UtshovChapter 77
77.1
संजय उवाच
अथात्मजं तव पुनर्गाङ्गेयो ध्यानमास्थितम्
अब्रवीद्भरतश्रेष्ठः संप्रहर्षकरं वचः
Sanjaya uvacha
Athatmajam tava punargangeyo dhyanamasthitam
Abravidbharatashreshthah sampraharshakaram vachah
77.2
अहं द्रोणश्च शल्यश्च कृतवर्मा च सात्वतः
अश्वत्थामा विकर्णश्च सोमदत्तोऽथ सैन्धवः
Aham dronashcha shalyashcha kritavarma cha satvatah
Ashvatthama vikarnashcha somadattotha saindhavah
77.3
विन्दानुविन्दावावन्त्यौ बाह्लिकः सह बाह्लिकैः
त्रिगर्तराजश्च बली मागधश्च सुदुर्जयः
Vindanuvindavavantyau bahlikah saha bahlikaih
Trigartarajashcha bali magadhashcha sudurjayah
77.4
बृहद्बलश्च कौसल्यश्चित्रसेनो विविंशतिः
रथाश्च बहुसाहस्राः शोभमाना महाध्वजाः
Brihadbalashcha kausalyashchitraseno vivinshatih
Rathashcha bahusahasrah shobhamana mahadhvajah
77.5
देशजाश्च हया राजन्स्वारूढा हयसादिभिः
गजेन्द्राश्च मदोद्वृत्ताः प्रभिन्नकरटामुखाः
Deshajashcha haya rajansvarudha hayasadibhih
Gajendrashcha madodvrittah prabhinnakaratamukhah
77.6
पदाताश्च तथा शूरा नानाप्रहरणायुधाः
नानादेशसमुत्पन्नास्त्वदर्थे योद्धुमुद्यताः
Padatashcha tatha shura nanapraharanayudhah
Nanadeshasamutpannastvadarthe yoddhumudyatah
77.7
एते चान्ये च बहवस्त्वदर्थे त्यक्तजीविताः
देवानपि रणे जेतुं समर्था इति मे मतिः
Ete chanye cha bahavastvadarthe tyaktajivitah
Devanapi rane jetum samartha iti me matih
77.8
अवश्यं तु मया राजंस्तव वाच्यं हितं सदा
अशक्याः पाण्डवा जेतुं देवैरपि सवासवैः
वासुदेवसहायाश्च महेन्द्रसमविक्रमाः
Avashyam tu maya rajanstava vachyam hitam sada
Ashakyah pandava jetum devairapi savasavaih
Vasudevasahayashcha mahendrasamavikramah
77.9
सर्वथाहं तु राजेन्द्र करिष्ये वचनं तव
पाण्डवान्वा रणे जेष्ये मां वा जेष्यन्ति पाण्डवाः
Sarvathaham tu rajendra karishye vachanam tava
Pandavanva rane jeshye mam va jeshyanti pandavah
77.10
एवमुक्त्वा ददौ चास्मै विशल्यकरणीं शुभाम्
ओषधीं वीर्यसंपन्नां विशल्यश्चाभवत्तदा
Evamuktva dadau chasmai vishalyakaranim shubham
Oshadhim viryasampannam vishalyashchabhavattada
77.11
ततः प्रभाते विमले स्वेनानीकेन वीर्यवान्
अव्यूहत स्वयं व्यूहं भीष्मो व्यूहविशारदः
Tatah prabhate vimale svenanikena viryavan
Avyuhata svayam vyuham bhishmo vyuhavisharadah
77.12
मण्डलं मनुजश्रेष्ठ नानाशस्त्रसमाकुलम्
संपूर्णं योधमुख्यैश्च तथा दन्तिपदातिभिः
Mandalam manujashreshtha nanashastrasamakulam
Sampurnam yodhamukhyaishcha tatha dantipadatibhih
77.13
रथैरनेकसाहस्रैः समन्तात्परिवारितम्
अश्ववृन्दैर्महद्भिश्च ऋष्टितोमरधारिभिः
Rathairanekasahasraih samantatparivaritam
Ashvavrindairmahadbhishcha rishtitomaradharibhih
77.14
नागे नागे रथाः सप्त सप्त चाश्वा रथे रथे
अन्वश्वं दश धानुष्का धानुष्के सप्त चर्मिणः
Nage nage rathah sapta sapta chashva rathe rathe
Anvashvam dasha dhanushka dhanushke sapta charminah
77.15
एवंव्यूहं महाराज तव सैन्यं महारथैः
स्थितं रणाय महते भीष्मेण युधि पालितम्
Evanvyuham maharaja tava sainyam maharathaih
