Utshovঅধ্যায় 83
83.1
সংজয় উবাচ
পরিণাম্য নিশাং তাং তু সুখসুপ্তা জনেশ্বরাঃ
কুরবঃ পাণ্ডবাশ্চৈব পুনর্যুদ্ধায় নির্যয়ুঃ
83.2
ততঃ শব্দো মহানাসীত্সেনয়োরুভয়োরপি
নির্গচ্ছমানয়োঃ সংখ্যে সাগরপ্রতিমো মহান্
83.3
ততো দুর্যোধনো রাজা চিত্রসেনো বিবিংশতিঃ
ভীষ্মশ্চ রথিনাং শ্রেষ্ঠো ভারদ্বাজশ্চ বৈ দ্বিজঃ
83.4
একীভূতাঃ সুসংয়ত্তাঃ কৌরবাণাং মহাচমূঃ
ব্যূহায় বিদধূ রাজন্পাণ্ডবান্প্রতি দংশিতাঃ
83.5
ভীষ্মঃ কৃত্বা মহাব্যূহং পিতা তব বিশাং পতে
সাগরপ্রতিমং ঘোরং বাহনোর্মিতরঙ্গিণম্
83.6
অগ্রতঃ সর্বসৈন্যানাং ভীষ্মঃ শাংতনবো যয়ৌ
মালবৈর্দাক্ষিণাত্যৈশ্চ আবন্ত্যৈশ্চ সমন্বিতঃ
83.7
ততোঽনন্তরমেবাসীদ্ভারদ্বাজঃ প্রতাপবান্
পুলিন্দৈঃ পারদৈশ্চৈব তথা ক্ষুদ্রকমালবৈঃ
83.8
দ্রোণাদনন্তরং যত্তো ভগদত্তঃ প্রতাপবান্
মাগধৈশ্চ কলিঙ্গৈশ্চ পিশাচৈশ্চ বিশাং পতে
83.9
প্রাগ্জ্যোতিষাদনু নৃপঃ কৌসল্যোঽথ বৃহদ্বলঃ
মেকলৈস্ত্রৈপুরৈশ্চৈব চিচ্ছিলৈশ্চ সমন্বিতঃ
83.10
বৃহদ্বলাত্ততঃ শূরস্ত্রিগর্তঃ প্রস্থলাধিপঃ
কাম্বোজৈর্বহুভিঃ সার্ধং যবনৈশ্চ সহস্রশঃ
83.11
দ্রৌণিস্তু রভসঃ শূরস্ত্রিগর্তাদনু ভারত
প্রয়য়ৌ সিংহনাদেন নাদয়ানো ধরাতলম্
83.12
তথা সর্বেণ সৈন্যেন রাজা দুর্যোধনস্তদা
দ্রৌণেরনন্তরং প্রায়াত্সোদর্যৈঃ পরিবারিতঃ
83.13
দুর্যোধনাদনু কৃপস্ততঃ শারদ্বতো যয়ৌ
এবমেষ মহাব্যূহঃ প্রয়য়ৌ সাগরোপমঃ
83.14
রেজুস্তত্র পতাকাশ্চ শ্বেতচ্ছত্রাণি চাভিভো
অঙ্গদান্যথ চিত্রাণি মহার্হাণি ধনূংষি চ
83.15
তং তু দৃষ্ট্বা মহাব্যূহং তাবকানাং মহারথঃ
যুধিষ্ঠিরোঽব্রবীত্তূর্ণং পার্ষতং পৃতনাপতিম্
83.16
পশ্য ব্যূহং মহেষ্বাস নির্মিতং সাগরোপমম্
প্রতিব্যূহং ত্বমপি হি কুরু পার্ষত মাচিরম্
83.17
ততঃ স পার্ষতঃ শূরো ব্যূহং চক্রে সুদারুণম্
শৃঙ্গাটকং মহারাজ পরব্যূহবিনাশনম্
83.18
শৃঙ্গেভ্যো ভীমসেনশ্চ সাত্যকিশ্চ মহারথঃ
রথৈরনেকসাহস্রৈস্তথা হয়পদাতিভিঃ
83.19
নাভ্যামভূন্নরশ্রেষ্ঠঃ শ্বেতাশ্বো বানরধ্বজঃ
মধ্যে যুধিষ্ঠিরো রাজা মাদ্রীপুত্রৌ চ পাণ্ডবৌ
83.20
অথেতরে মহেষ্বাসাঃ সহসৈন্যা নরাধিপাঃ
