Utshovঅধ্যায় 84
84.1
সংজয় উবাচ
ভীষ্মং তু সমরে ক্রুদ্ধং প্রতপন্তং সমন্ততঃ
ন শেকুঃ পাণ্ডবা দ্রষ্টুং তপন্তমিব ভাস্করম্
84.2
ততঃ সর্বাণি সৈন্যানি ধর্মপুত্রস্য শাসনাৎ
অভ্যদ্রবন্ত গাঙ্গেয়ং মর্দয়ন্তং শিতৈঃ শরৈঃ
84.3
স তু ভীষ্মো রণশ্লাঘী সোমকান্সহসৃঞ্জয়ান্
পাঞ্চালাংশ্চ মহেষ্বাসান্পাতয়ামাস সায়কৈঃ
84.4
তে বধ্যমানা ভীষ্মেণ পাঞ্চালাঃ সোমকৈঃ সহ
ভীষ্মমেবাভ্যয়ুস্তূর্ণং ত্যক্ত্বা মৃত্যুকৃতং ভয়ম্
84.5
স তেষাং রথিনাং বীরো ভীষ্মঃ শাংতনবো যুধি
চিচ্ছেদ সহসা রাজন্বাহূনথ শিরাংসি চ
84.6
বিরথান্রথিনশ্চক্রে পিতা দেবব্রতস্তব
পতিতান্যুত্তমাঙ্গানি হয়েভ্যো হয়সাদিনাম্
84.7
নির্মনুষ্যাংশ্চ মাতঙ্গাঞ্শয়ানান্পর্বতোপমান্
অপশ্যাম মহারাজ ভীষ্মাস্ত্রেণ প্রমোহিতান্
84.8
ন তত্রাসীত্পুমান্কশ্চিত্পাণ্ডবানাং বিশাং পতে
অন্যত্র রথিনাং শ্রেষ্ঠাদ্ভীমসেনান্মহাবলাৎ
84.9
স হি ভীষ্মং সমাসাদ্য তাডয়ামাস সংয়ুগে
ততো নিষ্টানকো ঘোরো ভীষ্মভীমসমাগমে
84.10
বভূব সর্বসৈন্যানাং ঘোররূপো ভয়ানকঃ
তথৈব পাণ্ডবা হৃষ্টাঃ সিংহনাদমথানদন্
84.11
ততো দুর্যোধনো রাজা সোদর্যৈঃ পরিবারিতঃ
ভীষ্মং জুগোপ সমরে বর্তমানে জনক্ষয়ে
84.12
ভীমস্তু সারথিং হত্বা ভীষ্মস্য রথিনাং বরঃ
বিদ্রুতাশ্বে রথে তস্মিন্দ্রবমাণে সমন্ততঃ
সুনাভস্য শরেণাশু শিরশ্চিচ্ছেদ চারিহা
84.13
ক্ষুরপ্রেণ সুতীক্ষ্ণেন স হতো ন্যপতদ্ভুবি
হতে তস্মিন্মহারাজ তব পুত্রে মহারথে
নামৃষ্যন্ত রণে শূরাঃ সোদর্যাঃ সপ্ত সংয়ুগে
84.14
আদিত্যকেতুর্বহ্বাশী কুণ্ডধারো মহোদরঃ
অপরাজিতঃ পণ্ডিতকো বিশালাক্ষঃ সুদুর্জয়ঃ
84.15
পাণ্ডবং চিত্রসংনাহা বিচিত্রকবচধ্বজাঃ
অভ্যদ্রবন্ত সংগ্রামে যোদ্ধুকামারিমর্দনাঃ
84.16
মহোদরস্তু সমরে ভীমং বিব্যাধ পত্রিভিঃ
নবভির্বজ্রসংকাশৈর্নমুচিং বৃত্রহা যথা
84.17
আদিত্যকেতুঃ সপ্তত্যা বহ্বাশী চাপি পঞ্চভিঃ
নবত্যা কুণ্ডধারস্তু বিশালাক্ষশ্চ সপ্তভিঃ
84.18
অপরাজিতো মহারাজ পরাজিষ্ণুর্মহারথঃ
শরৈর্বহুভিরানর্ছদ্ভীমসেনং মহাবলম্
84.19
রণে পণ্ডিতকশ্চৈনং ত্রিভির্বাণৈঃ সমর্দয়ৎ
স তন্ন মমৃষে ভীমঃ শত্রুভির্বধমাহবে
84.20
ধনুঃ প্রপীড্য বামেন করেণামিত্রকর্শনঃ
শিরশ্চিচ্ছেদ সমরে শরেণ নতপর্বণা
84.21
অপরাজিতস্য সুনসং তব পুত্রস্য সংয়ুগে
পরাজিতস্য ভীমেন নিপপাত শিরো মহীম্
84.22
