Utshovঅধ্যায় 80
80.1
সংজয় উবাচ
ততো যুধিষ্ঠিরো রাজা মধ্যং প্রাপ্তে দিবাকরে
শ্রুতায়ুষমভিপ্রেক্ষ্য চোদয়ামাস বাজিনঃ
80.2
অভ্যধাবত্ততো রাজা শ্রুতায়ুষমরিংদমম্
বিনিঘ্নন্সায়কৈস্তীক্ষ্ণৈর্নবভির্নতপর্বভিঃ
80.3
স সংবার্য রণে রাজা প্রেষিতান্ধর্মসূনুনা
শরান্সপ্ত মহেষ্বাসঃ কৌন্তেয়ায় সমর্পয়ৎ
80.4
তে তস্য কবচং ভিত্ত্বা পপুঃ শোণিতমাহবে
অসূনিব বিচিন্বন্তো দেহে তস্য মহাত্মনঃ
80.5
পাণ্ডবস্তু ভৃশং বিদ্ধস্তেন রাজ্ঞা মহাত্মনা
রণে বরাহকর্ণেন রাজানং হৃদি বিব্যধে
80.6
অথাপরেণ ভল্লেন কেতুং তস্য মহাত্মনঃ
রথশ্রেষ্ঠো রথাত্তূর্ণং ভূমৌ পার্থো ন্যপাতয়ৎ
80.7
কেতুং নিপতিতং দৃষ্ট্বা শ্রুতায়ুঃ স তু পার্থিবঃ
পাণ্ডবং বিশিখৈস্তীক্ষ্ণৈ রাজন্বিব্যাধ সপ্তভিঃ
80.8
ততঃ ক্রোধাত্প্রজজ্বাল ধর্মপুত্রো যুধিষ্ঠিরঃ
যথা যুগান্তে ভূতানি ধক্ষ্যন্নিব হুতাশনঃ
80.9
ক্রুদ্ধং তু পাণ্ডবং দৃষ্ট্বা দেবগন্ধর্বরাক্ষসাঃ
প্রবিব্যথুর্মহারাজ ব্যাকুলং চাপ্যভূজ্জগৎ
80.10
সর্বেষাং চৈব ভূতানামিদমাসীন্মনোগতম্
ত্রীঁল্লোকানদ্য সংক্রুদ্ধো নৃপোঽয়ং ধক্ষ্যতীতি বৈ
80.11
ঋষয়শ্চৈব দেবাশ্চ চক্রুঃ স্বস্ত্যয়নং মহৎ
লোকানাং নৃপ শান্ত্যর্থং ক্রোধিতে পাণ্ডবে তদা
80.12
স চ ক্রোধসমাবিষ্টঃ সৃক্কিণী পরিলেলিহন্
দধারাত্মবপুর্ঘোরং যুগান্তাদিত্যসংনিভম্
80.13
ততঃ সর্বাণি সৈন্যানি তাবকানি বিশাং পতে
নিরাশান্যভবংস্তত্র জীবিতং প্রতি ভারত
80.14
স তু ধৈর্যেণ তং কোপং সংনিবার্য মহায়শাঃ
শ্রুতায়ুষঃ প্রচিচ্ছেদ মুষ্টিদেশে মহদ্ধনুঃ
80.15
অথৈনং ছিন্নধন্বানং নারাচেন স্তনান্তরে
নির্বিভেদ রণে রাজা সর্বসৈন্যস্য পশ্যতঃ
80.16
সত্বরং চরণে রাজংস্তস্য বাহান্মহাত্মনঃ
নিজঘান শরৈঃ ক্ষিপ্রং সূতং চ সুমহাবলঃ
80.17
হতাশ্বং তু রথং ত্যক্ত্বা দৃষ্ট্বা রাজ্ঞস্তু পৌরুষম্
বিপ্রদুদ্রাব বেগেন শ্রুতায়ুঃ সমরে তদা
80.18
তস্মিঞ্জিতে মহেষ্বাসে ধর্মপুত্রেণ সংয়ুগে
