Utshovঅধ্যায় 77
77.1
সংজয় উবাচ
অথাত্মজং তব পুনর্গাঙ্গেয়ো ধ্যানমাস্থিতম্
অব্রবীদ্ভরতশ্রেষ্ঠঃ সংপ্রহর্ষকরং বচঃ
77.2
অহং দ্রোণশ্চ শল্যশ্চ কৃতবর্মা চ সাত্বতঃ
অশ্বত্থামা বিকর্ণশ্চ সোমদত্তোঽথ সৈন্ধবঃ
77.3
বিন্দানুবিন্দাবাবন্ত্যৌ বাহ্লিকঃ সহ বাহ্লিকৈঃ
ত্রিগর্তরাজশ্চ বলী মাগধশ্চ সুদুর্জয়ঃ
77.4
বৃহদ্বলশ্চ কৌসল্যশ্চিত্রসেনো বিবিংশতিঃ
রথাশ্চ বহুসাহস্রাঃ শোভমানা মহাধ্বজাঃ
77.5
দেশজাশ্চ হয়া রাজন্স্বারূঢা হয়সাদিভিঃ
গজেন্দ্রাশ্চ মদোদ্বৃত্তাঃ প্রভিন্নকরটামুখাঃ
77.6
পদাতাশ্চ তথা শূরা নানাপ্রহরণায়ুধাঃ
নানাদেশসমুত্পন্নাস্ত্বদর্থে যোদ্ধুমুদ্যতাঃ
77.7
এতে চান্যে চ বহবস্ত্বদর্থে ত্যক্তজীবিতাঃ
দেবানপি রণে জেতুং সমর্থা ইতি মে মতিঃ
77.8
অবশ্যং তু ময়া রাজংস্তব বাচ্যং হিতং সদা
অশক্যাঃ পাণ্ডবা জেতুং দেবৈরপি সবাসবৈঃ
বাসুদেবসহায়াশ্চ মহেন্দ্রসমবিক্রমাঃ
77.9
সর্বথাহং তু রাজেন্দ্র করিষ্যে বচনং তব
পাণ্ডবান্বা রণে জেষ্যে মাং বা জেষ্যন্তি পাণ্ডবাঃ
77.10
এবমুক্ত্বা দদৌ চাস্মৈ বিশল্যকরণীং শুভাম্
ওষধীং বীর্যসংপন্নাং বিশল্যশ্চাভবত্তদা
77.11
ততঃ প্রভাতে বিমলে স্বেনানীকেন বীর্যবান্
অব্যূহত স্বয়ং ব্যূহং ভীষ্মো ব্যূহবিশারদঃ
77.12
মণ্ডলং মনুজশ্রেষ্ঠ নানাশস্ত্রসমাকুলম্
সংপূর্ণং যোধমুখ্যৈশ্চ তথা দন্তিপদাতিভিঃ
77.13
রথৈরনেকসাহস্রৈঃ সমন্তাত্পরিবারিতম্
অশ্ববৃন্দৈর্মহদ্ভিশ্চ ঋষ্টিতোমরধারিভিঃ
77.14
নাগে নাগে রথাঃ সপ্ত সপ্ত চাশ্বা রথে রথে
অন্বশ্বং দশ ধানুষ্কা ধানুষ্কে সপ্ত চর্মিণঃ
77.15
এবংব্যূহং মহারাজ তব সৈন্যং মহারথৈঃ
স্থিতং রণায় মহতে ভীষ্মেণ যুধি পালিতম্
77.16
দশাশ্বানাং সহস্রাণি দন্তিনাং চ তথৈব চ
রথানাময়ুতং চাপি পুত্রাশ্চ তব দংশিতাঃ
চিত্রসেনাদয়ঃ শূরা অভ্যরক্ষন্পিতামহম্
77.17
রক্ষ্যমাণশ্চ তৈঃ শূরৈর্গোপ্যমানাশ্চ তেন তে
সংনদ্ধাঃ সমদৃশ্যন্ত রাজানশ্চ মহাবলাঃ
77.18
দুর্যোধনস্তু সমরে দংশিতো রথমাস্থিতঃ
ব্যভ্রাজত শ্রিয়া জুষ্টো যথা শক্রস্ত্রিবিষ্টপে
77.19
ততঃ শব্দো মহানাসীত্পুত্রাণাং তব ভারত
রথঘোষশ্চ তুমুলো বাদিত্রাণাং চ নিস্বনঃ
77.20
ভীষ্মেণ ধার্তরাষ্ট্রাণাং ব্যূঢঃ প্রত্যঙ্মুখো যুধি
মণ্ডলঃ সুমহাব্যূহো দুর্ভেদ্যোঽমিত্রঘাতিনাম্
সর্বতঃ শুশুভে রাজন্রণেঽরীণাং দুরাসদঃ
77.21
মণ্ডলং তু সমালোক্য ব্যূহং পরমদারুণম্
স্বয়ং যুধিষ্ঠিরো রাজা ব্যূহং বজ্রমথাকরোৎ
77.22
তথা ব্যূঢেষ্বনীকেষু যথাস্থানমবস্থিতাঃ
