Utshovঅধ্যায় 89
89.1
সংজয় উবাচ
বিমুখীকৃত্য তান্সর্বাংস্তাবকান্যুধি রাক্ষসঃ
জিঘাংসুর্ভরতশ্রেষ্ঠ দুর্যোধনমুপাদ্রবৎ
89.2
তমাপতন্তং সংপ্রেক্ষ্য রাজানং প্রতি বেগিতম্
অভ্যধাবঞ্জিঘাংসন্তস্তাবকা যুদ্ধদুর্মদাঃ
89.3
তালমাত্রাণি চাপানি বিকর্ষন্তো মহাবলাঃ
তমেকমভ্যধাবন্ত নদন্তঃ সিংহসংঘবৎ
89.4
অথৈনং শরবর্ষেণ সমন্তাত্পর্যবারয়ন্
পর্বতং বারিধারাভিঃ শরদীব বলাহকাঃ
89.5
স গাঢবিদ্ধো ব্যথিতস্তোত্ত্রার্দিত ইব দ্বিপঃ
উত্পপাত তদাকাশং সমন্তাদ্বৈনতেয়বৎ
89.6
ব্যনদত্সুমহানাদং জীমূত ইব শারদঃ
দিশঃ খং প্রদিশশ্চৈব নাদয়ন্ভৈরবস্বনঃ
89.7
রাক্ষসস্য তু তং শব্দং শ্রুত্বা রাজা যুধিষ্ঠিরঃ
উবাচ ভরতশ্রেষ্ঠো ভীমসেনমিদং বচঃ
89.8
যুধ্যতে রাক্ষসো নূনং ধার্তরাষ্ট্রৈর্মহারথৈঃ
যথাস্য শ্রূয়তে শব্দো নদতো ভৈরবং স্বনম্
অতিভারং চ পশ্যামি তত্র তাত সমাহিতম্
89.9
পিতামহশ্চ সংক্রুদ্ধঃ পাঞ্চালান্হন্তুমুদ্যতঃ
তেষাং চ রক্ষণার্থায় যুধ্যতে ফল্গুনঃ পরৈঃ
89.10
এতচ্ছ্রুত্বা মহাবাহো কার্যদ্বয়মুপস্থিতম্
গচ্ছ রক্ষস্ব হৈডিম্বং সংশয়ং পরমং গতম্
89.11
ভ্রাতুর্বচনমাজ্ঞায় ত্বরমাণো বৃকোদরঃ
প্রয়য়ৌ সিংহনাদেন ত্রাসয়ন্সর্বপার্থিবান্
বেগেন মহতা রাজন্পর্বকালে যথোদধিঃ
89.12
তমন্বয়াত্সত্যধৃতিঃ সৌচিত্তির্যুদ্ধদুর্মদঃ
শ্রেণিমান্বসুদানশ্চ পুত্রঃ কাশ্যস্য চাভিভূঃ
89.13
অভিমন্যুমুখাশ্চৈব দ্রৌপদেয়া মহারথাঃ
ক্ষত্রদেবশ্চ বিক্রান্তঃ ক্ষত্রধর্মা তথৈব চ
89.14
অনূপাধিপতিশ্চৈব নীলঃ স্ববলমাস্থিতঃ
মহতা রথবংশেন হৈডিম্বং পর্যবারয়ন্
89.15
কুঞ্জরৈশ্চ সদা মত্তৈঃ ষট্সহস্রৈঃ প্রহারিভিঃ
অভ্যরক্ষন্ত সহিতা রাক্ষসেন্দ্রং ঘটোত্কচম্
89.16
সিংহনাদেন মহতা নেমিঘোষেণ চৈব হি
খুরশব্দনিনাদৈশ্চ কম্পয়ন্তো বসুংধরাম্
89.17
তেষামাপততাং শ্রুত্বা শব্দং তং তাবকং বলম্
ভীমসেনভয়োদ্বিগ্নং বিবর্ণবদনং তথা
পরিবৃত্তং মহারাজ পরিত্যজ্য ঘটোত্কচম্
89.18
ততঃ প্রববৃতে যুদ্ধং তত্র তত্র মহাত্মনাম্
তাবকানাং পরেষাং চ সংগ্রামেষ্বনিবর্তিনাম্
89.19
নানারূপাণি শস্ত্রাণি বিসৃজন্তো মহারথাঃ
অন্যোন্যমভিধাবন্তঃ সংপ্রহারং প্রচক্রিরে
ব্যতিষক্তং মহারৌদ্রং যুদ্ধং ভীরুভয়াবহম্
89.20
হয়া গজৈঃ সমাজগ্মুঃ পাদাতা রথিভিঃ সহ