Sthitam ranaya mahate bhishmena yudhi palitam
77.16
दशाश्वानां सहस्राणि दन्तिनां च तथैव च
रथानामयुतं चापि पुत्राश्च तव दंशिताः
चित्रसेनादयः शूरा अभ्यरक्षन्पितामहम्
Dashashvanam sahasrani dantinam cha tathaiva cha
Rathanamayutam chapi putrashcha tava danshitah
Chitrasenadayah shura abhyarakshanpitamaham
77.17
रक्ष्यमाणश्च तैः शूरैर्गोप्यमानाश्च तेन ते
संनद्धाः समदृश्यन्त राजानश्च महाबलाः
Rakshyamanashcha taih shurairgopyamanashcha tena te
Sannaddhah samadrishyanta rajanashcha mahabalah
77.18
दुर्योधनस्तु समरे दंशितो रथमास्थितः
व्यभ्राजत श्रिया जुष्टो यथा शक्रस्त्रिविष्टपे
Duryodhanastu samare danshito rathamasthitah
Vyabhrajata shriya jushto yatha shakrastrivishtape
77.19
ततः शब्दो महानासीत्पुत्राणां तव भारत
रथघोषश्च तुमुलो वादित्राणां च निस्वनः
Tatah shabdo mahanasitputranam tava bharata
Rathaghoshashcha tumulo vaditranam cha nisvanah
77.20
भीष्मेण धार्तराष्ट्राणां व्यूढः प्रत्यङ्मुखो युधि
मण्डलः सुमहाव्यूहो दुर्भेद्योऽमित्रघातिनाम्
सर्वतः शुशुभे राजन्रणेऽरीणां दुरासदः
Bhishmena dhartarashtranam vyudhah pratyanmukho yudhi
Mandalah sumahavyuho durbhedyomitraghatinam
Sarvatah shushubhe rajanranerinam durasadah
77.21
मण्डलं तु समालोक्य व्यूहं परमदारुणम्
स्वयं युधिष्ठिरो राजा व्यूहं वज्रमथाकरोत्
Mandalam tu samalokya vyuham paramadarunam
Svayam yudhishthiro raja vyuham vajramathakarot
77.22
तथा व्यूढेष्वनीकेषु यथास्थानमवस्थिताः
रथिनः सादिनश्चैव सिंहनादमथानदन्
Tatha vyudheshvanikeshu yathasthanamavasthitah
Rathinah sadinashchaiva sinhanadamathanadan
77.23
बिभित्सवस्ततो व्यूहं निर्ययुर्युद्धकाङ्क्षिणः
इतरेतरतः शूराः सहसैन्याः प्रहारिणः
Bibhitsavastato vyuham niryayuryuddhakankshinah
Itaretaratah shurah sahasainyah praharinah
77.24
भारद्वाजो ययौ मत्स्यं द्रौणिश्चापि शिखण्डिनम्
स्वयं दुर्योधनो राजा पार्षतं समुपाद्रवत्
Bharadvajo yayau matsyam draunishchapi shikhandinam
Svayam duryodhano raja parshatam samupadravat
77.25
नकुलः सहदेवश्च राजन्मद्रेशमीयतुः
विन्दानुविन्दावावन्त्याविरावन्तमभिद्रुतौ
Nakulah sahadevashcha rajanmadreshamiyatuh
Vindanuvindavavantyaviravantamabhidrutau
77.26
सर्वे नृपास्तु समरे धनंजयमयोधयन्
भीमसेनो रणे यत्तो हार्दिक्यं समवारयत्
Sarve nripastu samare dhananjayamayodhayan
Bhimaseno rane yatto hardikyam samavarayat
77.27
चित्रसेनं विकर्णं च तथा दुर्मर्षणं विभो
आर्जुनिः समरे राजंस्तव पुत्रानयोधयत्
Chitrasenam vikarnam cha tatha durmarshanam vibho
Arjunih samare rajanstava putranayodhayat
77.28
प्राग्ज्योतिषं महेष्वासं हैडिम्बो राक्षसोत्तमः
अभिदुद्राव वेगेन मत्तो मत्तमिव द्विपम्
Pragjyotisham maheshvasam haidimbo rakshasottamah
Abhidudrava vegena matto mattamiva dvipam
77.29
अलम्बुसस्ततो राजन्सात्यकिं युद्धदुर्मदम्
ससैन्यं समरे क्रुद्धो राक्षसः समभिद्रवत्
Alambusastato rajansatyakim yuddhadurmadam
Sasainyam samare kruddho rakshasah samabhidravat
77.30
