Utshovঅধ্যায় 75
75.1
সংজয় উবাচ
ততো দুর্যোধনো রাজা লোহিতায়তি ভাস্করে
সংগ্রামরভসো ভীমং হন্তুকামোঽভ্যধাবত
75.2
তমায়ান্তমভিপ্রেক্ষ্য নৃবীরং দৃঢবৈরিণম্
ভীমসেনঃ সুসংক্রুদ্ধ ইদং বচনমব্রবীৎ
75.3
অয়ং স কালঃ সংপ্রাপ্তো বর্ষপূগাভিকাঙ্ক্ষিতঃ
অদ্য ত্বাং নিহনিষ্যামি যদি নোত্সৃজসে রণম্
75.4
অদ্য কুন্ত্যাঃ পরিক্লেশং বনবাসং চ কৃত্স্নশঃ
দ্রৌপদ্যাশ্চ পরিক্লেশং প্রণোত্স্যামি হতে ত্বয়ি
75.5
যত্ত্বং দুরোদরো ভূত্বা পাণ্ডবানবমন্যসে
তস্য পাপস্য গান্ধারে পশ্য ব্যসনমাগতম্
75.6
কর্ণস্য মতমাজ্ঞায় সৌবলস্য চ যত্পুরা
অচিন্ত্য পাণ্ডবান্কামাদ্যথেষ্টং কৃতবানসি
75.7
যাচমানং চ যন্মোহাদ্দাশার্হমবমন্যসে
উলূকস্য সমাদেশং যদ্দদাসি চ হৃষ্টবৎ
75.8
অদ্য ত্বা নিহনিষ্যামি সানুবন্ধং সবান্ধবম্
সমীকরিষ্যে তত্পাপং যত্পুরা কৃতবানসি
75.9
এবমুক্ত্বা ধনুর্ঘোরং বিকৃষ্যোদ্ভ্রাম্য চাসকৃৎ
সমাদায় শরান্ঘোরান্মহাশনিসমপ্রভান্
75.10
ষড্বিংশত্তরসা ক্রুদ্ধো মুমোচাশু সুয়োধনে
জ্বলিতাগ্নিশিখাকারান্বজ্রকল্পানজিহ্মগান্
75.11
ততোঽস্য কার্মুকং দ্বাভ্যাং সূতং দ্বাভ্যাং চ বিব্যধে
চতুর্ভিরশ্বাঞ্জবনাননয়দ্যমসাদনম্
75.12
দ্বাভ্যাং চ সুবিকৃষ্টাভ্যাং শরাভ্যামরিমর্দনঃ
ছত্রং চিচ্ছেদ সমরে রাজ্ঞস্তস্য রথোত্তমাৎ
75.13
ত্রিভিশ্চ তস্য চিচ্ছেদ জ্বলন্তং ধ্বজমুত্তমম্
ছিত্ত্বা তং চ ননাদোচ্চৈস্তব পুত্রস্য পশ্যতঃ
75.14
রথাচ্চ স ধ্বজঃ শ্রীমান্নানারত্নবিভূষিতঃ
পপাত সহসা ভূমিং বিদ্যুজ্জলধরাদিব
75.15
জ্বলন্তং সূর্যসংকাশং নাগং মণিময়ং শুভম্
ধ্বজং কুরুপতেশ্ছিন্নং দদৃশুঃ সর্বপার্থিবাঃ
75.16
অথৈনং দশভির্বাণৈস্তোত্ত্রৈরিব মহাগজম্
আজঘান রণে ভীমঃ স্ময়ন্নিব মহারথঃ
75.17
ততস্তু রাজা সিন্ধূনাং রথশ্রেষ্ঠো জয়দ্রথঃ
দুর্যোধনস্য জগ্রাহ পার্ষ্ণিং সত্পুরুষোচিতাম্
75.18
কৃপশ্চ রথিনাং শ্রেষ্ঠঃ কৌরব্যমমিতৌজসম্
আরোপয়দ্রথং রাজন্দুর্যোধনমমর্ষণম্
75.19
স গাঢবিদ্ধো ব্যথিতো ভীমসেনেন সংয়ুগে
নিষসাদ রথোপস্থে রাজা দুর্যোধনস্তদা
75.20
পরিবার্য ততো ভীমং হন্তুকামো জয়দ্রথঃ
রথৈরনেকসাহস্রৈর্ভীমস্যাবারয়দ্দিশঃ
75.21
ধৃষ্টকেতুস্ততো রাজন্নভিমন্যুশ্চ বীর্যবান্
কেকয়া দ্রৌপদেয়াশ্চ তব পুত্রানয়োধয়ন্