অন্যোন্যং সমরে রাজন্প্রার্থয়ানা মহদ্যশঃ
89.21
সহসা চাভবত্তীব্রং সংনিপাতান্মহদ্রজঃ
রথাশ্বগজপত্তীনাং পদনেমিসমুদ্ধতম্
89.22
ধূম্রারুণং রজস্তীব্রং রণভূমিং সমাবৃণোৎ
নৈব স্বে ন পরে রাজন্সমজানন্পরস্পরম্
89.23
পিতা পুত্রং ন জানীতে পুত্রো বা পিতরং তথা
নির্মর্যাদে তথা ভূতে বৈশসে লোমহর্ষণে
89.24
শস্ত্রাণাং ভরতশ্রেষ্ঠ মনুষ্যাণাং চ গর্জতাম্
সুমহানভবচ্ছব্দো বংশানামিব দহ্যতাম্
89.25
গজবাজিমনুষ্যাণাং শোণিতান্ত্রতরঙ্গিণী
প্রাবর্তত নদী তত্র কেশশৈবলশাদ্বলা
89.26
নরাণাং চৈব কায়েভ্যঃ শিরসাং পততাং রণে
শুশ্রুবে সুমহাঞ্শব্দঃ পততামশ্মনামিব
89.27
বিশিরস্কৈর্মনুষ্যৈশ্চ ছিন্নগাত্রৈশ্চ বারণৈঃ
অশ্বৈঃ সংভিন্নদেহৈশ্চ সংকীর্ণাভূদ্বসুংধরা
89.28
নানাবিধানি শস্ত্রাণি বিসৃজন্তো মহারথাঃ
অন্যোন্যমভিধাবন্তঃ সংপ্রহারং প্রচক্রিরে
89.29
হয়া হয়ান্সমাসাদ্য প্রেষিতা হয়সাদিভিঃ
সমাহত্য রণেঽন্যোন্যং নিপেতুর্গতজীবিতাঃ
89.30
নরা নরান্সমাসাদ্য ক্রোধরক্তেক্ষণা ভৃশম্
উরাংস্যুরোভিরন্যোন্যং সমাশ্লিষ্য নিজঘ্নিরে
89.31
প্রেষিতাশ্চ মহামাত্রৈর্বারণাঃ পরবারণাঃ
অভিঘ্নন্তি বিষাণাগ্রৈর্বারণানেব সংয়ুগে
89.32
তে জাতরুধিরাপীডাঃ পতাকাভিরলংকৃতাঃ
সংসক্তাঃ প্রত্যদৃশ্যন্ত মেঘা ইব সবিদ্যুতঃ
89.33
কেচিদ্ভিন্না বিষাণাগ্রৈর্ভিন্নকুম্ভাশ্চ তোমরৈঃ
বিনদন্তোঽভ্যধাবন্ত গর্জন্তো জলদা ইব
89.34
কেচিদ্ধস্তৈর্দ্বিধা ছিন্নৈশ্ছিন্নগাত্রাস্তথাপরে
নিপেতুস্তুমুলে তস্মিংশ্ছিন্নপক্ষা ইবাদ্রয়ঃ
89.35
পার্শ্বৈস্তু দারিতৈরন্যে বারণৈর্বরবারণাঃ
মুমুচুঃ শোণিতং ভূরি ধাতূনিব মহীধরাঃ
89.36
নারাচাভিহতাস্ত্বন্যে তথা বিদ্ধাশ্চ তোমরৈঃ
হতারোহা ব্যদৃশ্যন্ত বিশৃঙ্গা ইব পর্বতাঃ
89.37
কেচিত্ক্রোধসমাবিষ্টা মদান্ধা নিরবগ্রহাঃ
রথান্হয়ান্পদাতাংশ্চ মমৃদুঃ শতশো রণে
89.38
তথা হয়া হয়ারোহৈস্তাডিতাঃ প্রাসতোমরৈঃ
তেন তেনাভ্যবর্তন্ত কুর্বন্তো ব্যাকুলা দিশঃ
89.39
রথিনো রথিভিঃ সার্ধং কুলপুত্রাস্তনুত্যজঃ
পরাং শক্তিং সমাস্থায় চক্রুঃ কর্মাণ্যভীতবৎ
89.40
স্বয়ংবর ইবামর্দে প্রজহ্রুরিতরেতরম্
প্রার্থয়ানা যশো রাজন্স্বর্গং বা যুদ্ধশালিনঃ
89.41
তস্মিংস্তথা বর্তমানে সংগ্রামে লোমহর্ষণে
ধার্তরাষ্ট্রং মহত্সৈন্যং প্রায়শো বিমুখীকৃতম্