Utshovঅধ্যায় 86
86.1
সংজয় উবাচ
বর্তমানে তথা রৌদ্রে রাজন্বীরবরক্ষয়ে
শকুনিঃ সৌবলঃ শ্রীমান্পাণ্ডবান্সমুপাদ্রবৎ
86.2
তথৈব সাত্বতো রাজন্হার্দিক্যঃ পরবীরহা
অভ্যদ্রবত সংগ্রামে পাণ্ডবানামনীকিনীম্
86.3
ততঃ কাম্বোজমুখ্যানাং নদীজানাং চ বাজিনাম্
আরট্টানাং মহীজানাং সিন্ধুজানাং চ সর্বশঃ
86.4
বনায়ুজানাং শুভ্রাণাং তথা পর্বতবাসিনাম্
যে চাপরে তিত্তিরজা জবনা বাতরংহসঃ
86.5
সুবর্ণালংকৃতৈরেতৈর্বর্মবদ্ভিঃ সুকল্পিতৈঃ
হয়ৈর্বাতজবৈর্মুখ্যৈঃ পাণ্ডবস্য সুতো বলী
অভ্যবর্তত তত্সৈন্যং হৃষ্টরূপঃ পরংতপঃ
86.6
অর্জুনস্যাথ দায়াদ ইরাবান্নাম বীর্যবান্
সুতায়াং নাগরাজস্য জাতঃ পার্থেন ধীমতা
86.7
ঐরাবতেন সা দত্তা অনপত্যা মহাত্মনা
পত্যৌ হতে সুপর্ণেন কৃপণা দীনচেতনা
86.8
ভার্যার্থং তাং চ জগ্রাহ পার্থঃ কামবশানুগাম্
এবমেষ সমুত্পন্নঃ পরক্ষেত্রেঽর্জুনাত্মজঃ
86.9
স নাগলোকে সংবৃদ্ধো মাত্রা চ পরিরক্ষিতঃ
পিতৃব্যেণ পরিত্যক্তঃ পার্থদ্বেষাদ্দুরাত্মনা
86.10
রূপবান্বীর্যসংপন্নো গুণবান্সত্যবিক্রমঃ
ইন্দ্রলোকং জগামাশু শ্রুত্বা তত্রার্জুনং গতম্
86.11
সোঽভিগম্য মহাত্মানং পিতরং সত্যবিক্রমম্
অভ্যবাদয়দব্যগ্রো বিনয়েন কৃতাঞ্জলিঃ
ইরাবানস্মি ভদ্রং তে পুত্রশ্চাহং তবাভিভো
86.12
মাতুঃ সমাগমো যশ্চ তত্সর্বং প্রত্যবেদয়ৎ
তচ্চ সর্বং যথাবৃত্তমনুসস্মার পাণ্ডবঃ
86.13
পরিষ্বজ্য সুতং চাপি সোঽঽত্মনঃ সদৃশং গুণৈঃ
প্রীতিমানভবত্পার্থো দেবরাজনিবেশনে
86.14
সোঽর্জুনেন সমাজ্ঞপ্তো দেবলোকে তদা নৃপ
প্রীতিপূর্বং মহাবাহুঃ স্বকার্যং প্রতি ভারত
যুদ্ধকালে ত্বয়াস্মাকং সাহ্যং দেয়মিতি প্রভো
86.15
বাঢমিত্যেবমুক্ত্বা চ যুদ্ধকাল উপাগতঃ
কামবর্ণজবৈরশ্বৈঃ সংবৃতো বহুভির্নৃপ
86.16
তে হয়াঃ কাঞ্চনাপীডা নানাবর্ণা মনোজবাঃ
উত্পেতুঃ সহসা রাজন্হংসা ইব মহোদধৌ
86.17
তে ত্বদীয়ান্সমাসাদ্য হয়সংঘান্মহাজবান্
