Utshovঅধ্যায় 87
87.1
ধৃতরাষ্ট্র উবাচ
ইরাবন্তং তু নিহতং দৃষ্ট্বা পার্থা মহারথাঃ
সংগ্রামে কিমকুর্বন্ত তন্মমাচক্ষ্ব সংজয়
87.2
সংজয় উবাচ
ইরাবন্তং তু নিহতং সংগ্রামে বীক্ষ্য রাক্ষসঃ
ব্যনদত্সুমহানাদং ভৈমসেনির্ঘটোত্কচঃ
87.3
নদতস্তস্য শব্দেন পৃথিবী সাগরাম্বরা
সপর্বতবনা রাজংশ্চচাল সুভৃশং তদা
অন্তরিক্ষং দিশশ্চৈব সর্বাশ্চ প্রদিশস্তথা
87.4
তং শ্রুত্বা সুমহানাদং তব সৈন্যস্য ভারত
ঊরুস্তম্ভঃ সমভবদ্বেপথুঃ স্বেদ এব চ
87.5
সর্ব এব চ রাজেন্দ্র তাবকা দীনচেতসঃ
সর্পবত্সমবেষ্টন্ত সিংহভীতা গজা ইব
87.6
নিনদত্সুমহানাদং নির্ঘাতমিব রাক্ষসঃ
জ্বলিতং শূলমুদ্যম্য রূপং কৃত্বা বিভীষণম্
87.7
নানাপ্রহরণৈর্ঘোরৈর্বৃতো রাক্ষসপুংগবৈঃ
আজগাম সুসংক্রুদ্ধঃ কালান্তকয়মোপমঃ
87.8
তমাপতন্তং সংপ্রেক্ষ্য সংক্রুদ্ধং ভীমদর্শনম্
স্ববলং চ ভয়াত্তস্য প্রায়শো বিমুখীকৃতম্
87.9
ততো দুর্যোধনো রাজা ঘটোত্কচমুপাদ্রবৎ
প্রগৃহ্য বিপুলং চাপং সিংহবদ্বিনদন্মুহুঃ
87.10
পৃষ্ঠতোঽনুয়য়ৌ চৈনং স্রবদ্ভিঃ পর্বতোপমৈঃ
কুঞ্জরৈর্দশসাহস্রৈর্বঙ্গানামধিপঃ স্বয়ম্
87.11
তমাপতন্তং সংপ্রেক্ষ্য গজানীকেন সংবৃতম্
পুত্রং তব মহারাজ চুকোপ স নিশাচরঃ
87.12
ততঃ প্রববৃতে যুদ্ধং তুমুলং লোমহর্ষণম্
রাক্ষসানাং চ রাজেন্দ্র দুর্যোধনবলস্য চ
87.13
গজানীকং চ সংপ্রেক্ষ্য মেঘবৃন্দমিবোদ্যতম্
অভ্যধাবন্ত সংক্রুদ্ধা রাক্ষসাঃ শস্ত্রপাণয়ঃ
87.14
নদন্তো বিবিধান্নাদান্মেঘা ইব সবিদ্যুতঃ
শরশক্ত্যৃষ্টিনারাচৈর্নিঘ্নন্তো গজয়োধিনঃ
87.15
ভিণ্ডিপালৈস্তথা শূলৈর্মুদ্গরৈঃ সপরশ্বধৈঃ
পর্বতাগ্রৈশ্চ বৃক্ষৈশ্চ নিজঘ্নুস্তে মহাগজান্
87.16
ভিন্নকুম্ভান্বিরুধিরান্ভিন্নগাত্রাংশ্চ বারণান্
অপশ্যাম মহারাজ বধ্যমানান্নিশাচরৈঃ
87.17
তেষু প্রক্ষীয়মাণেষু ভগ্নেষু গজয়োধিষু
দুর্যোধনো মহারাজ রাক্ষসান্সমুপাদ্রবৎ
87.18
অমর্ষবশমাপন্নস্ত্যক্ত্বা জীবিতমাত্মনঃ
মুমোচ নিশিতান্বাণান্রাক্ষসেষু মহাবলঃ
87.19
জঘান চ মহেষ্বাসঃ প্রধানাংস্তত্র রাক্ষসান্
সংক্রুদ্ধো ভরতশ্রেষ্ঠ পুত্রো দুর্যোধনস্তব
87.20
বেগবন্তং মহারৌদ্রং বিদ্যুজ্জিহ্বং প্রমাথিনম্
শরৈশ্চতুর্ভিশ্চতুরো নিজঘান মহারথঃ
87.21
ততঃ পুনরমেয়াত্মা শরবর্ষং দুরাসদম্
মুমোচ ভরতশ্রেষ্ঠ নিশাচরবলং প্রতি
87.22
তত্তু দৃষ্ট্বা মহত্কর্ম পুত্রস্য তব মারিষ
ক্রোধেনাভিপ্রজজ্বাল ভৈমসেনির্মহাবলঃ
87.23
বিস্ফার্য চ মহচ্চাপমিন্দ্রাশনিসমস্বনম্
অভিদুদ্রাব বেগেন দুর্যোধনমরিংদমম্
87.24
তমাপতন্তমুদ্বীক্ষ্য কালসৃষ্টমিবান্তকম্
ন বিব্যথে মহারাজ পুত্রো দুর্যোধনস্তব
87.25
অথৈনমব্রবীত্ক্রুদ্ধঃ ক্রূরঃ সংরক্তলোচনঃ
যে ত্বয়া সুনৃশংসেন দীর্ঘকালং প্রবাসিতাঃ
যচ্চ তে পাণ্ডবা রাজংশ্ছলদ্যূতে পরাজিতাঃ
87.26
যচ্চৈব দ্রৌপদী কৃষ্ণা একবস্ত্রা রজস্বলা
সভামানীয় দুর্বুদ্ধে বহুধা ক্লেশিতা ত্বয়া
87.27
তব চ প্রিয়কামেন আশ্রমস্থা দুরাত্মনা
সৈন্ধবেন পরিক্লিষ্টা পরিভূয় পিতৄন্মম
87.28
এতেষামবমানানামন্যেষাং চ কুলাধম
অন্তমদ্য গমিষ্যামি যদি নোত্সৃজসে রণম্
87.29
এবমুক্ত্বা তু হৈডিম্বো মহদ্বিস্ফার্য কার্মুকম্
সংদশ্য দশনৈরোষ্ঠং সৃক্কিণী পরিসংলিহন্
87.30
শরবর্ষেণ মহতা দুর্যোধনমবাকিরৎ
পর্বতং বারিধারাভিঃ প্রাবৃষীব বলাহকঃ