীমসেনস্য চিচ্ছেদ চাপং ক্রোধসমন্বিতঃ
90.4
তদন্তরং চ সংপ্রেক্ষ্য ত্বরমাণো মহারথঃ
সংদধে নিশিতং বাণং গিরীণামপি দারণম্
তেনোরসি মহাবাহুর্ভীমসেনমতাডয়ৎ
90.5
স গাঢবিদ্ধো ব্যথিতঃ সৃক্কিণী পরিসংলিহন্
সমাললম্বে তেজস্বী ধ্বজং হেমপরিষ্কৃতম্
90.6
তথা বিমনসং দৃষ্ট্বা ভীমসেনং ঘটোত্কচঃ
ক্রোধেনাভিপ্রজজ্বাল দিধক্ষন্নিব পাবকঃ
90.7
অভিমন্যুমুখাশ্চৈব পাণ্ডবানাং মহারথাঃ
সমভ্যধাবন্ক্রোশন্তো রাজানং জাতসংভ্রমাঃ
90.8
সংপ্রেক্ষ্য তানাপততঃ সংক্রুদ্ধাঞ্জাতসংভ্রমান্
ভারদ্বাজোঽব্রবীদ্বাক্যং তাবকানাং মহারথান্
90.9
ক্ষিপ্রং গচ্ছত ভদ্রং বো রাজানং পরিরক্ষত
সংশয়ং পরমং প্রাপ্তং মজ্জন্তং ব্যসনার্ণবে
90.10
এতে ক্রুদ্ধা মহেষ্বাসাঃ পাণ্ডবানাং মহারথাঃ
ভীমসেনং পুরস্কৃত্য দুর্যোধনমুপদ্রুতাঃ
90.11
নানাবিধানি শস্ত্রাণি বিসৃজন্তো জয়ে রতাঃ
নদন্তো ভৈরবান্নাদাংস্ত্রাসয়ন্তশ্চ ভূমিমাম্
90.12
তদাচার্যবচঃ শ্রুত্বা সোমদত্তপুরোগমাঃ
তাবকাঃ সমবর্তন্ত পাণ্ডবানামনীকিনীম্
90.13
কৃপো ভূরিশ্রবাঃ শল্যো দ্রোণপুত্রো বিবিংশতিঃ
চিত্রসেনো বিকর্ণশ্চ সৈন্ধবোঽথ বৃহদ্বলঃ
আবন্ত্যৌ চ মহেষ্বাসৌ কৌরবং পর্যবারয়ন্
90.14
তে বিংশতিপদং গত্বা সংপ্রহারং প্রচক্রিরে
পাণ্ডবা ধার্তরাষ্ট্রাশ্চ পরস্পরজিঘাংসবঃ
90.15
এবমুক্ত্বা মহাবাহুর্মহদ্বিস্ফার্য কার্মুকম্
ভারদ্বাজস্ততো ভীমং ষড্বিংশত্যা সমার্পয়ৎ
90.16
ভূয়শ্চৈনং মহাবাহুঃ শরৈঃ শীঘ্রমবাকিরৎ
পর্বতং বারিধারাভিঃ শরদীব বলাহকঃ
90.17
তং প্রত্যবিধ্যদ্দশভির্ভীমসেনঃ শিলীমুখৈঃ
ত্বরমাণো মহেষ্বাসঃ সব্যে পার্শ্বে মহাবলঃ
90.18
স গাঢবিদ্ধো ব্যথিতো বয়োবৃদ্ধশ্চ ভারত
প্রনষ্টসংজ্ঞঃ সহসা রথোপস্থ উপাবিশৎ
90.19
গুরুং প্রব্যথিতং দৃষ্ট্বা রাজা দুর্যোধনঃ স্বয়ম্
দ্রৌণায়নিশ্চ সংক্রুদ্ধৌ ভীমসেনমভিদ্রুতৌ
90.20
তাবাপতন্তৌ সংপ্রেক্ষ্য কালান্তকয়মোপমৌ
ভীমসেনো মহাবাহুর্গদামাদায় সত্বরঃ
90.21
অবপ্লুত্য রথাত্তূর্ণং তস্থৌ গিরিরিবাচলঃ
সমুদ্যম্য গদাং গুর্বীং যমদণ্ডোপমাং রণে
90.22
তমুদ্যতগদং দৃষ্ট্বা কৈলাসমিব শৃঙ্গিণম্
কৌরবো দ্রোণপুত্রশ্চ সহিতাবভ্যধাবতাম্
90.23
তাবাপতন্তৌ সহিতৌ ত্বরিতৌ বলিনাং বরৌ
অভ্যধাবত বেগেন ত্বরমাণো বৃকোদরঃ
90.24
তমাপতন্তং সংপ্রেক্ষ্য সংক্রুদ্ধং ভীমদর্শনম্
সমভ্যধাবংস্ত্বরিতাঃ কৌরবাণাং মহারথাঃ
90.25
ভারদ্বাজমুখাঃ সর্বে ভীমসেনজিঘাংসয়া
নানাবিধানি শস্ত্রাণি ভীমস্যোরস্যপাতয়ন্
সহিতাঃ পাণ্ডবং সর্বে পীডয়ন্তঃ সমন্ততঃ
90.26