ব্যূহং তং পূরয়ামাসুর্ব্যূহশাস্ত্রবিশারদাঃ
83.21
অভিমন্যুস্ততঃ পশ্চাদ্বিরাটশ্চ মহারথঃ
দ্রৌপদেয়াশ্চ সংহৃষ্টা রাক্ষসশ্চ ঘটোত্কচঃ
83.22
এবমেতং মহাব্যূহং ব্যূহ্য ভারত পাণ্ডবাঃ
অতিষ্ঠন্সমরে শূরা যোদ্ধুকামা জয়ৈষিণঃ
83.23
ভেরীশব্দাশ্চ তুমুলা বিমিশ্রাঃ শঙ্খনিস্বনৈঃ
ক্ষ্বেডিতাস্ফোটিতোত্ক্রুষ্টৈঃ সুভীমাঃ সর্বতোদিশম্
83.24
ততঃ শূরাঃ সমাসাদ্য সমরে তে পরস্পরম্
নেত্রৈরনিমিষৈ রাজন্নবৈক্ষন্ত প্রকোপিতাঃ
83.25
মনোভিস্তে মনুষ্যেন্দ্র পূর্বং যোধাঃ পরস্পরম্
যুদ্ধায় সমবর্তন্ত সমাহূয়েতরেতরম্
83.26
ততঃ প্রববৃতে যুদ্ধং ঘোররূপং ভয়াবহম্
তাবকানাং পরেষাং চ নিঘ্নতামিতরেতরম্
83.27
নারাচা নিশিতাঃ সংখ্যে সংপতন্তি স্ম ভারত
ব্যাত্তাননা ভয়করা উরগা ইব সংঘশঃ
83.28
নিষ্পেতুর্বিমলাঃ শক্ত্যস্তৈলধৌতাঃ সুতেজনাঃ
অম্বুদেভ্যো যথা রাজন্ভ্রাজমানাঃ শতহ্রদাঃ
83.29
গদাশ্চ বিমলৈঃ পট্টৈঃ পিনদ্ধাঃ স্বর্ণভূষিতাঃ
পতন্ত্যস্তত্র দৃশ্যন্তে গিরিশৃঙ্গোপমাঃ শুভাঃ
নিস্ত্রিংশাশ্চ ব্যরাজন্ত বিমলাম্বরসংনিভাঃ
83.30
আর্ষভাণি চ চর্মাণি শতচন্দ্রাণি ভারত
অশোভন্ত রণে রাজন্পতমানানি সর্বশঃ
83.31
তেঽন্যোন্যং সমরে সেনে যুধ্যমানে নরাধিপ
অশোভেতাং যথা দৈত্যদেবসেনে সমুদ্যতে
অভ্যদ্রবন্ত সমরে তেঽন্যোন্যং বৈ সমন্ততঃ
83.32
রথাস্তু রথিভিস্তূর্ণং প্রেষিতাঃ পরমাহবে
যুগৈর্যুগানি সংশ্লিষ্য যুয়ুধুঃ পার্থিবর্ষভাঃ
83.33
দন্তিনাং যুধ্যমানানাং সংঘর্ষাত্পাবকোঽভবৎ
দন্তেষু ভরতশ্রেষ্ঠ সধূমঃ সর্বতোদিশম্
83.34
প্রাসৈরভিহতাঃ কেচিদ্গজয়োধাঃ সমন্ততঃ
পতমানাঃ স্ম দৃশ্যন্তে গিরিশৃঙ্গান্নগা ইব
83.35
পাদাতাশ্চাপ্যদৃশ্যন্ত নিঘ্নন্তো হি পরস্পরম্
চিত্ররূপধরাঃ শূরা নখরপ্রাসয়োধিনঃ
83.36
অন্যোন্যং তে সমাসাদ্য কুরুপাণ্ডবসৈনিকাঃ
শস্ত্রৈর্নানাবিধৈর্ঘোরৈ রণে নিন্যুর্যমক্ষয়ম্
83.37
ততঃ শাংতনবো ভীষ্মো রথঘোষেণ নাদয়ন্
অভ্যাগমদ্রণে পাণ্ডূন্ধনুঃশব্দেন মোহয়ন্
83.38
পাণ্ডবানাং রথাশ্চাপি নদন্তো ভৈরবস্বনম্
অভ্যদ্রবন্ত সংয়ত্তা ধৃষ্টদ্যুম্নপুরোগমাঃ
83.39
ততঃ প্রববৃতে যুদ্ধং তব তেষাং চ ভারত
নরাশ্বরথনাগানাং ব্যতিষক্তং পরস্পরম্