75.22
চিত্রসেনঃ সুচিত্রশ্চ চিত্রাশ্বশ্চিত্রদর্শনঃ
চারুচিত্রঃ সুচারুশ্চ তথা নন্দোপনন্দকৌ
75.23
অষ্টাবেতে মহেষ্বাসাঃ সুকুমারা যশস্বিনঃ
অভিমন্যুরথং রাজন্সমন্তাত্পর্যবারয়ন্
75.24
আজঘান ততস্তূর্ণমভিমন্যুর্মহামনাঃ
একৈকং পঞ্চভির্বিদ্ধ্বা শরৈঃ সংনতপর্বভিঃ
বজ্রমৃত্যুপ্রতীকাশৈর্বিচিত্রায়ুধনিঃসৃতৈঃ
75.25
অমৃষ্যমাণাস্তে সর্বে সৌভদ্রং রথসত্তমম্
ববর্ষুর্মার্গণৈস্তীক্ষ্ণৈর্গিরিং মেরুমিবাম্বুদাঃ
75.26
স পীড্যমানঃ সমরে কৃতাস্ত্রো যুদ্ধদুর্মদঃ
অভিমন্যুর্মহারাজ তাবকান্সমকম্পয়ৎ
যথা দেবাসুরে যুদ্ধে বজ্রপাণির্মহাসুরান্
75.27
বিকর্ণস্য ততো ভল্লান্প্রেষয়ামাস ভারত
চতুর্দশ রথশ্রেষ্ঠো ঘোরানাশীবিষোপমান্
ধ্বজং সূতং হয়াংশ্চাস্য ছিত্ত্বা নৃত্যন্নিবাহবে
75.28
পুনশ্চান্যাঞ্শরান্পীতানকুণ্ঠাগ্রাঞ্শিলাশিতান্
প্রেষয়ামাস সৌভদ্রো বিকর্ণায় মহাবলঃ
75.29
তে বিকর্ণং সমাসাদ্য কঙ্কবর্হিণবাসসঃ
ভিত্ত্বা দেহং গতা ভূমিং জ্বলন্ত ইব পন্নগাঃ
75.30
তে শরা হেমপুঙ্খাগ্রা ব্যদৃশ্যন্ত মহীতলে
বিকর্ণরুধিরক্লিন্না বমন্ত ইব শোণিতম্
75.31
বিকর্ণং বীক্ষ্য নির্ভিন্নং তস্যৈবান্যে সহোদরাঃ
অভ্যদ্রবন্ত সমরে সৌভদ্রপ্রমুখান্রথান্
75.32
অভিয়াত্বা তথৈবাশু রথস্থান্সূর্যবর্চসঃ
অবিধ্যন্সমরেঽন্যোন্যং সংরব্ধা যুদ্ধদুর্মদাঃ
75.33
দুর্মুখঃ শ্রুতকর্মাণং বিদ্ধ্বা সপ্তভিরাশুগৈঃ
ধ্বজমেকেন চিচ্ছেদ সারথিং চাস্য সপ্তভিঃ
75.34
অশ্বাঞ্জাম্বূনদৈর্জালৈঃ প্রচ্ছন্নান্বাতরংহসঃ
জঘান ষড্ভিরাসাদ্য সারথিং চাভ্যপাতয়ৎ
75.35
স হতাশ্বে রথে তিষ্ঠঞ্শ্রুতকর্মা মহারথঃ
শক্তিং চিক্ষেপ সংক্রুদ্ধো মহোল্কাং জ্বলিতামিব
75.36
সা দুর্মুখস্য বিপুলং বর্ম ভিত্ত্বা যশস্বিনঃ
বিদার্য প্রাবিশদ্ভূমিং দীপ্যমানা সুতেজনা
75.37
তং দৃষ্ট্বা বিরথং তত্র সুতসোমো মহাবলঃ
পশ্যতাং সর্বসৈন্যানাং রথমারোপয়ত্স্বকম্
75.38
শ্রুতকীর্তিস্তথা বীরো জয়ত্সেনং সুতং তব
অভ্যয়াত্সমরে রাজন্হন্তুকামো যশস্বিনম্
75.39
তস্য বিক্ষিপতশ্চাপং শ্রুতকীর্তের্মহাত্মনঃ
চিচ্ছেদ সমরে রাজঞ্জয়ত্সেনঃ সুতস্তব
ক্ষুরপ্রেণ সুতীক্ষ্ণেন প্রহসন্নিব ভারত
75.40
তং দৃষ্ট্বা ছিন্নধন্বানং শতানীকঃ সহোদরম্
