Utshovঅধ্যায় 79
79.1
ধৃতরাষ্ট্র উবাচ
বহূনীহ বিচিত্রাণি দ্বৈরথানি স্ম সংজয়
পাণ্ডূনাং মামকৈঃ সার্ধমশ্রৌষং তব জল্পতঃ
79.2
ন চৈব মামকং কংচিদ্ধৃষ্টং শংসসি সংজয়
নিত্যং পাণ্ডুসুতান্হৃষ্টানভগ্নাংশ্চৈব শংসসি
79.3
জীয়মানান্বিমনসো মামকান্বিগতৌজসঃ
বদসে সংয়ুগে সূত দিষ্টমেতদসংশয়ম্
79.4
সংজয় উবাচ
যথাশক্তি যথোত্সাহং যুদ্ধে চেষ্টন্তি তাবকাঃ
দর্শয়ানাঃ পরং শক্ত্যা পৌরুষং পুরুষর্ষভ
79.5
গঙ্গায়াঃ সুরনদ্যা বৈ স্বাদুভূতং যথোদকম্
মহোদধিগুণাভ্যাসাল্লবণত্বং নিগচ্ছতি
79.6
তথা তত্পৌরুষং রাজংস্তাবকানাং মহাত্মনাম্
প্রাপ্য পাণ্ডুসুতান্বীরান্ব্যর্থং ভবতি সংয়ুগে
79.7
ঘটমানান্যথাশক্তি কুর্বাণান্কর্ম দুষ্করম্
ন দোষেণ কুরুশ্রেষ্ঠ কৌরবান্গন্তুমর্হসি
79.8
তবাপরাধাত্সুমহান্সপুত্রস্য বিশাং পতে
পৃথিব্যাঃ প্রক্ষয়ো ঘোরো যমরাষ্ট্রবিবর্ধনঃ
79.9
আত্মদোষাত্সমুত্পন্নং শোচিতুং নার্হসে নৃপ
ন হি রক্ষন্তি রাজানঃ সর্বার্থান্নাপি জীবিতম্
79.10
যুদ্ধে সুকৃতিনাং লোকানিচ্ছন্তো বসুধাধিপাঃ
চমূং বিগাহ্য যুধ্যন্তে নিত্যং স্বর্গপরায়ণাঃ
79.11
পূর্বাহ্ণে তু মহারাজ প্রাবর্তত জনক্ষয়ঃ
তন্মমৈকমনা ভূত্বা শৃণু দেবাসুরোপমম্
79.12
আবন্ত্যৌ তু মহেষ্বাসৌ মহাত্মানৌ মহাবলৌ
ইরাবন্তমভিপ্রেক্ষ্য সমেয়াতাং রণোত্কটৌ
তেষাং প্রববৃতে যুদ্ধং তুমুলং লোমহর্ষণম্
79.13
ইরাবাংস্তু সুসংক্রুদ্ধো ভ্রাতরৌ দেবরূপিণৌ
বিব্যাধ নিশিতৈস্তূর্ণং শরৈঃ সংনতপর্বভিঃ
তাবেনং প্রত্যবিধ্যেতাং সমরে চিত্রয়োধিনৌ
79.14
যুধ্যতাং হি তথা রাজন্বিশেষো ন ব্যদৃশ্যত
যততাং শত্রুনাশায় কৃতপ্রতিকৃতৈষিণাম্
79.15
ইরাবাংস্তু ততো রাজন্ননুবিন্দস্য সায়কৈঃ
চতুর্ভিশ্চতুরো বাহাননয়দ্যমসাদনম্
79.16
ভল্লাভ্যাং চ সুতীক্ষ্ণাভ্যাং ধনুঃ কেতুং চ মারিষ
চিচ্ছেদ সমরে রাজংস্তদদ্ভুতমিবাভবৎ
79.17
ত্যক্ত্বানুবিন্দোঽথ রথং বিন্দস্য রথমাস্থিতঃ
ধনুর্গৃহীত্বা নবমং ভারসাধনমুত্তমম্
79.18
তাবেকস্থৌ রণে বীরাবাবন্ত্যৌ রথিনাং বরৌ
