Utshovঅধ্যায় 82
82.1
সংজয় উবাচ
বিরথং তং সমাসাদ্য চিত্রসেনং মনস্বিনম্
রথমারোপয়ামাস বিকর্ণস্তনয়স্তব
82.2
তস্মিংস্তথা বর্তমানে তুমুলে সংকুলে ভৃশম্
ভীষ্মঃ শাংতনবস্তূর্ণং যুধিষ্ঠিরমুপাদ্রবৎ
82.3
ততঃ সরথনাগাশ্বাঃ সমকম্পন্ত সৃঞ্জয়াঃ
মৃত্যোরাস্যমনুপ্রাপ্তং মেনিরে চ যুধিষ্ঠিরম্
82.4
যুধিষ্ঠিরোঽপি কৌরব্যো যমাভ্যাং সহিতঃ প্রভুঃ
মহেষ্বাসং নরব্যাঘ্রং ভীষ্মং শাংতনবং যয়ৌ
82.5
ততঃ শরসহস্রাণি প্রমুঞ্চন্পাণ্ডবো যুধি
ভীষ্মং সংছাদয়ামাস যথা মেঘো দিবাকরম্
82.6
তেন সম্যক্প্রণীতানি শরজালানি ভারত
প্রতিজগ্রাহ গাঙ্গেয়ঃ শতশোঽথ সহস্রশঃ
82.7
তথৈব শরজালানি ভীষ্মেণাস্তানি মারিষ
আকাশে সমদৃশ্যন্ত খগমানাং ব্রজা ইব
82.8
নিমেষার্ধাচ্চ কৌন্তেয়ং ভীষ্মঃ শাংতনবো যুধি
অদৃশ্যং সমরে চক্রে শরজালেন ভাগশঃ
82.9
ততো যুধিষ্ঠিরো রাজা কৌরব্যস্য মহাত্মনঃ
নারাচং প্রেষয়ামাস ক্রুদ্ধ আশীবিষোপমম্
82.10
অসংপ্রাপ্তং ততস্তং তু ক্ষুরপ্রেণ মহারথঃ
চিচ্ছেদ সমরে রাজন্ভীষ্মস্তস্য ধনুশ্চ্যুতম্
82.11
তং তু ছিত্ত্বা রণে ভীষ্মো নারাচং কালসংমিতম্
নিজঘ্নে কৌরবেন্দ্রস্য হয়ান্কাঞ্চনভূষণান্
82.12
হতাশ্বং তু রথং ত্যক্ত্বা ধর্মপুত্রো যুধিষ্ঠিরঃ
আরুরোহ রথং তূর্ণং নকুলস্য মহাত্মনঃ
82.13
যমাবপি সুসংক্রুদ্ধঃ সমাসাদ্য রণে তদা
শরৈঃ সংছাদয়ামাস ভীষ্মঃ পরপুরংজয়ঃ
82.14
তৌ তু দৃষ্ট্বা মহারাজ ভীষ্মবাণপ্রপীডিতৌ
জগামাথ পরাং চিন্তাং ভীষ্মস্য বধকাঙ্ক্ষয়া
82.15
ততো যুধিষ্ঠিরো বশ্যান্রাজ্ঞস্তান্সমচোদয়ৎ
ভীষ্মং শাংতনবং সর্বে নিহতেতি সুহৃদ্গণান্
82.16
ততস্তে পার্থিবাঃ সর্বে শ্রুত্বা পার্থস্য ভাষিতম্
মহতা রথবংশেন পরিবব্রুঃ পিতামহম্
82.17
স সমন্তাত্পরিবৃতঃ পিতা দেবব্রতস্তব
চিক্রীড ধনুষা রাজন্পাতয়ানো মহারথান্
82.18
তং চরন্তং রণে পার্থা দদৃশুঃ কৌরবং যুধি
মৃগমধ্যং প্রবিশ্যেব যথা সিংহশিশুং বনে
82.19
তর্জয়ানং রণে শূরাংস্ত্রাসয়ানং চ সায়কৈঃ
দৃষ্ট্বা ত্রেসুর্মহারাজ সিংহং মৃগগণা ইব
82.20
