Utshovঅধ্যায় 88
88.1
সংজয় উবাচ
ততস্তদ্বাণবর্ষং তু দুঃসহং দানবৈরপি
দধার যুধি রাজেন্দ্রো যথা বর্ষং মহাদ্বিপঃ
88.2
ততঃ ক্রোধসমাবিষ্টো নিঃশ্বসন্নিব পন্নগঃ
সংশয়ং পরমং প্রাপ্তঃ পুত্রস্তে ভরতর্ষভ
88.3
মুমোচ নিশিতাংস্তীক্ষ্ণান্নারাচান্পঞ্চবিংশতিম্
তেঽপতন্সহসা রাজংস্তস্মিন্রাক্ষসপুংগবে
আশীবিষা ইব ক্রুদ্ধাঃ পর্বতে গন্ধমাদনে
88.4
স তৈর্বিদ্ধঃ স্রবন্রক্তং প্রভিন্ন ইব কুঞ্জরঃ
দধ্রে মতিং বিনাশায় রাজ্ঞঃ স পিশিতাশনঃ
জগ্রাহ চ মহাশক্তিং গিরীণামপি দারণীম্
88.5
সংপ্রদীপ্তাং মহোল্কাভামশনীং মঘবানিব
সমুদ্যচ্ছন্মহাবাহুর্জিঘাংসুস্তনয়ং তব
88.6
তামুদ্যতামভিপ্রেক্ষ্য বঙ্গানামধিপস্ত্বরন্
কুঞ্জরং গিরিসংকাশং রাক্ষসং প্রত্যচোদয়ৎ
88.7
স নাগপ্রবরেণাজৌ বলিনা শীঘ্রগামিনা
যতো দুর্যোধনরথস্তং মার্গং প্রত্যপদ্যত
রথং চ বারয়ামাস কুঞ্জরেণ সুতস্য তে
88.8
মার্গমাবারিতং দৃষ্ট্বা রাজ্ঞা বঙ্গেন ধীমতা
ঘটোত্কচো মহারাজ ক্রোধসংরক্তলোচনঃ
উদ্যতাং তাং মহাশক্তিং তস্মিংশ্চিক্ষেপ বারণে
88.9
স তয়াভিহতো রাজংস্তেন বাহুবিমুক্তয়া
সংজাতরুধিরোত্পীডঃ পপাত চ মমার চ
88.10
পতত্যথ গজে চাপি বঙ্গানামীশ্বরো বলী
জবেন সমভিদ্রুত্য জগাম ধরণীতলম্
88.11
দুর্যোধনোঽপি সংপ্রেক্ষ্য পাতিতং বরবারণম্
প্রভগ্নং চ বলং দৃষ্ট্বা জগাম পরমাং ব্যথাম্
88.12
ক্ষত্রধর্মং পুরস্কৃত্য আত্মনশ্চাভিমানিতাম্
প্রাপ্তেঽপক্রমণে রাজা তস্থৌ গিরিরিবাচলঃ
88.13
সংধায় চ শিতং বাণং কালাগ্নিসমতেজসম্
মুমোচ পরমক্রুদ্ধস্তস্মিন্ঘোরে নিশাচরে
88.14
তমাপতন্তং সংপ্রেক্ষ্য বাণমিন্দ্রাশনিপ্রভম্
লাঘবাদ্বঞ্চয়ামাস মহাকায়ো ঘটোত্কচঃ
88.15
ভূয় এব ননাদোগ্রঃ ক্রোধসংরক্তলোচনঃ
ত্রাসয়ন্সর্বভূতানি যুগান্তে জলদো যথা
88.16
তং শ্রুত্বা নিনদং ঘোরং তস্য ভীষ্মস্য রক্ষসঃ
আচার্যমুপসংগম্য ভীষ্মঃ শাংতনবোঽব্রবীৎ
88.17
যথৈষ নিনদো ঘোরঃ শ্রূয়তে রাক্ষসেরিতঃ
হৈডিম্বো যুধ্যতে নূনং রাজ্ঞা দুর্যোধনেন হ
88.18
নৈষ শক্যো হি সংগ্রামে জেতুং ভূতেন কেনচিৎ
তত্র গচ্ছত ভদ্রং বো রাজানং পরিরক্ষত
88.19
অভিদ্রুতং মহাভাগং রাক্ষসেন দুরাত্মনা
এতদ্ধি পরমং কৃত্যং সর্বেষাং নঃ পরংতপাঃ
88.20
পিতামহবচঃ শ্রুত্বা ত্বরমাণা মহারথাঃ