দুর্যোধনবলং রাজন্সর্বমাসীত্পরাঙ্মুখম্
80.19
এতত্কৃত্বা মহারাজ ধর্মপুত্রো যুধিষ্ঠিরঃ
ব্যাত্তাননো যথা কালস্তব সৈন্যং জঘান হ
80.20
চেকিতানস্তু বার্ষ্ণেয়ো গৌতমং রথিনাং বরম্
প্রেক্ষতাং সর্বসৈন্যানাং ছাদয়ামাস সায়কৈঃ
80.21
সংনিবার্য শরাংস্তাংস্তু কৃপঃ শারদ্বতো যুধি
চেকিতানং রণে যত্তং রাজন্বিব্যাধ পত্রিভিঃ
80.22
অথাপরেণ ভল্লেন ধনুশ্চিচ্ছেদ মারিষ
সারথিং চাস্য সমরে ক্ষিপ্রহস্তো ন্যপাতয়ৎ
হয়াংশ্চাস্যাবধীদ্রাজন্নুভৌ চ পার্ষ্ণিসারথী
80.23
সোঽবপ্লুত্য রথাত্তূর্ণং গদাং জগ্রাহ সাত্বতঃ
স তয়া বীরঘাতিন্যা গদয়া গদিনাং বরঃ
গৌতমস্য হয়ান্হত্বা সারথিং চ ন্যপাতয়ৎ
80.24
ভূমিষ্ঠো গৌতমস্তস্য শরাংশ্চিক্ষেপ ষোডশ
তে শরাঃ সাত্বতং ভিত্ত্বা প্রাবিশন্ত ধরাতলম্
80.25
চেকিতানস্ততঃ ক্রুদ্ধঃ পুনশ্চিক্ষেপ তাং গদাম্
গৌতমস্য বধাকাঙ্ক্ষী বৃত্রস্যেব পুরংদরঃ
80.26
তামাপতন্তীং বিমলামশ্মগর্ভাং মহাগদাম্
শরৈরনেকসাহস্রৈর্বারয়ামাস গৌতমঃ
80.27
চেকিতানস্ততঃ খড্গং কোশাদুদ্ধৃত্য ভারত
লাঘবং পরমাস্থায় গৌতমং সমুপাদ্রবৎ
80.28
গৌতমোঽপি ধনুস্ত্যক্ত্বা প্রগৃহ্যাসিং সুসংশিতম্
বেগেন মহতা রাজংশ্চেকিতানমুপাদ্রবৎ
80.29
তাবুভৌ বলসংপন্নৌ নিস্ত্রিংশবরধারিণৌ
নিস্ত্রিংশাভ্যাং সুতীক্ষ্ণাভ্যামন্যোন্যং সংততক্ষতুঃ
80.30
নিস্ত্রিংশবেগাভিহতৌ ততস্তৌ পুরুষর্ষভৌ
ধরণীং সমনুপ্রাপ্তৌ সর্বভূতনিষেবিতাম্
মূর্ছয়াভিপরীতাঙ্গৌ ব্যায়ামেন চ মোহিতৌ
80.31
ততোঽভ্যধাবদ্বেগেন করকর্ষঃ সুহৃত্তয়া
চেকিতানং তথাভূতং দৃষ্ট্বা সমরদুর্মদম্
রথমারোপয়চ্চৈনং সর্বসৈন্যস্য পশ্যতঃ
80.32
তথৈব শকুনিঃ শূরঃ স্যালস্তব বিশাং পতে
আরোপয়দ্রথং তূর্ণং গৌতমং রথিনাং বরম্
80.33
সৌমদত্তিং তথা ক্রুদ্ধো ধৃষ্টকেতুর্মহাবলঃ
নবত্যা সায়কৈঃ ক্ষিপ্রং রাজন্বিব্যাধ বক্ষসি
80.34
সৌমদত্তিরুরঃস্থৈস্তৈর্ভৃশং বাণৈরশোভত
মধ্যংদিনে মহারাজ রশ্মিভিস্তপনো যথা
80.35