রণে ভরতসিংহস্য দদৃশুঃ ক্ষত্রিয়া গতিম্
অগ্নের্বায়ুসহায়স্য যথা কক্ষং দিধক্ষতঃ
82.21
শিরাংসি রথিনাং ভীষ্মঃ পাতয়ামাস সংয়ুগে
তালেভ্য ইব পক্বানি ফলানি কুশলো নরঃ
82.22
পতদ্ভিশ্চ মহারাজ শিরোভির্ধরণীতলে
বভূব তুমুলঃ শব্দঃ পততামশ্মনামিব
82.23
তস্মিংস্তু তুমুলে যুদ্ধে বর্তমানে সুদারুণে
সর্বেষামেব সৈন্যানামাসীদ্ব্যতিকরো মহান্
82.24
ভিন্নেষু তেষু ব্যূহেষু ক্ষত্রিয়া ইতরেতরম্
একমেকং সমাহূয় যুদ্ধায়ৈবোপতস্থিরে
82.25
শিখণ্ডী তু সমাসাদ্য ভরতানাং পিতামহম্
অভিদুদ্রাব বেগেন তিষ্ঠ তিষ্ঠেতি চাব্রবীৎ
82.26
অনাদৃত্য ততো ভীষ্মস্তং শিখণ্ডিনমাহবে
প্রয়য়ৌ সৃঞ্জয়ান্ক্রুদ্ধঃ স্ত্রীত্বং চিন্ত্য শিখণ্ডিনঃ
82.27
সৃঞ্জয়াস্তু ততো হৃষ্টা দৃষ্ট্বা ভীষ্মং মহারথম্
সিংহনাদান্বহুবিধাংশ্চক্রুঃ শঙ্খবিমিশ্রিতান্
82.28
ততঃ প্রববৃতে যুদ্ধং ব্যতিষক্তরথদ্বিপম্
অপরাং দিশমাস্থায় স্থিতে সবিতরি প্রভো
82.29
ধৃষ্টদ্যুম্নোঽথ পাঞ্চাল্যঃ সাত্যকিশ্চ মহারথঃ
পীডয়ন্তৌ ভৃশং সৈন্যং শক্তিতোমরবৃষ্টিভিঃ
শস্ত্রৈশ্চ বহুভী রাজঞ্জঘ্নতুস্তাবকান্রণে
82.30
তে হন্যমানাঃ সমরে তাবকাঃ পুরুষর্ষভ
আর্যাং যুদ্ধে মতিং কৃত্বা ন ত্যজন্তি স্ম সংয়ুগম্
যথোত্সাহং চ সমরে জঘ্নুর্লোকং মহারথাঃ
82.31
তত্রাক্রন্দো মহানাসীত্তাবকানাং মহাত্মনাম্
বধ্যতাং সমরে রাজন্পার্ষতেন মহাত্মনা
82.32
তং শ্রুত্বা নিনদং ঘোরং তাবকানাং মহারথৌ
বিন্দানুবিন্দাবাবন্ত্যৌ পার্ষতং প্রত্যুপস্থিতৌ
82.33
তৌ তস্য তুরগান্হত্বা ত্বরমাণৌ মহারথৌ
ছাদয়ামাসতুরুভৌ শরবর্ষেণ পার্ষতম্
82.34
অবপ্লুত্যাথ পাঞ্চাল্যো রথাত্তূর্ণং মহাবলঃ
আরুরোহ রথং তূর্ণং সাত্যকেঃ সুমহাত্মনঃ
82.35
ততো যুধিষ্ঠিরো রাজা মহত্যা সেনয়া বৃতঃ
আবন্ত্যৌ সমরে ক্রুদ্ধাবভ্যয়াত্স পরংতপৌ
82.36
তথৈব তব পুত্রোঽপি সর্বোদ্যোগেন মারিষ
বিন্দানুবিন্দাবাবন্ত্যৌ পরিবার্যোপতস্থিবান্
82.37
অর্জুনশ্চাপি সংক্রুদ্ধঃ ক্ষত্রিয়ান্ক্ষত্রিয়র্ষভ
অয়োধয়ত সংগ্রামে বজ্রপাণিরিবাসুরান্
