Utshovঅধ্যায় 85
85.1
ধৃতরাষ্ট্র উবাচ
দৃষ্ট্বা মম হতান্পুত্রান্বহূনেকেন সংজয়
ভীষ্মো দ্রোণঃ কৃপশ্চৈব কিমকুর্বত সংয়ুগে
85.2
অহন্যহনি মে পুত্রাঃ ক্ষয়ং গচ্ছন্তি সংজয়
মন্যেঽহং সর্বথা সূত দৈবেনোপহতা ভৃশম্
85.3
যত্র মে তনয়াঃ সর্বে জীয়ন্তে ন জয়ন্ত্যুত
যত্র ভীষ্মস্য দ্রোণস্য কৃপস্য চ মহাত্মনঃ
85.4
সৌমদত্তেশ্চ বীরস্য ভগদত্তস্য চোভয়োঃ
অশ্বত্থাম্নস্তথা তাত শূরাণাং সুমহাত্মনাম্
85.5
অন্যেষাং চৈব বীরাণাং মধ্যগাস্তনয়া মম
যদহন্যন্ত সংগ্রামে কিমন্যদ্ভাগধেয়তঃ
85.6
ন হি দুর্যোধনো মন্দঃ পুরা প্রোক্তমবুধ্যত
বার্যমাণো ময়া তাত ভীষ্মেণ বিদুরেণ চ
85.7
গান্ধার্যা চৈব দুর্মেধাঃ সততং হিতকাম্যয়া
নাববুধ্যত্পুরা মোহাত্তস্য প্রাপ্তমিদং ফলম্
85.8
যদ্ভীমসেনঃ সমরে পুত্রান্মম বিচেতসঃ
অহন্যহনি সংক্রুদ্ধো নয়তে যমসাদনম্
85.9
সংজয় উবাচ
ইদং তত্সমনুপ্রাপ্তং ক্ষত্তুর্বচনমুত্তমম্
ন বুদ্ধবানসি বিভো প্রোচ্যমানং হিতং তদা
85.10
নিবারয় সুতান্দ্যূতাত্পাণ্ডবান্মা দ্রুহেতি চ
সুহৃদাং হিতকামানাং ব্রুবতাং তত্তদেব চ
85.11
ন শুশ্রূষসি যদ্বাক্যং মর্ত্যঃ পথ্যমিবৌষধম্
তদেব ত্বামনুপ্রাপ্তং বচনং সাধু ভাষিতম্
85.12
বিদুরদ্রোণভীষ্মাণাং তথান্যেষাং হিতৈষিণাম্
অকৃত্বা বচনং পথ্যং ক্ষয়ং গচ্ছন্তি কৌরবাঃ
85.13
তদেতত্সমতিক্রান্তং পূর্বমেব বিশাং পতে
তস্মান্মে শৃণু তত্ত্বেন যথা যুদ্ধমবর্তত
85.14
মধ্যাহ্নে সুমহারৌদ্রঃ সংগ্রামঃ সমপদ্যত
লোকক্ষয়করো রাজংস্তন্মে নিগদতঃ শৃণু
85.15
ততঃ সর্বাণি সৈন্যানি ধর্মপুত্রস্য শাসনাৎ
সংরব্ধান্যভ্যধাবন্ত ভীষ্মমেব জিঘাংসয়া
85.16
ধৃষ্টদ্যুম্নঃ শিখণ্ডী চ সাত্যকিশ্চ মহারথঃ
যুক্তানীকা মহারাজ ভীষ্মমেব সমভ্যয়ুঃ
85.17
অর্জুনো দ্রৌপদেয়াশ্চ চেকিতানশ্চ সংয়ুগে
দুর্যোধনসমাদিষ্টান্রাজ্ঞঃ সর্বান্সমভ্যয়ুঃ
85.18
অভিমন্যুস্তথা বীরো হৈডিম্বশ্চ মহারথঃ
ভীমসেনশ্চ সংক্রুদ্ধস্তেঽভ্যধাবন্ত কৌরবান্
85.19
ত্রিধাভূতৈরবধ্যন্ত পাণ্ডবৈঃ কৌরবা যুধি