শরান্মুমুচতুস্তূর্ণমিরাবতি মহাত্মনি
79.19
তাভ্যাং মুক্তা মহাবেগাঃ শরাঃ কাঞ্চনভূষণাঃ
দিবাকরপথং প্রাপ্য ছাদয়ামাসুরম্বরম্
79.20
ইরাবাংস্তু ততঃ ক্রুদ্ধো ভ্রাতরৌ তৌ মহারথৌ
ববর্ষ শরবর্ষেণ সারথিং চাপ্যপাতয়ৎ
79.21
তস্মিন্নিপতিতে ভূমৌ গতসত্ত্বেঽথ সারথৌ
রথঃ প্রদুদ্রাব দিশঃ সমুদ্ভ্রান্তহয়স্ততঃ
79.22
তৌ স জিত্বা মহারাজ নাগরাজসুতাসুতঃ
পৌরুষং খ্যাপয়ংস্তূর্ণং ব্যধমত্তব বাহিনীম্
79.23
সা বধ্যমানা সমরে ধার্তরাষ্ট্রী মহাচমূঃ
বেগান্বহুবিধাংশ্চক্রে বিষং পীত্বেব মানবঃ
79.24
হৈডিম্বো রাক্ষসেন্দ্রস্তু ভগদত্তং সমাদ্রবৎ
রথেনাদিত্যবর্ণেন সধ্বজেন মহাবলঃ
79.25
ততঃ প্রাগ্জ্যোতিষো রাজা নাগরাজং সমাস্থিতঃ
যথা বজ্রধরঃ পূর্বং সংগ্রামে তারকাময়ে
79.26
তত্র দেবাঃ সগন্ধর্বা ঋষয়শ্চ সমাগতাঃ
বিশেষং ন স্ম বিবিদুর্হৈডিম্বভগদত্তয়োঃ
79.27
যথা সুরপতিঃ শক্রস্ত্রাসয়ামাস দানবান্
তথৈব সমরে রাজংস্ত্রাসয়ামাস পাণ্ডবান্
79.28
তেন বিদ্রাব্যমাণাস্তে পাণ্ডবাঃ সর্বতোদিশম্
ত্রাতারং নাভ্যবিন্দন্ত স্বেষ্বনীকেষু ভারত
79.29
ভৈমসেনিং রথস্থং তু তত্রাপশ্যাম ভারত
শেষা বিমনসো ভূত্বা প্রাদ্রবন্ত মহারথাঃ
79.30
নিবৃত্তেষু তু পাণ্ডূনাং পুনঃ সৈন্যেষু ভারত
আসীন্নিষ্টানকো ঘোরস্তব সৈন্যেষু সংয়ুগে
79.31
ঘটোত্কচস্ততো রাজন্ভগদত্তং মহারণে
শরৈঃ প্রচ্ছাদয়ামাস মেরুং গিরিমিবাম্বুদঃ
79.32
নিহত্য তাঞ্শরান্রাজা রাক্ষসস্য ধনুশ্চ্যুতান্
ভৈমসেনিং রণে তূর্ণং সর্বমর্মস্বতাডয়ৎ
79.33
স তাড্যমানো বহুভিঃ শরৈঃ সংনতপর্বভিঃ
ন বিব্যথে রাক্ষসেন্দ্রো ভিদ্যমান ইবাচলঃ
79.34
তস্য প্রাগ্জ্যোতিষঃ ক্রুদ্ধস্তোমরান্স চতুর্দশ
প্রেষয়ামাস সমরে তাংশ্চ চিচ্ছেদ রাক্ষসঃ
79.35
স তাংশ্ছিত্ত্বা মহাবাহুস্তোমরান্নিশিতৈঃ শরৈঃ
ভগদত্তং চ বিব্যাধ সপ্তত্যা কঙ্কপত্রিভিঃ
79.36
ততঃ প্রাগ্জ্যোতিষো রাজন্প্রহসন্নিব ভারত
তস্যাশ্বাংশ্চতুরঃ সংখ্যে পাতয়ামাস সায়কৈঃ
79.37
স হতাশ্বে রথে তিষ্ঠন্রাক্ষসেন্দ্রঃ প্রতাপবান্