ক্রোডৈঃ ক্রোডানভিঘ্নন্তো ঘোণাভিশ্চ পরস্পরম্
নিপেতুঃ সহসা রাজন্সুবেগাভিহতা ভুবি
86.18
নিপতদ্ভিস্তথা তৈশ্চ হয়সংঘৈঃ পরস্পরম্
শুশ্রুবে দারুণঃ শব্দঃ সুপর্ণপতনে যথা
86.19
তথৈব চ মহারাজ সমেত্যান্যোন্যমাহবে
পরস্পরবধং ঘোরং চক্রুস্তে হয়সাদিনঃ
86.20
তস্মিংস্তথা বর্তমানে সংকুলে তুমুলে ভৃশম্
উভয়োরপি সংশান্তা হয়সংঘাঃ সমন্ততঃ
86.21
প্রক্ষীণসায়কাঃ শূরা নিহতাশ্বাঃ শ্রমাতুরাঃ
বিলয়ং সমনুপ্রাপ্তাস্তক্ষমাণাঃ পরস্পরম্
86.22
ততঃ ক্ষীণে হয়ানীকে কিংচিচ্ছেষে চ ভারত
সৌবলস্যাত্মজাঃ শূরা নির্গতা রণমূর্ধনি
86.23
বায়ুবেগসমস্পর্শা জবে বায়ুসমাংস্তথা
আরুহ্য শীলসংপন্নান্বয়ঃস্থাংস্তুরগোত্তমান্
86.24
গজো গবাক্ষো বৃষকশ্চর্মবানার্জবঃ শুকঃ
ষডেতে বলসংপন্না নির্যয়ুর্মহতো বলাৎ
86.25
বার্যমাণাঃ শকুনিনা স্বৈশ্চ যোধৈর্মহাবলৈঃ
সংনদ্ধা যুদ্ধকুশলা রৌদ্ররূপা মহাবলাঃ
86.26
তদনীকং মহাবাহো ভিত্ত্বা পরমদুর্জয়ম্
বলেন মহতা যুক্তাঃ স্বর্গায় বিজয়ৈষিণঃ
বিবিশুস্তে তদা হৃষ্টা গান্ধারা যুদ্ধদুর্মদাঃ
86.27
তান্প্রবিষ্টাংস্তদা দৃষ্ট্বা ইরাবানপি বীর্যবান্
অব্রবীত্সমরে যোধান্বিচিত্রাভরণায়ুধান্
86.28
যথৈতে ধার্তরাষ্ট্রস্য যোধাঃ সানুগবাহনাঃ
হন্যন্তে সমরে সর্বে তথা নীতির্বিধীয়তাম্
86.29
বাঢমিত্যেবমুক্ত্বা তে সর্বে যোধা ইরাবতঃ
জঘ্নুস্তে বৈ পরানীকং দুর্জয়ং সমরে পরৈঃ
86.30
তদনীকমনীকেন সমরে বীক্ষ্য পাতিতম্
অমৃষ্যমাণাস্তে সর্বে সুবলস্যাত্মজা রণে
ইরাবন্তমভিদ্রুত্য সর্বতঃ পর্যবারয়ন্
86.31
তাডয়ন্তঃ শিতৈঃ প্রাসৈশ্চোদয়ন্তঃ পরস্পরম্
তে শূরাঃ পর্যধাবন্ত কুর্বন্তো মহদাকুলম্
86.32
ইরাবানথ নির্ভিন্নঃ প্রাসৈস্তীক্ষ্ণৈর্মহাত্মভিঃ
স্রবতা রুধিরেণাক্তস্তোত্ত্রৈর্বিদ্ধ ইব দ্বিপঃ
86.33
উরস্যপি চ পৃষ্ঠে চ পার্শ্বয়োশ্চ ভৃশাহতঃ
একো বহুভিরত্যর্থং ধৈর্যাদ্রাজন্ন বিব্যথে
86.34