তথৈব কৌরবে রাজন্নবধ্যন্ত পরে রণে
85.20
দ্রোণস্তু রথিনাং শ্রেষ্ঠঃ সোমকান্সৃঞ্জয়ৈঃ সহ
অভ্যদ্রবত সংক্রুদ্ধঃ প্রেষয়িষ্যন্যমক্ষয়ম্
85.21
তত্রাক্রন্দো মহানাসীত্সৃঞ্জয়ানাং মহাত্মনাম্
বধ্যতাং সমরে রাজন্ভারদ্বাজেন ধন্বিনা
85.22
দ্রোণেন নিহতাস্তত্র ক্ষত্রিয়া বহবো রণে
বিবেষ্টন্তঃ স্ম দৃশ্যন্তে ব্যাধিক্লিষ্টা নরা ইব
85.23
কূজতাং ক্রন্দতাং চৈব স্তনতাং চৈব সংয়ুগে
অনিশং শ্রূয়তে শব্দঃ ক্ষুত্কৃশানাং নৃণামিব
85.24
তথৈব কৌরবেয়াণাং ভীমসেনো মহাবলঃ
চকার কদনং ঘোরং ক্রুদ্ধঃ কাল ইবাপরঃ
85.25
বধ্যতাং তত্র সৈন্যানামন্যোন্যেন মহারণে
প্রাবর্তত নদী ঘোরা রুধিরৌঘপ্রবাহিনী
85.26
স সংগ্রামো মহারাজ ঘোররূপোঽভবন্মহান্
কুরূণাং পাণ্ডবানাং চ যমরাষ্ট্রবিবর্ধনঃ
85.27
ততো ভীমো রণে ক্রুদ্ধো রভসশ্চ বিশেষতঃ
গজানীকং সমাসাদ্য প্রেষয়ামাস মৃত্যবে
85.28
তত্র ভারত ভীমেন নারাচাভিহতা গজাঃ
পেতুঃ সেদুশ্চ নেদুশ্চ দিশশ্চ পরিবভ্রমুঃ
85.29
ছিন্নহস্তা মহানাগাশ্ছিন্নপাদাশ্চ মারিষ
ক্রৌঞ্চবদ্ব্যনদন্ভীতাঃ পৃথিবীমধিশিশ্যিরে
85.30
নকুলঃ সহদেবশ্চ হয়ানীকমভিদ্রুতৌ
তে হয়াঃ কাঞ্চনাপীডা রুক্মভাণ্ডপরিচ্ছদাঃ
বধ্যমানা ব্যদৃশ্যন্ত শতশোঽথ সহস্রশঃ
85.31
পতদ্ভিশ্চ হয়ৈ রাজন্সমাস্তীর্যত মেদিনী
নির্জিহ্বৈশ্চ শ্বসদ্ভিশ্চ কূজদ্ভিশ্চ গতাসুভিঃ
হয়ৈর্বভৌ নরশ্রেষ্ঠ নানারূপধরৈর্ধরা
85.32
অর্জুনেন হতৈঃ সংখ্যে তথা ভারত বাজিভিঃ
প্রবভৌ বসুধা ঘোরা তত্র তত্র বিশাং পতে
85.33
রথৈর্ভগ্নৈর্ধ্বজৈশ্ছিন্নৈশ্ছত্রৈশ্চ সুমহাপ্রভৈঃ
হারৈর্নিষ্কৈঃ সকেয়ূরৈঃ শিরোভিশ্চ সকুণ্ডলৈঃ
85.34
উষ্ণীষৈরপবিদ্ধৈশ্চ পতাকাভিশ্চ সর্বষঃ
অনুকর্ষৈঃ শুভৈ রাজন্যোক্ত্রৈশ্চব্যসুরশ্মিভিঃ
সংছন্না বসুধা ভাতি বসন্তে কুসুমৈরিব
85.35
এবমেষ ক্ষয়ো বৃত্তঃ পাণ্ডূনামপি ভারত
ক্রুদ্ধে শাংতনবে ভীষ্মে দ্রোণে চ রথসত্তমে
85.36
অশ্বত্থাম্নি কৃপে চৈব তথৈব কৃতবর্মণি
তথেতরেষু ক্রুদ্ধেষু তাবকানামপি ক্ষয়ঃ