অথাপরেণ ভল্লেন কুণ্ডধারং মহারথম্
প্রাহিণোন্মৃত্যুলোকায় সর্বলোকস্য পশ্যতঃ
84.23
ততঃ পুনরমেয়াত্মা প্রসংধায় শিলীমুখম্
প্রেষয়ামাস সমরে পণ্ডিতং প্রতি ভারত
84.24
স শরঃ পণ্ডিতং হত্বা বিবেশ ধরণীতলম্
যথা নরং নিহত্যাশু ভুজগঃ কালচোদিতঃ
84.25
বিশালাক্ষশিরশ্ছিত্ত্বা পাতয়ামাস ভূতলে
ত্রিভিঃ শরৈরদীনাত্মা স্মরন্ক্লেশং পুরাতনম্
84.26
মহোদরং মহেষ্বাসং নারাচেন স্তনান্তরে
বিব্যাধ সমরে রাজন্স হতো ন্যপতদ্ভুবি
84.27
আদিত্যকেতোঃ কেতুং চ ছিত্ত্বা বাণেন সংয়ুগে
ভল্লেন ভৃশতীক্ষ্ণেন শিরশ্চিচ্ছেদ চারিহা
84.28
বহ্বাশিনং ততো ভীমঃ শরেণ নতপর্বণা
প্রেষয়ামাস সংক্রুদ্ধো যমস্য সদনং প্রতি
84.29
প্রদুদ্রুবুস্ততস্তেঽন্যে পুত্রাস্তব বিশাং পতে
মন্যমানা হি তত্সত্যং সভায়াং তস্য ভাষিতম্
84.30
ততো দুর্যোধনো রাজা ভ্রাতৃব্যসনকর্শিতঃ
অব্রবীত্তাবকান্যোধান্ভীমোঽয়ং যুধি বধ্যতাম্
84.31
এবমেতে মহেষ্বাসাঃ পুত্রাস্তব বিশাং পতে
ভ্রাতৄন্সংদৃশ্য নিহতান্প্রাস্মরংস্তে হি তদ্বচঃ
84.32
যদুক্তবান্মহাপ্রাজ্ঞঃ ক্ষত্তা হিতমনাময়ম্
তদিদং সমনুপ্রাপ্তং বচনং দিব্যদর্শিনঃ
84.33
লোভমোহসমাবিষ্টঃ পুত্রপ্রীত্যা জনাধিপ
ন বুধ্যসে পুরা যত্তত্তথ্যমুক্তং বচো মহৎ
84.34
তথৈব হি বধার্থায় পুত্রাণাং পাণ্ডবো বলী
নূনং জাতো মহাবাহুর্যথা হন্তি স্ম কৌরবান্
84.35
ততো দুর্যোধনো রাজা ভীষ্মমাসাদ্য মারিষ
দুঃখেন মহতাবিষ্টো বিললাপাতিকর্শিতঃ
84.36
নিহতা ভ্রাতরঃ শূরা ভীমসেনেন মে যুধি
যতমানাস্তথান্যেঽপি হন্যন্তে সর্বসৈনিকাঃ
84.37
ভবাংশ্চ মধ্যস্থতয়া নিত্যমস্মানুপেক্ষতে
সোঽহং কাপথমারূঢঃ পশ্য দৈবমিদং মম
84.38
এতচ্ছ্রুত্বা বচঃ ক্রূরং পিতা দেবব্রতস্তব
দুর্যোধনমিদং বাক্যমব্রবীত্সাশ্রুলোচনম্
84.39
উক্তমেতন্ময়া পূর্বং দ্রোণেন বিদুরেণ চ
গান্ধার্যা চ যশস্বিন্যা তত্ত্বং তাত ন বুদ্ধবান্
84.40
সময়শ্চ ময়া পূর্বং কৃতো বঃ শত্রুকর্শন
নাহং যুধি বিমোক্তব্যো নাপ্যাচার্যঃ কথংচন
84.41
যং যং হি ধার্তরাষ্ট্রাণাং ভীমো দ্রক্ষ্যতি সংয়ুগে
হনিষ্যতি রণে তং তং সত্যমেতদ্ব্রবীমি তে
84.42
স ত্বং রাজন্স্থিরো ভূত্বা দৃঢাং কৃত্বা রণে মতিম্
যোধয়স্ব রণে পার্থান্স্বর্গং কৃত্বা পরায়ণম্
84.43
ন শক্যাঃ পাণ্ডবা জেতুং সেন্দ্রৈরপি সুরাসুরৈঃ
তস্মাদ্যুদ্ধে মতিং কৃত্বা স্থিরাং যুধ্যস্ব ভারত