ইরাবানথ সংক্রুদ্ধঃ সর্বাংস্তান্নিশিতৈঃ শরৈঃ
মোহয়ামাস সমরে বিদ্ধ্বা পরপুরংজয়ঃ
86.35
প্রাসানুদ্ধৃত্য সর্বাংশ্চ স্বশরীরাদরিংদমঃ
তৈরেব তাডয়ামাস সুবলস্যাত্মজান্রণে
86.36
নিকৃষ্য নিশিতং খড্গং গৃহীত্বা চ শরাবরম্
পদাতিস্তূর্ণমাগচ্ছজ্জিঘাংসুঃ সৌবলান্যুধি
86.37
ততঃ প্রত্যাগতপ্রাণাঃ সর্বে তে সুবলাত্মজাঃ
ভূয়ঃ ক্রোধসমাবিষ্টা ইরাবন্তমথাদ্রবন্
86.38
ইরাবানপি খড্গেন দর্শয়ন্পাণিলাঘবম্
অভ্যবর্তত তান্সর্বান্সৌবলান্বলদর্পিতঃ
86.39
লাঘবেনাথ চরতঃ সর্বে তে সুবলাত্মজাঃ
অন্তরং নাধ্যগচ্ছন্ত চরন্তঃ শীঘ্রগামিনঃ
86.40
ভূমিষ্ঠমথ তং সংখ্যে সংপ্রদৃশ্য ততঃ পুনঃ
পরিবার্য ভৃশং সর্বে গ্রহীতুমুপচক্রমুঃ
86.41
অথাভ্যাশগতানাং স খড্গেনামিত্রকর্শনঃ
উপহস্তাবহস্তাভ্যাং তেষাং গাত্রাণ্যকৃন্তত
86.42
আয়ুধানি চ সর্বেষাং বাহূনপি চ ভূষিতান্
অপতন্ত নিকৃত্তাঙ্গা গতা ভূমিং গতাসবঃ
86.43
বৃষকস্তু মহারাজ বহুধা পরিবিক্ষতঃ
অমুচ্যত মহারৌদ্রাত্তস্মাদ্বীরাবকর্তনাৎ
86.44
তান্সর্বান্পতিতান্দৃষ্ট্বা ভীতো দুর্যোধনস্ততঃ
অভ্যভাষত সংক্রুদ্ধো রাক্ষসং ঘোরদর্শনম্
86.45
আর্শ্যশৃঙ্গিং মহেষ্বাসং মায়াবিনমরিংদমম্
বৈরিণং ভীমসেনস্য পূর্বং বকবধেন বৈ
86.46
পশ্য বীর যথা হ্যেষ ফল্গুনস্য সুতো বলী
মায়াবী বিপ্রিয়ং ঘোরমকার্ষীন্মে বলক্ষয়ম্
86.47
ত্বং চ কামগমস্তাত মায়াস্ত্রে চ বিশারদঃ
কৃতবৈরশ্চ পার্থেন তস্মাদেনং রণে জহি
86.48
বাঢমিত্যেবমুক্ত্বা তু রাক্ষসো ঘোরদর্শনঃ
প্রয়য়ৌ সিংহনাদেন যত্রার্জুনসুতো যুবা
86.49
স্বারূঢৈর্যুদ্ধকুশলৈর্বিমলপ্রাসয়োধিভিঃ
বীরৈঃ প্রহারিভির্যুক্তঃ স্বৈরনীকৈঃ সমাবৃতঃ
নিহন্তুকামঃ সমরে ইরাবন্তং মহাবলম্
86.50
ইরাবানপি সংক্রুদ্ধস্ত্বরমাণঃ পরাক্রমী
হন্তুকামমমিত্রঘ্নো রাক্ষসং প্রত্যবারয়ৎ
86.51
তমাপতন্তং সংপ্রেক্ষ্য রাক্ষসঃ সুমহাবলঃ
ত্বরমাণস্ততো মায়াং প্রয়োক্তুমুপচক্রমে
86.52
