Utshovঅধ্যায় 81
81.1
সংজয় উবাচ
স তুদ্যমানস্তু শরৈর্ধনংজয়ঃ; পদা হতো নাগ ইব শ্বসন্বলী
বাণেন বাণেন মহারথানাং; চিচ্ছেদ চাপানি রণে প্রসহ্য
81.2
সংছিদ্য চাপানি চ তানি রাজ্ঞাং; তেষাং রণে বীর্যবতাং ক্ষণেন
বিব্যাধ বাণৈর্যুগপন্মহাত্মা; নিঃশেষতাং তেষ্বথ মন্যমানঃ
81.3
নিপেতুরাজৌ রুধিরপ্রদিগ্ধা;স্তে তাডিতাঃ শক্রসুতেন রাজন্
বিভিন্নগাত্রাঃ পতিতোত্তমাঙ্গা; গতাসবশ্ছিন্নতনুত্রকায়াঃ
81.4
মহীং গতাঃ পার্থবলাভিভূতা; বিচিত্ররূপা যুগপদ্বিনেশুঃ
দৃষ্ট্বা হতাংস্তান্যুধি রাজপুত্রাং;স্ত্রিগর্তরাজঃ প্রয়য়ৌ ক্ষণেন
81.5
তেষাং রথানামথ পৃষ্ঠগোপা; দ্বাত্রিংশদন্যেঽব্যপতন্ত পার্থম্
তথৈব তে সংপরিবার্য পার্থং; বিকৃষ্য চাপানি মহারবাণি
অবীবৃষন্বাণমহৌঘবৃষ্ট্যা; যথা গিরিং তোয়ধরা জলৌঘৈঃ
81.6
সংপীড্যমানস্তু শরৌঘবৃষ্ট্যা; ধনংজয়স্তান্যুধি জাতরোষঃ
ষষ্ট্যা শরৈঃ সংয়তি তৈলধৌতৈ;র্জঘান তানপ্যথ পৃষ্ঠগোপান্
81.7
ষষ্টিং রথাংস্তানবজিত্য সংখ্যে; ধনংজয়ঃ প্রীতমনা যশস্বী
অথাত্বরদ্ভীষ্মবধায় জিষ্ণু;র্বলানি রাজ্ঞাং সমরে নিহত্য
81.8
ত্রিগর্তরাজো নিহতান্সমীক্ষ্য; মহারথাংস্তানথ বন্ধুবর্গান্
রণে পুরস্কৃত্য নরাধিপাংস্তা;ঞ্জগাম পার্থং ত্বরিতো বধায়
81.9
অভিদ্রুতং চাস্ত্রভৃতাং বরিষ্ঠং; ধনংজয়ং বীক্ষ্য শিখণ্ডিমুখ্যাঃ
অভ্যুদ্যয়ুস্তে শিতশস্ত্রহস্তা; রিরক্ষিষন্তো রথমর্জুনস্য
81.10
পার্থোঽপি তানাপততঃ সমীক্ষ্য; ত্রিগর্তরাজ্ঞা সহিতান্নৃবীরান্
বিধ্বংসয়িত্বা সমরে ধনুষ্মা;ন্গাণ্ডীবমুক্তৈর্নিশিতৈঃ পৃষত্কৈঃ
ভীষ্মং যিয়াসুর্যুধি সংদদর্শ; দুর্যোধনং সৈন্ধবাদীংশ্চ রাজ্ঞঃ
81.11
আবারয়িষ্ণূনভিসংপ্রয়ায়; মুহূর্তমায়োধ্য বলেন বীরঃ
উত্সৃজ্য রাজানমনন্তবীর্যো; জয়দ্রথাদীংশ্চ নৃপান্মহৌজাঃ
যয়ৌ ততো ভীমবলো মনস্বী; গাঙ্গেয়মাজৌ শরচাপপাণিঃ
81.12
যুধিষ্ঠিরশ্চোগ্রবলো মহাত্মা; সমায়য়ৌ ত্বরিতো জাতকোপঃ