भूरिश्रवा रणे यत्तो धृष्टकेतुमयोधयत्
श्रुतायुषं तु राजानं धर्मपुत्रो युधिष्ठिरः
Bhurishrava rane yatto dhrishtaketumayodhayat
Shrutayusham tu rajanam dharmaputro yudhishthirah
77.31
चेकितानस्तु समरे कृपमेवान्वयोधयत्
शेषाः प्रतिययुर्यत्ता भीममेव महारथम्
Chekitanastu samare kripamevanvayodhayat
Sheshah pratiyayuryatta bhimameva maharatham
77.32
ततो राजसहस्राणि परिवव्रुर्धनंजयम्
शक्तितोमरनाराचगदापरिघपाणयः
Tato rajasahasrani parivavrurdhananjayam
Shaktitomaranarachagadaparighapanayah
77.33
अर्जुनोऽथ भृशं क्रुद्धो वार्ष्णेयमिदमब्रवीत्
पश्य माधव सैन्यानि धार्तराष्ट्रस्य संयुगे
व्यूढानि व्यूहविदुषा गाङ्गेयेन महात्मना
Arjunotha bhrisham kruddho varshneyamidamabravit
Pashya madhava sainyani dhartarashtrasya sanyuge
Vyudhani vyuhavidusha gangeyena mahatmana
77.34
युद्धाभिकामाञ्शूरांश्च पश्य माधव दंशितान्
त्रिगर्तराजं सहितं भ्रातृभिः पश्य केशव
Yuddhabhikamanshuranshcha pashya madhava danshitan
Trigartarajam sahitam bhratribhih pashya keshava
77.35
अद्यैतान्पातयिष्यामि पश्यतस्ते जनार्दन
य इमे मां यदुश्रेष्ठ योद्धुकामा रणाजिरे
Adyaitanpatayishyami pashyataste janardana
Ya ime mam yadushreshtha yoddhukama ranajire
77.36
एवमुक्त्वा तु कौन्तेयो धनुर्ज्यामवमृज्य च
ववर्ष शरवर्षाणि नराधिपगणान्प्रति
Evamuktva tu kaunteyo dhanurjyamavamrijya cha
Vavarsha sharavarshani naradhipagananprati
77.37
तेऽपि तं परमेष्वासाः शरवर्षैरपूरयन्
तडागमिव धाराभिर्यथा प्रावृषि तोयदाः
Tepi tam parameshvasah sharavarshairapurayan
Tadagamiva dharabhiryatha pravrishi toyadah
77.38
हाहाकारो महानासीत्तव सैन्ये विशां पते
छाद्यमानौ भृशं कृष्णौ शरैर्दृष्ट्वा महारणे
Hahakaro mahanasittava sainye visham pate
Chhadyamanau bhrisham krishnau sharairdrishtva maharane
77.39
देवा देवर्षयश्चैव गन्धर्वाश्च महोरगाः
विस्मयं परमं जग्मुर्दृष्ट्वा कृष्णौ तथागतौ
Deva devarshayashchaiva gandharvashcha mahoragah
Vismayam paramam jagmurdrishtva krishnau tathagatau
77.40
ततः क्रुद्धोऽर्जुनो राजन्नैन्द्रमस्त्रमुदीरयत्
तत्राद्भुतमपश्याम विजयस्य पराक्रमम्
Tatah kruddhorjuno rajannaindramastramudirayat
Tatradbhutamapashyama vijayasya parakramam
77.41
शस्त्रवृष्टिं परैर्मुक्तां शरौघैर्यदवारयत्
न च तत्राप्यनिर्भिन्नः कश्चिदासीद्विशां पते
Shastravrishtim parairmuktam sharaughairyadavarayat
Na cha tatrapyanirbhinnah kashchidasidvisham pate
77.42
तेषां राजसहस्राणां हयानां दन्तिनां तथा
द्वाभ्यां त्रिभिः शरैश्चान्यान्पार्थो विव्याध मारिष
Tesham rajasahasranam hayanam dantinam tatha
Dvabhyam tribhih sharaishchanyanpartho vivyadha marisha
77.43
ते हन्यमानाः पार्थेन भीष्मं शांतनवं ययुः
अगाधे मज्जमानानां भीष्मस्त्राताभवत्तदा
Te hanyamanah parthena bhishmam shantanavam yayuh
Agadhe majjamananam bhishmastratabhavattada
77.44
आपतद्भिस्तु तैस्तत्र प्रभग्नं तावकं बलम्
संचुक्षुभे महाराज वातैरिव महार्णवः
Apatadbhistu taistatra prabhagnam tavakam balam
Sanchukshubhe maharaja vatairiva maharnavah