তেন মায়াময়াঃ কৢপ্তা হয়াস্তাবন্ত এব হি
স্বারূঢা রাক্ষসৈর্ঘোরৈঃ শূলপট্টিশপাণিভিঃ
86.53
তে সংরব্ধাঃ সমাগম্য দ্বিসাহস্রাঃ প্রহারিণঃ
অচিরাদ্গময়ামাসুঃ প্রেতলোকং পরস্পরম্
86.54
তস্মিংস্তু নিহতে সৈন্যে তাবুভৌ যুদ্ধদুর্মদৌ
সংগ্রামে ব্যবতিষ্ঠেতাং যথা বৈ বৃত্রবাসবৌ
86.55
আদ্রবন্তমভিপ্রেক্ষ্য রাক্ষসং যুদ্ধদুর্মদম্
ইরাবান্ক্রোধসংরব্ধঃ প্রত্যধাবন্মহাবলঃ
86.56
সমভ্যাশগতস্যাজৌ তস্য খড্গেন দুর্মতেঃ
চিচ্ছেদ কার্মুকং দীপ্তং শরাবাপং চ পঞ্চকম্
86.57
স নিকৃত্তং ধনুর্দৃষ্ট্বা খং জবেন সমাবিশৎ
ইরাবন্তমভিক্রুদ্ধং মোহয়ন্নিব মায়য়া
86.58
ততোঽন্তরিক্ষমুত্পত্য ইরাবানপি রাক্ষসম্
বিমোহয়িত্বা মায়াভিস্তস্য গাত্রাণি সায়কৈঃ
চিচ্ছেদ সর্বমর্মজ্ঞঃ কামরূপো দুরাসদঃ
86.59
তথা স রাক্ষসশ্রেষ্ঠঃ শরৈঃ কৃত্তঃ পুনঃ পুনঃ
সংবভূব মহারাজ সমবাপ চ যৌবনম্
86.60
মায়া হি সহজা তেষাং বয়ো রূপং চ কামজম্
এবং তদ্রাক্ষসস্যাঙ্গং ছিন্নং ছিন্নং ব্যরোহত
86.61
ইরাবানপি সংক্রুদ্ধো রাক্ষসং তং মহাবলম্
পরশ্বধেন তীক্ষ্ণেন চিচ্ছেদ চ পুনঃ পুনঃ
86.62
স তেন বলিনা বীরশ্ছিদ্যমান ইব দ্রুমঃ
রাক্ষসো ব্যনদদ্ঘোরং স শব্দস্তুমুলোঽভবৎ
86.63
পরশ্বধক্ষতং রক্ষঃ সুস্রাব রুধিরং বহু
ততশ্চুক্রোধ বলবাংশ্চক্রে বেগং চ সংয়ুগে
86.64
আর্শ্যশৃঙ্গিস্ততো দৃষ্ট্বা সমরে শত্রুমূর্জিতম্
কৃত্বা ঘোরং মহদ্রূপং গ্রহীতুমুপচক্রমে
সংগ্রামশিরসো মধ্যে সর্বেষাং তত্র পশ্যতাম্
86.65
তাং দৃষ্ট্বা তাদৃশীং মায়াং রাক্ষসস্য মহাত্মনঃ
ইরাবানপি সংক্রুদ্ধো মায়াং স্রষ্টুং প্রচক্রমে
86.66
তস্য ক্রোধাভিভূতস্য সংয়ুগেষ্বনিবর্তিনঃ
যোঽন্বয়ো মাতৃকস্তস্য স এনমভিপেদিবান্
86.67
স নাগৈর্বহুশো রাজন্সর্বতঃ সংবৃতো রণে
দধার সুমহদ্রূপমনন্ত ইব ভোগবান্
ততো বহুবিধৈর্নাগৈশ্ছাদয়ামাস রাক্ষসম্
86.68
ছাদ্যমানস্তু নাগৈঃ স ধ্যাত্বা রাক্ষসপুংগবঃ
