Utshovঅধ্যায় 78
78.1
সংজয় উবাচ
তথা প্রবৃত্তে সংগ্রামে নিবৃত্তে চ সুশর্মণি
প্রভগ্নেষু চ বীরেষু পাণ্ডবেন মহাত্মনা
78.2
ক্ষুভ্যমাণে বলে তূর্ণং সাগরপ্রতিমে তব
প্রত্যুদ্যাতে চ গাঙ্গেয়ে ত্বরিতং বিজয়ং প্রতি
78.3
দৃষ্ট্বা দুর্যোধনো রাজন্রণে পার্থস্য বিক্রমম্
ত্বরমাণঃ সমভ্যেত্য সর্বাংস্তানব্রবীন্নৃপান্
78.4
তেষাং চ প্রমুখে শূরং সুশর্মাণং মহাবলম্
মধ্যে সর্বস্য সৈন্যস্য ভৃশং সংহর্ষয়ন্বচঃ
78.5
এষ ভীষ্মঃ শাংতনবো যোদ্ধুকামো ধনংজয়ম্
সর্বাত্মনা কুরুশ্রেষ্ঠস্ত্যক্ত্বা জীবিতমাত্মনঃ
78.6
তং প্রয়ান্তং পরানীকং সর্বসৈন্যেন ভারতম্
সংয়ত্তাঃ সমরে সর্বে পালয়ধ্বং পিতামহম্
78.7
বাঢমিত্যেবমুক্ত্বা তু তান্যনীকানি সর্বশঃ
নরেন্দ্রাণাং মহারাজ সমাজগ্মুঃ পিতামহম্
78.8
ততঃ প্রয়াতঃ সহসা ভীষ্মঃ শাংতনবোঽর্জুনম্
রণে ভারতমায়ান্তমাসসাদ মহাবলম্
78.9
মহাশ্বেতাশ্বয়ুক্তেন ভীমবানরকেতুনা
মহতা মেঘনাদেন রথেনাতি বিরাজত
78.10
সমরে সর্বসৈন্যানামুপয়াতং ধনংজয়ম্
অভবত্তুমুলো নাদো ভয়াদ্দৃষ্ট্বা কিরীটিনম্
78.11
অভীশুহস্তং কৃষ্ণং চ দৃষ্ট্বাদিত্যমিবাপরম্
মধ্যংদিনগতং সংখ্যে ন শেকুঃ প্রতিবীক্ষিতুম্
78.12
তথা শাংতনবং ভীষ্মং শ্বেতাশ্বং শ্বেতকার্মুকম্
ন শেকুঃ পাণ্ডবা দ্রষ্টুং শ্বেতগ্রহমিবোদিতম্
78.13
স সর্বতঃ পরিবৃতস্ত্রিগর্তৈঃ সুমহাত্মভিঃ
ভ্রাতৃভিস্তব পুত্রৈশ্চ তথান্যৈশ্চ মহারথৈঃ
78.14
ভারদ্বাজস্তু সমরে মত্স্যং বিব্যাধ পত্রিণা
ধ্বজং চাস্য শরেণাজৌ ধনুশ্চৈকেন চিচ্ছিদে
78.15
তদপাস্য ধনুশ্ছিন্নং বিরাটো বাহিনীপতিঃ
অন্যদাদত্ত বেগেন ধনুর্ভারসহং দৃঢম্
শরাংশ্চাশীবিষাকারাঞ্জ্বলিতান্পন্নগানিব
78.16
দ্রোণং ত্রিভিঃ প্রবিব্যাধ চতুর্ভিশ্চাস্য বাজিনঃ
ধ্বজমেকেন বিব্যাধ সারথিং চাস্য পঞ্চভিঃ
ধনুরেকেষুণাবিধ্যত্তত্রাক্রুধ্যদ্দ্বিজর্ষভঃ
78.17
তস্য দ্রোণোঽবধীদশ্বাঞ্শরৈঃ সংনতপর্বভিঃ
অষ্টাভির্ভরতশ্রেষ্ঠ সূতমেকেন পত্রিণা
78.18
স হতাশ্বাদবপ্লুত্য স্যন্দনাদ্ধতসারথিঃ
আরুরোহ রথং তূর্ণং শঙ্খস্য রথিনাং বরঃ
78.19
ততস্তু তৌ পিতাপুত্রৌ ভারদ্বাজং রথে স্থিতৌ
মহতা শরবর্ষেণ বারয়ামাসতুর্বলাৎ
78.20
