অধ্যায় 76

76.1

সংজয় উবাচ
অথ শূরা মহারাজ পরস্পরকৃতাগসঃ
জগ্মুঃ স্বশিবিরাণ্যেব রুধিরেণ সমুক্ষিতাঃ

বিশ্রম্য চ যথান্যায়ং পূজয়িত্বা পরস্পরম্
সংনদ্ধাঃ সমদৃশ্যন্ত ভূয়ো যুদ্ধচিকীর্ষয়া

ততস্তব সুতো রাজংশ্চিন্তয়াভিপরিপ্লুতঃ
বিস্রবচ্ছোণিতাক্তাঙ্গঃ পপ্রচ্ছেদং পিতামহম্

সৈন্যানি রৌদ্রাণি ভয়ানকানি; ব্যূঢানি সম্যগ্বহুলধ্বজানি
বিদার্য হত্বা চ নিপীড্য শূরা;স্তে পাণ্ডবানাং ত্বরিতা রথৌঘাঃ

সংমোহ্য সর্বান্যুধি কীর্তিমন্তো; ব্যূহং চ তং মকরং বজ্রকল্পম্
প্রবিশ্য ভীমেন নিবর্হিতোঽস্মি; ঘোরৈঃ শরৈর্মৃত্যুদণ্ডপ্রকাশৈঃ

ক্রুদ্ধং তমুদ্বীক্ষ্য ভয়েন রাজ;ন্সংমূর্ছিতো নালভং শান্তিমদ্য
ইচ্ছে প্রসাদাত্তব সত্যসংধ; প্রাপ্তুং জয়ং পাণ্ডবেয়াংশ্চ হন্তুম্

তেনৈবমুক্তঃ প্রহসন্মহাত্মা; দুর্যোধনং জাতমন্যুং বিদিত্বা
তং প্রত্যুবাচাবিমনা মনস্বী; গঙ্গাসুতঃ শস্ত্রভৃতাং বরিষ্ঠঃ

পরেণ যত্নেন বিগাহ্য সেনাং; সর্বাত্মনাহং তব রাজপুত্র
ইচ্ছামি দাতুং বিজয়ং সুখং চ; ন চাত্মানং ছাদয়েঽহং ত্বদর্থে

এতে তু রৌদ্রা বহবো মহারথা; যশস্বিনঃ শূরতমাঃ কৃতাস্ত্রাঃ
যে পাণ্ডবানাং সমরে সহায়া; জিতক্লমাঃ ক্রোধবিষং বমন্তি

তে নেহ শক্যাঃ সহসা বিজেতুং; বীর্যোন্নদ্ধাঃ কৃতবৈরাস্ত্বয়া চ
অহং হ্যেতান্প্রতিয়োত্স্যামি রাজ;ন্সর্বাত্মনা জীবিতং ত্যজ্য বীর

রণে তবার্থায় মহানুভাব; ন জীবিতং রক্ষ্যতমং মমাদ্য
সর্বাংস্তবার্থায় সদেবদৈত্যাঁ;ল্লোকান্দহেয়ং কিমু শত্রূংস্তবেহ

তত্পাণ্ডবান্যোধয়িষ্যামি রাজ;ন্প্রিয়ং চ তে সর্বমহং করিষ্যে
শ্রুত্বৈব চৈতত্পরমপ্রতীতো; দুর্যোধনঃ প্রীতমনা বভূব

সর্বাণি সৈন্যানি ততঃ প্রহৃষ্টো; নির্গচ্ছতেত্যাহ নৃপাংশ্চ সর্বান্
তদাজ্ঞয়া তানি বিনির্যয়ুর্দ্রুতং; রথাশ্বপাদাতগজায়ুতানি

প্রহর্ষয়ুক্তানি তু তানি রাজ;ন্মহান্তি নানাবিধশস্ত্রবন্তি
স্থিতানি নাগাশ্বপদাতিমন্তি; বিরেজুরাজৌ তব রাজন্বলানি

বৃন্দৈঃ স্থিতাশ্চাপি সুসংপ্রয়ুক্তা;শ্চকাশিরে দন্তিগণাঃ সমন্তাৎ
শস্ত্রাস্ত্রবিদ্ভির্নরদেব যোধৈ;রধিষ্ঠিতাঃ সৈন্যগণাস্ত্বদীয়াঃ

রথৈশ্চ পাদাতগজাশ্বসংঘৈঃ; প্রয়াদ্ভিরাজৌ বিধিবত্প্রণুন্নৈঃ
সমুদ্ধতং বৈ তরুণার্কবর্ণং; রজো বভৌ ছাদয়ত্সূর্যরশ্মীন্

রেজুঃ পতাকা রথদন্তিসংস্থা; বাতেরিতা ভ্রাম্যমাণাঃ সমন্তাৎ
নানারঙ্গাঃ সমরে তত্র রাজ;ন্মেঘৈর্যুক্তা বিদ্যুতঃ খে যথৈব

ধনূংষি বিস্ফারয়তাং নৃপাণাং; বভূব শব্দস্তুমুলোঽতিঘোরঃ
বিমথ্যতো দেবমহাসুরৌঘৈ;র্যথার্ণবস্যাদিয়ুগে তদানীম্

তদুগ্রনাদং বহুরূপবর্ণং; তবাত্মজানাং সমুদীর্ণমেবম্
বভূব সৈন্যং রিপুসৈন্যহন্তৃ; যুগান্তমেঘৌঘনিভং তদানীম্