শক্তিং চিক্ষেপ বেগেন প্রাগ্জ্যোতিষগজং প্রতি
79.38
তামাপতন্তীং সহসা হেমদণ্ডাং সুবেগিতাম্
ত্রিধা চিচ্ছেদ নৃপতিঃ সা ব্যকীর্যত মেদিনীম্
79.39
শক্তিং বিনিহতাং দৃষ্ট্বা হৈডিম্বঃ প্রাদ্রবদ্ভয়াৎ
যথেন্দ্রস্য রণাত্পূর্বং নমুচির্দৈত্যসত্তমঃ
79.40
তং বিজিত্য রণে শূরং বিক্রান্তং খ্যাতপৌরুষম্
অজেয়ং সমরে রাজন্যমেন বরুণেন চ
79.41
পাণ্ডবীং সমরে সেনাং সংমমর্দ সকুঞ্জরঃ
যথা বনগজো রাজন্মৃদ্নংশ্চরতি পদ্মিনীম্
79.42
মদ্রেশ্বরস্তু সমরে যমাভ্যাং সহ সংগতঃ
স্বস্রীয়ৌ ছাদয়াং চক্রে শরৌঘৈঃ পাণ্ডুনন্দনৌ
79.43
সহদেবস্তু সমরে মাতুলং বীক্ষ্য সংগতম্
অবারয়চ্ছরৌঘেণ মেঘো যদ্বদ্দিবাকরম্
79.44
ছাদ্যমানঃ শরৌঘেণ হৃষ্টরূপতরোঽভবৎ
তয়োশ্চাপ্যভবত্প্রীতিরতুলা মাতৃকারণাৎ
79.45
ততঃ প্রহস্য সমরে নকুলস্য মহারথঃ
অশ্বান্বৈ চতুরো রাজংশ্চতুর্ভিঃ সায়কোত্তমৈঃ
প্রেষয়ামাস সমরে যমস্য সদনং প্রতি
79.46
হতাশ্বাত্তু রথাত্তূর্ণমবপ্লুত্য মহারথঃ
আরুরোহ ততো যানং ভ্রাতুরেব যশস্বিনঃ
79.47
একস্থৌ তু রণে শূরৌ দৃঢে বিক্ষিপ্য কার্মুকে
মদ্ররাজরথং ক্রুদ্ধৌ ছাদয়ামাসতুঃ ক্ষণাৎ
79.48
স চ্ছাদ্যমানো বহুভিঃ শরৈঃ সংনতপর্বভিঃ
স্বস্রীয়াভ্যাং নরব্যাঘ্রো নাকম্পত যথাচলঃ
প্রহসন্নিব তাং চাপি শরবৃষ্টিং জঘান হ
79.49
সহদেবস্ততঃ ক্রুদ্ধঃ শরমুদ্যম্য বীর্যবান্
মদ্ররাজমভিপ্রেক্ষ্য প্রেষয়ামাস ভারত
79.50
স শরঃ প্রেষিতস্তেন গরুত্মানিব বেগবান্
মদ্ররাজং বিনির্ভিদ্য নিপপাত মহীতলে
79.51
স গাঢবিদ্ধো ব্যথিতো রথোপস্থে মহারথঃ
নিষসাদ মহারাজ কশ্মলং চ জগাম হ
79.52
তং বিসংজ্ঞং নিপতিতং সূতঃ সংপ্রেক্ষ্য সংয়ুগে
অপোবাহ রথেনাজৌ যমাভ্যামভিপীডিতম্
79.53
দৃষ্ট্বা মদ্রেশ্বররথং ধার্তরাষ্ট্রাঃ পরাঙ্মুখম্
সর্বে বিমনসো ভূত্বা নেদমস্তীত্যচিন্তয়ন্
79.54
নির্জিত্য মাতুলং সংখ্যে মাদ্রীপুত্রৌ মহারথৌ
দধ্মতুর্মুদিতৌ শঙ্খৌ সিংহনাদং বিনেদতুঃ
79.55
অভিদুদ্রুবতুর্হৃষ্টৌ তব সৈন্যং বিশাং পতে
যথা দৈত্যচমূং রাজন্নিন্দ্রোপেন্দ্রাবিবামরৌ