ভারদ্বাজস্ততঃ ক্রুদ্ধঃ শরমাশীবিষোপমম্
চিক্ষেপ সমরে তূর্ণং শঙ্খং প্রতি জনেশ্বর
78.21
স তস্য হৃদয়ং ভিত্ত্বা পীত্বা শোণিতমাহবে
জগাম ধরণিং বাণো লোহিতার্দ্রীকৃতচ্ছবিঃ
78.22
স পপাত রথাত্তূর্ণং ভারদ্বাজশরাহতঃ
ধনুস্ত্যক্ত্বা শরাংশ্চৈব পিতুরেব সমীপতঃ
78.23
হতং স্বমাত্মজং দৃষ্ট্বা বিরাটঃ প্রাদ্রবদ্ভয়াৎ
উত্সৃজ্য সমরে দ্রোণং ব্যাত্তাননমিবান্তকম্
78.24
ভারদ্বাজস্ততস্তূর্ণং পাণ্ডবানাং মহাচমূম্
দারয়ামাস সমরে শতশোঽথ সহস্রশঃ
78.25
শিখণ্ড্যপি মহারাজ দ্রৌণিমাসাদ্য সংয়ুগে
আজঘান ভ্রুবোর্মধ্যে নারাচৈস্ত্রিভিরাশুগৈঃ
78.26
স বভৌ নরশার্দূলো ললাটে সংস্থিতৈস্ত্রিভিঃ
শিখরৈঃ কাঞ্চনময়ৈর্মেরুস্ত্রিভিরিবোচ্ছ্রিতৈঃ
78.27
অশ্বত্থামা ততঃ ক্রুদ্ধো নিমেষার্ধাচ্ছিখণ্ডিনঃ
সূতং ধ্বজমথো রাজংস্তুরগানায়ুধং তথা
শরৈর্বহুভিরুদ্দিশ্য পাতয়ামাস সংয়ুগে
78.28
স হতাশ্বাদবপ্লুত্য রথাদ্বৈ রথিনাং বরঃ
খড্গমাদায় নিশিতং বিমলং চ শরাবরম্
শ্যেনবদ্ব্যচরত্ক্রুদ্ধঃ শিখণ্ডী শত্রুতাপনঃ
78.29
সখড্গস্য মহারাজ চরতস্তস্য সংয়ুগে
নান্তরং দদৃশে দ্রৌণিস্তদদ্ভুতমিবাভবৎ
78.30
ততঃ শরসহস্রাণি বহূনি ভরতর্ষভ
প্রেষয়ামাস সমরে দ্রৌণিঃ পরমকোপনঃ
78.31
তামাপতন্তীং সমরে শরবৃষ্টিং সুদারুণাম্
অসিনা তীক্ষ্ণধারেণ চিচ্ছেদ বলিনাং বরঃ
78.32
ততোঽস্য বিমলং দ্রৌণিঃ শতচন্দ্রং মনোরমম্
চর্মাচ্ছিনদসিং চাস্য খণ্ডয়ামাস সংয়ুগে
শিতৈঃ সুবহুশো রাজংস্তং চ বিব্যাধ পত্রিভিঃ
78.33
শিখণ্ডী তু ততঃ খড্গং খণ্ডিতং তেন সায়কৈঃ
আবিধ্য ব্যসৃজত্তূর্ণং জ্বলন্তমিব পন্নগম্
78.34
তমাপতন্তং সহসা কালানলসমপ্রভম্
চিচ্ছেদ সমরে দ্রৌণির্দর্শয়ন্পাণিলাঘবম্
শিখণ্ডিনং চ বিব্যাধ শরৈর্বহুভিরায়সৈঃ
78.35
শিখণ্ডী তু ভৃশং রাজংস্তাড্যমানঃ শিতৈঃ শরৈঃ
আরুরোহ রথং তূর্ণং মাধবস্য মহাত্মনঃ
78.36
সাত্যকিস্তু ততঃ ক্রুদ্ধো রাক্ষসং ক্রূরমাহবে
অলম্বুসং শরৈর্ঘোরৈর্বিব্যাধ বলিনং বলী
78.37
রাক্ষসেন্দ্রস্ততস্তস্য ধনুশ্চিচ্ছেদ ভারত
অর্ধচন্দ্রেণ সমরে তং চ বিব্যাধ সায়কৈঃ
মায়াং চ রাক্ষসীং কৃত্বা শরবর্ষৈরবাকিরৎ
78.38
তত্রাদ্ভুতমপশ্যাম শৈনেয়স্য পরাক্রমম্