মদ্রাধিপং সমভিত্যজ্য সংখ্যে; স্বভাগমাপ্তং তমনন্তকীর্তিঃ
সার্ধং স মাদ্রীসুতভীমসেনৈ;র্ভীষ্মং যয়ৌ শাংতনবং রণায়
81.13
তৈঃ সংপ্রয়ুক্তঃ স মহারথাগ্র্যৈ;র্গঙ্গাসুতঃ সমরে চিত্রয়োধী
ন বিব্যথে শাংতনবো মহাত্মা; সমাগতৈঃ পাণ্ডুসুতৈঃ সমস্তৈঃ
81.14
অথৈত্য রাজা যুধি সত্যসংধো; জয়দ্রথোঽত্যুগ্রবলো মনস্বী
চিচ্ছেদ চাপানি মহারথানাং; প্রসহ্য তেষাং ধনুষা বরেণ
81.15
যুধিষ্ঠিরং ভীমসেনং যমৌ চ; পার্থং তথা যুধি সংজাতকোপঃ
দুর্যোধনঃ ক্রোধবিষো মহাত্মা; জঘান বাণৈরনলপ্রকাশৈঃ
81.16
কৃপেণ শল্যেন শলেন চৈব; তথা বিভো চিত্রসেনেন চাজৌ
বিদ্ধাঃ শরৈস্তেঽতিবিবৃদ্ধকোপৈ;র্দেবা যথা দৈত্যগণৈঃ সমেতৈঃ
81.17
ছিন্নায়ুধং শাংতনবেন রাজা; শিখণ্ডিনং প্রেক্ষ্য চ জাতকোপঃ
অজাতশত্রুঃ সমরে মহাত্মা; শিখণ্ডিনং ক্রুদ্ধ উবাচ বাক্যম্
81.18
উক্ত্বা তথা ত্বং পিতুরগ্রতো মা;মহং হনিষ্যামি মহাব্রতং তম্
ভীষ্মং শরৌঘৈর্বিমলার্কবর্ণৈঃ; সত্যং বদামীতি কৃতা প্রতিজ্ঞা
81.19
ত্বয়া ন চৈনাং সফলাং করোষি; দেবব্রতং যন্ন নিহংসি যুদ্ধে
মিথ্যাপ্রতিজ্ঞো ভব মা নৃবীর; রক্ষস্ব ধর্মং চ কুলং যশশ্চ
81.20
প্রেক্ষস্ব ভীষ্মং যুধি ভীমবেগং; সর্বাংস্তপন্তং মম সৈন্যসংঘান্
শরৌঘজালৈরতিতিগ্মতেজৈঃ; কালং যথা মৃত্যুকৃতং ক্ষণেন
81.21
নিকৃত্তচাপঃ সমরানপেক্ষঃ; পরাজিতঃ শাংতনবেন রাজ্ঞা
বিহায় বন্ধূনথ সোদরাংশ্চ; ক্ব যাস্যসে নানুরূপং তবেদম্
81.22
দৃষ্ট্বা হি ভীষ্মং তমনন্তবীর্যং; ভগ্নং চ সৈন্যং দ্রবমাণমেবম্
ভীতোঽসি নূনং দ্রুপদস্য পুত্র; তথা হি তে মুখবর্ণোঽপ্রহৃষ্টঃ
81.23
আজ্ঞায়মানেঽপি ধনংজয়েন; মহাহবে সংপ্রসক্তে নৃবীর
কথং হি ভীষ্মাত্প্রথিতঃ পৃথিব্যাং; ভয়ং ত্বমদ্য প্রকরোষি বীর
81.24
স ধর্মরাজস্য বচো নিশম্য; রূক্ষাক্ষরং বিপ্রলাপানুবদ্ধম্
প্রত্যাদেশং মন্যমানো মহাত্মা; প্রতত্বরে ভীষ্মবধায় রাজন্
81.25
তমাপতন্তং মহতা জবেন; শিখণ্ডিনং ভীষ্মমভিদ্রবন্তম্