তং দৃষ্ট্বা সংশয়ং প্রাপ্তং পীড্যমানং মহারথম্
অভিমন্যুপ্রভৃতয়ঃ পাণ্ডবানাং মহারথাঃ
অভ্যধাবন্পরীপ্সন্তঃ প্রাণাংস্ত্যক্ত্বা সুদুস্ত্যজান্
90.27
অনূপাধিপতিঃ শূরো ভীমস্য দয়িতঃ সখা
নীলো নীলাম্বুদপ্রখ্যঃ সংক্রুদ্ধো দ্রৌণিমভ্যয়াৎ
স্পর্ধতে হি মহেষ্বাসো নিত্যং দ্রোণসুতেন যঃ
90.28
স বিস্ফার্য মহচ্চাপং দ্রৌণিং বিব্যাধ পত্রিণা
যথা শক্রো মহারাজ পুরা বিব্যাধ দানবম্
90.29
বিপ্রচিত্তিং দুরাধর্ষং দেবতানাং ভয়ংকরম্
যেন লোকত্রয়ং ক্রোধাত্ত্রাসিতং স্বেন তেজসা
90.30
তথা নীলেন নির্ভিন্নঃ সুমুখেন পতত্রিণা
সংজাতরুধিরোত্পীডো দ্রৌণিঃ ক্রোধসমন্বিতঃ
90.31
স বিস্ফার্য ধনুশ্চিত্রমিন্দ্রাশনিসমস্বনম্
দধ্রে নীলবিনাশায় মতিং মতিমতাং বরঃ
90.32
ততঃ সংধায় বিমলান্ভল্লান্কর্মারপায়িতান্
জঘান চতুরো বাহান্পাতয়ামাস চ ধ্বজম্
90.33
সপ্তমেন চ ভল্লেন নীলং বিব্যাধ বক্ষসি
স গাঢবিদ্ধো ব্যথিতো রথোপস্থ উপাবিশৎ
90.34
মোহিতং বীক্ষ্য রাজানং নীলমভ্রচয়োপমম্
ঘটোত্কচোঽপি সংক্রুদ্ধো ভ্রাতৃভিঃ পরিবারিতঃ
90.35
অভিদুদ্রাব বেগেন দ্রৌণিমাহবশোভিনম্
তথেতরে অভ্যধাবন্রাক্ষসা যুদ্ধদুর্মদাঃ
90.36
তমাপতন্তং সংপ্রেক্ষ্য রাক্ষসং ঘোরদর্শনম্
অভ্যধাবত তেজস্বী ভারদ্বাজাত্মজস্ত্বরন্
90.37
নিজঘান চ সংক্রুদ্ধো রাক্ষসান্ভীমদর্শনান্
যেঽভবন্নগ্রতঃ ক্রুদ্ধা রাক্ষসস্য পুরঃসরাঃ
90.38
বিমুখাংশ্চৈব তান্দৃষ্ট্বা দ্রৌণিচাপচ্যুতৈঃ শরৈঃ
অক্রুধ্যত মহাকায়ো ভৈমসেনির্ঘটোত্কচঃ
90.39
প্রাদুশ্চক্রে মহামায়াং ঘোররূপাং সুদারুণাম্
মোহয়ন্সমরে দ্রৌণিং মায়াবী রাক্ষসাধিপঃ
90.40
ততস্তে তাবকাঃ সর্বে মায়য়া বিমুখীকৃতাঃ
অন্যোন্যং সমপশ্যন্ত নিকৃত্তান্মেদিনীতলে
বিচেষ্টমানান্কৃপণাঞ্শোণিতেন সমুক্ষিতান্
90.41
দ্রোণং দুর্যোধনং শল্যমশ্বত্থামানমেব চ
প্রায়শশ্চ মহেষ্বাসা যে প্রধানাশ্চ কৌরবাঃ
90.42
বিধ্বস্তা রথিনঃ সর্বে গজাশ্চ বিনিপাতিতাঃ
হয়াশ্চ সহয়ারোহা বিনিকৃত্তাঃ সহস্রশঃ
90.43
তদ্দৃষ্ট্বা তাবকং সৈন্যং বিদ্রুতং শিবিরং প্রতি
মম প্রাক্রোশতো রাজংস্তথা দেবব্রতস্য চ
90.44
যুধ্যধ্বং মা পলায়ধ্বং মায়ৈষা রাক্ষসী রণে
ঘটোত্কচপ্রয়ুক্তেতি নাতিষ্ঠন্ত বিমোহিতাঃ
নৈব তে শ্রদ্দধুর্ভীতা বদতোরাবয়োর্বচঃ
90.45
তাংশ্চ প্রদ্রবতো দৃষ্ট্বা জয়ং প্রাপ্তাশ্চ পাণ্ডবাঃ
ঘটোত্কচেন সহিতাঃ সিংহনাদান্প্রচক্রিরে
শঙ্খদুন্দুভিঘোষাশ্চ সমন্তাত্সস্বনুর্ভৃশম্
90.46
এবং তব বলং সর্বং হৈডিম্বেন দুরাত্মনা
সূর্যাস্তমনবেলায়াং প্রভগ্নং বিদ্রুতং দিশঃ