নাসংভ্রমদ্যত্সমরে বধ্যমানঃ শিতৈঃ শরৈঃ
78.39
ঐন্দ্রমস্ত্রং চ বার্ষ্ণেয়ো যোজয়ামাস ভারত
বিজয়াদ্যদনুপ্রাপ্তং মাধবেন যশস্বিনা
78.40
তদস্ত্রং ভস্মসাত্কৃত্বা মায়াং তাং রাক্ষসীং তদা
অলম্বুসং শরৈর্ঘোরৈরভ্যাকিরত সর্বশঃ
পর্বতং বারিধারাভিঃ প্রাবৃষীব বলাহকঃ
78.41
তত্তথা পীডিতং তেন মাধবেন মহাত্মনা
প্রদুদ্রাব ভয়াদ্রক্ষো হিত্বা সাত্যকিমাহবে
78.42
তমজেয়ং রাক্ষসেন্দ্রং সংখ্যে মঘবতা অপি
শৈনেয়ঃ প্রাণদজ্জিত্বা যোধানাং তব পশ্যতাম্
78.43
ন্যহনত্তাবকাংশ্চাপি সাত্যকিঃ সত্যবিক্রমঃ
নিশিতৈর্বহুভির্বাণৈস্তেঽদ্রবন্ত ভয়ার্দিতাঃ
78.44
এতস্মিন্নেব কালে তু দ্রুপদস্যাত্মজো বলী
ধৃষ্টদ্যুম্নো মহারাজ তব পুত্রং জনেশ্বরম্
ছাদয়ামাস সমরে শরৈঃ সংনতপর্বভিঃ
78.45
সংছাদ্যমানো বিশিখৈর্ধৃষ্টদ্যুম্নেন ভারত
বিব্যথে ন চ রাজেন্দ্র তব পুত্রো জনেশ্বরঃ
78.46
ধৃষ্টদ্যুম্নং চ সমরে তূর্ণং বিব্যাধ সায়কৈঃ
ষষ্ট্যা চ ত্রিংশতা চৈব তদদ্ভুতমিবাভবৎ
78.47
তস্য সেনাপতিঃ ক্রুদ্ধো ধনুশ্চিচ্ছেদ মারিষ
হয়াংশ্চ চতুরঃ শীঘ্রং নিজঘান মহারথঃ
শরৈশ্চৈনং সুনিশিতৈঃ ক্ষিপ্রং বিব্যাধ সপ্তভিঃ
78.48
স হতাশ্বান্মহাবাহুরবপ্লুত্য রথাদ্বলী
পদাতিরসিমুদ্যম্য প্রাদ্রবত্পার্ষতং প্রতি
78.49
শকুনিস্তং সমভ্যেত্য রাজগৃদ্ধী মহাবলঃ
রাজানং সর্বলোকস্য রথমারোপয়ত্স্বকম্
78.50
ততো নৃপং পরাজিত্য পার্ষতঃ পরবীরহা
ন্যহনত্তাবকং সৈন্যং বজ্রপাণিরিবাসুরম্
78.51
কৃতবর্মা রণে ভীমং শরৈরার্ছন্মহারথম্
প্রচ্ছাদয়ামাস চ তং মহামেঘো রবিং যথা
78.52
ততঃ প্রহস্য সমরে ভীমসেনঃ পরংতপঃ
প্রেষয়ামাস সংক্রুদ্ধঃ সায়কান্কৃতবর্মণে
78.53
তৈরর্দ্যমানোঽতিরথঃ সাত্বতঃ শস্ত্রকোবিদঃ
নাকম্পত মহারাজ ভীমং চার্ছচ্ছিতৈঃ শরৈঃ
78.54
তস্যাশ্বাংশ্চতুরো হত্বা ভীমসেনো মহাবলঃ
সারথিং পাতয়ামাস ধ্বজং চ সুপরিষ্কৃতম্
78.55
শরৈর্বহুবিধৈশ্চৈনমাচিনোত্পরবীরহা
শকলীকৃতসর্বাঙ্গঃ শ্বাবিদ্বত্সমদৃশ্যত
78.56
হতাশ্বাত্তু রথাত্তূর্ণং বৃষকস্য রথং যয়ৌ
স্যালস্য তে মহারাজ তব পুত্রস্য পশ্যতঃ
78.57
ভীমসেনোঽপি সংক্রুদ্ধস্তব সৈন্যমুপাদ্রবৎ
নিজঘান চ সংক্রুদ্ধো দণ্ডপাণিরিবান্তকঃ