ভূরিশ্রবাস্তু সমরে ধৃষ্টকেতুং মহারথম্
হতসূতহয়ং চক্রে বিরথং সায়কোত্তমৈঃ
80.36
বিরথং চৈনমালোক্য হতাশ্বং হতসারথিম্
মহতা শরবর্ষেণ ছাদয়ামাস সংয়ুগে
80.37
স চ তং রথমুত্সৃজ্য ধৃষ্টকেতুর্মহামনাঃ
আরুরোহ ততো যানং শতানীকস্য মারিষ
80.38
চিত্রসেনো বিকর্ণশ্চ রাজন্দুর্মর্ষণস্তথা
রথিনো হেমসংনাহাঃ সৌভদ্রমভিদুদ্রুবুঃ
80.39
অভিমন্যোস্ততস্তৈস্তু ঘোরং যুদ্ধমবর্তত
শরীরস্য যথা রাজন্বাতপিত্তকফৈস্ত্রিভিঃ
80.40
বিরথাংস্তব পুত্রাংস্তু কৃত্বা রাজন্মহাহবে
ন জঘান নরব্যাঘ্রঃ স্মরন্ভীমবচস্তদা
80.41
ততো রাজ্ঞাং বহুশতৈর্গজাশ্বরথয়ায়িভিঃ
সংবৃতং সমরে ভীষ্মং দেবৈরপি দুরাসদম্
80.42
প্রয়ান্তং শীঘ্রমুদ্বীক্ষ্য পরিত্রাতুং সুতাংস্তব
অভিমন্যুং সমুদ্দিশ্য বালমেকং মহারথম্
বাসুদেবমুবাচেদং কৌন্তেয়ঃ শ্বেতবাহনঃ
80.43
চোদয়াশ্বান্হৃষীকেশ যত্রৈতে বহুলা রথাঃ
এতে হি বহবঃ শূরাঃ কৃতাস্ত্রা যুদ্ধদুর্মদাঃ
যথা ন হন্যুর্নঃ সেনাং তথা মাধব চোদয়
80.44
এবমুক্তঃ স বার্ষ্ণেয়ঃ কৌন্তেয়েনামিতৌজসা
রথং শ্বেতহয়ৈর্যুক্তং প্রেষয়ামাস সংয়ুগে
80.45
নিষ্টানকো মহানাসীত্তব সৈন্যস্য মারিষ
যদর্জুনো রণে ক্রুদ্ধঃ সংয়াতস্তাবকান্প্রতি
80.46
সমাসাদ্য তু কৌন্তেয়ো রাজ্ঞস্তান্ভীষ্মরক্ষিণঃ
সুশর্মাণমথো রাজন্নিদং বচনমব্রবীৎ
80.47
জানামি ত্বাং যুধি শ্রেষ্ঠমত্যন্তং পূর্ববৈরিণম্
পর্যায়স্যাদ্য সংপ্রাপ্তং ফলং পশ্য সুদারুণম্
অদ্য তে দর্শয়িষ্যামি পূর্বপ্রেতান্পিতামহান্
80.48
এবং সংজল্পতস্তস্য বীভত্সোঃ শত্রুঘাতিনঃ
শ্রুত্বাপি পরুষং বাক্যং সুশর্মা রথয়ূথপঃ
ন চৈনমব্রবীত্কিংচিচ্ছুভং বা যদি বাশুভম্
80.49
অভি গত্বার্জুনং বীরং রাজভির্বহুভির্বৃতঃ
পুরস্তাত্পৃষ্ঠতশ্চৈব পার্শ্বতশ্চৈব সর্বতঃ
80.50
পরিবার্যার্জুনং সংখ্যে তব পুত্রৈঃ সহানঘ
শরৈঃ সংছাদয়ামাস মেঘৈরিব দিবাকরম্
80.51
ততঃ প্রবৃত্তঃ সুমহান্সংগ্রামঃ শোণিতোদকঃ
তাবকানাং চ সমরে পাণ্ডবানাং চ ভারত