উত্তমং জবমাস্থায় প্রয়য়ুর্যত্র কৌরবঃ
88.21
দ্রোণশ্চ সোমদত্তশ্চ বাহ্লিকশ্চ জয়দ্রথঃ
কৃপো ভূরিশ্রবাঃ শল্যশ্চিত্রসেনো বিবিংশতিঃ
88.22
অশ্বত্থামা বিকর্ণশ্চ আবন্ত্যশ্চ বৃহদ্বলঃ
রথাশ্চানেকসাহস্রা যে তেষামনুয়ায়িনঃ
অভিদ্রুতং পরীপ্সন্তঃ পুত্রং দুর্যোধনং তব
88.23
তদনীকমনাধৃষ্যং পালিতং লোকসত্তমৈঃ
আততায়িনমায়ান্তং প্রেক্ষ্য রাক্ষসসত্তমঃ
নাকম্পত মহাবাহুর্মৈনাক ইব পর্বতঃ
88.24
প্রগৃহ্য বিপুলং চাপং জ্ঞাতিভিঃ পরিবারিতঃ
শূলমুদ্গরহস্তৈশ্চ নানাপ্রহরণৈরপি
88.25
ততঃ সমভবদ্যুদ্ধং তুমুলং লোমহর্ষণম্
রাক্ষসানাং চ মুখ্যস্য দুর্যোধনবলস্য চ
88.26
ধনুষাং কূজতাং শব্দঃ সর্বতস্তুমুলোঽভবৎ
অশ্রূয়ত মহারাজ বংশানাং দহ্যতামিব
88.27
শস্ত্রাণাং পাত্যমানানাং কবচেষু শরীরিণাম্
শব্দঃ সমভবদ্রাজন্নদ্রীণামিব দীর্যতাম্
88.28
বীরবাহুবিসৃষ্টানাং তোমরাণাং বিশাং পতে
রূপমাসীদ্বিয়ত্স্থানাং সর্পাণাং সর্পতামিব
88.29
ততঃ পরমসংক্রুদ্ধো বিস্ফার্য সুমহদ্ধনুঃ
রাক্ষসেন্দ্রো মহাবাহুর্বিনদন্ভৈরবং রবম্
88.30
আচার্যস্যার্ধচন্দ্রেণ ক্রুদ্ধশ্চিচ্ছেদ কার্মুকম্
সোমদত্তস্য ভল্লেন ধ্বজমুন্মথ্য চানদৎ
88.31
বাহ্লিকং চ ত্রিভির্বাণৈরভ্যবিধ্যত্স্তনান্তরে
কৃপমেকেন বিব্যাধ চিত্রসেনং ত্রিভিঃ শরৈঃ
88.32
পূর্ণায়তবিসৃষ্টেন সম্যক্প্রণিহিতেন চ
জত্রুদেশে সমাসাদ্য বিকর্ণং সমতাডয়ৎ
ন্যষীদত্স রথোপস্থে শোণিতেন পরিপ্লুতঃ
88.33
ততঃ পুনরমেয়াত্মা নারাচান্দশ পঞ্চ চ
ভূরিশ্রবসি সংক্রুদ্ধঃ প্রাহিণোদ্ভরতর্ষভ
তে বর্ম ভিত্ত্বা তস্যাশু প্রাবিশন্মেদিনীতলম্
88.34
বিবিংশতেশ্চ দ্রৌণেশ্চ যন্তারৌ সমতাডয়ৎ
তৌ পেততূ রথোপস্থে রশ্মীনুত্সৃজ্য বাজিনাম্
88.35
সিন্ধুরাজ্ঞোঽর্ধচন্দ্রেণ বারাহং স্বর্ণভূষিতম্
উন্মমাথ মহারাজ দ্বিতীয়েনাচ্ছিনদ্ধনুঃ
88.36
চতুর্ভিরথ নারাচৈরাবন্ত্যস্য মহাত্মনঃ
জঘান চতুরো বাহান্ক্রোধসংরক্তলোচনঃ
88.37
পূর্ণায়তবিসৃষ্টেন পীতেন নিশিতেন চ
নির্বিভেদ মহারাজ রাজপুত্রং বৃহদ্বলম্
স গাঢবিদ্ধো ব্যথিতো রথোপস্থ উপাবিশৎ
88.38
ভৃশং ক্রোধেন চাবিষ্টো রথস্থো রাক্ষসাধিপঃ
চিক্ষেপ নিশিতাংস্তীক্ষ্ণাঞ্শরানাশীবিষোপমান্
বিভিদুস্তে মহারাজ শল্যং যুদ্ধবিশারদম্