সৌপর্ণং রূপমাস্থায় ভক্ষয়ামাস পন্নগান্
86.69
মায়য়া ভক্ষিতে তস্মিন্নন্বয়ে তস্য মাতৃকে
বিমোহিতমিরাবন্তমসিনা রাক্ষসোঽবধীৎ
86.70
সকুণ্ডলং সমুকুটং পদ্মেন্দুসদৃশপ্রভম্
ইরাবতঃ শিরো রক্ষঃ পাতয়ামাস ভূতলে
86.71
তস্মিংস্তু নিহতে বীরে রাক্ষসেনার্জুনাত্মজে
বিশোকাঃ সমপদ্যন্ত ধার্তরাষ্ট্রাঃ সরাজকাঃ
86.72
তস্মিন্মহতি সংগ্রামে তাদৃশে ভৈরবে পুনঃ
মহান্ব্যতিকরো ঘোরঃ সেনয়োঃ সমপদ্যত
86.73
হয়া গজাঃ পদাতাশ্চ বিমিশ্রা দন্তিভির্হতাঃ
রথাশ্চ দন্তিনশ্চৈব পত্তিভিস্তত্র সূদিতাঃ
86.74
তথা পত্তিরথৌঘাশ্চ হয়াশ্চ বহবো রণে
রথিভির্নিহতা রাজংস্তব তেষাং চ সংকুলে
86.75
অজানন্নর্জুনশ্চাপি নিহতং পুত্রমৌরসম্
জঘান সমরে শূরান্রাজ্ঞস্তান্ভীষ্মরক্ষিণঃ
86.76
তথৈব তাবকা রাজন্সৃঞ্জয়াশ্চ মহাবলাঃ
জুহ্বতঃ সমরে প্রাণান্নিজঘ্নুরিতরেতরম্
86.77
মুক্তকেশা বিকবচা বিরথাশ্ছিন্নকার্মুকাঃ
বাহুভিঃ সময়ুধ্যন্ত সমবেতাঃ পরস্পরম্
86.78
তথা মর্মাতিগৈর্ভীষ্মো নিজঘান মহারথান্
কম্পয়ন্সমরে সেনাং পাণ্ডবানাং মহাবলঃ
86.79
তেন যৌধিষ্ঠিরে সৈন্যে বহবো মানবা হতাঃ
দন্তিনঃ সাদিনশ্চৈব রথিনোঽথ হয়াস্তথা
86.80
তত্র ভারত ভীষ্মস্য রণে দৃষ্ট্বা পরাক্রমম্
অত্যদ্ভুতমপশ্যাম শক্রস্যেব পরাক্রমম্
86.81
তথৈব ভীমসেনস্য পার্ষতস্য চ ভারত
রৌদ্রমাসীত্তদা যুদ্ধং সাত্বতস্য চ ধন্বিনঃ
86.82
দৃষ্ট্বা দ্রোণস্য বিক্রান্তং পাণ্ডবান্ভয়মাবিশৎ
এক এব রণে শক্তো হন্তুমস্মান্সসৈনিকান্
86.83
কিং পুনঃ পৃথিবীশূরৈর্যোধব্রাতৈঃ সমাবৃতঃ
ইত্যব্রুবন্মহারাজ রণে দ্রোণেন পীডিতাঃ
86.84
বর্তমানে তথা রৌদ্রে সংগ্রামে ভরতর্ষভ
উভয়োঃ সেনয়োঃ শূরা নামৃষ্যন্ত পরস্পরম্
86.85
আবিষ্টা ইব যুধ্যন্তে রক্ষোভূতা মহাবলাঃ
তাবকাঃ পাণ্ডবেয়াশ্চ সংরব্ধাস্তাত ধন্বিনঃ
86.86
ন স্ম পশ্যামহে কংচিদ্যঃ প্রাণান্পরিরক্ষতি
সংগ্রামে দৈত্যসংকাশে তস্মিন্যোদ্ধা নরাধিপ