রথিনঃ সাদিনশ্চৈব সিংহনাদমথানদন্
77.23
বিভিত্সবস্ততো ব্যূহং নির্যয়ুর্যুদ্ধকাঙ্ক্ষিণঃ
ইতরেতরতঃ শূরাঃ সহসৈন্যাঃ প্রহারিণঃ
77.24
ভারদ্বাজো যয়ৌ মত্স্যং দ্রৌণিশ্চাপি শিখণ্ডিনম্
স্বয়ং দুর্যোধনো রাজা পার্ষতং সমুপাদ্রবৎ
77.25
নকুলঃ সহদেবশ্চ রাজন্মদ্রেশমীয়তুঃ
বিন্দানুবিন্দাবাবন্ত্যাবিরাবন্তমভিদ্রুতৌ
77.26
সর্বে নৃপাস্তু সমরে ধনংজয়ময়োধয়ন্
ভীমসেনো রণে যত্তো হার্দিক্যং সমবারয়ৎ
77.27
চিত্রসেনং বিকর্ণং চ তথা দুর্মর্ষণং বিভো
আর্জুনিঃ সমরে রাজংস্তব পুত্রানয়োধয়ৎ
77.28
প্রাগ্জ্যোতিষং মহেষ্বাসং হৈডিম্বো রাক্ষসোত্তমঃ
অভিদুদ্রাব বেগেন মত্তো মত্তমিব দ্বিপম্
77.29
অলম্বুসস্ততো রাজন্সাত্যকিং যুদ্ধদুর্মদম্
সসৈন্যং সমরে ক্রুদ্ধো রাক্ষসঃ সমভিদ্রবৎ
77.30
ভূরিশ্রবা রণে যত্তো ধৃষ্টকেতুময়োধয়ৎ
শ্রুতায়ুষং তু রাজানং ধর্মপুত্রো যুধিষ্ঠিরঃ
77.31
চেকিতানস্তু সমরে কৃপমেবান্বয়োধয়ৎ
শেষাঃ প্রতিয়য়ুর্যত্তা ভীমমেব মহারথম্
77.32
ততো রাজসহস্রাণি পরিবব্রুর্ধনংজয়ম্
শক্তিতোমরনারাচগদাপরিঘপাণয়ঃ
77.33
অর্জুনোঽথ ভৃশং ক্রুদ্ধো বার্ষ্ণেয়মিদমব্রবীৎ
পশ্য মাধব সৈন্যানি ধার্তরাষ্ট্রস্য সংয়ুগে
ব্যূঢানি ব্যূহবিদুষা গাঙ্গেয়েন মহাত্মনা
77.34
যুদ্ধাভিকামাঞ্শূরাংশ্চ পশ্য মাধব দংশিতান্
ত্রিগর্তরাজং সহিতং ভ্রাতৃভিঃ পশ্য কেশব
77.35
অদ্যৈতান্পাতয়িষ্যামি পশ্যতস্তে জনার্দন
য ইমে মাং যদুশ্রেষ্ঠ যোদ্ধুকামা রণাজিরে
77.36
এবমুক্ত্বা তু কৌন্তেয়ো ধনুর্জ্যামবমৃজ্য চ
ববর্ষ শরবর্ষাণি নরাধিপগণান্প্রতি
77.37
তেঽপি তং পরমেষ্বাসাঃ শরবর্ষৈরপূরয়ন্
তডাগমিব ধারাভির্যথা প্রাবৃষি তোয়দাঃ
77.38
হাহাকারো মহানাসীত্তব সৈন্যে বিশাং পতে
ছাদ্যমানৌ ভৃশং কৃষ্ণৌ শরৈর্দৃষ্ট্বা মহারণে
77.39
দেবা দেবর্ষয়শ্চৈব গন্ধর্বাশ্চ মহোরগাঃ
বিস্ময়ং পরমং জগ্মুর্দৃষ্ট্বা কৃষ্ণৌ তথাগতৌ
77.40
ততঃ ক্রুদ্ধোঽর্জুনো রাজন্নৈন্দ্রমস্ত্রমুদীরয়ৎ
তত্রাদ্ভুতমপশ্যাম বিজয়স্য পরাক্রমম্
77.41
শস্ত্রবৃষ্টিং পরৈর্মুক্তাং শরৌঘৈর্যদবারয়ৎ
ন চ তত্রাপ্যনির্ভিন্নঃ কশ্চিদাসীদ্বিশাং পতে
77.42
তেষাং রাজসহস্রাণাং হয়ানাং দন্তিনাং তথা
দ্বাভ্যাং ত্রিভিঃ শরৈশ্চান্যান্পার্থো বিব্যাধ মারিষ
77.43
তে হন্যমানাঃ পার্থেন ভীষ্মং শাংতনবং যয়ুঃ
অগাধে মজ্জমানানাং ভীষ্মস্ত্রাতাভবত্তদা
77.44
আপতদ্ভিস্তু তৈস্তত্র প্রভগ্নং তাবকং বলম্
সংচুক্ষুভে মহারাজ বাতৈরিব মহার্ণবঃ