আবারয়ামাস হি শল্য এনং; শস্ত্রেণ ঘোরেণ সুদুর্জয়েন
81.26
স চাপি দৃষ্ট্বা সমুদীর্যমাণ;মস্ত্রং যুগান্তাগ্নিসমপ্রভাবম্
নাসৌ ব্যমুহ্যদ্দ্রুপদস্য পুত্রো; রাজন্মহেন্দ্রপ্রতিমপ্রভাবঃ
81.27
তস্থৌ চ তত্রৈব মহাধনুষ্মা;ঞ্শরৈস্তদস্ত্রং প্রতিবাধমানঃ
অথাদদে বারুণমন্যদস্ত্রং; শিখণ্ড্যথোগ্রং প্রতিঘাতায় তস্য
তদস্ত্রমস্ত্রেণ বিদার্যমাণং; খস্থাঃ সুরা দদৃশুঃ পার্থিবাশ্চ
81.28
ভীষ্মস্তু রাজন্সমরে মহাত্মা; ধনুঃ সুচিত্রং ধ্বজমেব চাপি
ছিত্ত্বানদত্পাণ্ডুসুতস্য বীরো; যুধিষ্ঠিরস্যাজমীঢস্য রাজ্ঞঃ
81.29
ততঃ সমুত্সৃজ্য ধনুঃ সবাণং; যুধিষ্ঠিরং বীক্ষ্য ভয়াভিভূতম্
গদাং প্রগৃহ্যাভিপপাত সংখ্যে; জয়দ্রথং ভীমসেনঃ পদাতিঃ
81.30
তমাপতন্তং মহতা জবেন; জয়দ্রথঃ সগদং ভীমসেনম্
বিব্যাধ ঘোরৈর্যমদণ্ডকল্পৈঃ; শিতৈঃ শরৈঃ পঞ্চশতৈঃ সমন্তাৎ
81.31
অচিন্তয়িত্বা স শরাংস্তরস্বী; বৃকোদরঃ ক্রোধপরীতচেতাঃ
জঘান বাহান্সমরে সমস্তা;নারট্টজান্সিন্ধুরাজস্য সংখ্যে
81.32
ততোঽভিবীক্ষ্যাপ্রতিমপ্রভাব;স্তবাত্মজস্ত্বরমাণো রথেন
অভ্যায়য়ৌ ভীমসেনং নিহন্তুং; সমুদ্যতাস্ত্রঃ সুররাজকল্পঃ
81.33
ভীমোঽপ্যথৈনং সহসা বিনদ্য; প্রত্যুদ্যয়ৌ গদয়া তর্জমানঃ
সমুদ্যতাং তাং যমদণ্ডকল্পাং; দৃষ্ট্বা গদাং তে কুরবঃ সমন্তাৎ
81.34
বিহায় সর্বে তব পুত্রমুগ্রং; পাতং গদায়াঃ পরিহর্তুকামাঃ
অপক্রান্তাস্তুমুলে সংবিমর্দে; সুদারুণে ভারত মোহনীয়ে
81.35
অমূঢচেতাস্ত্বথ চিত্রসেনো; মহাগদামাপতন্তীং নিরীক্ষ্য
রথং সমুত্সৃজ্য পদাতিরাজৌ; প্রগৃহ্য খড্গং বিমলং চ চর্ম
অবপ্লুতঃ সিংহ ইবাচলাগ্রা;জ্জগাম চান্যং ভুবি ভূমিদেশম্
81.36
গদাপি সা প্রাপ্য রথং সুচিত্রং; সাশ্বং সসূতং বিনিহত্য সংখ্যে
জগাম ভূমিং জ্বলিতা মহোল্কা; ভ্রষ্টাম্বরাদ্গামিব সংপতন্তী
81.37
আশ্চর্যভূতং সুমহত্ত্বদীয়া; দৃষ্ট্বৈব তদ্ভারত সংপ্রহৃষ্টাঃ
সর্বে বিনেদুঃ সহিতাঃ সমন্তা;ত্পুপূজিরে তব পুত্রং সসৈন্যাঃ