অভ্যপদ্যত তেজস্বী সিংহবদ্বিনদন্মুহুঃ
75.41
শতানীকস্তু সমরে দৃঢং বিস্ফার্য কার্মুকম্
বিব্যাধ দশভিস্তূর্ণং জয়ত্সেনং শিলীমুখৈঃ
75.42
অথান্যেন সুতীক্ষ্ণেন সর্বাবরণভেদিনা
শতানীকো জয়ত্সেনং বিব্যাধ হৃদয়ে ভৃশম্
75.43
তথা তস্মিন্বর্তমানে দুষ্কর্ণো ভ্রাতুরন্তিকে
চিচ্ছেদ সমরে চাপং নাকুলেঃ ক্রোধমূর্ছিতঃ
75.44
অথান্যদ্ধনুরাদায় ভারসাধনমুত্তমম্
সমাদত্ত শিতান্বাণাঞ্শতানীকো মহাবলঃ
75.45
তিষ্ঠ তিষ্ঠেতি চামন্ত্র্য দুষ্কর্ণং ভ্রাতুরগ্রতঃ
মুমোচ নিশিতান্বাণাঞ্জ্বলিতান্পন্নগানিব
75.46
ততোঽস্য ধনুরেকেন দ্বাভ্যাং সূতং চ মারিষ
চিচ্ছেদ সমরে তূর্ণং তং চ বিব্যাধ সপ্তভিঃ
75.47
অশ্বান্মনোজবাংশ্চাস্য কল্মাষান্বীতকল্মষঃ
জঘান নিশিতৈস্তূর্ণং সর্বান্দ্বাদশভিঃ শরৈঃ
75.48
অথাপরেণ ভল্লেন সুমুক্তেন নিপাতিনা
দুষ্কর্ণং সমরে ক্রুদ্ধো বিব্যাধ হৃদয়ে ভৃশম্
75.49
দুষ্কর্ণং নিহতং দৃষ্ট্বা পঞ্চ রাজন্মহারথাঃ
জিঘাংসন্তঃ শতানীকং সর্বতঃ পর্যবারয়ন্
75.50
ছাদ্যমানং শরব্রাতৈঃ শতানীকং যশস্বিনম্
অভ্যধাবন্ত সংরব্ধাঃ কেকয়াঃ পঞ্চ সোদরাঃ
75.51
তানভ্যাপততঃ প্রেক্ষ্য তব পুত্রা মহারথাঃ
প্রত্যুদ্যয়ুর্মহারাজ গজা ইব মহাগজান্
75.52
দুর্মুখো দুর্জয়শ্চৈব তথা দুর্মর্ষণো যুবা
শত্রুংজয়ঃ শত্রুসহঃ সর্বে ক্রুদ্ধা যশস্বিনঃ
প্রত্যুদ্যাতা মহারাজ কেকয়ান্ভ্রাতরঃ সমম্
75.53
রথৈর্নগরসংকাশৈর্হয়ৈর্যুক্তৈর্মনোজবৈঃ
নানাবর্ণবিচিত্রাভিঃ পতাকাভিরলংকৃতৈঃ
75.54
বরচাপধরা বীরা বিচিত্রকবচধ্বজাঃ
বিবিশুস্তে পরং সৈন্যং সিংহা ইব বনাদ্বনম্
75.55
তেষাং সুতুমুলং যুদ্ধং ব্যতিষক্তরথদ্বিপম্
অবর্তত মহারৌদ্রং নিঘ্নতামিতরেতরম্
অন্যোন্যাগস্কৃতাং রাজন্যমরাষ্ট্রবিবর্ধনম্
75.56
মুহূর্তাস্তমিতে সূর্যে চক্রুর্যুদ্ধং সুদারুণম্
রথিনঃ সাদিনশ্চৈব ব্যকীর্যন্ত সহস্রশঃ
75.57
ততঃ শাংতনবঃ ক্রুদ্ধঃ শরৈঃ সংনতপর্বভিঃ
নাশয়ামাস সেনাং বৈ ভীষ্মস্তেষাং মহাত্মনাম্
পাঞ্চালানাং চ সৈন্যানি শরৈর্নিন্যে যমক্ষয়ম্
75.58
এবং ভিত্ত্বা মহেষ্বাসঃ পাণ্ডবানামনীকিনীম্
কৃত্বাবহারং সৈন্যানাং যয়ৌ স্বশিবিরং নৃপ
75.59
ধর্মরাজোঽপি সংপ্রেক্ষ্য ধৃষ্টদ্যুম্নবৃকোদরৌ
মূর্ধ্নি চৈতাবুপাঘ্রায় সংহৃষ্টঃ শিবিরং যয়ৌ