82.38
দ্রোণশ্চ সমরে ক্রুদ্ধঃ পুত্রস্য প্রিয়কৃত্তব
ব্যধমত্সর্বপাঞ্চালাংস্তূলরাশিমিবানলঃ
82.39
দুর্যোধনপুরোগাস্তু পুত্রাস্তব বিশাং পতে
পরিবার্য রণে ভীষ্মং যুয়ুধুঃ পাণ্ডবৈঃ সহ
82.40
ততো দুর্যোধনো রাজা লোহিতায়তি ভাস্করে
অব্রবীত্তাবকান্সর্বাংস্ত্বরধ্বমিতি ভারত
82.41
যুধ্যতাং তু তথা তেষাং কুর্বতাং কর্ম দুষ্করম্
অস্তং গিরিমথারূঢে নপ্রকাশতি ভাস্করে
82.42
প্রাবর্তত নদী ঘোরা শোণিতৌঘতরঙ্গিণী
গোমায়ুগণসংকীর্ণা ক্ষণেন রজনীমুখে
82.43
শিবাভিরশিবাভিশ্চ রুবদ্ভির্ভৈরবং রবম্
ঘোরমায়োধনং জজ্ঞে ভূতসংঘসমাকুলম্
82.44
রাক্ষসাশ্চ পিশাচাশ্চ তথান্যে পিশিতাশনাঃ
সমন্ততো ব্যদৃশ্যন্ত শতশোঽথ সহস্রশঃ
82.45
অর্জুনোঽথ সুশর্মাদীন্রাজ্ঞস্তান্সপদানুগান্
বিজিত্য পৃতনামধ্যে যয়ৌ স্বশিবিরং প্রতি
82.46
যুধিষ্ঠিরোঽপি কৌরব্যো ভ্রাতৃভ্যাং সহিতস্তদা
যয়ৌ স্বশিবিরং রাজা নিশায়াং সেনয়া বৃতঃ
82.47
ভীমসেনোঽপি রাজেন্দ্র দুর্যোধনমুখান্রথান্
অবজিত্য ততঃ সংখ্যে যয়ৌ স্বশিবিরং প্রতি
82.48
দুর্যোধনোঽপি নৃপতিঃ পরিবার্য মহারণে
ভীষ্মং শাংতনবং তূর্ণং প্রয়াতঃ শিবিরং প্রতি
82.49
দ্রোণো দ্রৌণিঃ কৃপঃ শল্যঃ কৃতবর্মা চ সাত্বতঃ
পরিবার্য চমূং সর্বাং প্রয়য়ুঃ শিবিরং প্রতি
82.50
তথৈব সাত্যকী রাজন্ধৃষ্টদ্যুম্নশ্চ পার্ষতঃ
পরিবার্য রণে যোধান্যয়তুঃ শিবিরং প্রতি
82.51
এবমেতে মহারাজ তাবকাঃ পাণ্ডবৈঃ সহ
পর্যবর্তন্ত সহিতা নিশাকালে পরংতপাঃ
82.52
ততঃ স্বশিবিরং গত্বা পাণ্ডবাঃ কুরবস্তথা
ন্যবিশন্ত মহারাজ পূজয়ন্তঃ পরস্পরম্
82.53
রক্ষাং কৃত্বাত্মনঃ শূরা ন্যস্য গুল্মান্যথাবিধি
অপনীয় চ শল্যাংস্তে স্নাত্বা চ বিবিধৈর্জলৈঃ
82.54
কৃতস্বস্ত্যয়নাঃ সর্বে সংস্তূয়ন্তশ্চ বন্দিভিঃ
গীতবাদিত্রশব্দেন ব্যক্রীডন্ত যশস্বিনঃ
82.55
মুহূর্তমিব তত্সর্বমভবত্স্বর্গসংনিভম্
ন হি যুদ্ধকথাং কাংচিত্তত্র চক্রুর্মহারথাঃ
82.56
তে প্রসুপ্তে বলে তত্র পরিশ্রান্তজনে নৃপ
হস্ত্যশ্ববহুলে রাজন্প্রেক্ষণীয়ে বভূবতুঃ